الحلقة(40)
شاف البنت واقفه على صاحب المحل نزل من سيارته قدم شويه بش يشوفها زين
عماد"هي هي "،،بعد ماكملت مع صاحب المحل وبتركب السيارة شد عماد الباب
سرور: إييييييه علينا
عماد بضحكه: غير خيرك ههههههه
سرور بحده: اسمع مش كان تشبح فيا بنت بيوحي معناها مافي حد وياي عندي من يسلخ جلدك عن عظمك
عماد ضحك: يالطييف طلعتي آاامر كتيبه
سرور جت بتركب وتجبد الباب عماد شد الباب وجبده وهي شادته جي وجهها في وجهه للحظه سرور حست بشعور غريب قعدت تشبح لعيون عماد وخلاص وعماد حاس بشعور حلو هلبه وفرحان بهالقرب ،،استاقضت سروروبحركه سريعه خبطاته بالباب ع وجهه هو شد خشمه وهي ركبت وطارت طول بالسيارة عماد وهو شاد خشمه طلع يجري لسيارته ركب وطلع وراها
***
(صباح الخير)
(صباح الورد والفل والياسمين)
(وينك ليك 3أيام مختفي)
(لاهي شوي)
(باهي طمني عليك حتى بمسج )
(مانلهاش نفتح نت)
تفكككر
(باهي تو نعطيك رقمي)
فرح واتفاجئ
(تمام)
(092*********)
(كويس سجلته توا مشغول نحكوا اول مانفضى)
(تمام ربي يحميك)
(ويحفظك يااارب)
طقطق
جمانه: ندى تعالي تغدي
ندى : هيا هي....
****
وهما يتغدو
اريج : بتمشي غدوة جمانه
جمانه: اممم
اصيل: وين
جمانه: عرس بنت خالي
اصيل : اها
خش نجيب
جمانه: اغسل ايديك وتعالى
نجيب: لالا مستعجل،، ركب فوق
جمانه: ضاعف ومش عاجبني
اريج: حتى اني لاحظت
أصيل سيب كشيكه وشبح لجمانه:بدي يقري في الكليه
جمانه: الله !
اصيل :والله
نزل نجيب سكتوا خش شرب اميه وطلع
جمانه: حق يقري في ريما
أصيل: أيه كيف عرفتي؟
اريج: حقق؟
جمانه: يومها مشيت لريما في الهندسه جت وحده قالتلها إن نجيب بيولي يقري في الكليه طلبة الدراسات وريما تقرا في الدراسات
ندى: به أصيل تشوف فيهم
اصيل: لاحظت إن يدور في ريما هلبه وين مايلقاها واقفه ع أستاذ عز اللي قلتلك عليه يعصب هلبه ومرات يوقف معاهم
جمانه ابتسمت: زي ماتوقعت
اريج: مولي ع خاطرها
ندى: غريب خوي هذا يعني في باله لو بيوليلها بتقبل بيه
أريج: ماتندريش
ندى: مستحيل بعد اللي داره فيها
جمانه ساكته
اصيل: نتمناها ترده مش امتى مايبي يسيب وامتى مايبي يرد
****
نزلت تجري لحقها وقف قدامها
سرور: والله نعيط
عماد: صلي ع النبي ،،اني جايك لخدمه خيرنا
سرور برفعه حاجب: خدمة شنو بتنقش المقيوض ولابتيكيب الغييبه 😒
عماد قعد يضحك : ههههه والله تهبلي
دفاته وجت بتخش
جي واحد لابس عسكري قدم جيهتها
:خير سرور خير بلاه هذا
سرور شبحت لعماد : لالاشي كان يكلم فيا ع الخدمه
عماد قدم وتصنع الجديه: نبي نخش للمعمل ونشوف شنو عندكم
الولد: بالله علاش موظف بلديه ؟!
عماد شبح لسرور ع جنب وبعدين شبحله: عندي مناسبه يوم التلاتاء ونبي نوصي ع حاجات هذا كل شي
سرور: قتلك ياموسى
موسى: تمام خش معاها
عماد شبح لموسى زين وخطم من جنبه وكمل وهو سرور للمعمل
عماد: شنو يكونلك سبع البرمبه
سرور: وأنت شن دخلك
عماد بمكر: جووو حاطه خطيبك ع باب المعمل بش يحميك سوبرمان ههههههه
سرور انغاضت: مش خطيبي هذا ياجل اختي ومعاش تدخل في اللي مالكش فيه وأمشي وأنت ساكت
عماد فرح: ربي يحفظه ياجل اختك ويبعتله عديل سمح يشبهلي يااارب
سرور شبحتله ع جنب وبعدين مشت قدامه وع وجهها إبتسامه خجوله...
***
:معروف من قبل متكبر ويحب روحه بس
لارا تبكي: انا كثير مقهورة منو وبدي حاسبوا ع اللي عملوا فيي
: كويييس وأني حنخليك تحاسبيه حساب عسير
لارا ضيقت عيونها بإستغراب: كيف
: .......
***
هي فاتحه
سرور : فاتحه ولافضانيه مادخليش انت اختاي
وخلصني
عماد ابتسم وقعد يشبح للعرض: عندك علم ام صاحبي قعدت تشكر في المقروض والغريبه هلبه
سرور : كويس
عماد قعد يضحك
سرور شنو زبون
سرور بتهكم : لا بدله كبيية
عماد :هههههههههههههههههههههههههههههههههههههههه
البنت: دمك خفيف من يوم يومك
سرور بإبتسامه صفرا: شويه من اللي عندك
البنت تجاهلتها وجت لعماد: تفضل ذوق هذا
عماد بمكر: هاتي ترا
سرور تشبحله
عماد: حاجه صح
البنت: بجديات عجبك
عماد: اطلع طول
البنت: دامك أول مرة تجينا ليك صفرة هديه ع حسابي
سرور بغيظ: جديده هادي
البنت : مش لأي زبون في ناس مميزة
سرور بنفس الغيظ: وشنو اللي ميزه بالله
البنت تشبح لعماد بإعجاب: كل شي فيه
سرور بحركه تلقائيه من الغيظ جبدت عماد من إيده: معليشي ماما هذا زبون جايني اني وهني مكان خدمه وتو خليني نشوف شغلي
عماد فرحان بشدة إيده وعاجبه الجو
البنت شبحت لسرور من فوق للوطا ومشت
سرور تشبحلها بأزدراء: ميزن دمك أوووف ،،وشبحت لعماد لقته يشبحلها ومبتسم 😁
سرور: إبتسامتك عبيطه ع فكيية
عماد ضحك
سرور: بسرعه اختاي وخلصني
عماد: اطلقيني به 😁
سرور شبحت لإيدها وجهها ولا احمر طلقاته طول وبعدت وربعت إيديها وبحده: هيا خلصني 😳
عماد قعد يضحك عليها
***
جمانه كان مقعمزة تقرا في نهايه الكتاب كملاته وسكراته "مش عادي كان نلقى يقعد عندي"
فتحت الفيس وخشت ع الرسايل لقت سليمان مسكر
بعتتله رساله وصكرت وناضت بتوتي روحها للجامع...
***
أريج في العياده تفك في الجبس وكان مسؤول ع حالتها دكتور لكن استغربت المرة هادي بدكتورة جايتها وكان حلوة هلبه وأنيقه وفي أخر العشرينات
الدكتورة بإبتسامه: اريج صح
اريج: ايه
الدكتورة: تمام استني شويه ،،تعالى هي
خش الممرض اللي بيفك الجبس والدكتورة واقفه عليهم وكل ماأريج تقيم عينها تلقاها تشبحلها ،،كمل المرض شغله وناضت اريج تجرب في المشي ع رجلها
الدكتورة: شن تحسي
اريج: الحمد لله كويسه ولت
الدكتورة : الحمد لله ع السلامة ،،موصييني عليك ره
اريج أستغربت: منو؟
الدكتورة شبحتلها وأبتسمت: صديقي الأستاذ ضرار عبدالحفيظ
اريج نار الغيرة بدت تشعل: أها
الدكتورة : شكلك تخصيه هلبه لليوم الصبح اتصل بيا ووصاني عليك
اريج "ماشاء الله اهو عنده وقت ويتكلم"
الدكتورة: ع العموم إنتي محظوظه ضرار البنات عليه زي النحل ع العسل لكن هو ماعطي وجه لحد
اريج "يعطيك نحل يهجم عليك ومايخلي وين يقرصك"
اريج بأبتسامه صفرا : اها
الدكتورة: زمان كان ممكن يكون بينا مشروع ارتباط ره كنت مرته توا تنهدت كله نصيب برغم أني ماقدرتش نقبل بحد بعده لأن ماريتش حد زيه أو خير منه
اريج خلاص قريب تتفجر : امم باه ربي يعوضك ،،هيا نستأذن وطلعت أريج وهي منغاضه ع الآخر
****
بعد المغرب
ربيع: تي غير علاش متعب روحك ياعمده
عماد: فرحان بيك ياطيري
سليمان: تو انت لما قلتلك جيب حلويات بش نرفعوهم معانا للبلاد درتلي قصه وتو ماشاء الله مشيت حجزت بروحك بروحك
عماد: باه وين المشكله في الموضوع 😌
سليمان: الله لايجيب مشاكل بس مش عارف علاش حاسس في إن
عماد : لا إن ولا لعل خالتي فتحيه منين شكرت فيهم تشجعت ومشيت حجزت ومالقيتش هديه خير من هكي لربيع
ربيع: ياسيدي بارك الله فيك وجودك بروحه هديه😁
عماد: الحمد لله اللي في حد قدر نعمة وجودي 😏
سليمان : 😑😑
ربيع:😂😂
***
اني نبي نفهم أنتي علاش حارقه دمك
اريج بعصبيه: شنو لاش حارقه دمي اللي قلته هذا مايحرقش الدم
سوسن : يابنتي مفروض تفرحي فضلك إنتي وجاك من الباب
اريج : إنتي مش فاهمه ؟علاش وصاها هي عليا ترا
سوسن: علاش
اريج: لإنه يبي يغيضها بيا
سوسن: شن قصدك
اريج: واضح من اللي حكاته شكله كان يبيها وممكن تكون هي اللي فاتته
سوسن: ويبي يغضيها بيك
اريج: هاه وصلت وأخيرا
سوسن قعدت ساكته
اريج: لاوقاعد يكلم فيها وقالت "صديكي"
سوسن: باه انتي ماديريش مشكله وحاولي تفهمي منه قبل
اريج بغيظ: هو اني محصلاته بش نفهم منه مكلم الخانوم هديكا من صباحات ربي واني من لما سافر مافكرش يبعتلي حتي مسج
فجأة في رقم دولي خش إنتظار
اريج: اذكر القط ،،اهو رقم دولي يتصل شكله هو
سوسن: بهدوء اريج ارجوك
اريج : ومن قالك بنرد خليه هكي
سوسن: ووواك منك إنتي
***
نجيب مقمعز في داره يوتي لفعالياات مؤتمر بيقام في طرابلس طلبوه بالأسم فيه وهو وكم مهندس ومهندسه المهمين في ليبيا وحيحضر المؤتمر مهندسين غرب وعرب
وكان يحضرله بشغف شديد ،،تعب شويه ،،خش ع الفيس بش يشوف صفحة المكتب دار دورته عليها ،،جاه إشعار من القروب متاع كلية الهندسه خش يشوفه لقي طالبه ناشرة صورة لعز العرب وريما تمدح فيهم وتشكر فيهم ع عطائهم ومساعدتهم للطلبه وكاتبه في النهايه"اروع ثنائي "
نجيب قعديهز برجله تلقائيا ومنغاظ هلبه خش ع التعليقات ويقرا في عبارات الثناء لين شاف رئيس واحد من الاقسام معلق "من زمان وهما متألقين كطلبه وتوا كأساتذة ثنائي ذهبي "
نجيب"ياعليك كسر رقبه وخلاص "فجأة خشت ريما علقت شكرت البنت وكتبت في النهايه الشكر لله اللي حط الأستاذ عز العرب في طريقي العلمي "
نجيب:😑😑
خش عز ورد عليها : شكرا استاذه ريما كلامك هذا شرف ليا
نجيب معاش تحمل سكر اللاب توب وناض طلع من الدار
نزل لوطا لقي خواته يتفرجوا
نجيب: امي روحت؟
ندى: لالا بتبات في حوش خالي ليوم الخميس
هز راسه بأيجاب وطلع قعمز في الجنان ،جي عينه الورد
فلاش باك
شوف غادي
نجيب: انتي زارعتيه
جمانه: لالاا خطيبتك العسوله
نجيب ضحك
جمانه: قالتلي قولي لنجيب لما يكون مضايق من شي يجي يقعمز بحداهم
شبح للورد وأبتسم
الوقت الحاضر
ناض من كرسيه ومشي قعمز بحدا الورد قعد يتفرج عليه ويشم في ريحته نفسيته أرتاحت وحس بشعور اندفع فيه بقوة خلاه يطلع تليفونه من جيبه ويضرب ع رقم معين
في نفس الوقت
ساره وريما ورنا أختها مروحين في الطريق واللي تسوق سارة
سارة: تو بالله شن معناه الجو اللي يدير فيه
رنا : شي ماهضمته ديما نشوف في اختي خساره فيه
ريما اضايقت: خيركم بالشويه مش هكي
سارة: رنا هي كلها مرارة وحدة بتفقعهالي اختك
رنا: أني فقعتهالي من زمان
ريما بضيق: غلطتت لما حكيتلكم اصلا
سارة: انتي غالطه لأنك مازال تحكي عليه من الأساس
رنا وهي تشبح لتليفونها : لكن والله عز العرب الباين عليه حكايه 😍عجبني تعليقك عليه وهو شنو رد
سارة: ترا اقريلي
قرتلها رنا تعليق ريما وردعز عليها
سارة بخبث: طالعين ع بعض
رنا: هلبه
ريما بحده: عز زميل فقط لاغير وياريت تسكروا ع موضوع ،،مدت أيدها فتحت الراديو
وكانت كيف باديه اغنية إليسا"بتمون" علت الصوت وقعدت تغني معاها
سارة ورنا بغيض: آاااااااااه
ريما تضحك: بتمون ع ضحكي انا بتمون بتمون ع الدمعه وإلك بتمون وقعدت تغني من قلبها لأن كلمات الأغنيه تعبر عنها فجاة رن تليفونها شافت الرقم انصدمت
سارة: ردي
ريما : لالا مش مهم
سارة شبحتلها بعدين شبحت القدام، اما ريما علت صوت الرديو وفتحت الخط وجي مقطع : مابخون لو حبك إلي بتخون بجنون شوبحبك انا بجنون وباقي المقطع لين تمت الأغنيه صكرت عليه
نجيب سكر وهو طاير من الفرحه ناض بيمشي بعدين ولاطبس ع الورد وشمه وباسه ومشي وهذا كله جمانه كانت تشوف فيه من فوق ومبتسمه ...
يتبع .....
#GomanFared
