الحلقة(12)
تغدوا الجماعه وبحبحوا ويشربوا في الشاهي الأخضر باللوز والهدرزة والجو الحلو أنسجم قاسم مع عيلة أصيل كانوا ناس متواضعه برغم إنهم مرتاحين ماديا وواضح إنهم طيبين ...
أصيل: ههههههههههه والله ماننساه هذاكا اليوم
قاسم : لازم نعاودها
نجيب: من توا معاكم
عبدو : سجلوا أسمي حتى أني 😂
الحاج فرج: لو كان عندي جهد ره قلت معاكم معاكم
ضحكوا كلهم
قاسم: ماشاء الله عليك قاعد في عز شبابك
نجيب : ديما نقوله فيها يشبحوك جنبي يقولوا خوه الكبير مش بوه
قاسم: ماشاء الله عندي ليك عروس في الشرق ياحاج لاقوة إلابالله😂
الحاج فرج : ههههههه لاياولدي إلاهادي
عبدو : الحاج خاف 😂
نجيب : حي كان تسمع الحكومه لز طول ياقاسم 😂
كلهم ضحكوا
قاسم: إيه بالله لو مافيش مشكله نسلم ع الحاجه من بعد إذنك ياعمي فرج وإذنكم
الحاج: مافيش مشكله ياولدي زي أمك برا ياأصيل نادي ع أمك
أصيل ناض: وبالمرة تعطيها وصفة العصبان متاعك
كلهم 😂😂😂😂
في المطبخ
جمانه : مازال العشي
أمينه : خل نرتاحوا شوي وبعد المغرب نحوسوا عليه
خش أصيل
أصيل : ربي يعطيكم الصحه
ندى: عجبتكم الرشده
أصيل: مالا إنتي مطيبتيها
جمانه وأمها 😂😂😂😂
ندى: مش قصدي يابارد نبي نعرف شن قال صاحبك ع ماكلتنا
أصيل: شكر فيها هلبه الحق
أمينه: صحتين
أصيل: أمي تعالي شويه يبي يسلم عليك
أمينه : هي شويه برا وتو نجي
أصيل : تمام ومشي
جمانه: مالا أني بنركب نتكا شويه وطلعت وركبت لدارها وأمينه تساوي في الكوجينه ومنها للمربوعه وندى مقعمزة إتزين في الكيكه بيحطوها في الليل
أريج لما روحت ركبت طول خشت فراشها وغمت روحهابالغطا تبي تحول ضرار من بالها مش قادرة
*********
عنده الحق يازينب
رجاء تكلم في زينب
زينب تبكي : والله مانقصد كله صار صدفه صدقيني
رجاء: خلاص معاش تبكي مصدقاتك، إني تعرفي إنه ملتزم مفروض أنتبهتي لتصرفاتك معاه
زينب دموعها ينزلوا وخلاص
رجاء سخفتها أختها: خلاص حبيبتي خلاص
زينب: خدي عني فكره مش كويسه يارجاء حتى لو كان في أمل إنه يحس بيا ويكون ليا تو معاش في بكل
رجاء: ماتقوليش هكي مرات يصير شي تاني ماتندريش
زينب خشت في حضن أختها وتبكي: يااارب مانبي غيره في هالدنيا خليه من نصيبي
رجاء اطبطب ع أختها: ربي يفرحك يااارب
****
5:00 العصر
أصيل وقاسم بيمشوا لصاحبهم اللي عازمهم ع أفتتاح محله
يسقدوا فيهم الحاج والشباب برا
الحاج: العشي هني ياولدي ره
قاسم : لنقني صمتتها الحق وتعبت العيله في المطبخ
الحاج: عيب ياولدي أنت ضيفنا وتعبك راحه
قاسم : بارك الله فيكم
في الصاله
ندى الراجل طلع بري ديري دورة ع المربوعه
أمينه تكلم في ندى
ناضت ندى خشت للمربوعه وبضمها جي قدامها مترد الحلويات فيه العكك المعسل وملبس بجوز الهند اللي كانت تعشقه مشت خدت وحده قعدت تاكل وكانت واقفه حدا روشن اللي كان مقابل الباب البراني سمعت هدرزة حلوة باللكنة الشرقاويه اللي تهبل شبحت للروشن لقت قاسم مقابلها يهدرز مع بوها وخوتها اللي كانوا عاطيين بالظهر قعدت تشبحله كيف يتكلم ويحرك في إيديه وجسمه لما يتكلم قعدت منسبها فيه حاطه إيدها بالكعكه في فمها ومنظرها يضحك تقول في نفسها" لغة الجسد عنده عاليه "
هو في عز الهدرزة لمحها في الروشن جت عينها في عينه ابتسمتله تلقائيا والكعكه في فمها 😂
بعدين أستاقضت وطلعت تجري استندت ع حيط وحطت إيدها ع قلبها وهي تمضغ وقالت : محلااااه 😍
سمعت الباب تسكر ولت للمربوعه وقعدت اضم وتتفكر في اللقطه وتضحك
*****
ضرار: تمام نتلاقوا غادي مع 7،،،، خلاص حنكون قبل السبعه غادي إن شاء الله وصكر
وناض فتح دولابه بش يطلع حوايجه ، خداهم وطلع وقف في الباب
ضرار: مليكه مليكه
الشغاله جت تجري
ضرار: عطاها الحوايج، حديدهم زين وعلقيهم بنلبسهم بعدين
مليكه : حاضر ياسيدي
وهو خش بش يدوش وبين عيونه أريج وكلامها يرن في وذنه وحاس بجسمه نار من الغضب والغيرة
*********
نجيب: والله ماشاء الله ويعطيكم الصحه
أمينه : صحيحتين ❤، بوك طلع
نجيب: أيه وهو وعبدو مشوا لحوش عمي ناصر
امينه: ايه قال بيمشيله
نجيب : البنات وين؟
أمينه : جمانه ركبت تتكا شويه
وندى لحقتها وأريج من لما روحت رقدت طول حتى الغدي ماتغدت
نجيب شبح لأمه بعدين شبح جيهة الدروج في عقله" نقوللها توا ؟؟،، لالافي الليل،،، ولاخلي غدوة خير أيه غدوة غدوة "
امينه: نجيب تبي تقولي حاجه
نجيب انخلع: هاه😮
أمينه: خيرك واقف هكي مالا
نجيب: لاشي أبتسملها وركب
خدا نفس وأرتاح لأن قدر يهرب من أمه وأسئلتها اتجه لدار أريج وقف في الباب وطقطق
أريج كانت غامه روحها بالغطا لكن مش راقده
أريج : منووو
نجيب : أني
اريج: حولت الغطا وناضت قعمزت
نجيب: ماتبيش تفتحي
اريج : خش
نجيب فتح الباب وقعد واقف قدامه يشبحلها ورافع حاجبه الأيسار فوق : متأكده نخش عادي ؟
أريج أبتسمت وهزت راسها بالإيجاب
خش وجي قعمز مقابلهاع السرير
نجيب قرصها من خدها قرصه خفيفه: قاعده زعلانه ياشينه
أريج شبحتله بحزن: إيه
قدم وشد راسها بإيديه وباس على جبينها
نجيب شبحلها: وتوا 😊
اريج ضحكت وحضنت خوها وحضنها وطبطب ع ضهرها وبعدين وخر وقاللها: هيا تطلعي للسوق
ضحكت أريج: أنت بترفعني للسوق؟!حي عليك ره نطلعلك قرون
نجيب ضحك: نتحملوا هي كلها هالمرة ومش حتتعاود 😆
اريج :😂😂
ناض نجيب: هي نوضي وتي روحك وشوفي كان هديكا الزغدة بتمشي معاك ولالا
اريج: نكلم حتى جمانه؟
نجيب: لالا جمانه خليها تعبت اليوم من الصبح وهي ع رجل في المطبخ هيا سقدي روحك وطلع
بعد شويه وتت روحها أريج وكلمت ندى قالت مش ماشيه لإنها بتقرا، طلعت اريج هي ونجيب
*********
سليمان : ماشاء الله تبارك الله خلاص ياعبدالمهيمن حتبدا من الحفاظ لكتاب الله
عبدالمهيمن واحد من طلبة سليمان في الخلوة وعمره 13سنه
عبدالمهيمن : الحمد لله كل بفضل الله ثم فضلك الشيخ عبد الوهاب وفضلك ياشيخ
سليمان أبتسم: حنديرولك حفله في المسجد حفظت خلال سنة ونص هذا إنجاز ره ،بس لازم نقولك ياعبدالمهيمن ره أنت توا ولت ليك مكانه خاصه وهالمكانه مش شرف بس هي أمانه الحافظ من أهل الله وخاصته يعني لازم ع قد ماتقدر أخلاقك تكون قرآن تصرفاتك قرآن حياتك كلها ماشيه عليه حاول ع قد ماتقدر تخلي حفظك شاهد ليك مش عليك ورد بالك تستخدم هالنعمه فيما يغضب ربك أوفي كسب الدنيا ورد بالك دير شي يخلي الناس اذمك وتاخد فكرة مش كويس عن الحافظ إنه منافق أوكذاب ،،وره القرآن يفلت منك لو ماراجعته ودرسته فخليك ديما مع مصحفك ومصحفك معاك لإنك مهما درت أصحاب وأحباب مش حتلقى زي صحبته
ابتسم عبدالمهمين: وقال في كلام فهمته وكلام لا لكن نوعدك أني نحافظ ع هالشرف 💓
ضحك الشيخ : تو تكبر وحتفهمه كله ربي يحفظك وينفع بيك شيخ ياشيخ
سليمان: خيرك يالؤي
لؤي: جي الشيخ نبيل وقال الشيخه متاع خلوة النساء تبيك شويه
ناض سليمان: ياالله، به قعمزوا احفظوا وردوا بالكم ديروا فوضى لإني حنعاقب
كلهم : حاضر
ابتسم وطلع ومشي جهة الخلوة اللي كان يفصل بيناتهم فيها سور من ور السور
سليمان : إحمم السلام عليكم ورحمة الله وبركاته
الشيخه: وعليكم السلام ورحمة الله بركاته
سليمان : كيف حالك وحال الشيخ وحمزة
الشيخه: الحمد لله على فضله حمزةبدي يستجيب مع العلاج الطبيعي ويمشي شوي شوي
سليمان: ربي يزيده من الشفاء
الشيخه: اللهم آاامين ،شنو صار ياشيخ في موضوع توسعة الخلوة الطالباات بدوا يزيدوا في الفترتين
سليمان: ماشاء الله ، كلمت الشيخ عثمان وقال إنه الشهر جاي بإذن الله حيطلب تعطي للطالبات عطله خلال أسبوع بش يفتحلكم الدار اللي جنب الخلوة
الشيخه: قصدك حيهد الحيط اللي بيناتهم؟
سليمان: إيه
الشيخه: كويس ؛جزاك الله خير ياشيخ هي نستأذن
سليمان:هذا واجبي السلام عليكم
الشيخه: وعليكم السلام
********
اريج هيجت في السوق وفلست بنجيب وبعد تعبت قالت تبيه يدرسلها ع المطعم ويكمل باقي هديته ويعشيها وهو قبل
في السيارة
اريج: نحس فيك بركان وبيتفجر 😁
نجيب: 😂قلتلك أول وأخر مرة
أريج : 😂😂😂
درسوا قدام مطعم هي إنزلي
في نفس الوقت
ضرار: اقتنع مبدئيا لكن مازال بنقعمز معاه أكثر وقول للأستاذ قالك ضرار أعتبر موضوعه تم
محمد: يعني حدخله في الجيب
ضرار: يشرب في القهوة ونزل فنجانه وأبتسم وقال عيب عاد انت عارفني نهني
محمد: والله حق تهني وزياده
ضحكوا الزوز وضرار في عز ضحكة شاف حاجه خلت هالضحكة تتلاشي، البنت اللي خدت قلبه وعقله في مدة قصيرة ،ماسد رفضاته الصبح يشبحها في الليل مع واحد وشاد أيدها وجايبها للمطعم
محمد: شبح وين مايشبح ضرار ، تعرفها؟
ضرار وهو يغلي : منو؟
محمد :هادي اللي تشبحلها ؟
ضرار: لالا بس شبهت عليها
محمد : اها بس بجديات صاروخ
ضرار شبحله بحده: ماقلتش شنو تبي تتعشى
محمد : اللي تبيه تمام
في نفس الوقت
قعمزت اريج مع خوها ع طاوله كانت مقابله طاولة ضرار بس بعيده شوي ونجيب كان عاطي بالظهر
نجيب: هاه شنو تبي تاكلي
أريج :اطلبلي ع ذوقك 😄
نجيب: تم أشر للقرسون وجي وقعد يقول ع طلبات
اريج ركزت ع ايد خوها ماشبحتش الدبله راجت لين القرسون مشي
اريج: نجيب وين دبلتك
نجيب انصمت 🤤شبح لإيده وتحسس صبعه وابتسم ابتسامه صفره وقال: شكلي نسيتها في الحوش 😅
اريج: معاش تنساها ره البنات مايصدقوا 😁
نجيب: باه 😑
اريج: كيف حالها ريما ليا مدة عليها
نجيب لما سمع أسمها جسمه كله تكرهب: كويسه ، وغير الموضوع خليك مني وأحكيلي ع قرايتك
وقعدوا يهدرزوا ويضحكوا وجابولهم الماكله وكانوا ياكلوا ومرة مرة نجيب يوكل في أخته، نجيب برغم جديته وطبعه الواعر لكن حنين بالذات مع خواته حتى لو زعلوا منه او زعلوه لازم يرضيهم ويكون قريب منه لأن تربى ع إن خو لازم يكون سند لأخته ولازم يحتويها ويعرف أمتى يشد عليها وأمتى يرخي ويكون في ظهرها ديما ويحسسها بالأمان ❤"مافيش سند من بعد ربي زي الأخ"
طبعا ضرار عيونه عليهم طول الوقت يغلي وينقش تنقيش ع عكس محمد اللي معاه اللي كان طايح ياكل بإيديه ورجليه برغم انه لاحظ ضرار مش طبيعي وإنه طول ماهو مقعمز يهز في رجله من الغضب وماوقفش لكن ماباش يدور
الغريب إن أريج مالاحظت شي بككل كانت لاهية تاكل وتهدرز مع خوها، لكن ضرار كان يبيها تشوفه
ضرار: هي خلاص
محمد: ايه لازم انوض عندي مشوار تاني
ضرار : تم وبدل مايأشر للقرسون ناداه بالصوت ، لوسمحت اريج سمعت الصوت وماكانش غريب عليها لإنه كان مميز شبحت قدامها وانصدمت وغصت وقعدت تكح
نجيب مدلها الميه : خيرك يابنتي كولي بشويه
اريج شربت الميه ووجهها أحمر وعيونها يدمعوا : ناكل بالشويه مش عارفه هادي كيف هربت
نجيب: هربت صار😒كملي وبالشويه عليك
اريج خلاص بتموت حالتها حاله القلب يدق بالقوة وسخنت مع بعضها وحست روحها ترجف معاش قدرت تقيم عيونها وتاكل بالسيف
ضرار مركز معاها دفع الحساب وناض هو محمد خلا محمد يمشي قدامه وهو ماشي دار حركه برجله لوحده من الكراسي في الطاوله القريبه لطاولة أريج وخوها بلعاني بش اريج تشوفه وسوا الكرسي
قامت عينها قعد يشبحلها بحدة ونظرة كلها توعد وتهديد وفات من حداهم وطلع
اريج خافت هلبه قعدت تفكر شنو ممكن يصير
********
طبعا هديكا الليله فاتت عادي قاسم تعشا عند أصيل وروح هدرز مع الشباب شويه ورقد لإن عنده رحله الصبح
وعماد ووائل متكيين حدا ربيع ويهدرزوا عليه بعد مانزل سليمان لشقته بش يقرا شويه وبعدها يرقد
جمانه بعد كملت الحوسه وخشت للدار لقت ندى توتي في حوايجها
ندى : كان تشوفي أريج شن شرت فلست بنجيب
جمانه: فرصة عاد 😂
ندى : ايه 😂😂،، كملت ندى وخشت فراشها ،،اسمعي توا الساعه 12 الواحد تسكريه عندي إمتحان غدوة 😌
جمانه ضحكت : باه ارقدي ارقدي
جمانه قعمزت فتحت اللاب توب بتشوف مشروعها : ماعنديش خلوق خل نخش نشوف الفيس شويه
خشت لقت عندها رساله معلقه فتحتها
جمانه: 😏 ع أساس بيطببها عماها
وبدت تكتب في الرد
يتبع .....
#GomanFared
