الحلقة(45)
طول الطريق كانت تشبح لأختها وتفكر شنو ممكن يصير بينها وبين الراجل اللي تحبه تعرف اختها حساسه وبالذات بعد ولت تحب حساسيتها زادت أكثر وقفت أريج قدام محل ملابس وأكسسوارات رجالي
اريج : تنزلي معاي ندو
ندى بإستغراب : شنو عندك هني؟
اريج: نبي ناخد هديه لضرار❤
ندى قعدت تشبح لأختها بحزن
اريج: خلاص ندو تو نحلوها بينك وبين البوليس مان
ندى " أنتي اللي شن بيحلها بينك وبين ضرار ياهمي"
اريج وهي تفتح في باب السيارة: ماتبيش تنزلي
ندى: هيا نازله
***
غاطس في الخدمه بشكل مبالغ فيه هلبه ماحط في فمه شي غير القهوة والميه نفسيته زي الزفت ،،المؤتمر كان يستنى فيه بفارغ الصبر حس روحه مش حيقدم فيه زي ماخططله في زحمه الخدمه اللي هو فيها
طقطق
نجيب: خششش
خشت لارا
نجيب بدون مايشبحلها: شن تبي
لارا لاحظت ع نجيب شحوب الوجه من الأرهاق وزنه نزل وجاذبيته انطفت وجعها هلبه
لارا :نجيب ممكن نحكي
نجيب: لا
لارا: مشان الشغل
نجيب : خلاص ناديني حضرة المهندس
لارا بيأس: حضرة المهندس أني جايه اعتذر منك عن كل شي وقلك رح التزم بشغلي طول فترة وجودي بليبيا ومارح اتسبب بأي مشكله
نجيب : كويس وتوا بري شوفي شغلك
لارا مقهورة وقلبها محروق حبت نجيب بس هو ماحبهاش تأكدت أنها بالنسبه ليه كانت مجرد نزوه وأنه يحب ريما بجديات واللي هو فيه من ندمه ع تفريطه بيها وبحبها
طلعت لارا ودموعها ع خدها ...
***
وائل: وحني أخر من يعلم
قاسم يضحك:والله ماعرفت اليوم ألا بالصدفه
عماد: يعني ضروري اللي يصير معاي نجي نحكيه؟!
وائل: ايه مش ع أساس عيله وحده
عماد بمزح: وأن شاء الله حنطلع منها قريبا 😁
وائل يكلم في قاسم ويأشر ع عماد: بالله عليك شوفي كيف يبتسم زي العبيط ،،لو شافت هالإبتسامه حتفوتك نصيحة مديرهاش قدامها
عماد: حتى هي قالتهالي😂
قاسم ووائل 😂😂😂😂😂
سليمان 😊
عماد:شنو ياشيخ مافيش مشاركه بكل
سليمان: نفكر فيكم كيف قاعدين تمشوا واحد ورا تاني كل واحد حيلهى بحياته وأني حنقعد في عالعمارة بروحي
وائل: زيك ياغالي
سليمان شبح لوائل وأبتسم إبتسامه ليها معني ووائل حس بشي
قاسم : كلا انا بتزوجها في الجنه إن شاء الله
كلهم قلوبهم انقبضت
عماد: بالله ياقاسم خليني فرحان
وائل: قاسم غير السيرة
قاسم يضحك: نبيكم تتهيئوا
سليمان بجديه: قاسم صايرة حاجه
قاسم ابتسم: مش يقولوا اللي يقرب موته يحس بيه وأنا حاس بيه
عماد: عليك دراما
قاسم بإبتسامه: أمانه عليكم لو صار فيا شي نبيكم تصدقوا عليا كل شي يخصني كل شي ونبيك ياسليمان اديرلي صدقه جاريه وأدعولي مانبيش نقعد بروحي في القبر نستوحش واجد...
قعدوا ساكتين ودمعوهم في محاجر عيونهم وهما يشوفوله
قاسم ضحك: كنكم ياجماعه كلنا بنموتوا ره وناض انا بنعدي نجيبلكم عشا سمح ماديروا شي ..وطلع
عماد: ماعنديش جهد نتحمل وجع فقد جديد خلاص
وائل: لاقدر الله
سليمان ساكت ويفكر...
***
ضرار غضبه واصل حده لكن كان خايف من الفراق ماتحملاش المرة الأولى ومش حيتحمله بكل خدي نفس عميق وأتصل بأريج
اريج في دارها توتي في حوايجها اللي بتلبسهم للكليه وهي تفكر كيف بتراضيه رن تليفونها فرحت لما شافت رقمه ردت طول
اريج: آلو
ضرار بحده:أيوه
اريج: كيف حالك
ضرار : بخير من ربي
أريج ضحكت بدون مايحس
ضرار: وين كنتي اليوم
اريج حست بشي من نبرة صوته تنهدت: شكلك شفتني
ضرار بحده : نبي تفسير
اريج تنهدت :.......
***
شن ندير فيك توا قولي
ندى: أاااي أييي بالله عليك اطلق
اصيل:موليه مجرمه ولازم تتعاقبي
ندى: خلاص وراس أصولي اطلق
أصيل: لا لين تتربي
ندى: وراس هويدا
اصيل ضحك وطلقها
ندى شدت رقبتها من اللتالي : شرير حارة
اصيل : تستاهلي ،،ولد خالها من عمر بوها ياقردة خليتني تخيل فيه كيف شكله وضربته حتي الضرب
ندي تضحك: باه بنعطيك حاجه
اصيل : شنو
ندى وراته شاشة تليفونها وكانت حاطه ع رقم هويدا
اصيل: بالله عليك قالت به
ندى هزت راسها ورمشت عيونها بإيجاب
قرب بياخد التليفون حاطته ورا ظهرها
اصيل: شن تبي
اريج مدت يدها : قولي ارجوك ياأميره ندى وبوسلي يدي
اصيل: حاضر ،جبدها من إيدها ولواها ظهرها وخدي منها التليفون
ندى: آيييييي يامتوحش أاااهييي
أصيل : تستاهلي هادي اخر البراده متاعك
خدي الرقم وعطاها تليفون وخش لداره طول
ندى"ياكبدي ماصدق هالخفيف"
***
ضرار: يعني صاحب خوك
اريج: إيه
ضرار: وكيف شكل صحبتهم قويه ولاعاديه
اريج بإستغراب: لاقويه ولاعاديه
ضرار: وقداش ليه يعرفه
اريج بضيق: تحقق معاي ؟!!
ضرار بقلة صبر: نسأل بس غير جاوبي
اريج بيأس: من شتي السنه اللي فاتت
ضرار: اممم
اريج: علاش كل هالأسئله
ضرار: فضول مش اكثر ،،وياريت مرة تانيه تحترميني زي ماأني محترمك وتقوليلي كل شي مرة تانيه
اريج النبرة اللي يتكلم بيها وأسلوبه جدد عليها حست وكإن مش ضرار اللي يكلم فيها
اريج:حاضر ،،عندك سؤال تاني
ضرار: تبي تصكري؟
اريج: أيه لو مافيش مانع غير تعبانه وبنرقد غدوة جامعه
ضرار بتعجب: ره اني اللي مفروض نزعل ونحرج مش أنتي
اريج: ومن قالك أني زعلانه عاديه اني
ضرار : آاااااااااه ياااارب
اريج كاتمه ضحكتها: خيرك
ضرار بتهكم: لاسلامتك مافي شي
اريج: به بنرقد
ضرار : بري ارقدي من شادك تشااو وصكر
اريج تضحك وخلاص خشت عليها ندى مستغربه
ندى : خيرك تضحكي
اريج : ضرار شافنا
ندى: اييه؟
اريج: سألني وأني قلتله وفاتت ع خير
ندى"الحمد لله "
اريج : خلاص ندو عيوني بيتسكروا سكري الضي واطلعي
ضحكت ندى بإرتياح إن الحكايه عدت ع خير وطلعت من الدار...
واريج بعتت لضرار مسج
ضرار شاف المسج" نحبك موووووووووووت"
ضرار ضحك رد عليها" غلا شوارب بس"
اريج ضحكت "حرام عليك تظلم في قلبي هكي"
ضرار"اني المرة هادي مش حنرضى بالساهل دبري راسك"
اريج ضحكت وبعتت 😚😚😚
ضرار ضحك: بتهبلني رسمي
ماباش يرد عليها وهي استنت وبعدين فيسع خداها النوم
***
(لازم نشوفك بكرا )
(ماه شفتني اليوم)
(بكرا مروح لبنغازي وضروري نشوفك)
(تمام في حديقه بحدا مدرستنا نشوفك غادي بس مش حنعطل)
(حتى أنا مش معطل)
(تمام تصبح ع خير)
(وأنتي من أهله)
***
تاني يوم ...
نجيب كان ملخبط ع الآخر المؤتمر حيبدا يوم الأحد وهو يفكر ينسحب حاس أنه مش جاهز نهائي ،،خش عليه نزار للمكتب
نزار: هاه نجيب واتي
نجيب : لحظه
نزار مركز ع نجيب كيف مشغول وملخبطه حكايته
نزار : المؤتمر الأحد
نجيب: شكلي حننسحب ومش حنحضر
نزار متفاجئ: نجيب ليك 6شهور تستنى فيه
نجيب: الخدمه هلبه ومانقدرش نوفق
نزار: بسبب قصة التدريس اللي طلعت فجأة
نجيب سكت
نزار: حاول ماتفوتش عليك هالفرصه مرات ماتتكررش
نراجي فيك برا وطلع
نجيب قعد يفكر في كلام نزار وزاد تلخبط ..
***
اريج كانت مقعمزة مع سوسن ويهدرزوا
سوسن: رغم إني هدرزت معاه هلبه ع التليفون لكن توا متوترة هلبه
اريج: طبيعي سوسو حتى انتم بتحددوا مصيركم اليوم
سوسن: ووك عليا مكبرها الكلمه تحديد مصير 😣
اريج تضحك: خلاص سوسو اهدي بش تعرفي تتكلمي معاه لما يجي
جي عصام ولد عمة سوسن واللي حيكون خطيبها شافهم من بعيد أشر لسوسن ناضت
سوسن : ادعيلي روجي
اريج بإبتسامه: ربي يسعدك ياعمري
ابتسمت سوسن ومشت لعصام وقعمزوا في مكان بعيد ع أريج بس كانت تشوف فيهم وتتأمل فيهم كيف منسجمين ويهدرزوا براحه لمحت ضرار من بعيد جاي قلبها قعد يدق بقوة زي كل مرة تشوفه فيها وهو يمشي ويشبح لسوسن وعصام وأبتسم شبح لأريج اريج دارت روحها مركزة معاهم وماتشوفش فيه لين جي خاطم حداها قال: ياااارب
اريج شبحتله ع جنب وكاتمه إبتسامتها وهو حول نظاراتها وقعد يشبحلها ع جنب بعدين كمل طريقه
اريج"خليه هكي مش حنعدل عليه😆"
***
وين المشكله لو حضرتي الدعوة عامه لأهل التخصص
ريما: تو نشوف كان في وقت
عز ابتسم: لو ع خدمة المكتب مافيش مشكله الأيام اللي اني نمشي فيها تمشي فيها معاي
ريما ابتسمت: كان هكي باهي
خش عليهم عيسى
عيسى: بتحضري المؤتمر ريما؟
ريما: إن شاء الله
عيسى: كويس حينفعك هلبه
ريما ابتسمت
عيسى: ترا بالله عز شوفلي الورقه هادي
عز : ورقه شنو
عيسى: ورقة بحث لأصيل الشريف عجبتني هلبه
عز: الولد هاذا ماشاء الله حتى أستاد عبد العزيز يشكر في مشروعه حيكون قوي هلبه
عيسى: زي مشروع خوه تذكر مشروع الملعب اللي داره
عز: كلنا عجبنا هلبه
عيسى : كان يجري بش ينفذه بس عفسوله فيها
عز: هوينا افتتحوه السنه اللي في (****) وعليه اسمه
عيسى : صحه لإيده ماخلاشي محبوس في هالبلاد الميته
ريما اذكرت فترة سفر نجيب ع خاطر الماستر ومشروع الملعب كيف كان يكلم فيها ويبلغ فيها بتفاصيل وكيف فرحته لما خداته منه شركه اوروبيه ونفذاته تجمعوا الدموع في عيونها
طقطق
نجيب: معليشي استاذ عيسى نبيك لحظه
ريما مابتش تشبح للباب بكككل وعز دار روحه لاهي ببحث أصيل نجيب تجاهلهم الزوز
ريما ناضت: هي مالا أني بنمشي عندي محاضرة بنعطيها
عز ابتسم: تفضلي
طلعت ريما ولقت عيسى ونجيب يهدرزوا فاتت من جنبهم وعيونها لقدام اما نجيب شبحلها بطرف عينه وقلبه يقربع تقربيع لما شم ريحه عطرها المميزة .....
فلاش باك
نجيب: معاش تكتري منها الريحه اللي حطتيها
ريما بإرتباك: والله شويه بختين بس
نجيب ضحك: حتى بخة وحده ساده وياريت تفوتيها مرة وحده
ريما ضحكت بخجل : نحاول
نجيب بضحكه: شن هو عطرك مميز
ريما: سرر مش حنقولك عليه
نجيب ضحك: سيورني نعرفه 😉
ريما تحشششمت لين خلاص
الوقت الحاضر
عيسى : مافيش مشكله كون هاني
نجيب: بارك الله فيك هيا نتلاقوا ومشي عيسى ولا لعز
***
امينه: المشكله مرت خوك متغيره علينا من يوم ردينا عليهم في موضوع معز
فرج: معليشي ياأمينه سايري وخلاص
امينه: باه اللي عزمت عيلة باسط حتى هما،،المشكله إن حتى هما طلبوا جمانه وردتهم اهي نجيه قاعده معاي زي قبل ماتغيرتش بكل ،،صدق اللي قال الأقارب عقارب
فرج ضحك: عقارب مرة وحدة!!المراة زعلانه عخاطر ولدها بس
امينه : ماعندها علاش تزعل كله نصيب
فرج: خلاص فكينا من هالسيرة وهي نوضي بنطلعوا
امينه بضحكه : وين
فرج : عازمك ع بورديم ماصارش
أمينه: هههههههههههههههه
فرج: هيا نوضي معاش في وقت
ناضت عمتك أمينه بش توتي روحها وهي تضحك ،،فرج كان إنسان طيب وروحه حلوة وحنين هلبه وباله واسع هلبه لكن في الجد كان يولي إنسان تاني ماكانش يحب يتحكم بس كان يحب يفرض إحترامه وهيبته بالحب والمعامله الحسنه ..وعارف زين إن الرجوله أخلاق مش عضلات وعياط
وغطرسه....
***
سوسن: الحمد لله متفقين ع كل شي
حضنتها اريج: ربي يتمملك ع خير ياارب
سوسن ابتسمت: الفال ليك أنتي وهذاكا اللي يهدرز ع الراجل وهو أصلا مش معاه
اريج ضحكت: يشبح هني
سوسن: ايه مرة مرة
اريج ضحكت : باه هي وقت خل نمشوا للقاعه
سوسن : هي
ضرار شافها بتمشي : تمام نشوفك بعدين
ولحق اريج كيف تركب للدروج ركب قدامها بسرعه ووقفها
ضرار: بري سوسن توتلحقك
سوسن تضحك : تمام
شدها من إيدها وخداها ع تركينه
ضرار: امتي تبطلي الدلال متاعك هذا
اريج تشبحله ورافعه حواجبها: اني ؟؟
ضرار : لا أني
اريج: ماندللش اني
ضرار ويقلد فيها: "ماندللش اني"
اريج ضحكت
ضرار : بترضيني ولاكيف
اريج شبحتله بملل متصنع: باه كيف تبيني نرضيك هي
ضرار شبحلها بنظرة خبيثه: بوسه مثلا
اريج بعصبيه: عينك وعين عينك
ضرار : ههههههههههههههههههههه
اريج: ترا حول بنمشي
ضرار شدها من إيدها : تعالي يامعفنه جاي يوم الأحد بنشوفك في المقهي اللي قلتلك عليه ومافيش إعتراض
اريج بإبتسامه مكتومه مع غضب متصنع: باااه
ضرار: غدوة مسافر
اريج شبحتله وعيونها تجمعوا فيهم دموع
ضرار بضحكه : ع سبله دميعاتك ،،بمنشي لبنغازي يومين ومروح
اريج : باه تمشي وتجي بالسلامه ،،خل نمشي للمحاضرة فاتت
ضرار يضحك:باه بري يانعيجتي
اريج وهي ماشيه: مبردك 😋
ضرار : نحبك
اريج اشرت ع قلبه بمعني حتى أني وركبت طول ....
***
ندى: اول مرة نديرها ونفوت المدرسه هكي حاسه روحي بنت منحرفه
قاسم يضحك: صلي ع النبي منحرفه شنو بس😂
ندى تضحك : هذا اللي حاسته
قاسم ابتسم: بسببي انا
ندى شبحتله : ع خاطرك بس عادي كان استهرت مرة وحده
قاسم قلبه يقربع ع لسانه كلمة"نحبك" بس مش قادر يقولها مايبيش يعلق قلبها فيه أكثر من هكي
قاسم : ندى
ندى شبحتله : نعم
قاسم: عطيني وعد.
ندى خافت: وعد شنو
قاسم: أنك تشدي في قرايتك وتحققي طموحك وأنك مهما وصلتي مراتب راك تنسي بلادك هيا أولى بيك من غيرها
ندى تسمعله وبس والخوف تمكن منها
قاسم ابتسم وشبح القدام: ممكن حيجن ايام اصعب من اللي عدن ويجي للناس شعورأن البلاد هظي معاش ينعاش فيها
هذكي الوقت نبيك تطردي هالشعور من عقلك وقلبك اقري برا حققي ذاتك لكن ارجعي؛ البلاد هذي تبي من يكافح ع خاطرها عمره مايصير منها إلا لو كافحنا وواجهنا وتحملنا المسؤوليه ،،وسكت شويه،، وضحينا ،شبحلها لقي دموعها ينزلوا
قاسم : هذا اللي مانبيش نشوفه اليوم بككل
ندى بألم: قاسم انت شن صاير معاك
قاسم ابتسم ويمسح في دموعها : ماصاير شي بس كلام في قلبي وخاطري نقوله لكي
رن تليفونه وناض : هي أنا بنعدي خلاص وقت ع الطيارة
ناضت ندى وتشبحله هلبه وكأنها تملي في عيونها منه
قاسم مد يده : نشوفك ع خير
ندى دموعها نزلوا ومدت يدها وصافحته شد ع أيدها بقوة وهي نفس الشي "نحبك ياطشه" "نحبك قاسم"
قاسم حول إيده : هيا سلام ومشي وهي تشبحله هلبه وهو التفت شبحلها بنظرة غريبه عصرت قلب ندى عصر وكمل طريقه لين اختفى من قدام عيونها ندى في هديكا اللحظه حست كأنه هادي أخر مرة تشوف فيها قاسم .....
يتبع .....
#GomanFared
