الحلقة(9)
كم مرة قتله كبر عقلك وماتحطش راسك براسهم شي شي راس مسكر ياراجل وماتوقعته يطلق مراته مسكينه وهيا ماليهاش ذنب في شي،، قاسم يكلم في سليمان
سليمان: تو مفروض ندوروه مش نقعدوا مقعمزين هكي
وائل: عندي معارف في وزارة الداخليه تو نشوفهم
قاسم: وأنا نعرف كم ضابط هنا بالك يقدروا يديروا شي حاجه
عماد: عندي جماعه حتى أني تو نشوفهم
سليمان: جماعة شني ؟!!🤔
عماد: يرحم والديك معاش ادقق
سليمان : 😅به به كل واحد يدير اللي قال عليه
وناض بيطلع
وائل: وين ماشي ؟
سليمان : مشوار وجاي
قاسم: راك تريح حتى أنت نكونوا في واحد نصبحوا في
سليمان ضحك وهز راسه يمين ويسار وطلع
كل واحد منهم كلم اللي يعرفه ويقوللهم تو نديروا اللي نقدروا عليه وصلنا لشي نكلموكم ، بعد ساعتين روح الشيخ وماباش يقول وين مشي وصحابه مابوش يصروا عليه قعدوا يستنوا في خبر عن ربيع للصبح كل واحد راقد في مكانه اللي مقعمز فيه ؛؛فجأة رن تليفون عماد ورنته كانت قمة الأزعاج"بيله 😂" ناضوا كلهم مخلوعين رد عماد
عماد: هاااه واااالله ،،باه باه ؛،،وين بالزبط ،،،هي جايين مسافة الطريق وسكر كلهم يشبحوله
عماد: لقوه مضروب ومعذب وملوحينه في الطريق وتوا هو في المستشفى
انصدموا وناضوا يجروا بش يمشوله ماعدا سليمان اللي كان في الجامع وتليفونه مسكر يكلموفيه ويلقوه مسكر
**********
زينب قاعده في المستشفى لمدة يومين وبتطلع ،بعد مافاقت من الكومه اللي جتها بسيطه وعلي خوهاقال اللي ماليه إن دواء زينب بيتغير من حبوب ليباري ولازم يردوا بالهم ع نفسيتها
أما رجاء فكانت تفكر هلبه علاش هكي صار لأختها وحست في إن في القصه ،،،
**********
بتفكر في إيه حبيبي وساكت بس ليه تي كلمه ساهله ومش مستاهله طب قولهالي ولو بعنيك
اريج تغني وترقص وجوهامليح ماحد في الحوش غير هي وخواتها
جمانه كانت شاغله نفسها بالقرايه وتحاول تنسى اللي صار
ندى تقرا حتى هيا تانيه ركابها زي مايقولوا شهادة تانويه وأمهم لوطا مقعمزة تقرا في كتاب
فجأة خش نجيب متكنطي ركب فوق طول أمه اتفاجئت وأستغربت خيره ؟!!وهو راكب يسمع في الأغاني وعياط أريج وهي تغني مشي بسرعه فتح الباب بقوة اريج انخلعت وعيطت وهو خاش طول خدي العلاقه المحطوطه حدا الدولاب اريج قريب ماتت تحسابه بيضربها قعمزت وشبكت إيدها ع راسها وهو ألتفت ع المنظومه وطاح فيها تكسير
سمعوا جمانه وندى صوت العياط وتكسير طلعوا يجروا شبحوا اللي صاير انصدموا قدمت جمانه وغمضت عيونها وقالت لاحول ولاقوة إلابالله شدت أيد خوها
جمانه: نحيب استهدي بالله قول لاإله إلا الله
نجيب: لاإله إلاالله هدي شويه
تعرفي يافرخة إنتي جو الصايعات هذا نلقاك مدايرتيه مرةتانيه العصا حديرلك زي مادارت لهالشقفه لوح العصا وطلع شاف أمه وطى عيونه فات من بحداها ومشي لداره
أريج تبكي وندى حاضنتها وجمانه عطتها ميه بعدين جت حدا أمها
جمانه: شنو صار ياماما بالزبط
امينه: مش عارفه خش طول حتى ماسلمش عليا وركب يجري
جمانه: واضح صاير معاه حاجه يوم السبت صح يروح بكري لكن مش بكري هكي
أمينه: عصبيته مشكله يوم الأيام حيرتكب جريمه عارفه
جمانه حطت إيدها ع ذراع أمها :ماتخافيش صح عصبي لكن مش متهور لهالدرجه
أمينه: يستر الله وخشت لبنتها تشوف فيها ،وجمانه بدي شاغل بالها حال نجيب وحاسه في حاجه ...
*********
الدكتور : عنده كسور في رجليه وكتفه وكدمات اللي ضربوه مابالغوش في ضربه
عماد: لاوالله مابالغوش كسروه بس
الدكتور ابتسم: في حالات أسوأ من هكي لو نحيكلك عليها حتقول أن اللي ضربوا صاحبك ناس حنينه
وائل: قداش يبي بش يطلع
الدكتور: أسبوعين
وائل: بارك الله فيك يادكتور
مشي الدكتور جي قاسم
قاسم: هاشنو صايرله
عماد: كسروله كتفه ورجليه
قاسم : بسس؟
عماد: وشنو تبي يعني ؟
قاسم: والله بارك الله فيهم توقعت بنسمع بلاوي لكن للحمد لله جت ع هكي
وائل: قال الدكتور تقدروا تخشوله
عماد : كيف في حساب العيادة لازم نشتركوا فيه
قاسم: مش وقته المواضيع هادي بعدين نتفاهموا فيها خشوا لربيع ....
*************
الساعه 6:00مساءا
في حوش الحاج فرج
أريج حابسه روحها في الدار مابتش تتغدا ونجيب كذلك
الحاج فرج ومرته أمينه طلعوا لعزي أم واحد من أصدقاء فرج
عبدو في المستشفى وأصيل طالع
جومانا وندى في الدار ندى راقده وجومانا تقرا
جمانه: همممم تعبببت
خل نشوف الفيس بالك تلقى البنات أون لاين نكلمهم ع المشروع ،فتحت وخشت ع الرسايل جت قدامها رسالة الصفحه اللي ردت عليها وعاودت تقرا في الرساله وفي ردها
"تخشوا بأسماء مستعارة وتهرفوا بما لاتعرفوا والله أعلم من مأجركم للحاجه هادي، ماخرب هالبلاد إلا وجود أمثالكم وأسأل الله إنها تنظف منكم قريبا "
وردها
"ماتوقعتش أدمن لصفحة زي صفحتكم تدعي الوطنيه وشعارها "لنرتقي" يكون هذا أسلوبه وهادي طريقته في نقاش الناس اللي تخالفه، لكن كلكم زي بعض نفس التفكير المتخلف مع الأسف ،وصفحه زي هادي إلغاء الأعجاب هو ماتستحقه"
جمانه تنهدت: قداش قهرني رده تعليقي ماكانش يستحق هالرد نهائي ،،رجعت لتعليقها وقراته" كلامك فيه جانب من الصواب وفيه جانب من الخطأ أيضا، لإن الدين طاهر مفروض مايخشش في ألعاب السياسه القذرة "
توا أني في شنو غلطتت هو اللي يتكلم في السياسه ويدخل في الدين فيها وممكن كلامه غلط مش صح وناس تنغر بيه وتمشي في جرته تنهدت تاني وقالت أستغفر الله وخلاص
دورت صحباتها لقتهم مسكرات وسكرت وطلعت من دارها بش ادير العشي فكرت تخش لأريج بس تراجعت تعرف أن مزاجها مش كويس وممكن تجرحها في الكلام هي من قبل مش سالكه ،،كملت طريقها بتنزل تسمع في نقاش بصوت عالي ولت تبعت الصوت لقاته من دار نجيب بتقدم بش تسمع بعدين قالت :لالا اخرتها تقعدي تتجسسي ياجمانه
وكيف بتلف وبتمشي لكن سمعت "إنتي مش حاسبتيني راجل جايه لمكان خدمتي" ماقدرتش تتحمل ولت وقدمت حدا داره وقعدت تسمع
نجيب: احمدي ربك اللي ضبطت نفسي وتصرفت تصرف تاني قدام الناس
ريما: شن هو اللي درته جيتك لمكان خدمتك وين المشكله مكان خدمتك مكان محترم ع أساس
نجيب: شن هي ؟!!شنو قصدك إنتي
ريما ساكته
نجيب : تكلمي قولي شن قصدك
ريما : ماتعيطش عليا لوسمحت،، أني خطيبتك ولاكأني خطيبتك معاملتك إهمالك ليا كله تحملته وفوته ونقول معليشي طبعه هكي حتى العرس اللي قعدت تماطل في موعده نبرر لأهلي بكل المبررات تافهه وكبيرة وكذبت ع خاطرك بش ماياخدوش منك موقف ،،وصلت إنك حتى لما نتصل بيك ماتردش ،، حط نفسك في مكاني معلقني بين السمي والأرض لاأنت اللي تبيني ولاأنت اللي سيبتني طبيعي نحط حد للي صاير ولأنك تهرب اضطريت نمشيلك لمكان عملك نشوفك واقف مع وحده وماسك إيدها وأيدك ع وجههاوحده تانيه قلبت الدنيا ع راسك لكن أني شفتك وطلعت بدون ولاحرف وتوا قالب الدنيا ع راسي ومطلعني أني الغالطه!!"
نجيب ساكت وحس بتأنيب ضمير لإن كلامها صح لكن الكبرياء متاعه كان أكبر من أنه يعترف بإنه غالط
نجيب: هههع ياعليك دراما اديري فيها هذا كله مستعجله تبيني نحدد العرس بأي طريقه!!
ريما انصدمت نزلت دمعة سخونه ع خدها وقالت
ريما: خلاص صكر بالله عليك صكر
نجيب: إنتي صكري إنتي اللي متصله" يزيد يحرق في دمها"
صكرت ريما وقعدت تبكي وطبعا هي كانت مع صاحبتها في كافي طلعت منه ولحقتها :خيرك ريما ريما اوقفي ريما
وريما ماتسمعش في شي كلام نجيب بس يرن في ودنها لحقت عليها صاحبتها وشدتها
ريما: نبي نروح ياسارة
سارة: باه تو نروح بيك خليني أني نسوق
ريما هزت راسها بالموافقه وركبوا وهما في الطريق
سارة: خلاص ياريما معاش تبكي والله مايستاهل هالمتعجرف
ريما تبكي أكثر ،، سارة معاش عرفت شن دير فتتحت الراديو وع الحظ تجي أغنية إليسا "تعبت منك" سكرت الراديو طول
ريما: بالله عليك افتحي وخليها
سارة: ري...
ريما: سارة بالله عليك
سارة فتحتها ووريما علت الصوت وتسمع فيها وانهارت بالبكي وسارة وجعتها صاحبتها هلبه وتسب نجيب في خاطرها هلبه
♡♡♡
طبعا خطوبة نجيب وريما شبه تقليديه ريما كانت طالبه في كلية الهندسه أخر سنه وكان نجيب معيد وقتها قراها لفتتله إنتباهه كيف كانت محترمه ومثقفه ومتفوقه في قرايتها أعجب بيها وهي كانت معجبه بيه أكثر من أول ماخشت الكليه وهي تسمع بيه وبتفوقه ووكيف كانوا البنات بيهبلوا عليه بس هو كان شديد وحازم وماعنداش في جو العلاقات
طبعا خشت راسه وجاب أخته جمانه نهار للجامعه بش كلمتها وريما فرحت ووافقت وأنخطبتله في 2010 بعد تخرجها وكانت حتولي معيده بس هو رفض وطلب منها تقعد في الحوش وهي وافقت طول وحباته هلبه مع إنه كان جاف وقليل مايكلم فيها وهي خدت ع طبعه برغم أهماله ليها بس كانت تغار عليه هلبه وفرحت لما سيب التدريس في الكليه وفتح مكتب خاص ،،برغم جفاه ومعاملته كانت راضيه وكانت تصبر في روحها كل ماتشبح لدبلتها وتقول المهم هو ليا وأني ليه ،،بس طبعا نجيب تغير بزياده عليها في المدة الأخيرةع أقل كانت لما تتصل يرد عليها ويسأل مرة مرة عليها لكن توا حتى ع مكالمتها معاش بي يرد وطبعا عارفين السبب وريما حتى هي شبه عرفاته ...
***********
عماد: راك مكسر تكسير والدكتور قال تقعد أسبوعين وانت تبي تطلع توا كيف بتطلع وأنت مجبس من فوق للوطى ورجلك مشنقه فوق
ربيع: نكره المستشفيات والطريق اللي يجيبلهم
عماد : عيادة مش مستشفى
ربيع : عيادة ولامستشفى شنو الفرق ،،🤤شنو عيادة وأسبوعين!!تي غير من جابني بس حق الليله الوحده بهداك الحساب يابال14ليله!!!
عماد: ترا سكر فمك خير مانزيد على مابيك وحني وين مشينا يا لوح
ربيع يبي ينوض: شنو أنتم جبتوني ونسيتوني مش ساد قاعد في حوش سليمان وقداش ليا مدفعتله الإيجار وهو ساكت لالا ساد ساد
عماد: ارقد وهني روحك ،،رقده وقاله حني خوت يامدقوق ومعاش تعاود هالقطاف وكانك ع الإيجار حتى أني مادفعته وهو والله مامدور عارفنا وعارف وضعنا
ربيع: هو وينه أصلا معقول قاعد حرجان مني لدرجة سمع بيا هكي وماجاش
عماد: تي شن تحكي انت!!تي هو كان عند أماليه بعد سمع بيك مختفي سيبهم وجي يجري بش يدور عليك
ربيع : به وينه توا ؟!!لاريته بكري لما جيتوا ولاتو
عماد: نكلموا فيه تلفونه مسكر أشبح في شنو لاهي وبعدين أكيد في الخلوة ومتأكد حيسمع ويجيك طول
ربيع: به شنو قصة مشيته لماليه تصالح هو وبوه؟
عماد: الباين هكي قاعدين ماحكيناش معاه روح أمس المغرب ولهينا بحكايتك
طق طق طق
فتح سليمان الباب وخش وفي ايده باقة ورد وشكلاطه
عماد: بنقول كلمه وخايف تعلق فيا
سليمان: معناها كنتوا تغتابوا كويس أهوا نقصتوا من سيئاتي من غير تعب 😁
سلم ع ربيع وباس راسه ،الحمد الله ع سلامتك ياراس مسكر وطهورا إن شاء الله
ربيع تحشم منه لما باس ع راسه: الله يسلمك ياشيخ
سليمان: تقدر تحكيلي كيف صار بالزبط
عماد: ماباش يحكي
ربيع : تونحكيلكم قعمز ربيع حكالهم اللي صار بالتفصيل كيف الجماعه طبوه وعطوه طريحه بالعصي وبأيديهم لين داخ وماحد منهم قاله شي وفقد الوعي ولقي روحه هني
سليمان قعد يفكر هلبه وعماد أتصل بقاسم ووائل بش يجوا ويتفاهموا في القصه
***********
الليله هديكا كانت ع الكل صعبه كل حد بهمه
نجيب اللي يفكر في وضعه مع ريما ومشاعره اتجاه لارا
وريما اللي كانت تبكي بكي قهرة ووجع في فراشها ولاقدرت تسكت ،،وجمانه اللي كنت مشغولة باللي صار مع خوها وخطيبته وأريج اللي بعد ماروحت من السوق اللي طلعتله مع أصيل بش تغير جوها وتنسى اللي داره نجيب فيها وفي نفس الوقت تفكر في قرار جديد حتاخده في حياتها حنعرفوه ،،وزينب اللي كانت تتألم هلبه من اللي صار معاها وكلام سليمان مافارقهاش لحظه وكأنه تو تسمع فيه
************
روحوا الشباب من زيارة ربيع وكل واحد فيهم كان تاعب مشوا لشقتهم ورقدوا
وسليمان روح خش دوش وتوضا وصلى وقعمز ع اللاب توب وقام تليفونه واتصل نادى ونادى بعدين رد
سليمان : السلام عليكم كيف حالك محمود توا وكيف حال الوالده
محمود: الحمد لله أحسن من بكري سامحني تعبت معاي هلبه اليوم من الصبح وأنت واقف معاي
سليمان :ماتقولش هكي يامحمود وفكك من الرسميات ره انت زي خوي الصغير وأمك زي أمي
محمود: بارك الله فيك ياشيخ ويرحم والديك
سليمان : آمين ،،هي مالانخليك توا متلهاش عن أمك بكل وتصير حاجه كلمني طوووول
محمود: صحيت بارك الله فيك هي السلام عليكم
سليمان: وعليكم السلام
سليمان حط تلفونه وفتح اللاب توب وخش ع الفيس وتبدا الإشعارات تهل
شاف هلبه رسائل
سليمان: تو كيف بنرد عليهم كلهم ؟؟كان مارديتش نطلع متكبر وشايف روحي مافي حد حيقدر إني تاعب وعندي ماشاغلني خنرد ع مجموعه توا ومجموعه غدوة إن شاء الله
فتح الرسائل
هادي "قاصرة الطرف " خل نشوفوا خيرها ،،قعد يقرأ متفاجئ ،،خيرها هادي شنو تقول ركب فوق شوي شاف روحه شن كاتب انصدم🤤 "حيي هذا شنو شنو اللي بعتته للبنت هذا شنو هالأسلوب؛ أصلا كيف كلمتها من الأساس !؟؟
أستغفر الله وأتوب إليه
لاإله إلا انت سبحانك إني كنت من الظالمين
توا أكيد دارت سكرين شوت ونشرتها في القروبات وبشعت بالصفحه ،لكن كان صار هكي ره باقي الأدمنز قالولي ؟!! خل نبعتلها إعتذار ونطلب منه ماتنشرش المحادثه ،،أني أصلا وين كان عقلي بس وعلاش كلمتها ع خاص ومارديتيش ع التعليق طول !!!!عليك موقف،، مسح وجهه بإيده،، أستغفر الله وأتوب إليه ،،، وبعت الرساله
جمانه كانت تكتب في مشروعها واالنت مفتوح وصلتها رساله من الفيس
جمانه: مش وقته بكل ،،،وقعدت تكمل كتيبه
ندى: جمانه خلاص عاد ارقدي نبي نرقد والضي متاع اللاب توب مش مخليني نرقد
جمانه : خلاص هي شويه بس
ندى: خلاص ياجمانه غدوة عندي إختبار
سكرت جمانه : خلاص أرقدي هي
طلعت من الدار توضت وولت صلت الوتر وخشت فراشها ورقدت طول من التعب
رايكم
#GomanFared
