الحلقة(108)
ممر مليان ...جري ..صوت ممرضه تقول بصوت عالي "نبوا دم جيبوا اكياس دم"...ترقب ..وقلوب مذعورة ..لحظات
وطلع الدكتور وعلامات الأسف ع وجهه
:شنو يادكتور..
الدكتور:فقدناه عظم الله أجركم..ومشي...
:خير شنوصاير
: سعفوا واحد مضروب باربع رصاصات مع الأسف توفى
: لاحول ولاقوة إلابالله
: قالوا شيخ...واضح انه اغتيال
: الله لايربحهم لاخلو عسكري ولاشيخ دين ...
***
ادور في ممر وحده من العيادات..جايه مع امها ومرت خوها اللي تعبت فجأة ..تتصل ع رقمه وتعاود ولارد...
جمانه: ياارب خيره مايردش يااارب يااارب
تتصل وتتصل..وأخيرا فتح الخط..
جمانه بلهفه: سليمان وينك....منو...منو معاي.....؟!!
......
فاتت مدة ع وفاته أول مرة تخش للحوش من بعد مامات..ادور بعيونها في كل مكان...كل زوايه ليها ذكري ملامح وجهه محفورة في حيوط الحوش وأثاته...ذكريات وذكريات..وقفتها صورته اللي ع الحيط ..تتأمل فيها ودموعها تنزل سيل...حطت ايدها ع بطنها البارزة...خلاص ولادتها قربت...ماتخيلتش يجي يوم ولادتها ومايكونش جنبها ..تستمد قوتها منه ويبدد خوفها من الولادة وآلامها..مسحت دموعها..وبدت تلم في الحاجات المهمه ودموعها مابطلوش نزول ...كانت توقف أكثر من مرة في أكثر من مكان وتقعد تبكي بالعبرة..مش مستوعبه مش مصدقه حتى بعد مافاتت هالمده ع رحيله من الدنيا...
كملت ورجعت لفت بعيونها في الحوش وركزت نظرها من جديد ع صورته "الله يرحمك ياحبيبي ياكل دنيتي"..
خلاص كملتي ؟...
هزت راسها بالإيجاب...قام الحاجات وحطهم في السيارة وهي طالعه دارت نظره أخيره للحوش يلي قاعد حاضن احلى ذكريات عمرها..وركبت للسيارة...
كده ياقلبي ياحته مني ياكل حاجه فيا
كده حتمشي وتسبني وحدي في الحياة والدنيا ديا
يعني ايه
يعني خلاص انا مش حشوفك تاني
مش هلمسك مش ححكي ليك عن حاجه تعباني
كنت روحي لما كان جوايا روح
عمري ماتخيلت إنك يوم تروح
مش فاضلي منوغير حبة جروح
مع السلامه ياحبيبي وفأمان
عمري ماهقول يوم عليك ماضي وكان
عمري ماأنسى مهما طال بيا الزمان...
مروة ببكي : علاش طفيته
جمال: حرام عليك اللي ديري فيه في نفسك ره انتي حامل وع وشك ولادة فكري في ولدك ياعمري..مش تبي تسميه ضرار وتكبريه ويطلع أحسن راجل في الدنيا مش هدا كلامك..ضرار الله يرحمه بروحه قالي اخر مرة شفته فيها قوللها مش حنسامحها لو حزنت عليا..
مروة:مش ساااهل ياناس حسوا بيا ره هذا كل شي في حياتي راني ميته من غيره ره هذا خوي وكل شي فيا خداته مني الموت بسرعه مافرحتش بيه ماشافش صغاري ماشفتش صغاره حسوا بيا ...وقعدت تخبط ع وجهها ..درس جمال السياره ونزل منها وجي لبابها وفتحه وحضنها بكل قوته بش تهدا ويمسح ع ظهرها ويقرا فقرآن...
هادي حاله مروة من لما مات ضرار خوها وسندها وكل حياتها..💔
***
المدام ريما عندها مشاكل في القلب قبل..
امينه: والله يادكتورة ماعنديش خلفيه
دكتوره مطت شواربها بإستياء وشبحت لوطا وبعدين شبحت لأمينه: ضروري نشوف زوجها ..ياريت يجي لو فيها كيف ..
امينه بخوف: تو نكلمه...
.....
إن لله وإن إليه راجعون..
سليمان يتكلم بالتليفون ويدور في المستشفى: خلاص حبيبتي بنصكر توا ..وبإذن الله غدوة نكون في البلاد عندي مشاغل نقضيها وبعدين نروح للحوش ..
جمانه ابتسمت : باهي كلمني بين فترة وفترة طمني عليك
سليمان : حاضر ياروح الروح 💓 ...السلام عليكم
جمانه ابتسمت : وعليكم السلام ....وصكرت ..التفتت جمانه لقت وجه أمها مخطوف ..خيرك ماما شن قالتلك الدكتورة
امينه: قوليلي جمانه ..ريما عندها القلب
جمانه بإستغراب: لالا ماما ..علاش شن في
امينه : تو يجي خوك ونفهموا...
جمانه بخوف: ماما فهميني شن في
امينه بتوهان: اني بروحي مش فاهمه ...
جمانه: اللهم عفوك ...
***
وعلاش شنو داير..
:والله ياشيخ ليه فترة يهددوا فيه..لكن هو ماكانش مدور وكان نازل فيهم ويسمي بالأسماء حتى في الخطب متاعه..وع الغالب اللي دار فيه هكي ولد عمه
سليمان بصدمه: ولد عمه
: اها هو واضح عليه تصرفات غريبه واجد..ومرة قدامي صار نقاش قوي واجد بيناتهم..ومن وقتها واضح من وجه ولد عمه..انه مش حيعديله الكلام اللي قاله..
سليمان بأسف: إن لله وإن إليه راجعون ...
: عندك علم ماليسي تلاته شهور مزوز ومراته حامل اخره...
سليمان جي بين عيونه جمانه ..فكر لو صار فيه نفس الشي شن يصير فيها من بعده...: الله يتولاهم ويصبرها...💔
***
جي يجري في الممر والخوف مسيطر عليه وصل في غرفتها لقي أمه واخته قدامه...
نجيب بخوف: خيرها ريما..
امينه: اسمع دكتورتها تبي تشوفك ..
نجيب بخوف أكبر مصحوب بأستغراب:شن في امي قولي
امينه: اني مش عارفه ولافاهمه شي امشي لدكتورتها قبل
جمانه: برا يانجيب للدكتوره وبعدين تعالى شوفها هي راقده حاليا..
نجيب مشي بسرعه لدكتورة ريما ..وصل في غرفتها وطق الباب
الدكتورة: تفضل
خش نجيب: السلام عليكم
الدكتورة : وعليكم السلام تفضل ..قدم نجيب وقعمز..
نجيب: قالولي تبيني شن في خيرها ريما..
الدكتورة : عندها مشاكل في القلب ؟
نجيب بصدمه: ايه بس مش خطيرة..
الدكتورة: هيا صح مش خطيره حاليا بس ممكن تشكل خطر مستقبلا لو حملت بشكل متواصل..
نجيب مصدوم وساكت
الدكتورة: ياباش مهندس زوجتك خلال الفترة الجايه لازم تكون بعيده عن أي جهد زايد خصوصا انها حتثقل وأهم شي تبعد عن الإنفعالات تماما..
نجيب شبحلها : ريما مش حيصير فيها شي
الدكتورة ابتسمت : اطمن مع الإهتمام واتباع تعليماتي إن شاء الله مش حيصير فيها شي...
نجيب قعد ساكت ومصدوم ..ريما قلبها التعبان كان هو اللي تاعبه ..اذكره كلام امها...اللي قالته لما مشالها بش يقعنها توافق عليه
<< بنتي بسببك بسبب الكتمان قلبها بدي ضعيف لمحلها خالها مرة إنها تسيبك قريب ماتت ماتحملتش حتى تسمعها>>
***
الساعه 9 في الليل ..
خشت جمانه للمطبخ لقيت ملاك واقفه وفي ايدها صونيه كبيره
جمانه: ريحة حنه
ملاك بضحكه : ايه شويه وبتجيني الحنايه اللي تسكن في الحوش اللي جنبنا وتحنيني ..عبدو خاطره فيها..
جمانه شبحت للصونيه : هلبه الحنه
ملاك : ايه حسيتها هلبه بعد ماعجنتها
جمانه: بس مش حتكون خطيره وانتي حامل..
ملاك : لالامافيهاش زيوت ..
جمانه: حتمشي فيسع..
ملاك : مش مهم المهم نحنيهاله وخلاص وماتقعدش في خاطره
جمانه بخجل:ملاك ممكن نحني معاك
ملاك: هههههههههه اتهبلي وانتي متحشمه ..ايه عادي جدا وحتى عندي زوز لصقة حنه اني شريت زوز بش ناخد راي ماما فيهم واخترت وحده وقعدت وحده وره حلوة هلبه حتى هي..
جمانه بفرحه وحماس: كويس هلبه ..
ملاك : هي تعالي معاي .. جمانه: يللا..
وركبت معاها ...
قعدوا في الحنه حوالي 2ساعتين والحنايه نادت ع بنتها تجي وساعدتها وحنت عمتك جمانه رجليها للفخد...وايدها لنص ذراعها ...وطلعت فيها تهبببل بجسمها الأبيض الحلو..طبعا فخداها وذراعها خلت ندى تحينهم مابتش تنكشف ع نساوين ماتعرفهمش...باتت في حوش عبدو لانه كان بايت في المستشفى هديكا الليله...رقدت في نوم عميق وخلت عمك سليمان يتصل ويعاود قريب 100مرة ..
سليمان يضحك"رقدت وخطت فيا ههههههههه"...
ناضت ع صوت آذان الفجر ..ساعدت روحها ومشت للحمام فكت الحنه وحتربتها في أكياس ومصمصت وتوضت ..وطلعت لبست شخشيرها وتو جهت للقبله وصلت ..بعد كملت صلاة..خدت المصحف كان محطوط ع مكتبه في الصاله فتحاته وقرت وردها..بعد كملت قرت أذكار الصباح..وناضت من مكانها مشت لتلفونها لقت 40مكالمه لم يرد عليها وكلهم من سليمان ولقت رساله مكتوب فيها
(نوم العوافي 💓)..ضحكت واتصلت بيه ..ماردش ...شويه واتصل بيها
سليمان : السلام عليكم ..صباح الورد
جمانه ابتسمت : وعليكم السلام ...صباح الفل..
سليمان: شنو ياسموحه رقدتي ونستيني...
جمانه بضحكه: غلبني النوم ..
سليمان : واني غلبني الشوق وطير النوم من عيني..
جمانه ضحكت وسكتت
سليمان : كلها ساعتين ونكون في الطيارة وننزل غادي إن شاء الله ..
جمانه: بتمشي للبلاد ولا؟
سليمان: ايه زي ماقتلك بإذن الله بنمشي غادي نتم أموري ومع المغرب نكون في طرابلس ..
جمانه : تمام
سليمان: حوريتي تو لازم نسكر ..ردي بالك ع روحك.
جمانه: حتى انت ..السلام عليكم
سليمان : وعليكم السلام ...وصكر..
***
في هالوقت نجيب بعد ماصلى قعد مقعمز قدام العياده كان قلبه واجعه ع ريمته ..ماقدرش يمنع دمعته من النزول دمعته اللي مانزلت إلا ليها وع خاطرها ..خايف عليها هلبه وحاس بالذنب وقعد يدعي ربي من اعماقه إن يحفظهاله💓..
ناض وخش داخل ..مشي لغرفتها لقاها راقده زي الملاك .
رقد جنبها وخداها في حضنه وهي شبه فاقت ابتسمت وخشت في حضنه وقالتله بصوت ناعس "نحبك"وهو زاد حضنها "واني نموت فيك"..ورقدوا 💖
***
لطيفه : لتوا مش مستوعبه معقوله تعرفي وساكته
امباركه وهي توتي في الفطور: يعني شن بنستفيد لو درت مشكله ولا اطلقت حنطلع خاسره في كل الحالات ..
لطيفه: عادي جدا عندك ..انتي ماتحبيشي ياإمباركه ؟
امباركه مجرد سمعت هالكلمه رجعت بذكرياتها ليوم محدد
فلاش باك
سنة 2006
ارجوك تربح برا يامفتاح
مفتاح : سلمتي فيا بالساهل وبعتيني وخديت ولد العز شن بديري بواحد زيي عندك حق شن جابني لضو ولد عمران
امباركه بدموع: عمره ماحيجي زيك لكن مش بيدي يامفتاح مغصوبه ..
مفتاح: مغصوبه ايه صدقتك ياأمباركه انتي طول عمرك تشوفي في الدنيا فلوس ومظاهر ماتقدريش تقنعيني انك مغصوبه ..
إمباركه : هييييييييي حي عليا حييي سلفي الصغير رانا يانهاري الأسود برا تربح برا ..
مفتاح : خزيي ع اللي امن فيك وحبك ..ومشي وخلاها ..وهي ترعش مع بعضها وتمشي بالسيف
امباركه: وراس وخيي الموضوع مش زي ماأنت فاهمه
سليمان وعيونه لوطا ويتكلم بإزدراء: اني ماشفت شي..لكن نقوهالك لولا اني عارف ان خوي مجبور عليك وانه مادارش فيك طيب ماكنتش سكتت ع اللي ريته..احترمي نفسك واحترمي العيله اللي وليتي منهم وماتجبرنيش ع شي مانبيش نديره ..ومشي وخلاها
الوقت الحاضر...
امباركه والدمعه محبوسه في عينها: لاحب ولاطياح سعد ع أساس ضو فيه ماينحب..وقامت السفرة وطلعتها برا ولحقتها لطيفه...
***
خشت الممرضه للغرفه بتشوف ريما انصدمت باللي شافته ..
الممرضه: احمم معليشي ياأخ لوسمحت..ريما كانت فايقه قعدت تنخص فيه بصبعها: نجيب ..نجيب
نجيب وهو مغمض عيونه: همممم
ريما ضحكت : نوض خلاص
نجيب لف ايده عليها: ارقدي حبيبتي مازال الوقت
الممرضه😳..وطلعت..
ريما :هههههههه نوض حشمتنا ...
نجيب : ووواك ريما خيرك
ريما: رانا مش في الحوش ..استاقض وفاق شوي
نجيب ابتسم : نسيت روحي ..
ريما : باه نوض خل الممرضه تشوف شغلها
نجيب باسها وناض..وطلع كلم الممرضه اللي كان وجهها احمر وخشت لريما...
***
فات النهار عادي جمانه روح بيها بوها للحوش قبل العصر ..الضي كان هارب ربع ساعه وجي فرحت جمانه ..اذن العصر صلت ..وخشت للمطبخ دارت العشي رزبالخلطه وامبطن وسلاطه مقليه وقلايه..ودارت حلو بسبوسه بالقشطه مع المغرب كملت ..صلت دارت دروة ع الحوش وبخراته وعطراته ..ومشت لدارها اللي ضمتها وعطرتها كلها وطلعت روب حلو لونه دم غزال وكان جرئ شويه ..خشت غسلت جسمها ودارت اللوشن مابين ماكملت اذن العشي طلعت لبست توته وصلت ..بعدها ناضت ولعت دفايه في الصاله ودفايه في دار النوم وعدلتهم ..لبست الروب وطلقت شعرها ومشطاته ودارتله لقطه حلوة ومكيجت وتعطرت ..ع خشة سليمان للحوش اللي اول ماخشله حس براحه يشم في ريحه الوشق اللي يحبه والحوش كان زي الشمامه ..
سليمان : جمانه ...حوريتي ..خش لدار النوم وقعد متجمد في مكانه ..كانت خيال تجنن اول مرة يشوفها جريئه هكي في لبسها ..عيونه ع حنه اللي زادتها فتنه ع فتنتها ..كانت حاجه مش مفهومه من جمالها وعذوبة شكلها اللي كان فاااتن لأبعد حد
سليمان : شن مازال بديري فيا اكثر من هكي..كله قلب واحد والله 💖
جمانه ضحكت : الحمد لله ع سلامتك ...
سليمان تنهد: ااااه ياقلبي اللهم قوة ...
جمانه : ههههههههه حسستني انك بتحارب
سليمان بنظرة شوق وشغف: بنحارب صح ومش أي حرب حرب شوق مالاش حد ...ومشالها ... 💖💖💖💖💖💖
وحني خل نمشوا لسرور😁
سرور : اني والله ياحنان مااحتكيت بولاوحده فيهم كنت قصدا نبي معاملتي معاهم سطحيه ..
حنان: مرة تانيه ياسرور معاش ادرقي قوليلي كل شي واني حنحط لكل شخص حده ...
سرور:مانبيش المشاكل..
حنان: كنتي حطيحي في مصيبه كبيره في جرت سكاتك لأنك ماتبيش المشاكل ..ع العموم حنعرف كيف نتصرف..اني بإذن الله غدوة جايه ..
سرور: ميحبتين بيك..بس بالله عليك عمي مانبيشي يعيف
حنان: مش حيعرف اطمني..هي بالسلامه توا
سرور: بالسلامه.
***
حبيبي العشي واتي ...
سليمان : هي شويه ياعمري...
وتت الطاوله وراجت حساته عطل مشتله لغرفة المكتب لاقته منسجم مع اللاب توب ...قربت منه تشوف
جمانه: هادو صور دورة تطوير الذات..؟
سليمان : ايه ..
ركزت جمانه في الصور شافت حضور الجنس اللطيف كبير في المحاضرة..
جمانه بغيره: ماشاء الله افواج من البنات وكلهم القدام ..هادا شنو شوف لبسهم ..حيييي هادي شن ادير بحداك وخيرها تضحك هكي ...شن قلتلها ترا
سليمان : ههههههههههههههههههههههه
جمانه بغيظ: اضحك براحتك وطلعت وخلاته ..ناض وراها بسرعه وهي ماشيه حضنها ..
جمانه: حول عليا غادي..حول..
سليمان بضحكه: ياغيورة اللي يسمعك يقول اشبح شن شفتيني مداير...
جمانه: لاوالله واقفه حداك وتضحك ومش مداير شي ..شن قلتلها بش ضحكت ..
سليمان بحركه سريعه حط ايديه تحت رجليها وقامها في حضنه : عندك علم سمنتي ..
جمانه مغمضه عيونها وعلامات العصبيه ع وجهها وماتبيش ترد عليه
سليمان : هههههههههههههه..فازو عسل انتي..وقعد يبوس فيها
جمانه لفت بوجهها باس خدها ..وبعدين قعمزها ع كرسي طاولة الأكل وقعمز..اوووه عشي سمح ..
جمانه: سمح ..وبديت تتكلم زيهم ...
سليمان : ههههههههه تعشي راني ميت جوع ناكلك حتى انتي
جمانه شقلبت عيونها وقعدت تاكل ...وهو يضحك عليها وع غيرتها الحلوة في نظره...💖
***
رجاء كانت عند اهلها ..وساهره مع خواتها يتكلموا في موضوع العريس ..ناضت زينب من بحداهم بش ترفع صفرة تكسيده مدايرنها...وهي موليه سمعت رجاء تقول
رجاء: مش خاشلي راس الموضوع بكل ..فيه إن
وداد: وعلاش
رجاء: بيني وبينك معقوله واحد بالمواصفات اللي قلتي عليها ومن هني زياده ..يقبل يتزوج وحده بحالة زينب
وداد: وخيرها حاله زينب مهبوله ولا عقلها ناقص...الحمد لله ماناقصها شي ونيتها صافيه وربي عطاها ع قيس نيتها
رجاء : مش عارفه ...تخافي بعدين لما يتزوجها ينصدم بالواقع وهو راجل وانتي فاهمه قصدي ..يعني مرات يطلقها ويكسرها اكثر
وداد بخوف : إن شاء الله لا..
رجاء: وبصراحه لإن الموضوع من طرف ولد خالتك ومرته متقبلتاش
وداد: اسمعي الدوة هادي ماتقوليهاش قدامها ..
رجاء: عبيطه انتي ..كان نبي نقولها قدامها ره قلتها من بكري ...
وخرت زينب وفي قلبها غصه وطلعت للجنان برغم بروده الجو ماحست بشي جنب الضيق اللي حست بيه لما سمعت كلام أختها قعمزت وقعدت تبكي...شويه وسمعت بوها يقرا في القرآن
{ولقد نعلم انك يضيق صدرك بمايقولون◇فسبح بحمد ربك وكن من الساجدين ◇وأعبد ربك حتي يأتيك اليقين}
نزلت عليها الآيه زي النسمه البارده اللي طفت نار صدرها الضايق ..
ناضت توضت وصلت وقعدت تسبح ..في النهايه خدت قرار نهائي في موضوع الخطوبه...
....
جمانه: علاش يازينب
زينب: ماارتحتش للموضوع
جمانه: متأكده مافيش سبب تاني
زينب سكتت وبعدين قالت: مانبيش ياجمانه
جمانه تنهدت : يعني خلاص نقولوله مافيش نصيب
زينب قلبها وجعهها بس تمالكت نفسها: ايه وربي يبعتله اللي خير مني ...وصكرت عليها وقعدت تبكي ...
يتبع .....
#GomanFared
