الحلقة(85) العرس
تعبا حوش الحاج فرج بالأقارب والأحباب وطبعا من كل حدب وصوب ..عرس الولد...اكثر يوم مميز فيه يوم الكسوة ..وليلة الدخله ...طبعا نجيب وعبدو حيدخلوا في الدور الثالت اللي مقسوم لشقتين هما كانوا شبه كاملات بس ناقصهم التشطيبات ...حيقعد نجيب وريما في الشقه لين يكملوا حوشهم...اما عبدو من البدايه يبي فوق حوش اهله وشرط ع ملاك وهي قبلت...
طبعا ماكانش في منظومه في العرس ع خاطر جمانه ...والدخله والمحضر اللي حيكونوا في الصاله مش حتحضرهم ومابتش تقيد حد معاها ...المهم ..في اقارب للحاج فرج في الزاويه من جيهة امه ولد خاله كانوا عنده 5بنات ماشاء الله شهلوليات وين يخشوا لعرس يقيموه جوهم مليح وروحهم حلوة رغم انهم كبار شوي ولاوحده جاها نصيبها 💔
كانوا يمشوا ع بعضهم ويجوا في المناسبات وعلاقتهم بعيله فرج حلوة...
اكبر وحده سماها شمسه مواليد 77 هي ونجيب كانوا فار وقطوس وديما ياكل منها في الطرايح زمان 😂..ولما كبروا تحسنت العلاقه ولوا خوت ..وجوهم مليح
الثلات نهار الفاتحه 💖
اكثر يوم تتوتر فيه البنت بعد يوم الحفله طبعا 😁
بالذات لما فاتحتها تنقرا ع اللي تحبه ويحبها وتتمناه ويتمناها ❤..العرايس الزوز متوترات ع الآخر
عند ريما...
لابسه البودري وطالعه تجنن وضافره شعرها الاسود الطويل اللي نجيب قاللها تصبغيه نهارك الأحرف 😂
مقعمزة ومتوترة وتظاهر بعكس هكي ..
سارة: اهدي شويه خيرك ايديك يرجفوا
ريما:مش مصدقه ياسارة لتوا نحس فيه حلم..ودمعوا عيونها
سارة بضحكه: مش حلم واااقع حتكوني حلال نجيب بعد دقايق
ريما: اسكتي معاش تزيدني 😳
سارة: هههههه زعمه يجي
ريما : إن شاء الله لا
سارة مندهشه: هههههههههو علاش ..
ريما: مولي بكل ياسارة
سارة فهمتها وضحكت
جتهم مراة كبيره : بتحني الليله بنيتي
ريما ابتسمت : ايه خالتي نوريه
نوريه: ربي يهنيك طيبه وبنت اصول زي ابويك الله يرحمه
ريما اذكرت بوها وتمنت لو كان معاها في هاليوم نزلوا دموعها ..والعزوز طبطبت ع كتفها ومشت ..
سارة: اكيد فرحان بيك في قبره توا
ريما ببكي: الله يرحمك يابابا ...
عند ملاك
المنظومه قالبه الدنيا والبنات يرقصوا ويغنوا وملاك تتفرج عليهم وتضحك
نرجس صاحبتها: زعمه قروها
ملاك: وراس نرجس اسكتي 😖
نرجس :هههههه تي انتي تراجي في هاليوم بفارغ الصبر
ملاك: ايه بس توا خايفه
رووووووووروووووروررري
خالة ملاك: انقرت الفاتحه مبروك عليك بنيه اختي
وبدوا يحضنوا ويباركوا الخالات والعمات وبناتهم والصاحبات والأحباب ..وبعدين جت امها حضنتها وقعدوا يبكوا ..
وشدوا البنات الدربوكه وطاحوا فيها غني ورقيص وزغاريط
عند ريما
ريما سرحانه
سارة: صوت المنظومه مدايره دوشه في دماغي
ريما بضحكه: حتى اني ..
رنا جت شاده ضحكتها : شنجات
ريما ابتسمت : حلوات
رنا شبحتلها ودمعت بإبتسامه: وليتي حرم نجيب الشريف
ساره زغرطت ...وريما غمضت عيونها بشده ودموعها ينزلوا من الفرحه ناضت حضنت اختها هلبه وقعدوا يبكوا..
وتعالت اصوات الزغاريط وبدوا يتوافدوا المهنئين 😁
وجت امال حضنت بنتها : مبروك ياماما ربي يهنيك ياماما
ريما تبكي : الله يبارك فيك ماما ويطول في عمرك
امال بعدتها وقاعده شادتها بإيدها: بياخدك مننا هذاكا المتعجرف حتنسينا
ريما ضحكت ودمعت وحضنت امها بزياده ..وبدت الدربوكه والجو السمح 💕💕
عند أريج ...
الوضع يختلف.. يعني لو كان ضرار مكان معز حتكون اسعد انسانه في الدنيا ..بس ليس كل مايتمناه المرء يدركه ..تأتي الرياح بما لاتشتهي السفن
اتصنعت الفرحه ..هنوها وكانت عاديه لادمعت ولاتأثرت حاسه بإن مافيش حاجه ليها طعم..كانت تحلم بهاليوم زيها زي أي بنت ورسمت احلامها إن يكون ضرار هو زوجها بس مع الأسف في احلام تقعد محفوظه في درج الذاكره في العقل " أحلام لن تتحقق..💔"
.....
روحوا من الجامع وخشوا لحوشهم بعد كملوا زحمه الرجاله المهنئين خشوا داخل ...نجيب كان لابس زبون أسود في الذهبي محول الزبون ولابس فرمله وعاد هو طول بعرض وشخصيه وزين ياكبدي هيييه😍 ...وعبدو الحليوة لابس زبون بيج في الذهبي وكان سموح 😊..
امهم شافتهم قعدت تبكي وهما ضحكوا
نجيب : تي علاش البكي مش هذا اليوم اللي تراجي فيه
امينه ببكي : دموع فرح هادي وليدي
عبدو حضنها: حبيبتي وغلاي ..
حضناته: مبروك عليك ياغالي وربي يهنيك وبالذريه الصالحه
التفت لنجيب وهو فتح ايده حضناته: الحمد لله يااارب اللي استجاب دعائي وخلا ريما كنتي
نجيب: ههههههههههه امي تحبيها اكثر مني ره
امينه ضحكت وبعدت تشبحله: لإنها تحبك اكثر مني
حضنها نجيب بقوة ...
جمانه جت : عبودي ..
عبدو: جمانتي وحضنها
جمانه: بارك الله لكما وبارك عليكما وجمع بينكما ع خير بالذريه الصالحه ياغالي
عبدو بعدها وقعد شادها : آمين ونفرح بيك يااارب
ابتسمت جمانه وبساته ع راسه
نجيب: ره حتي اني عريس ياجمنو
طلقت عبدو ومشتله تجري حضناته بقوة : انت بالذات فرحتك بروحها ودعتله نفس الدعاء اللي دعاته لعبدو ..
وجت اريج باركت وباركولها وندى باركتلهم وخدتلهم كم صورة...📸
جتهم شمسه بالدربوكه : مبروك نجوبه مبروك عبودة
مبروك على وليداتك خالتي امينه مبروك ع خوتكم يابنات
نجيب بضحكه: مافيش فاصله ولانقطه
شمسه: لانك عريس بنفوتهالك
كلهم:😂😂😂
وبدت ادربك وجو خواتها وراها وباقي الفاميليا والمطبخ تعبا لأن الولااد وامهم وخواتهم كانوا واقفين جيهة المطبخ
شمسه: يامبروك عليه شقيقي هذا وين زمطه ريقي
ويرودوا وراها ...
يامبروك عليه زبونه هاللي كيف الصقر عيونه
ويرودوا وراها ..وفي اللي يزغرطوا
يااميمة العريس تعالي فرحانه وعطاك العالي
وجت وحده من خالاتهم وقعد ترقص في الأولاد وأمينه والدنيا انقلبت زغاريط وصفيق وشطيح
ام العيله نجيها عمار الحوش إلا بيها ...
ويردوا وراها ..
نجوبه وأمه ووخياته ورد مفتح في جنانته ..
ويردوا وراها
عبودة وأمه ووخياته ورد مفتح بجنانته
ويردوا وراها...وأريج طلقتها زغروطه وتبعتها زغاريط
اصيل كان يتفرج من بعيد لمحاته عمتك شمسه
شمسه وهي ادربك: تعالى صولا خود.هيا
يانجي مصماص الكرشه ياربي حضرني عرسه
ندى عيطت: أنيييييييي مصماصه الكرشه يانااااس
ضحكوا كلهم ...وشوي انسحبوا الولاد وكملوا الباقي في الجنان والدنيا انقلبت رقيص وغني وزغاريط
شمسه: والعيله شايشه ياناس العيله ترقص في الكياس ...🤣
***
عند ريما
تراجي في اتصال نجيب لكن مااتصلش وهي مضايقه
رنا: خيرك
ريما: نجيب ماكلمنيش
رنا: بالك مشغول
ربما: مفروض أول حاجه يديرها يكلمني طول
سارة: فكينا من النكد عاد
ريما بلعتها وسكتت ..فجأة يسمعوا صوت نوبه برا
رنا : هذا شنو ...
خالة ريما جتهم: راجلك جي ياريما
ريما لما سمعت كلمة راجلك قلبها رعش نفس الرعشه الحلوة اللي تخص نجيب وحست إنه خلاص نجيب ملكها حلاالها لكن لتوا مش مصدقه ...
بنت خالهم: تعالوا شوفوا من الروشن جو مش عادي
شحت ساره ريما ومشوا جهة الرواشن المطله ع برا ويتفرجوا وبنات العيله مشلعقات في الروشن
نجيب كان واقف ويصفق وكان باين عليه العريس
البنات يتهامسوا: ياماما هذا شنو يجنننن
بنت تانيه: احلى منها بوووين
من جهة تانيه: عليك حظ عند ريما شنو هذا ياكبدي غزااال
وحده جت لريما: ريما هذا زين ولارضا والدين
سارة: قولي ماشاء الله
ضحكت : ماشاء الله ماشاء الله ..بس غير قوليلنا من هي الشيخه اللي دارتلك كتيبه بش جبتيه
رنا: هديكا انتي اللي ادير هك مش ريما ..
سارة: ريما جباته بالسحر الرباني اللي انتي ماتعرفيشي النيه الصافيه والقلب الأبيض وماسماها ريما ألا هي حق ريما
البنت وجهها تلون: انبصروا خيركم ...ومشت وخلتهم
رنا: بردتي ع قلبي
سارة: ولايهمك حبيبتي اني في الخدمه ..
تسألوا عن ريما وين من هذا كله...ريما العاشقه اللي عرفتوها هايمه بكل جوارحها مع معشوقها ماتشوف في شي ولااتسمع في شي معاه هو وبس اللي تشوف فيه هذا حب عمرها اللي تمناته يكون شريك حياتها من كل قلبها..للحظه هالأمنيه كانت حتقعد امنيه لكن النصيب كان اقوى من كل شي ...
.....
عبدو: تشاينا مبروك عليك اني
ملاك بخجل وهي مقعمزة جنب عبدو وهو شاد ايدها: ومبروك عليك اني
عبدو تنهد: مش مصدق وليتي حلالي وليا
ملاك: ولااني
عبدو: تبي تصدقي
ملاك بعفويه : ايه
قرب منها عبدو وباسها من خدها قريب ماتت من الخجل
ملاك: عبدو 😳
عبدو: راجلك ياعبيطه
ملاك:😳
عبدو: شكلك مازال مش مصدقه
ملاك بعيطه بسيطه: لالالااا صدقت
عبدو:😂
....
تمشي ورجليها مش حاملينها قاعده مش مصدقه خايفاته يكون حلم كل اللي صار حلم وهي حتفيق منه في أي لحظه..لقت رجليها وصلوها لباب المربوعه اللي كان مردود كبهت عليه لقاته واقف كان طالع يجنن باللحيه اللي مدايرها شيانه ...وين شيانه وهي زادت من جاذبيته❤
كان واقف يشوف في تليفونه وزبون في ايده وقفته زادت هبلتها فيه والعربي طالع عليه خيال ...😍
خدت شهيق وزفير ...فتحت الباب بالشويه وخشت ورداته وراها بدون ماتسكره ريحته الحلوة كانت معبيه المربوعه..وريما هني قلبها بدت تقوى نبضاته ..وقفت تتأمل فيه وبس ومش مصدقه ..حلم .."كان حلم ياارب نوضني خلاص تعبت"...
نجيب وهو يشبح في التليفون: بتقعدي واقفه حدا الباب هلبه
ريما استاقضت وبصوت يدوب طالع: السلام عليكم 😳
نجيب قام راسه قعد يشبحلها يتأمل فيها وعيونه يلمعوا قاعد يتأمل لدقايق وبعدين قال: تعالي
ريما واقفه ومتسمره وتشبحله ..نجيب فتح ايده
"تعالي لحضن راجلك ❤"
ريما سمعت الكلمه هادي مشتله تجري وارتمت في حضنه غاصت براسها في حضنه وتشم في ريحته ومش مصدقه هولاف ايديه عليها ومغمض عيونه بعشق💖
وهي خطم عليها شريط الذكريات كامل بحلوة وبمره زادت حضاته اكثر وقعدت تبكي بالعبره
نجيب: يانكوديه ...وقته
ريما ضحكت في عز بكاها : مش مصدقه ..انت راجلي..
نجيب ضحك على صوتها المنغم بنبرة البكي: اممم قلتيلي مش مصدقه ..بعدها شويه وقعد يشبح لعيونها المدمعات قعد يشبح في تفاصيل وجهها ..قرب وبحنيه باسها ع راسها ..ونزل ع خدها اليمين وباسه وبعدين خدها الأيسار وبعدين خشمها..وبعدين قبلة الحياه 🙈
ريما حاسه روحها في عالم تاني هايمه معاه بعشق شديد وهو مش حاس بنفسه مشاعره مندفعه بقوة وشوقه مالاش حد ...بعد شويه بش تاخد نفس وحط خشمه ع خشمها وبنبره كلها حب : صدقتي توا
ريما بعشق: ايه ....💕💕💕💕💕
***
فات اليوم وجي اليوم اللي بعده الكسوة..قسموا ارواحهم لفريقين فريق يرفع كسوة ريما وفريق كسوة ملاك
امينه مابتش تمشي مع حد بش مايصيرش الفرق ..وطبعا الإتنين كساويهم في الصاله ...جمانه قعدت مع أمها واريج مشت لريما وندى مشت لملاك وطبعا مع نساوين العيله الكبار
وكانوا كساوي تحل العين المغمضه ،،خوك وبوك مش فيها زي مايقولوا...وكله من احسن وأغلى شي ...طبعا جمانه رقت كل شي قبل ليطلع من الحوش ..كانت كل وحده فيهم كسوتها بالزمزامات وهياجه وجو مليح ...كان يوم متعب هلبه ..مارقدوش فيه لبعد الفجر...
***
يوم الحفله 😻😻
المزينات اكثر من رابح في هاليوم ...الافواج من كل العائلات اللي يخصهم العرس في المزينات ...حتى امينه وورده..طبعا نجيه مابتش تجي وماخلتش بنتها تمشي ..ع العموم...جمانه قاعده في الحوش...انسانه عندها قناعات ومبادئ ماجاملتش ع حسابهم ..حاسه أن اللي دير فيه صح ومقتنعه بيه تمام الإقتناع ...ركبت قرت سورة البقرة في شقة نجيب مرة ..وقرتها مرة تانيه في شقة عبدو..رقت الشقق وديار النوم ...وسكرتهم زين ونزلت لوطا ...
...
الليل
في صاله ريما ..وصلت ريما للصاله الساعه 8قعمزت في الدار وكانت تكلم في حبيب القلب
ريما: حبيبي توا كيف وصلت
نجيب بحداه ولاد: كويس
ريما : وانت كملت
نجيب: ايه نظمت اموري
ريما فهمت أن حداه جماعه: نحبك ...
نجيب: بارك الله فيك
ريما : نراجي فيك وكلي شوق
نجيب: يصير خير يابرو
ريما: ههههههههههه
نجيب شاد ضحكته: تويبانلك هي سلامات ...وصكر
ريما ضحكت وعضت ع شاربها التحتاني من الخجل ..خشوا رنا وسارة : وااااااااااو
ريما ضحكت
رنا: ماشاء الله ياقلبي قمر عسسسل
سارة: اللهم بارك ..رقيتي روحك
ريما: ايه خالتي عطتني ميه رقية شربتها ورقتني ..
شويه وجو كنان وعدنان وكانوا طالعين غزله سلموا ع اختهم وباسوا راسها ...ودخلوها هما الزوز ..عيون البنات عليهم كانوا يهبلوا وكل واحد احلى من التاني ببداليهم السود..خشت طبعا ع أغنية حسين الجسمي لاإله إلا الله الف صلاة والسلام عليك ياحبيب الله محمد..امها واقفه بعيد وعيونها يدمعوا لين وصلت ريما للكوشه ..رقصت مع خوتها والمنشطه قلبتها بيهم سلموا عليها وطلعوا وعيونهم ماقاموهاش في ولابنت..
...عند ملاك
كانت طالعه عسل بملامحها الاسيويه الحلوه وكانت بيضا وتجنن في الفيلو دخلها خوها الوحيد ايمن والدنيا هياجه والمنشطه عندها حتى هي قالبه الدنيا..
..
في صالة العرسان الجو خيااللي والمنشطه قايمتها هي وشمسه والجو مش عادي ...اريج كانت ملفته هلبه لابسه قفطان اسود مخصر ..لعند الركبه وكان كم ظهره مفتوح من تالي ..وقايمه شعرها نفخه بسيطه ودايره قصه مفروقه بطريقه حلوة من قدام ولابسه طاقم فضه يهبل وكندرة فضيه ومكياجها ناعم وحلو ..
اماندى فكانت لابسه قفطان لونهه فسفوري هاااادي قصيره لتحت الفخد بشويه وكان يبرق بالذهبي مغطي من فوق وسيوره غلاظ ولابسه كندره ذهبيه وضافره شعرها الطويل سبوله حلوة غليظه ومنزله خصلات طوال ع وجهها ومدايره ايلاينر يبزر جمال عيونها وروج احمر ولمسات خفيفه ع وجه امهم كانت لابسه قفطان سهره اخضر حلو مناسب لسنها وقايمه شعرها برغم انها كبيره لكن جمالها كان ملفت للأنضار..ومن دار العسل غير النحله 😉
...
جي الوقت اللي بيجيبوا فيه العرايس ...مشت ندىمع خاله من خالاتها وشمسه لريما...واريج مع مرت عمها "عزوزتها"وخاله تانيه من خالاتهم لملاك..
الموكب متاع نجيب ..حصل في الزحمه وعطلوا شويه
ع عكس موكب عبدوا وصلوا فيسع
...
خشت ندى مع خالتها وشمسه للصاله جابولهم عشي تعشوا وهما يتعشوا رن تليفون ندى وكانت امها طلعت للمر وردت ..
...
كنان: ايوه يارنا قولي لأمي نبيها شوي
رنا : خشلها داخل
كنان: وين نخش !!
رنا : اوقف قدام الممر مايبان عليك حد ولاتبان على حد
كنان: متأكده
رنا: ايه هيا بنصكر ...
خش كنان وكان يتأكد إن مافي حد وقف وماأنتبهش ع ندى اللي كانت تتكلم بالتليفون
ندى: عطلنا من الزحمه ياماما
سمع صوتها قام راسه ...تجمد في مكانه...عيونه انفتحوا على وسعهم ..كانت تجنن تهبل ..جسمها برغم انها قصيرونه فضيييع ..شعرها القصلي الطويل ..انوثتها ..تتحرك بالكعب بطريقه فاتنه بان عليه وجهها ..انجن بزياده ..قلبه بيطلع من صدره ..من غير شي واخده عقله ..يابال يشوفها هكي ..
استاقض ع ضربات بأصابع ع كتفه من تالي تلفت امه جبداته ع تركينه
امال: هبلت
كنان: اااه 😳
امال : في شن كنت تبيني إن شاء الله مانسيتش
كنان: وحق ربي نسيت هي 😅
امال بضحكه: آااه منكم
كنان ضحك وتحشم واذكر: اه حق قالك خالي ماتخلي حد يلحق ريما نجيب مايبيش
امال: ايه عارفه ..
كنان : تمام ..هيا ماتبي شي
امال : سلامتك وليدي
خشت امال
وكنان طلع وخلا قلبه داخل ....💖
يتبع .....
#GomanFared
