الحلقة(111)
فرحة جمانه وسليمان نقلوها لعائلاتهم اللي فرحتهم بالخبر كانت لاتوصف..عمران وكأنه أول مرة يجوه أحفاد..كان يبي نهار الخميس يذبح ذبيحتين يصدق ويدير عزومه ..مع الأسف هالأفعال اللي كانت بحسن نيه نتائجها سلبيه ع باقي خوته اللي كان الحسد مسيطر عليهم تماما..🖤
🌸جمانه في المدرسه كانت محبوبه هلبه تعاملها بسماحه مع زميلاتها خلاهم يحترموها ويعزوها هلبه..
في حجرة المدرسات..
جمانه كانت مقعمزة تشوف في مذكرة التحضير متاعها ع خشة وحده من الأبلات
الأبله: السلام عليكم جمانه
جمانه قامت راسها وابتسمت: وعليكم السلام
قعمزت الأبله بحداها: كيف حالك وحال الأهل
جمانه : الحمد لله ..انتي كيف حالك وحال عويلتك
الأبله : الحمد لله ..شوفي اني نبيك في موضوع
جمانه سكرت المذكرة وركزت معاها: إن شاء الله خير
الأبله ابتسمت : خير بإذن الله..عندي وخيي ماتقوليش نشكر فيه بس شهاده حق نتحاسب عليها..راجل على دين وخلق وخدام ع راسه وربي عاطيه
جمانه ابتسمت بإستغراب: ماشاء الله ربي يباركله
الأبله: آاامين ..المهم حني ندوروله في بنية الحلال ..وإنتي خشيتي خاطري وعجبتيني هلبه وحكيت للعيله عليك
جمانه وهي متفاجئه بتساؤل: كيف مافهمتش
الأبله بضحكه: واضح كلامي نبي نخطبك لخوي
جمانه: ههههههههههههه
الأبله :😕
جمانه هدت ضحك: آسفه بس طلبك ضحكني ..مش قصدي شي بس اني مراة متزوجه وحامل ..
الأبله انصدمت : قولي والله
جمانه بضحكه: والله الله..ممكن بحكم إن ملايه واسعه مالاحظتيش اني حامل..
الأبله بصدمه: هههههه..ايه صح أسفه سامحيني 😅
جمانه : ولايهمك...وربي يبعتله بنية الحلال اللي تفرحه وتهنيه
الأبله ابتسمت : آمين وجزاك الله خيرا..هي نستأذن..وطلعت وعلامات الإحراج مافارقتش وجهها ...
جمانه ضحكت وناضت وكيف جايه بتطلع سمعت صوت جاي من روشن الحجرة صوت حد يترجى ويتوسل قدمت شويه وسمعت...
:بالله عليك وخيي مش طالبه منك أكثر من 200دينار بش ندفع الإيجار مولى الحوش ناويلي اللزة المرة هادي........حي عليا وين بنمشي بصغاري ...انت..انت انتخ..انت خوي ترضالي نقعد في الشارع ..........بارك الله فيك صحيت ياولد امي وبوي ..وصكرت وقعدت تبكي..
جمانه بصدمه"أبله خديجه!!"...
.....
والله وجعتني ..مش باين عليها ياسليمان تشوفها تقول مستحيل هادي تكون محتاجه هكي وصايرمعاها هالشي
سليمان وهو حاضنها: "تحسبهم أغنياء من التعفف"..
جمانه بعدت شويه ومسحت دموعها: سليمان نبي نساعدها بدون مانجرح كرامتها فكرلي في طريقه ..
سليمان: انتي عطيني اسمها بالكامل وأني حنتصرف ..
جمانه: مانبيش نكسرها
سليمان ابتسم وباسها ع راسها: اطمني إن شاء الله مجبورة مش مكسورة..
جمانه : يااارب..
سليمان : سلملي القلب الحنون اللي نحبه بجنون
جمانه ضحكت من بين دموعها: بتولي شاعر..
سليمان : انتي خلتيني نولي عاشق ماتستغربيش شن يطلع مني💖
جمانه باساته ع خده : نحبك ..
سليمان ناض وقامها في غمره: واني نموت فيك ....
خلاص لهني وياسر خل نشوفوا غيرهم 😁
***
ريتي تقول هما اول من جايهم التوامه
لطيفه بحزن : ماهو طبيعي مش زيي اني بالزرع..
أمباركه : والنبي فكيني هما هكي لإن اللي بيتجيبهم هالصفرا مكبرين الشطحه...
لطيفه: يللا منهم لله ..
امباركه : ايه والله...وسلفتك التانيه ماتندريش شن قالولها
لطيفه: هادي بالذات سكتم بكتم شي شي ..
إمباركه: يللا سيوره نعرفوا
***
مكالمة فيديو..
وأمتى الحفله..
كنان: الخميس سنفورتي 💓
ندى بضحكه: كويس بكل
كنان: حتى عدنان جاي لليبيا الأيام الجايه فكرت نقوله يقول لخطيبته تجي اهو تتعرفوا ع بعض
ندى بإستعباط: وعلاش
كنان: ماهو بتولوا سلفات في المستقبل لازم تعرفوا بعض بكري بكري
ندى: ومن قال نولوا سلفات ع النصيب
كنان شبحلها بنص عين: عارفك تتسهوكي ..لكن تبي ولاماتبيش أني نصيبك غصب عنك
ندى بضحكه: وأني مانبيش غيرك نصيب
كنان شبحلها بحب: تصدقي عمري ماتوقعت نحب هكي ويصير فيا اللي صار..من نظرة وحده لخبطتيني ..كنان الطموح اللي حياته كلها قرايه وتخطيط للمستقبل ومشاعره تتحرك للموسيقى بس ..نظرة وحده بس منك خلاته يختصر حياته ومستقبله فيك ..طموحه انتي أحلامه انتي مستقبله انتي مشاعره ليك انتي ..خديتي كل شي
ندى تسمع في كلامه وحساته طالع من أعماقه لأنه يتكلم وعيونه معبيات دموع ويعبروا أكثر من لسانه هي ماقدرتش تقاوم مشاعرها اندفعوا دموعها وقعدت تبكي..
كنان بخوف: خيرك ندوشي قلت حاجة ضايقاتك
ندى هزت راسها بالنفي : لاالا كلامك طلع من قلبك وخش لقلبي ..نحبك كناني ...💖
كنان: كنانك وملكك بكل مافيا ..ربي يجمعني بيك في القريب العاجل
ندى تمسح في دموعها: آااامين ...
***
تاني يوم ...
سليمان عرف عنوان أبله خديجه ومشي لصاحب الحوش ودفعله الفلوس اللي عليها ودفعله 3شهور مقدم..وقاله إنه من معارفها ومباش يذكر اسمه ..وأبله خديجه كيف دبرت في حق الإيجار تسلفت من هني ومن هني وتمرمدت وكيف جت لصاحب الحوش بتدفعله ..
خديجه بصدمه: كيف ..من هذا
صاحب الحوش: قال ان من معارفك وماقالش اسمه
خديجه سارحه "يارب زعمه خالي ؟!..لكن من وينله مسكين ..استغفرالله..باهي خوي هداه ربي ممكن هو بس المبلغ كبير "
صاحب الحوش: في حاجه ؟
خديجه استاقضت ع صوته: لالا ..السلام عليكم ومشت وهي محتارة...
***
ياراجل مهازل قسما بالله مدايرين العار..
سليمان: دايرين زي اللي طالع من حوشه وماشي لحياش الناس يفسد ويكسر وياكل ويشرب ومش هامه بكل المكان اللي هو فيه لإنه ببساطه مش ليه..
احمد : هي عاصمه وللكل..بس عاد مش هكي ..عاصمه البلاد هي وجهها مفروض نحافظوا عليها ونطلعوها بأحسن صورة..
وائل: ياودي ماغير يلموا ارواحهم ويتسقدوا لمدنهم ويريحونا...
سليمان : مش حيطلعوا بالساهل لاقيين كل شي هني ..
وائل: يطلعوا ولو بالقوة ...
سليمان وربيع شبحوله بإستغراب لأن تكلم بنبرة فيها تلميح لشيء ما..
سليمان: وائل في حاجه تعرفها ؟
وائل بضحكه: زي شنو
سليمان: لو نعرف ماكنتش سألتك
وائل ابتسم: مانعرف شي أكثر من اللي انتوا تعرفوه
سليمان شبحله بشك وسكت ..واحمد ماباش يناقشه..
***
بتسافري خلاص..
اريج : ايه هذا هو جمونتي مفروض نقعد شهر قعدت بزايد وفي ورانا خدمه مهمه غادي..
جمانه: وامتحاناتك النهائيه ؟
اريج : حنروح قبلهم بأسبوع نديرهم ونولي
جمانه: ربي يفتح عليك ..
اريج : اللهم آاامين أجمعين..شنجو النونوات..
جمانه بضحكه: نراجي فيهم أمتى يبدوا يتحركوا ويرفسوا..يومها تحمست هلبه لما تحركوا بنوتات ملاك وريما وقعدوا يرفسوا..
اريج بمزح: حيي عليك انتي زوز وولاد تو يديرولك حلبه مصارعه داخل..
جمانه : هههههههه ياوخيتي نجيهم خل يديروا اللي يبوه حبايب ماما...
اريج: ههههههههههه
***
وحمها واعر لازم تقعد راقده عندنا في الفترة هادي
عماد: مش خطيرة حالتها
الدكتورة : لالا اطمن في هلبه زيها..لازم يقعدوا تحت مراقبه طبيه فترة الوحم لإنه يجيهم قوي هلبه
عماد: إن شاء الله خير
الدكتورة: اطمن خير إن شاء الله...
***
في الليل...
سليمان كان مقعمز ع اللاب توب ويتفرج ع مناظرة ومنسجم معاهم ع الأخير ع خشة جمانه وفي ايدها طاسة عصير برتقال فرش حطتهوله ع الطاوله وهو مش مركز معاها ..قعمزت قريبه منه وقعدت تتفرج معاه وانسجمت حتى هيا ..قعدوا فترة لين تمت المناظرة..
سليمان: الله أكبر..ربي يكثر من أمثاله ..
جمانه: بجديات شي يفرح كلامه قوي هلبه افحمه ..
سليمان التفتلها وابتسم: حوريتي امتى جيتي
جمانه تأشر بإيدها: من بكررررررررري
سليمان ضحك وخدي بوسه من خدها بالصوت ..
جمانه : ههههههههههه
سليمان : عسسسل بنزمطك يوم من الأيام
جمانه : ههههههههه ...ايه قولي اللي قدامه مافهمتاش ملحد ولاعلماني ..
سليمان: ع أساس علماني ..بس كلامه يبين انه اقرب للإلحاد..تعرفي جمانتي العلماني او الملحد مش بخطر الفئة الجديده اللي بدت تطلع توا
جمانه : قصدك داعش
سليمان : ولا داعش بخطرهم ..الأخطر هما الفئه اللي طلعوا بطريقه غريبه اللي يستخدموا في الخطاب الديني في غير محله ..جماعة الخطاب الديني الجديد..اللي قاعدين يلبسوا ع الناس في دينهم ويميعوا فيه ...
جمانه : زي (**********)و(*********)
سليمان: بالزبط وغيرهم هلبه وتحسي انهم مدعومين دعم قوي حتى ظهورهم بطريقة غريبه كلهم بدوا يطلعوا مع بعض ..مستغلين ميول النفس البشريه للهوى والملذات..فيلعبوا عليهم بالفاظ ويستخدموا في الأحاديث والآيات ويغيروا في تفسيرها بش يحللوا الحرام ..وطبعا الإنسان المؤمن لما يرتكب معصيه يأنبه ضميره والنفس اللوامه تبدا فيه ويندم اشد الندم ..وفي اللي مبتلى بمعاصي مايقدرش يخليها زي شرب الخمر الزنا وغيره ويحاول يخفي ع قد مايقدر هالشي ع الناس مش بس خوف من الناس بل لإن فطرته السليمه مش راضيه ع أفعاله..فلما تحلله الحرام
بالأحاديث والقرآن حتغلب النفس الأمارة بالسوء ع اللوامه ويبدا يرتكب في الحرام بأريحيه لإنه حصل رخصه لهذا..
جمانه: كأنهم ماصدقوا
سليمان: صح ...شوي شوي الدين يبدا مايع لأبعد حد وممكن يختفي نهائي ...خطوة خطوة ..يعني اول شي نحلل الحرام ..بعدين نطعن في كل شي يحرم الحرام ..بعدين نبدا في تحريف تفاسير القرآن وهكي لين يوصل الإنسان لمرحله الإلحاد والإعتماد التام ع هواه في الحياة ..لان كل ماكان يستند عليه دينيا اندثر...
جمانه: اعوذ بالله ...
سليمان: ربي يثبت قلوبنا ع دينه
جمانه : اللهم آااامين...
***
تاني يوم
في المدرسه ..
جمانه كانت مقعمزة في حجرة المدرسات وكانت مقابلتها ابله خديجه سارحه وتخمم..جمانه قعدت تشبحلها...
جمانه : ابله خديجه..
خديجه سارحه
جمانه ضربت بصوابعها ع الطاوله: ابله خديجه
خديجه استاقضت : نعم ابله جمانه
جمانه بضحكه: وين وصلتي
خديجه ضحكت وبعدين تنهدت: قاعده في هالدنيا وهمها
جمانه بنبرة هاديه ومريحه: خيرك خديجه شن صاير معاك اعتبريني اختك واحكيلي..
خديجه قعدت تشبحلها هلبه وابتسمت: توا عندي حصه في الإستراحه نشوفك ونهدرزوا إن شاء الله..
جمانه ابتسمت وهزت راسها بإيجاب...
......
في الإستراحه
اني ارمله زوجي ميت من 2011 ماكانش يحارب بس رصاصه طايشه انهت حياته .
هو كان يخدم في عمل حر وأني بخدمتي هادي حياتنا كانت ماشيه كويس ولله الحمد سكنا في الإيجار بعد مابعنا شقتنا بش نكملوا الحوش ..اني ام لتلاته صغار اكبرهم مواليد 2006 بعد 2008 بعده 2010 وكلهم ولاد..صار اللي صار وتوفى ..وصارت فيا حاله لولا ايماني بالله كنت هبلت ..انصدمت أكثر بتنصل الأعمام من مسؤوليه صغار خوهم..وخوتي ماكانوش خير منهم..قويت نفسي ع خاطر صغار وقعدت نعافر ع خاطر لقمتهم ولبسهم..صاحب الحوش في الأول راعى ظروفي بس خلاص لأمتى بيقعد يراعيني..حتى هو عنده مسؤوليات..خلاص قالي اني لازم نطلع ع قد ماحاولت نطلب المساعده من عمامهم شي وخوي رفض حتى هو وقالي صغاري اولى بالقرش اللي نكسبه وقعدت تبكي
جمانه وهي تمسح في دموعها: مش قلتي انكم تبنوا في حوش
ابتسمت بتهكم: طلع في وحده من الأراضي اللي واخدها القذافي زمان من صحابها وجو صحاب الأرض وخدوها وبرغم مطالبتي بالتعويض ع اللي صرفه زوجي في البني ماطلوني وماحصلت شي ..واني مراة بروحي ماوراي حد غير الله
جمانه : ونعم بالله نعم المولى ونعم النصير
خديجه : ايه والله..بعتلي ماسدد عليا ايجار شهور فاتوا وايجار تلاته شهور مقدم ..تعرفي ياجمانه ليلة اللي صاحب الحوش قالي عندك يومين تفضي فيهم الحوش وتطلعي ..رقدت ع صلايتي واني ندعي ونشكي ونستغفر رقدت وحسيت ربي طبطب عليا وقالي ارتاحي حنبعتلك الفرج من حيث لاتحتسبي..وماخاب من لجأله سبحانه جاني الفرج فعلا من حيث لاأحتسب..ليلة اللي انزاح عني فيها حمل الإيجار بتت ليلتي نحمد في الله ونشكر ونسبح بحمده ..وندعي للي ساعدني إن ربي يفرج عليه زي مافرج عليا ..ويسعده ويباركله في رزقه وذريته وكل مايملك ..ويقيه أي سوء ممكن يتعرضله يوم من الأيام ..
جمانه ابتسمت براحه: "صنائع المعروف تقي مصارع السوء" +
"نبيكم تذكروا قصة خديجه كويس نتيجتها حتشوفوها في وحده من الأجزاء الجايه 💖💖💖🌹"
.....
جمانه في حضن سليمان: قداش ريحني دعائها هلبه..
سليمان : حتى أني الحمد لله ..
جمانه : شعور ماينوصفش لما ربي يستخدمك في الخير..
سليمان : لما تمشي في حاجه خوك المسلم تحس ان ربي يحبك اللي وكلك بهالمهمه..الحمد لله الذي هدانا لهذا وماكنا لنهتدي لولا أن هدانا الله..
جمانه : الحمد لله ...وزادت خشت في حضنه ..
سليمان: خيرك حوريتي صقعانه ..
جمانه ابتسمت : لالا بس نبي حضنك اللي نرتاح فيه ونبي نرقد على ترتيلك لكلام ربي اللي يزيد في راحتي ..
سليمان لف عليها ايديه الزوز وبدي يقرا في سورة المؤمنون...وهي تسمع بخشوع واستسلمت للنوم وهي في قمة الراحه...💖💖💖
اللهم هب لقارئات روايتي من العازبات أزواج صالحين يكونوا ليهم قرة عين ...🌹🌹🌹🌹🌹
يتبع .....
#GomanFared
