الحلقة(113)
كلامك مش خاش راسي ياسلمى ..وأشر بسبابته ع راسه..مش خاش راسي
سلمى بربكه: هذا هو وخيي هذا اللي صار يعني اني نعرف المراة في الحمل هرموناتها تتلخبط وتولي حساسه بزياده وتبكي من لاشي
طلعت الدكتورة جوها طول ..
الدكتورة: هي وصغارها كويسين اللي صارلها هبوط وركبنالها تغديه ..بس واضح انها متعرضه لإجهاد نفسي ..سليمان شبح لسلمى بحده ..
سلمى بربكه: ممكن يادكتورة بسبب لخبطه الهرمونات..
الدكتورة : تصير حاجه زي هادي ..بس هي واضح نفسيتها تعبانه ..وشبحت لسليمان وبنبرة حاده..المفروض المراة في الحمل يراعوها ويسايروها اللي تحس بيه في هالفترة مش ساهل بكل ..هي ربي يكون معاها ومشت وخلتهم..
سليمان : تفضلي هي ..فهمتي قصدها
سلمى: هي ماتعرفش ماتلومهاش لإن في هلبه رجاله مايراعوش في نساوينهم لما يحملوا ويزيدوهم على مابيهم
سليمان تنهد: لكن اني مش هكي ياسلمى وانتي تعرفي..سلمى أرجوك قوليلي شن صاير..
رن تليفون سلمى وحاسته انقذها من خوها : الو ..ايوه ماما...لالا داخت دوخه عاديه..كويسه ياماما مافي شي..لين اتم شكارة التغديه وتروح ..اطمني الحمد لله حتى هما كويسين ..الحمد لله الحمد لله...هي خلاص ..تمام ماما..هي مع السلامه..
سليمان مسح ع وجهه وبعد من حداها وقعمز بروحه وسلمى عرفت انه غصبت تحاشاته..
بعد كم ساعه كملت التغديه وروحوا بجمانه اللي كانت ساكته وماتبيش تتكلم ..وسليمان قلبه يغلي ..اول ماوصلوا ..
جمانه بصوت تعبان: سلمى..نبي نقعد معاك
سليمان انصدم وقعد ساكت
سلمى تدارك في الموقف: باه حبيبتي هيا تعالي ...ومشت معاها ..وسليمان مش فاهم شي..
...
فتحيه في المطبخ مع بنتها..
فتحيه بقلق: والله عرفتها بيعطوها عين ..
سلمى في خاطرها"بنت أختك وكنتك حسابهم عندي "
...
سليمان مقعمز في ع كراسي الخشب في السانيه ويقرا في القرآن ومربع ايده ومغمض عيونه ومش حاس بالصقع اللي يجمد ..من النار اللي فصدره ..
فات النهار ..وسليمان ماباش يخش داخل بكل ..وجمانه كانت تصلي وتولي ترقد ..ولحسن الحظ سلفاتها ماكانوش موجودات هذاكا اليوم ..
في الليل مع الساعه 1:00
جمانه حست روحها مخنوقه لبست ملايتها لكن مرفعتهاش ع راسها خلتها ع كتافها ولبست ماليه ووشاح غليظ عليه كاب صوف قالت لسلمى تجيبهولها من دارها قبل لترقد..طلعت من الدار ومشت للجنان الخلفي حست بصقع ربعت ايديها وحضنت نفسها ..وشبحت للسمي لقتها صافيه والقمر مضوي الدنيا..ابتسمت ابتسامه خفيفه وتنهدت وقدمت القدام تشوف الزرع كيف مولي والأشجار المثمرة كيف فيها ورد مصكر ..وتشم في ريحة شجرة الليمون واذكرت حوشهم ..تمنت لو انها ترجع جمانه الأولى مافي شي يشغلها غير قرايتها..بس لما فكرت ان سليمان مش في هديكا الحياة حست بضيق وحطت ايدها ع قلبها وقالت: مانقدرش نعيش من غيره..
"ولاهو يقدر.."
غمضت عيونها لما سمعت صوته ومابتش ترد..جاها ووقف قدامها وكان لابس توته عليها كبوط جلد اسود ولابس ع راسه برنوصها فيه زي الريش لونه عسلي في القهوي
ضحكت ..
سليمان بضحكه: خيرك تضحكي
جمانه : شي ..طلعت بروحها
سليمان برفعة حاجب: اممم..باه ..ماتبيش تقولي خيرك
جمانه شبحت لعيونه : انت تحبني ..؟
سليمان : هههههههههه
جمانه بجديه: نسأل بجديات ..
سليمان سكت مرر نظراته ع مكان بعدين شبحلها: انتي تعرفي اني نعشقك نتنفسك اكثر من الهواء نفسه..
جمانه: حق ولا تبي تجبر بخاطري..
سليمان ضيق عيونه بإستغراب: جمانه شن في بالزبط ..
جمانه بنبرة باكيه بس تحاول تتماسك: انت ممكن تكون حسيت بالذنب او الشفقه لهالسبب تزوجتيني بعد ماأطلقت ..
سليمان بإنفعال: شن تخرفي انتي ..شفقه شنو وذنب شنو اللي حسيت بيه ..جمانه اني حبيتك من لما عرفتك خشيتي قلبي دون مانحس غيرتيني قلبتي كياني كله ..اكثر حاجه ندمت عليها في حياتي هي نهار خليتك لما سمعتك هذا الكلام اللي جرحني قبل ليجرحك..من يومها واني في عذاب مايعلم بيه كان ربي ولما سمعت بيك انقرت فاتحتك ع غيري ..أشر ع قلبه..هذا حسيته تمزق تمزيق ...وحالي تبدلت لولا ايماني بالله مش عارف شن صارلي..نعطيك معلومه انتي ماتعرفيهاش وأني مابيتش نقولهالك ..هذاكا اليوم اللي روح بيك فيه ال.....استغفر وخلاص ..المهم لحقتكم وعرفت اللي صار..عطيته طريحه قريب حطيته في رقبتي لولا اللي خدوه من بين ايديا.
جمانه شهقت وحطت ايدها ع فمها...
سليمان هز راسه بإيجاب: ايه ...ضربته ولما طلقك مابتش نضيع وقت أكثر من اللي ضيعته طول خطبتك باش ماتريحيش مني مرة تانيه...
جمانه: مش مصدقه هذا كله صار ..
سليمان ابتسم: اممم ..صار ..غلطت غلطة عمري لما سيبتك ..وصلحت غلطتي والحمد لله..
جمانه شبحتله بنظره طفوليه : يعني انت تحبني ..
سليمان شد وجهها بإيديه: ونموت عليك ..وباسها بشوق وبشغف شديد وحتي هي ..
في هالوقت عمكم عمران ماشي يجيب حاجه من سيارته حس بحركه وسمع صوت جيهة جنان المطبخ قدم شويه وانصدم من اللي شافه ولف وجهه طول.."العشق وعمايله لما يخش لقلوب الشيوخ" ومشي وهو يضحك...
اما سليمان فكان مش حاس بشي غير انه عطشان و
ويبي يرتوى من حبها ..وميت شوق عليها..باسها لين قريب زمطها ...
جمانه وهي داهشه بضحكه: حي عليا رانا في الجنان..
سليمان حط خشمه ع خشمها: انتي اللي هبلتيني..💖
جمانه بدلع : واني شن دخلي ...
سليمان باسها : تعالي خشي عن الصقع في الأول وبعدين نوريك انتي شن دخلك حضنها وخشوا للحوش وخشوا لجناحهم ووراها شن دخلها 😁...واحني شن دخلنا بيهم 😂
***
كله حلو مادامه منك
ابوبكر: أااه ياقلبي ..هيا صح مرة مرة تقولي كلمه حلوة لكن ترفعيلي في قلبي وتوطيه ..
زينب ضحكت بصمت وتحشمت قعدت ساكته..
ابوبكر بضحكه: تمنيت نشوفك كيف طلعتي
زينب حطت ايدها ع عيونها من الخجل: تحشم
ابوبكر: هههههههه اللي يسمعك يقول اشبح شن قلت
زينب: باه اسكت
ابوبكر ابتسم: هي بنسكت اني انتي تكلمي
زينب عضت ع شاربها: شن بنقول يعني
ابوبكر بضحكه : هو هذا لما نقولك هدرزي تقوليلي شن بنقول ..نسكر احسن
زينب اضايقت : دير اللي يريحك
ابوبكر: ههههههههههه ..صدقتي ياهبله ..مش مهم عندي تتكلمي حتى صوت انفاسك يكفيني
زينب تتلمس في خدودها اللي ولوا نااااار من الخجل..
ابوبكر : اكيد وجهك احمر وحرارتك ارتفعت
زينب انخلعت وبتلقائيه : كيف عرف...وسكتت😳
ابو بكر: ههههههههههههههههه..آه منك ..تهبلي بالخجل الزايد اللي عندك
ضحكت زينب..
ابوبكر: زينب
زينب : نعم
ابوبكر: نحبك ياسكرتي 💖
زينب قريب ماتت سكرت في وجهه التليفون وقعدت تمروح شافتها اختها وداد اللي كانت ساهره عالفيس
وداد: قد مايعطي باللطف ..تمروحي في قرة العنز ..
زينب: ههههههههه صامته...
وداد: ملحيني
رجاء: ارقدوا يامصايب تو تنوضولي العيل ..
زينب وداد😂😂
***
تاني يوم مع الساعة 9:30
ركبت سلمى لشقة ضو لقت امباركه كيف طالعه..قلتلها خشي نبيك وخشوا هما الزوز..وضو كان يفطر
سلمى: صباح الخير وخيي
ضو: صباح الخير سومه تعالي افطري
سلمى : صحيت وخيي...اني جايه بنقول لمرتك كلمتين وكويس انك حاضر..وقعدت تأشر بسبباتها..امباركه عمايلك قاعدين نتغاضوا عنهم بمزاجنا ره تجنبا للمشاكل اللي بوي وأمي مايبوهاش..لكن لعند سليمان وتوقفي حدك..قسما بالله مازلت نسمعك تجيب سيرة مرته ولاتدوي عليها ولاتكلميها ولاتجي جيهتها..من غدوة بوي يخلي ضرتك تجي تسكن مكانك وانتي تتسقدي لحوش اماليك زي جيتي حتى صغارك تحلمي تشوفيهم..
امباركه شبحت لضو اللي ماحركش ساكن وكان مستمر في الماكله وولت شبحت لسلمى وهي زي العاده شاده دمعتها وتكابر
سلمى: قد أعذر من انذر...ومشت طلعت من الشقه ..
التفتت امباركه شبحتله لقاته مازال ياكل " ينزلك بالسم إن شاء الله" وخشت لدارها وفي قلبها الحقد يكبر وبدت تفكر كيف تنتقم من جمانه مع لطيفه..
كذلك مشت سلمى لحوش خالتها ومسحت برجاء الأرض قدام أمها وخواتها وروحت..ورقيه كملت ع رجاء هزايب ..وهي حرجت من أمهاكلمت راجلها روح بيها..
زينب: تستاهل،اللي يشوف عمايلها مع المراة تقول واخده منها راجلها
وداد: عندك حق زودتها هلبه...
***
باه ياودي باه هههههههههه..خلاص ياعش غدوة نتلاقوا....وصكرت..
في من كنتي تكلمي
ندى:😲اصووووووولي 😭
اصيل: هههههههههه خنقتيني ياغجريه ..
ندى بعدت : امتى روحت
اصيل : من المطار هني طول..
ندى: خش خش ماما مستاحشتك هلبه..
خش أصيل سلم ع امه وندى تتفرج عليهم ومتأثرة ..وصلت رساله ع تليفونها (ندى غدوة لازم نشوفك نتفاهموا غصب عنك)
ندى ضحكت وصكرت نقالها"خليه يتربى بش يدير اللي نقوله عليه مرة تانيه😏"
***
ياوخيتي محلاهم 😍
سلمى: ريتي عمك كيف من توا يدلع في صغارك
جمانه: ربي يطول في عمره ع طاعته ..
سليمان وسلمي: اللهم آمين ..
ماريه جت تجري : عموووو استاحشتك حضنها سليمان وقامها
سليمان: حتى اني استاحشتك كبرتي ياحلوة
ماريه : ايه... شافت للمهور..حلوين عمو متاعات مني
سليمان: هادم متاعات صغار عمك ..
ماريه : صغارك انت ..لكن هما قاعدين في بطنها واشرت ع جمانه
سليمان وسلمى وجمانه: ههههههههههه
سلمى: وخيرك ماتسلميش ع عمتك يامعفنه ..نزلها سليمان وسلمت ع سلمي ..
سليمان: بري سلمي ع مرت عمك ..قدمت ماريه وسلمت عليها ..
جمانه: وين جنو
ماريه : جايه وراي هي وأكرم..خشوا الصغار وجنى بعد سلمت ع سليمان وسلمى قعدت مع جمانه تهدرز معاها وتحكيلها ع المدرسه وشنو داروا في حوش جدهم "بو امباركه"
ماريه شبحت لجمانه: حقة خالتي جمانه انتي ساحرة ..
كلهم استغربوا جمانه بضحكه: كيف ؟
ماريه: هكي سمعت ماما وخالاتي يقولوا انك ساحرة ودرتي لعمو سحر..
كلهم انصدموا وجمانه تمالكت نفسها : ايه حبيبتي بس سحر حلو هلبه اسمه الحب اني درته لعمو وعمو دارهولي وابتسمت لسليمان وغمزتله..وهو ابتسم بحب لكن من داخل كان يغلي..
اما سلمى فابتسمت وغيرت الموضوع وجابت سيرة المدرسه..
...
أني ياأمي دوة النساوين مانبيش نخش فيها..ومانبيش تصير مشاكل من غير شي الجو مشحون ..لذلك بناخدها من قصيرها ومعاش بنجيبها هني إلا في المناسبات بس
فتحيه: الحق مانلومكش ياولدي برغم انه مايهونش عليا انكم ماتجوش ..لكن راحتك وراحة مريتك عندي أهم من كل شي رد بالك عليها واني تونطق فيكم كل خميس وجمعه
سليمان باس راسها : تأنسي وتشرفي ياغااليه..هي السلام عليكم ..
امه : وعليكم السلام ..
ركب سيارته ..
جمانه تأشر لعمتها وسلمى والصغار🖐 وحتى هما ..وتحركت السياره وطلعت..
جمانه : شن قلت لعمتي
سليمان ابتسم : مافي شي مهم ..
سكتت جمانه..سليمان: حولي القوانتي ..ابتسمت وحولاته وخدي يدها وباسها: اليوم مافيش مرواح لحوش اهلك اليوم معاي بس ...بنرفعك تتعشي في مكان قنين وندهوروا وين ماتبي..
جمانه ابتسمت : نحبك هلبه تعرف..
سليمان: واني نموت عليك لكن شكلك مازال ماتعرفيش
جمانه: ههههههههههه لالا نعرف والله نعرف ..
كملوا طريقهم هدرزة وضحك وكان يوم مميز بالنسبه ليهم💖
***
تاني في كليه الطب..
عدنان: بهدوء وماتعصبش مهما صار وشنو ماقالتلك..
كنان: باهي فهمت برا لخطيبتك
عدنان ضحك وضربه ع كتفه ومشي ..وهو قعد يدور ع ندى ..
في هالوقت ندى كانت مقعمزة تقرا ..وحاطه السماعات في وذنها تسمع في المحاضرات..
...
اوووو كنان
كنان: شن جو حكيم
حكيم: تمام شنو امورك ..والله كنت حاجه صح في الحفله
كنان بإبتسامه: بارك الله فيك..
...
ندى وهي تقرا ايد غمت ع عيونها..ضحكت ..
عرفتك يابارد ههههههه
وهاللقطه جت في عيون كنان اللي انطلق يجري زي الثور الإسباني لما يشوف الخرقه الحمرا 😂
حولت ندى يد نعيم ولد عمها وشبحتله: شن جو نعنع ..وفلمحة بصر معاش شافت نعنع ...اللي طيره كنان ببوكس جابه متنطر وطايح ...وطاح فيه ضرب بلا وعي..
ندى تعيط: حووووول خليه حوووول وتلقطوا الأولاد يحزوا وكنان مش حاس بشي يدف فيهم ويضرب فيه ونعيم حتى هو يضرب جي ايوب دف كنان بالقوة ..لكن كنان الغيرة عاميه عيونه دف ايوب بكل قوته وشد نعيم ويضرب ونعيم يضرب..
عدنان شاف العركه قرب لقي ندى تعيط قدم يجري لقي خوه زي الوحش قدمله يجري وشده من جاكته وعطاه بوكس خلا كنان يوخر وحاط ايده ع فمه..
عدنان: شن جو الشوارعيه اللي دير فيه هذا..
كنان شاد فمه وماباش يشبح لخوه..
ع جية الأمن..اللي كانوا يتعاركوا يتفضلوا معانا...
يتبع .....
#GomanFared
