الحلقة(89)
هي امتى مشية البحر
ندى: الخميس العيشه وبنروحوا الجمعه العشيه
اريج: ووواك معناها مش حنقدر نعوم ولا نقعمز ع الشط
ندى: ياهبله البشرة البرونزيه موضه
اريج: مانحبهاش هالموضه...
ندى بخبث: بيمشي معانا رويجلك
اريج اذكرت اخر مرة شن صار: 😳
ندى: وعزوزتك اللي تموت فيك
اريج عيييييطت من الغيظ..
اصيل جي يجري : خير بلاك
اريج 😨
ندى: شافت زقرلو كبير 😅
اصيل : وينه خل نقتلوه قبل لتجيها سكته قلبيه 😑
اريج : 😑
ندى: اشبح وين مشي 😅
مشي اصيل بعد ماشبحلهم بنص عين ...🤣
***
ريما متلوحه ع السرير راقده ع بطنها وشعرها مفتوح وجاي ع وجهها ..نجيب قام راسه من اللاب شافها هكي هبل عليها ..سكر اللاب وناض تمدد جنبها وقعد يتأمل فيها ..كان منظرها فاتن هلبه وهي راقده وشعرها ع وجهها ..بعد خصلات من شعرها وجهها وبدي يبوس فيه بوسات خفيفه
ريما اضايقت غيرت وجهها الجيهه التانيه
نجيب بضحكه: كنت نايضه يامشفشفه
ريما وكبدها زاهقه: ايه
قرب نجيب منها ولف ايديه عليها ..تشم في ريحته عفن حشاكم حاولت تقاوم بس لما زاد قرب وبيبوسها خلاص معاش قدرت تتحمل دافاته بكل قوتها ...
نجيب انصدم: خيرك !!!
ريما وحاطه ايدها ع فمها وتتغصص: برا غادي ارجوك
نجيب : ريما ؟؟!
ريما تتغصص وتكح
نجيب بخوف: خيرك حبيبي ..وجاي بيحضنها
ريما بعياط : حوووووول ..وناضت تجري للحمام
نجيب اضايق هلبه بس خاف عليها ..قعد يطق في الباب
نجيب: ريما ياعمري خيرك شن فيك؟؟
ريما تبكي : اطلع برا الدار ارجوك
نجيب : ريما شن تقولي
ريما وأعصابها فلتوا : اطلع مش طايقتك بكل
نجيب انصدم قريب مات وبصوت يدوب طالع: اهو طلعت ..
ووخر وطلع من الشقه كلها ..ريما سمعت تقربيعة الباب طلعت من الحمام وقعدت تبكي ...
...
امينه كانت في المطبخ ادير في يانسون بتشربه هي وراجلها ..جاها نجيب
نجيب بعصبيه مكتومه : امي نبيك شويه
امينه شبحتله: تكلم مافي حد
نجيب تنهد: امي ريما نحس فيها مش طبيعيه
امينه خافت وسيبت اللي في ايدها: خيرها!!
نجيب : تصرفاتها معاي موليه بكل ..خايف يكون سحر ولاعين..
امينه: اللطف ياارب ..خليك هني تو نركب نشوفها ..وركبت امينه
(طبعا نجيب من الناس اللي موسوسين هلبه من ناحية العين والسحر هذا علاش ماخلا حد يلحق ريما من اهلها ليلة الدخله ولا خلا مخلوق يعتب شقته اخطا عيلته بس ..)
***
كنان كان مضايق هلبه من أول ماروح وهو في داره ماطلعش منها ..حاول يقرا ماقدرش..فتح النت ..لقي عدنان باعتله رسايل مكانش عنده نيه يرد ..لقي ندى اون لاين ع الفيس ..ساوى تقعميزته ..وخش ع الخاص ..
ندى كانت مقعمزة حدا روشن دارها تفسفس ..جاها اشعار الرساله وكان من كنان ..ابتسمت وخشت شافتها
(ندى)
(اهلا)
(قاعده زعلانه )
ندى ضحكت وحبت ادير عليه جو..
(ايه وهلبه)
(أسف جدا جدا ..والله ماكان قصدي اللي فهمتيه )
(خلاص كلمتك وصلت )
(ندى والله ماقصدي حاجه..انا خفت عليك ..وبما أنك قريبتي حاسس جيهتك بالمسؤوليه ،،يعني لاقدر الله لو صار شي في مش حيقولوا خو مرت خوها معاها في نفس المكان وماردش باله منها)
ندى ضحكت ومعاش بت ترد
كنان"شكلها حراجه وحرجها واعر"
(ندى)
(Hallo)
(تمام ..بس صدقيني ماقصدش نزعلك ولانجرحك وحندير المستحيل بش نرضيك)
ندى لما قرت كلامه حست بشعور حلو ..بس مافسرتاش ألا انه يرجع لحياة كنان برا وانه واخد طبع الأجانب واسلوبهم اللطيف ...
(هههههههههههههههه)
(؟؟؟؟!)
(نبصر عليك كنكون ..والله مازعلت منك ولا حاجه وفاهمتك ومقدره خوفك عليا )
كنان طار من الفرحه
(ربي يهديك والله خليتني نكره روحي اللي زعلتك ودموعك اللي نزلوا بسببي)
ندى تنهدت
(دموعي مانزلوش بسببك )
كنان اذكر لما جي بيلحقها بس وقفه حكيم وكان يبي منه محاضرة وكنان تحشم يمشي ويخليه وبعد مشي حكيم..قعد كنان يدور ع ندى لين لقاها مقعمزه في تركينه مستخطيه وشاده تليفونه وتتفرج ع فيديو لحد يغني ويعزف ع القيتار وكانت تبكي ...بعد وقف الفيديو ندى قعدت تتكلم وتبكي
"مش قادرة ننساك ..ولا نحول جرح فراقك من قلبي ..والله لهاللحظه مامستوعبه انك ميت ..نقول لنفسي انك مسافر وحترجع يوم من الأيام ..مشيت من هالدنيا وخليت في قلبي وجع ..ياريتني قلتلك أني نحبك ياااريت"
كنان لما سمع كلامها قلبه انعصر عصر ..بس الغريب انه ماحسش بالغيرة ..لكن اضايق انه بدي امله فإنه يكسب ندى ضعيف شويه ..انسحب من المكان طول...
(كنكون رقدت)
كنان ابتسم
(لالا..ندى)
(اممم)
(ممكن غدوة ناخد من وقتك ساعه ولااتنين )
(هههههههههه مش شويه ساعه ولااتنين؟)
كنان"كان نلقى طول العمر "
(هههههههه ..نبي نهدرزوا هكي ونغيرلك جوك حسيتك مضايقه )
ندى ابتسمت
(تمام ..عندي ساعه 11 فاضيه )
(كويس بكل )
وكملوا هدرزة
****
نجيب كان مقعمز ع أعصابه يستنى في امه ..خشت امينه عليه ...
نجيب : شن صار معاك
امينه مبتسمه : غدوة الصبح ان شاء الله ارفعها تحلل
نجيب بخوف : علاش
امينه بضحكه: ارفعها وخلاص ..
ع خشة عبدو وملاك جايب معاه باكوا في ايده ..ملاك لما شافت نجيب تحشمت ومشتللصاله
عبدو بضحكه: شنجو
امينه: تمام شنو اللي جايبه ..قعدت تفتح فيه لقاته طورطه
امينه: عيد ميلاد منو
عبدو: ههههههه مش عيد ميلاد ياامي..حتولي جده ياسموحه
امينه فرحت وحضناته وطلعت لملاك طول
نجيب: مبارك عليكم تشوفه ع خير
عبدو : آاامين والفال ليك
نجيب قعد يفكر في كلام امه وربط الأحداث ببعضها اندهش وفرح وناض بيطلع قابلاته امه وملاك في الصاله
نجيب: هيا امي اني راكب
امينه: لالاا خليك نبيك شويه
نجيب استغرب وقعد يشبحلها
امينه :برا للمطبخ وتو نجيك ..
نجيب بحيره ولا للمطبخ وباله مشغول...
***
وشن فيها كان قعدت تخدم
عماد : مش مضطره
سعيد : هيا تحب خدمتها ماتمنعهاش منها ..وماتنساش ياولدي مرتك تمر بظروف صعبه قدرها وماتحملهاش فوق طاقتها
عماد تنهد وسكت..
سعيد: ماتخليهاش تبعد عليك ياولدي ره تشوفلك انت من بعدرب العالمين ..اجبر بخاطرها وماتزيديش كسرها ..
عماد قعد يفكر في كلام بوه...
***
ككككييييف؟
امينه: وطي صوتك ..انت سايرها الليله بات في دارك هنايا
نجيب بعصبيه: به به وناض بيطلع تلاقى مع بوه من كثر ماكان معصب ماانتبهلاش ..
فرج: خيره؟!
امينه بضحكه: مرته شكلها حامل والوحم بيجي عليه
فرج: هههههههههه ..بنولي جد يعني
امينه : بتولي جد مرتين مرت عبدو حامل ..
فرج بفرحه: تبيلهاخروف هادي ..بإذن الله غدوة بندبح خروف وبنصدقه
امينه : ربي يتقبل ..تعالى خود اليانسون بردتهولك
خدي منها الطاسه: ربي يخليك ليا وخلاص 💓💓
امينه: هههههه😳
***
ستووووووب
اكرم: مازال ماكتبتش 😡
ماريا: انت بطيء 🙄
اكرم : عينك انتي غشاشه 😡
سليمان بضحكه: خلاص انت وياها ..ورا ورقته لأكرم ..حتى اني مالحقتش
اكرم: هيا تغش ياعمي
ماريا: والله لا😢
سليمان: اكرم ماتقولش هكي وانت مش متأكد لأن هذا افتراء الأشرار بس يديروه
اكرم:😯
سليمان: هيا خلاص فوتوها اللعبه ..
جت فتحيه...
فتحيه: هيا نوضوا ارقدوا ليل خلاص
ماريا: مازال ياحناي بنلعبوا مع عمو
فتحيه : غدوة العبوا معاه
سليمان:غدوة بإذن الله بعد الفجر متسقد لطرابلس
فتحيه: اييح عاد انت من قبل ماتحبش طرابلس يابال توا 😒
سليمان:😂
***
بعد تفكير طويل وحرق دم قدر يغفى..خوفه من انه الوحم يكون عليه معناها لازم يبعد عنها وهو مايقدر يتحمل بعدها حتى في العمل خلاها معاه في نفس المكتب ..كيف حيتحمل فترة الوحم اللي ممكن اطول لشهور..
فتحت باب داره وتسللت بخفه داخل لقاته راقد وكان عاطي بالظهر ..ابتسمت وقعمزت جنبه وحطت ايدها ع شعره ..برغم ان كبدها زاهقه ..بس مافي شي يقدر يبعدها عن نجيبها 💓...نزلت راسها وباست خده ..هو بحركه مفاجئه تلفتلها وجبدها لحضنه ويشم في ريحتها
ريما : ههههههه
نجيب: تضحكي يامعفنه واني قريب نتختش بعيد عليك
ريما : مش بإيدي
نجيب لف رقدها ع عالسرير جنبه وحضنها بقوة: ارقدي توا وماتفكري في شي وخليني نرقد وراي يوم طويل غدوة
ريما ضحكت وحضناته ..رغم انها قريب تموت من الزهاق لكن تحملت ع خاطره ...ياااحليلي منهم اهما الزوز😍
***
تاني يوم ...
الساعه11
كان واقف يستنى فيها تجي ..لمحها من بعيد جايه..يشوف لها وقلبه يرفرف..احلى ماشافت عينه ..برغم انها شاف اشكال وألوان ..لكن هي غير عنهم كلهم ..البنت اللي ملكت قلبه من اول نظرة..وصلت
ندى: صباحو😊
كنان: صباح الوردات 💓
ندى: اممم وين بنمشوا
كنان: في مكان في الكليه حلوو هادي ..تعالي هي
ندى ابتسمت : تمام ومشت هي وياه
كنان وقف :استني هني بنمشي نجيب حاجه ونجي
ندى:به 😊
مشي كنان بسرعه لسيارته جاب منها القيتار ومشي لندى
ندى لما شافته جاي بالقيتار ارتسمت ع وجهها ابتسامه حلوة جنناته 💓...
كنان : هي تعالي نقعمزوا غادي ..مشوا قعمزوا تحت شجره وفي بيناتهم مسافه ...
كنان: احمم ..ندى ..نبي نسألك وممكن سؤالي يكون خاص شويه ..نسأل عادي ؟
ندى ابتسمت: اسأل
كنان ابتسم وبربكه: احمم..انتي حبيتي قبل ؟
ندى عيونها تعبوا دموع شبحت القدام وسكتت
كنان يشبحلها: اسف لو تجاوزت حدودي
ندى نزلت دمعه من عينها مسحتها وشبحتله وبصوت فيه نبرة بكي: ايه ولتوا ..
كنان: 💔...شبح القدام
ندى : ماكانتش علاقه زي اي علاقه مألوفه...كان حب لابس ثوب الصداقه
كنان ابتسم: طريقه تعبيرك حلوة
ندى بضحكه: اممم يقولولي فيها
كنان شبحلها: باه كيف حب لابس ثوب صداقه..؟
ندى تنهدت: اني وياه كنا نكلموا في بعض على إن اصدقاء بس اني وياه كنا نحبوا بعض وماقدرناش نبوحوا لبعض
كنان وقلبه واجعه: علاش
ندى: من البدايه محكوم على علاقتنا بالفشل،،لأن في بينا فرق كبير..
كنان: فرق كبير؟شن هو؟؟
ندى: العمر
كنان: كم فرق العمر
ندى شبحتله وبضحكه بسيطه: عشرين سنه
كنان انصدم وقعد ساكت ..
ندى:هههههه اللي كانوا يعرفوا بحبي ليه كانت زيك ردة فعلهم لما قلتلهم ..كانوا يقولولي انتي قاعده صغيره وفي سن مراهقه ومش فاهمه مشاعرك ..بالعكس كنت فاهمه مشاعري وواعيتلها..
كنان: هو كيف كان معاك
ندى تنهدت تنهيده قويه حسها كنان في وسط قلبه
ندى: كان راقي ومحترم ..عمره ماغلط معايبكلمه ..كان شخص خلوق لأبعد حد وراجل بكل معنى الكلمه برغم ان وظيفته قليل من يكون فيها ويحافظ ع اخلاقه وهدوئه ...
كنان كان متألم وهو يشوف فيهاكيف تتكلم عليه وعيونها يلمعوا ومن قلبها الكلام كان يطلع..غار من قاسم فى هديكا اللحظه
كنان: علاش شن كانت وظيفته
ندى: ضابط شرطه...
كنان اتفاجئ: كيف تعرفتي عليه
ندى ضحكت وحكتله القصه
كنان ضحك: طفله يابنت انتي وتبيني مانخافش عليك
ندى بضحكه: مرات نكون طفله ومرات نكون بعمر امي ..
كنان ابتسم: به وكيف صار بعدين ..
ندى سكتت وشبحت القدام ونظرتها كانت حزينه: مات 💔
كنان تأثر : كيف
ندى بعبرة مخنوقه: كان في سيارة مفخخه لواحد من الضباط الكبار ناويين يغتالوه ..هو جاته اخباريه بإن السياره حتتفجر بالضابط اول مايوصل المقر متاعهم والمقر كان بين الأحياء السكنيه ..هو مشي وركب سيارة الضابط وطلع بيها لمكان مستخطي وماوصل ..إلا وهي منفجرة ..قعدت تبكي
تأثر كنان هلبه ولما ندى بكت قلبه وجعه ع الأخر معاش عرف شن يدير مدلها كلينكس ولإن الكافتيريا كانت قريبه مشي بسرعه جابلها ميه ..
ندى تشرب: اسفه تعبتك ونكدت عليك
كنان ابتسم :اني اللي اسف فضولي خلاني نقلب عليك المواجع
ندى ضحكت ومسحت دموعها واشرت ع قيتار: نبيك تسمعني حاجه ..وإن شاء الله تطلع حافظها
كنان خدي القيتار: من عيوني..شن هي
ندى: اغنيه لفرقة قيتارا ..اسمها معاش ندكره بس تبدا بغرامك شي عجيب وطبعك ماحصل
كنان ضحك : ايه نعرفها وحافظها ونحبها يخي 💓
ندى بضحكه : هيا سمعنى
وبدي يعزف كنان ويشبح القدام
🎶غرامك شي عجيب وطبعك ماحصل
احبك لو تغيب وراضي بالأمل
غرامك شي عجيب وطبعك ماحصل
وأحبك لو تغيب وراضي بالأمل
حايره..ولامنك خبر
ساهرة..وينك ياقمر
من شوقي آااه ومن جرحي آااه اشكي واقول ويل ويل ويلاه
ندى كانت تتأمل فيه وهو يغني احساسه..طريقته في العزف ..كان جذاب هلبه ..وبدت تغني معاه
ندى وكنان:
🎶اسألك وين ذاك الحنين ياناس وينه
قلبي الحزين مخلص امين والله يعينه
شبحلها اول ما غنت وقعد نظره عليها ويغني معاها وهو فرحان
اسألك وين ذاك الحنين يا ناس وينه
قلبي الحزين مخلص أمين والله يعنيه ..
كنان هذيكا اللحظات احلى لحظات عاشها في حياته وتمنى لو يقعد معاها هكي طول العمر ...💓
لكن في عيون خبيثه كانت تراقب فيهم...
***
يسوق في السيارة وفاتح أغنيه "انت الحب الكبير" لراغب علامه ..اللي كان يحبه هلبه..ويسوق وحاط ايدها على قلبه
ويغنيلها ويديرلها في حركات بعيونه وحواجبه وهي ميته بالضحك...هادوا كانوا ريما ونجيب بعد مارفع ريما حللها وطلعت حامل...🤰💓💓💓
***
بعد العصر....
جمانه كانت اتبل في الدجاج وادسه في الفريز بش يرفعوه غدوة معاهم للبحر ...
وأمينه كانت مقعمزة تقرا في كتاب ..اريج في دارها راقده وندى تقرا ..واصيل عنده ضيف مقعمز هو وياه في الجنان
اصيل : الجو اليوم قنين
سليمان : ايه لهالسبب قتلك نقعمزوا برا ..ع العموم ..الجوائز اللي ساهمت بيهم في مسابقة التحفيظ وصلت لاهلها
اصيل : الحمد لله
سليمان: بصراحه ياأصيل اني فرحان بيك هلبه اعمال الخير اللي دير فيها برغم انك مازلت طالب وصغير في السن..مخليتني متأمل في شبابنا خير
اصيل بأحراج: الحمد لله ..بارك الله فيك
سليمان: امتى تتخرج
اصيل: معاش اذكرني ياشيخ ..مشروعي مفروض مناقشه لياوقت اجلولي المناقشه لبعد العيد الكبيره
سليمان: معليشي تصير
اصيل: والله شي يحرق الأعصاب ..اختي الكبيرة صارت معاها نفس القصه ماناقشت مسكينه لين خليني ونخليك
سليمان: 💓💓💓💓💓💓💓💓💓
اصيل ناض: خدتنا الهدرزة ونسيت نضيفك شن تحب تشرب
سليمان ابتسم: قهوة وسط مزهره ..
اصيل : حاضر
سليمان : اصيل
اصيل التفت: نعم
سليمان: خوك الكبير قاعد
اصيل بإستغراب : ايه
سليمان: لو مافيهاش مشكله ناديه نبيه في كلمتين
اصيل: أن شاء الله خير
سليمان ابتسم: خير بإذن الله ..
خش اصيل واتصل بنجيب وقاله ينزل ..ومشي للمطبخ
اصيل: جمانه ..ترا بالله وخيتي قهوة مزهرة للراجل برا وديري 3فناجيل
جمانه بإبتسامه : حاضر .."ماتعرفش إن اللي برا سليمان"
....
تفضل ياشيخ القهوة ..
سليمان بإبتسامه : جزاك الله خيرا ..ووريحة القهوة كانت فايحه..رشف منها وبنتها كانت غير" نحس فيها من ايدها❤"
شربوا القهوة وسليمان حط فنجانه وبيبدا يتكلم
سليمان: احم ..والله ياخوي نجيب طلبت من اصيل إنك تكون موجود لأني بنتكلم في موضوع حساس شوي ..
نجيب شبحله زين: تفضل نسمع فيك
سليمان: ليا فترة نعرف اصيل ..شاب ماشاء الله اخلاقه وتصرفاته تبين الحوش اللي طالع منه كيف شكله ..ولما تعرفت ع الحاج وعليكم تأكدت اكثر إن نظرتي ماخابتش..وبش نكون صريح معاك..سألت عليكم القراب منكم والبعاد اللي يعرفوكم ..واللي قالوه شجعني اكثر عاللي بنطلبه منكم ..
نجيب وأصيل شبحوا لبعض وبعدين شبحوله
نجيب: طلب شنو ؟
سليمان: اني قررت نكمل نص ديني من هالحوش المحترم
نجيب تفاجأ واصيل مش اقل منه..
نجيب: والله شن بنقولك عندي اخت مقريه فاتحتها
واللي بعدها صغيرة عليك هلبه الحق
سليمان بأستغراب: على حسب مانعرف حوشكم فيه 3بنات
نجيب : ايه بس الكبيرة انقرت فاتحتها لمدة شهر وبعدين اطلقت ...
سليمان: وأني قاصد الكبيره
نجيب رفع حواجبه بتساؤل وقعد ساكت
سليمان: هي تقرا عندنا في الجامع سألت عليها المشرفه حكتلي قصتها ومدحت فيها هلبه ..شوف مايهمنيش نهائي موضوع طلاقها ومش حنسأل عن السبب..المهم عندي انها ع خلق ودين ومن عيله طيبه ..مطلقه او ارمله مايهمش كله نصيب ..
نجيب: بصراحه مستغرب شوي ..يعني نحس فيك وكأنك طلبت تتزوجها لهالسبب...انها مطلقه..نعرف هلبه ملتزمين يديروا فيها يتزوج مطلقه وأرمله من باب عمل الخير وبعدين يتزوج عليها ..واني اختي غاليه هلبه عندي ومانرضالهاش الشي هذا
سليمان ابتسم وبهدوء: لو لاحظت إني قلتلك سألت عليها من قبل لنعرف إنها مطلقه ...
سكت نجيب شويه وبعدين قال: وشنو اللي خلاك مصر عليها حتى بعد عرفت انها مطلقه ..
سليمان: زي ماقتلك السمعه الطيبه ليكم وليها ..اني اكبر منك عمرا ..وانت متزوج حاليا ..يعني نعتبر عطلت في الزواج لسبب واحد لأني نبي نطلع من هالدنيا بخير متاعها ..الزوجه الصالحه ..وانتم عرفتكم عن قرب..وهي شهاده اللي يقروا معاها ويقروا فيها في الخلوة خلوني نتأكد إن هي الزوجه الصالحه اللي ندور عليها ...
نجيب ابتسم: ع العموم الموضوع في ايدها هي والوالد نكلموه وناخدوا رايها وأن شاء الله خير
سليمان ابتسم بإرتياح : إن شاء الله ..
طق باب الحوش ناض نجيب فتح وفي هاللحظه سليمان ناض بيمشي ..خشوا أم ريما واختها رنا وسلموا ع نجيب وعينهم جت في سليمان وهو يسلم ع أصيل
كان لابس سوريه عربيه سودا فيها زخرفه ذهبيه من جيهة الجيب متاع الصدر ومن جيهة الرقبه ولابس بلغه لونها ذهبي ولابس نظراته العسليه الشفافه ويتكلم والنقرة واضحه
نجيب: احمم ..تفضلوا عمتي ورنا ..رفعهم نجيب جهة الدروج اللي يوصل لشقته وولا يسلم ع سليمان
سليمان وهو طالع من الباب: رقمي عند أصيل نستنى في ردكم بفاارغ الصبر..السلام عليكم
نجيب واصيل : وعليكم السلام ..وصكروا الباب
اصيل :اختك هادي ربي يحبها اللي بعتلها الشيخ سليمان
نجيب بضحكه : إن شاء الله خير...
يتبع .....
#GomanFared
