الحلقة(80)
اللي خططله نجيب مع صالح كان كالتالي..سمع بواحد من جماعة(*******)يبي يبني مقر ليه ويكون متفرد ومايشبه شي والشخص واحد يتعامل بالرصاص بس حد يغلط معاه يطربقه ..المهم نجيب قدر يخترق مكتب صالح وخلا واحد من اللي يخدموا معاه يخدم لصالحه ..ولأن صالح ماكانش مهندس حقاني كان واخد الشهاده بالتزوير بسبب الكتاف اللي عنده في الدوله ايام القذافي فكان ياخد في تعب المهندسين اللي يخدموا معاه وينسب فيه لنفسه ويسكت فيهم بالفلوس،،المهندس اللي قلنا عليه عطاه تصميم مدايرنا لجماعه تانيين وكيف باديين ينفدوا فيه ..المهم سمعوا ومشوا طول لهذاكا الشخص اللي خلا صالح يصممله المقر وقالوله انه مسروق وصالح عرف وهرب لفتره ..لكن نجيب عنده جماعه في(*****) حكالهم ع اللي داره فيه صالح وانه يبي ياخد حقه منه اتفق معاهم يسكتوا ع الموضوع ويوهموه أنه مات في أرضه بش يولي للبلاد وفعلا صالح بلع الطعم وولا قرر انه يمشي لنجيب لأن عرف ان هو ورا القصه...
طقطق
نجيب : خش
ولاء خشت: باش مهندس في واحد برا يبي يشوفك اسمه صالح صابر
نجيب: 5 دقايق بالزبط ودخليه ..نجيب دار اتصالاته ..وبعد 5دقايق طق الباب نجيب حط تليفونه وحط ايده ع المكتب وهو متكي ع كرسيه
نجيب: خش
خش صالح وهو يشبح لنجيب شبحة حقد مع ضحكه مستفزة
صالح بتهكم: كيف حال يابطل
نجيب بإبتسامه شماته:خير من حالك
قعمز صالح وهو يشبحله
صالح: تعرف اتكتك طلعت ...لكن مش معاي اني لاني نطلع منها زي الشعره من العجين
نجيب بضحكه ساخرة: باهي ياشعرة انت شن تحب تشرب
صالح: قهوة ساده ....
نجيب كلمهم يجيبوا القهوة
نجيب: تربيت ع أني نكرم الكل كريم ولالئيم ..
صالح ابتسم بسخريه: مش جايك بش تحكيلي قصه حياتك
جايك بنسأل سؤال وعارفك حتجاوب عليه
نجيب رفع حواجبه بملل: اللي هو
صالح: انت ورا الموضوع اللي صار
نجيب ببرود: ايه
صالح : مش خايف من ردة فعلي كيف حتكون ولانسيت اللي صار معاك ..
نجيب: مش مهم ادير مادير ماك رابح شفت ورفع ايده فوق صحتي ميه ميه واموري عال العال...
صالح: سلم بنت عمي الريمه
نجيب بغضب: تجيب اسمها ع لسانك نقصه من منبته
صالح: غير اهدا اهدا ...ع العموم اللي درته مش حيعدي هكي صدقني
طق الباب جاب العامل القهوة حطها وطلع
نجيب قدم للاب توب :كان ماعندك شي مهم تقوله اشرب قهوتك وتسقد وقعد نجيب يخدم ع اللاب توب
شبحله صالح بغل وشبح لفنجان القهوة اللي كان البخار يطلع منه دلاله ع انه سخون ناض من مكانه خدي الفنجان وبزعه ع اللاب توب وجت ع ايد نجيب
نجيب قام عينه فيه وقعد يشبحله بحده
صالح : حنحرقك انت ومستقبلك كله والأيام جايه ولف ومشي طلع
نجيب قام تليفونه واتصل برقم محدد: اهو طلع من عندي توا....
طبعا الجماعه هادم متاعين الشخص اللي طلب من صالح يصممله المقر..طلع صالح بسيارته طلعوا وراه راجوه لين يخش في مكان مستخطي علقوا عليه بسياراتهم نزلوله وطلعوه من سيارته وخدوه ومشوا....
***
اليوم بنطلع بناخد الحاجات كلها
ندى: بنطلع معاك
امينه: وانتم
جمانه واريج لاحياة لمن تنادي
امينه: نكلم فيكم اريج جمانه
الزوز مع بعض: هاه ..!
امينه: ماتقولوليش خيركم انتم الزوز بالذات اأريج وحني في قبرص جوك حلو ومن لما روحتي انقلبتي شن في
اريج : خايفه من النتيجه بس
امينه: وامتى تطلع
اريج : بالك اول اسبوع في رمضان
امينه: ان شاء الله ناجحه ماتخمميش وانتي جمانه ماما شوفي روحك كيف وليتي حرام عليك اللي ديري فيه لروحك
جمانه بإبتسامه مصطنعه: خيرني ياماما مافيا شي غير نفكر في النتيجه
امينه: لماتكذبي وجهي يولي احمر وعيونك يصغروا
جمانه : ههههههههه
ندى: صح والله 😂
جمانه: زيديها انتي 😒
امينه تنهدت: ره حاسه بيكم انتم بناتي وقلبي حارقني عليكم لازم تعرفوا ياماما انه كله خيره وماتفكروش هلبه وتحملوا هم سلموا امركم لله وهو أعلم باللي يصلح بيكم
اريج وجمانه ابتسموا لأمهم
ندى: نحبك ماميتي 😚😚
امينه: وحتى اني نحبكم غزالاتي جوها يجروا وخشوا في حضنها ع خشة بوهم
فرج بضحكه: القطوسه الكبيرة وقطيطساتها الصغار
ضحكوا كلهم
فرج: ربي مايحرمني منكم❤
***
في حديقه عامه..
شاده ايده وداوي فيها ودموعها ينزلوا
ريما : عطيه مايحرقه الحيوان هاذا
نجيب بضحكه: خلاص من بكري وانتي نفس الدعوة ولاهبي 🤣
ريما ضحكت من وسط دموعها: يستاهل
نجيب يسمحلها في دموعها بإيده التانيه: خلاص ياسر من الدموع
ريما شبحتله : توجع فيك
نجيب ابتسم : كيف تبيها توجعني وانتي شادتيها 💓
ريما ضحكت: باه كويس كان هكي وطلقت ايده بش ادس ادوات الاسعافات في الشنطه متاعهم
نجيب بتصنع: آااه
ريما بخوف: خيرك
نجيب: ايدي
ريما شدتها مرة تانيه: مش قتلي ماتوجعش فيك
نجيب يشبحلها بهيام : لما تشديها بس ماتوجعش فيا
ريما ضحكت وطلقت ايده وناضت
نجيب: وين؟
ريما بإبتسامه: وراي خدمه لهني وأشرت ع راسها
نجيب : بديت نشك ف إن عز افندي دايرها قصدا يحط الخدمه كلها ع راسك بش ماتلقيش وقت تشوفيني فيه
ريما :هههههههههههه حرام عليك هو بروحه مشغول لين مش قادر يحك راسه
نجيب: حرام عليا،،واجعك شكله
ريما: نجييب 😑
نجيب ضحك: قلبك هذا ليا نبيه يحس بيا اني بس
ريما ابتسمت : علاش هو لمن عايش اصلا ❤
نجيب شد ايدها وقربهاليه وباسها من داخل بعمق...
ريما قلبها يدق بقوة وحاسه روحها بذوب من الخجل
قام راسها وشبحلها: نعشقك ❤
ريما تحشششمت وجبدت ايدها: باه كويس هي باي ومشت تجري وهو يضحك عليها
ريما"هذا بيجلطني برومانسيته الزايده آاااه ياقلبي يامبهاك يانجيب الأول ..انبصر انبصر ..😂"
التفتت شبحاته ماشي لسيارته شبحلها وبعتلها بوسه طايره ريما ابتسمت "انحبه ياناس😍"...
***
العشيه طلعت أمينه هي ندى للسوق بش يبضعوا لرمضان اللي مازال عليه اربعه أيام..أريج طلعت هي وسوسن صاحبتها بش تشري معاها حاجات البتات..وجمانه في الجامع
سوسن وأريج مقعمزين في كافي ...
سوسن : ووواك عليا قداش طلعه طلعتها وقاعده ماكملتش
أريج: انتي ماتكتريش لبس بس لإن جسمك حتغير بعد الزواج
سوسن مركزة مع أريج وجهها أصفر وضاعفه وعيونها ذابلات
سوسن: روجتي شن صاير معاك
اريج شربت النسكافيه وشبحتلها: شن بيصير يعني
سوسن : روجتي عارفه كلمة انسي ساهله لما تنقال وصعبه لما تتنفد لكن إنتي لازم تنسي ماتقعديش حابسه روحك فيه وفي ذكرياته هو مكتوب عليه يكون ماضي في حياتك وبس وإنتي لازم تتعاملي معاه ع هالأساس
أريج : وقلبي المجروح المفتفت كيف نديرله قوليلي مش قادرة ياسوسن..خنقتها العبرة..عندك علم شفته في قبرص
سوسن بدهشه: شفتيه!!
اريج وشاده بكيتها: ايه ومعاه وحده شاد في ايدها ويضحكوا ونظراته ليها تشبه نظرات ليا هي نفسها ..طلعت تليفونها وفتحت الأنستا وورتها الصورة ..شوفي
سوسن تشبح للصورة وعيونها تعبوا دموع: خلاص هذا اكبر دافع يخليك تنسيه ويخليك معاش تذكيرله شي لأنه طوي صفحتك ولاكأن يوم فتحها خلاص خليه مايستحقش تذكريه
اريج دموعها ينزلوا وحاطه صوابعها ع فمها وتشبح لواجهة الكافي : جرحت معز بسببه
سوسن : كيف
اريج: شاف اللي صار وقعد مشغول عليا يتصل بيا في اليوم قريب 20مرة مانبيش نرد أخر مرة رديت ماخليت ماقتله يا سوسن كلام جارح هلبه
سوسن مسحت دمعتها: مسكين هالمعز متحمل منك كل شي قداش تعذب في حبك
اريج تبكي: اني إنسانه سيئه وأنانيه مانستاهلش واحد زيه يحبني ..
سوسن شدت ايدها: بالعكس ياروجتي انتي طيبه وحساسه شوفي كيف تبكي ع خاطر وجعك واضايقتي من نفسك لأنك جرحتيه ..تبي الحق ياأريج من أول ماشفته وأني حسيت انه هو أحق بيك من ضرار ...
اريج شبحتلها وسكتت
سوسن: ارمي الماضي ورا ضهرك زي ماغيرك رماه وفكري في اللي جايه وأنتي متفائله انه حيكون أحلى بهلبه
اريج حطت ايدها فوق ايد سوسن: ربي يكملك ع خير ويهنيك حبيبتي
سوسن ابتسمت: وربي يفرحلك قلبك ويجبره أحلى جبر ياارب
ضحكوا الزوز لبعض بعدين كملوا النسكافيه متاعهم وأستأنفوا جولتهم في السوق
....
جمانه هذا اليوم في الجامع كملوا بكري اتصلت بأصيل يجيها قاللها بيعطل شويه وجتها وحده من المشرفات
:اخت جمانه يستنوا فيك برا
جمانه استغربت اصيل قاللها بيعطل "زعمه ماصارلاش من المشوار " ..طلعت وانصدمت بفيصل قدام الجامع واقف ع سيارته ويراجي فيها تلقائيا لفت وجهها جهة الباب الرئيسي للجامع متعرفش علاش دارتها بس حركه لاإراديه منها مالقت حد ..معاش عرفت شن ادير ..شويه وقدمت لفيصل
جمانه بغضب: أنت شن جابك
فيصل بإبتسامه مستفزة: جاي بنروح بمرتي
جمانه تشبح ايمين وايسار وخايفه : من قالك تجي
فيصل : حد..اني كلمت اصيل وقتله ماتعبش روحك تو نروح بيها أني..
جمانه زفرت بقوة وتشبح في الطالبات طالعين من الجامع ويشبحولهم مشت طول وفتحت باب السياره من الخلف
وركبت وسكرت الباب
فيصل جاها والروشن كان نازل: بلاش من حركات الصغار هادي واركبي لقدام
جمانه : تبي تروح بيا بنركب هني مش عاجبك ننزل ونكلم خوي هو اللي يروح بيا
فيصل خبط ع باب السياره : به به ....ومشي ركب
في هاللحظه سليمان كان واقف ويراقب في كل شي وهو مدرق زبط فيصل هو نفسه اللي جاه قدام العمارة ولاحظ إن جمانه مش متقبلاته نهائي وأذكر الكلام اللي قالاته لأم حمزة ..سليمان كان في قمة الغضب والغيره لكن عجباته حركتها لما ركبت الللتالي ...راجهم لين يمشوا وطلع من الجامع..
..
فيصل بعصبيه: الجو اللي ديري فيه هذا مش حنصبر عليه هلبه فاهمه وحطي في راسك انتي مرررررتي مررررتي اديري ماديري انتي ليا وهذا أمر واقع ماعندك وين تهربي منه
جمانه ساكته ومتجاهلاته لكن من داخلها مقهورة فعلا هي مرته وهذا شي ماتقدرش تغير خلاص نزلوا دموعها اللي كان مدرقهم الخمار....
***
ندى: شن رايك ماميتي نتعشوا هني
امينه وهي تسوق وتشبح للمكان: مش عارفه ماقلتش لبوك
ندى: كلميه توا ..ولاتونكلمه أني ..اتصلت ندى ببوها
ندى: ايوه بابا...شن جو...الحمدلله....لاحبيبي غير اني وماما طالعين للسوق قلنا نتعشوا برا شن رايك.....باهي ......باهي بابا تونبعتلك العنوان في رساله ..تمام بابا ...باي
أمينه: شن قالك
ندى بضحكه: قال باهي وابعتولي المكان وين بش نجي نتعشى معاكم
امينه ضحكت
***
وصل فيصل بجمانه للحوش نزلت بسرعه وبتفتح الباب من الربكه والخوف طاح المفتاح قامته وقعدت تفتح فيه انفتح خشت بسرعه بتسكر لباب شده فيصل برجله
جمانه : شن في
فيصل: بنخش
جمانه: علاش
فيصل: شنو علاش بنعاود الأغنيه اكثر من مرة اني راني راجلك افهمي دف الباب وخش وسكره
جمانه: ارجوك اطلع
فيصل مشي قدامها وخش للمربوعه وهي لحقاته لقاته قعمز
فيصل: بنستني لين يجوا الأولاد وعمي بنسلم عليهم لأني مسافر
جمانه سكتت خشت وسكرت الفاصل بالمفتاح وخلاته برا..
**
اريج: هاه قالولك باهي
سوسن : يس ..ضحكوا الزوز وخشوا للمطعم
اريج: حيي ماما وندى
سوسن: الله ؟
شبحولهم ومشوا
امينه: اهلا
سلمت عليها سوسن وسلمت ع ندى وقعمزوا
اريج: خيركم واخدين طاوله كبيرة
امينه: بوك بيجي بعدين شوي
سوسن انحرجت
اريج : زي بوك خيرك نسيتي بابا لما كان يرفع فينا للمدرسه وكان ديما يلبس فيك
ضحكت سوسن: ايه ع خاطر كنت متحشمه منه هلبه..
ضحكوا وكملوا هدرزة..
***
جمانه في دارها حولت ملايتها وهي تفكر "يااارب خلصني منه يااارب معاش قادره نتحمل "..نزلت لوطا ومشت للمطبخ كانت عطشانه فتحت التلاجه وطلعت الميه وتشرب وفي هاللحظه فيصل كان طالع من المربوعه ولف في الجنان جيهة المطبخ لقي بابه مفتوح لمح جمانه وكانت لابسه قفطان بودري نص كم ولتحت الركبه ودايره شعرها كعكه مبعثرة وكان منظرها فاتن بجسمها الحلو وبيوضيتها
عقل فيصل طار من مكانه وخشلها بخطوات خفيفه بش ماتحسش بيه .....
يتبع .....
#GomanFared
