الحلقة(115)الاخيرة
( القسم الأول ❤)
لساعه 4 الفجر...
المصيبه اللي صارت نستهم حتى السحور ..قعدوا كلهم يترقبوا شنو يصير..
ع مرواحه فتحيه اللي كان وجهها أسودخشت للصاله اللي كانوا فيها بنتها وكناينها وأختها وبنات أختها وحماتها..سكرت باب الصاله بتقربيع ..
فتحيه ووجهها مايتفسرش: آااه يارب ..المراة مش بس اجهضت عيل في الشهر الخامس لا..حتى رحمها بيحولوه
شهقوا كلهم بصدمه ..
سلمى ببكي: ياماما شن صارلها باهي ..
فتحيه اللي كانت تحاول تتماسك ع قد ماتقدر: قالوا واخدة حاجه للإجهاض وقويه هلبه اثرت عليها وع رحمها وهي قريب راحت فيها
لطيفه: مستحيل تكون هيا دارت في روحها هكي وعلاش بديره هي مش مصدقه انها حملت بعد هالمدة..
فتحيه : اكيد مش هي من غير كلام..الدكاترة قالوا شاربه حاجه مذوبين فيها هالدواء..
جمانه بصدمه وبدون ماتحس: البنجر ...
شبحولها كلهم ...
سلمى: مستحييييل البنجر مايديرش هكي بكل ولاليه أي تأثير ع المراه الحامل
امباركه كشرت عن أنيابها وبخبث: عمتي قالت مدوبينه في حاجه مشروبه..
سعاد تلقائيا: جمانه انتي اللي درتيلها العصير
جمانه جسمها يرجف مع بعضه وبهلع: لالا..والله لا..واللي رزقني باللي فبطني لا...
فتحيه وسلمى يشبحولها بنظرة غريبه قتلت جمانه..
رقيه: بنتي ..اهدي ..بالك حطيتي حاجه بالغلط فيه ..
جمانه وريقها نشف من الخوف: كيف بالغلط مستحيييل والله لا والله ..
فتحيه : باه كيف توا المراة صارلها اللي صارلها بعد شربت من العصير اللي درتهولها ..فسريلي ..
جمانه بخنقة عبرة: ماتظلمنيش ياعمتي..ماتظلمنيش...
كلهم يشبحولها بنظرة خلت جمانه تتمنى الموت ..
جمانه"يااارب ماليش غيرك يااالله "
فتحيه : يروح راجلك وهو اللي يتصرف بروحه ويقرر شن يصير
جمانه تشبحلها بصدمه ومع هذا مافيش دمعه نزلت من عينها..
"مادخلهاش جمانه"
كلهم شبحوا لمصدر الصوت
رجاء بحزم : اني بعيوني ريت اللي صار وتأكدت توا بس ..
كلهم يشوفولها يبوها تتكلم..
رجاء : امباركه هي اللي حطت الدوا في الطاسه
كلهم لفوا بوجوههم لأمباركه اللي كانت تشبح لرجاء بصدمه
امباركه بخوف شديد: انتي شن تخترفي..
رجاء شبحتلها بعدين شبحت لخالتها: لما سألت وين جمانه قلتيلي في المطبخ مشيت وكنت نحسابها بروحها ولما لقيت معاها حد في الكوجينه قلت خل نراجيها برا ..في اللحظه لمحت امباركه جت حدا طاسة العصير ع الرخامه وشفتها حطت حاجه ..في الأول مافهمتش شنو دارت وتجاهلت اللي توا صار خلاني نفهم كل شي
كلهم يشوفوا لإمباركه اللي كانت شبه منشله عن الحركه ..مش حاسبه حساب حاجه زي هادي بكل..
سعاد بنظرة شك: هذا علاش ركبتي لشقتك بعد طلعت جمانه من الكوجينه ..
امباركه مش قادرة تنطق ..تحركت سلمى بسرعه طلعت خدت مفتاح شقة خوها ضو اللي كان محطوط في دولاب المكتبه وركبت طول فوق..فتحت الشقه وخشت لدار النوم قلبتها ..لين وصلت في دولاب مباركه فتحاته لقت الدوا محطوط قباله..ومحطوط بطريقة عبثيه واضح اللي حطه كان يبي يحطه بسرعه ويطلع ..نزلت وهي كلها غضب وفي ايدها الدوا ..خشت الصاله ..وتوجهت لأمباركه
سلمى بنظرة غل وتوري لأمباركه في الدوا: هدا شنو ياأفعى ..كلهم انصدموا ..لكن جمانه انتابها شعور بغضب خلاها تولي أنسانه تانيه..
جمانه بغضب شديد: انتي شنو ..قولي شنو ..انسانه ولاشيطانه..معقوله لهالدرجه ماتعرفيش ربي!!معقوله قتلت جنين في بطن أمه وقتلتي مراة زيك زيها في أنوثتها وهي حيه ..يامجرمه ياشيطانه..لكن اني الغالطه ايه اني مفروض من لما سمعت انك كنت ناويه تسحريني اني وسليمان ليلة الدخول كنت قلت وفضحت وشهدت عليك سكينه اللي شافاتك بعينها
شهقوا شهقه قويه من الصدمه ..أما سلمى من كثر مافيها من غل لإمباركه ضربتها كف لين خرصتها نتطرت وخدها نجرح..
فتحيه : مانتسماش فتحيه بنت سليمان ومانجيش مراة كان ماخليت ولدي يطلقك قبل ليصبح الصبح ..امباركه وهي شاده خدها طلعت بسرعه وركبت لشقتها..
سلمى التفتت للطيفه: وانتي ياأمعه يلي ماشيه وشاده في ذيلها ليك يد في بلاويها ولالا..
لطيفه من الخوف بدت تتكلم تلقائيا وهردت الشكارة: اني مادخليش..هي تكره سليمان مش عارفه علاش كان تلقاه يموت اليوم قبل غدوة..ع خاطر الرزق والفلوس..ديما تقولي حياخد كل شي ويطلع رجالتنا برا ايديهم ع روسهم..وكانت تبيه ياخد زينب..تقول دوريشه ومريضه ونقدروا نمشوها
زينب قريب ماتت من اللي سمعاته..
وكملت لطيفه: كانت ديما تحفر لسليمان عند عمي وتبي يغضب عليه ..
فتحيه بعياط: سككككككري فمك سككككككريه ..
جمانه مصدومه من اللي تسمع فيه..فجأة حست بوجع فضيييع: آاااه...آااااه...آاااااااااااه ..ياااااربي ..
شافت رجاء لرجليها لقت الميه نازله: خالتي بتجيب ره بتجيب...
لبسوها بسرعه وبلغوا الرجاله ..ورفعهم رضوان هي وعزوزتها وحماتها ..كانت ليله صعبه ومابتش اتم...
***
مالك ياشيخ سليمان مش على بعضك خالص
سليمان تنهد: نتصل بالأهل في ليبيا من اول ماليل الليل غادي ومارد حد ياشيخ رشوان
رشوان: خير إن شاء الله يمكن مشغولين بحاجه ولانسيوا التليفون هنا ولاهنا ..اصل زوجتي تخصصها توغوشني عليها وتبقي رمايه هني ولاهنا ..
سليمان بضحكه وتنهيده : إن شاء الله يكون هكي
جاهم واحد من الدعاة الأجانب ..
:حان وقت الإنطلاق..
سليمان ورشوان: حسنا ...وناضوا معاه...
***
كيف ولادة مازال ماكملت التاسع
الدكتورة: هذا اللي صار توا ..حالة ولادتها شويه متعسرة ..ادعولها..
فتحيه ودموعها ينزلوا: يااارب الطف بينا يااارب
سلمى بنبرة باكيه: تعالي قعمزي ماما تعالي..
....
عمران: عليك ليله سوده
سعد راجل رقيه: وحد الله ياعمران
عمران: لاإله إلا الله..رمزي ماني عارف كيف بيصير فيه
سعد: عماه خوته ماتخافش عليه وربك يعوضه من عنده..
عمران تنهد: وزادت لحقت عليها عيال سليمان..اني ياسعد مداير شي في عمري مش باهي اللي ربي مش مبارك لصغاري في الذريه..
سعد: استغفر ربك ياراجل..كله ابتلاءات..وانت ياما داير خير في عمرك ..مش كل قضاء من ربي يبان من برا شديد معناها غضب مرات دفع شر..ومرات ابتلاء لزياده في الأجر..
تنهد عمران ومسح ع وجهه: يااارب عاملني بما انت أهل له ولاتعاملني بما انا أهل له...
...
فتحيه : ووووك عليا كان ماتموت داخل ولدي يلحقها ياسلمى ..
سلمى: اهدي ياماما بالله عليك
فتحيه : كيف تبييني نهدا ماتسمعيش في عياطها ماتشبحيش كيف يجروا الممرضات ..خوك شن يتراله لو تصيرلها حاجه ..!
سلمى : ياماما ادعيلها ارجوك..
***
سليمان وهو في الباص اللي كان يرفع فيهم من حي لحي فأحد الدول الآسيويه اللي فيها أقليات مسلمه يشوفوا في حالهم واحتياجاتهم..كان يحاول يتصل بيها وبأهله ماحد يرد..وقلبه مقبوض حط ايده عليه ودعي في سره"اللهم إني استودعك من اسكنتها قلبي وملكتها إياه وماتحمل من صلبي ياالله"...
***
خيرك ياأمينه
امينه تبكي: قلبي مقبوض وصدري مغموم يافرج ..اتصلولي بأريج وجمانه تربحوا ...
ندى مدت لأمها طاسه اميه وسكر دفتها أمينه طيحت الطاسه تكسرت: مانبيش نفطر نبي بناتي كلمولي بناتي ..وتبكي ..
***
الساعه 9:00 الصبح
بتاريخ 20\7\2014
رووووووورووووووورووووورووورووورري
يارب لك الحمد يارب لك الحمد ...روووورووي....قعدت تبكي
سلمى حضنتها: خلاص ياماما الحمد لله ناضت بالسلامه وجابت وليدات قمر..
فتحيه بعدت عليها ومسحت دموعها: نسخه من بوهم نسخه ياسلمى ..
...
الحمد لله رب العالمين...
سعد : اهو ربك طمنك عليهم ..
عمران: الحمد لله..خل نتصل بيك من بكري وهو يتصل وماقدرت نرد عليه...
....
جمانه فاقت وحالها كان كويس شافت فتحيه قدامها
فتحيه شدت ايدها: الحمد لله ع سلامتك بنيتي
جمانه حطت ايدها ع بطنها لقتها نازله بخوف: شن صار وين صغاري
فتحيه بإبتسامه وعيونهادمعوا: تو شويه و يجيبوهملك
جمانه بفرحه: قصدك جبتهم..
فتحيه : ايه بنيتي جبتيهم واللهم بارك صحتهم كويسه
جمانه حطت ايدها ع فمها تضحك وتبكي وقعدت تشبح فوق: اللهم لك الحمد كما ينبغي لجلال وجهك ولعظيم سلطانك..💖
***
سليمان لما سمع قريب طار من الفرحه صلى ركعتين حمد..وصدق بمبلغ كبير للجمعيه الدعويه حولوه من ليبيا لحساب الجمعيه..وكان يتصل بجمانه وماحصلهاش لين كلم سلمى اللي بعد وين بش ردت..
سلمى مدت التليفون لجمانه : هاك راجلك
جمانه خدت التليفون وسلمى خدت امها وانسحبوا ..
جمانه : السلام عليكم
سليمان بحب ولهفه: وعليكم السلام ياروحي ياقلبي ياام صغاري ياشريكه عمري ياحياتي كلها💖
جمانه : ههههههههه كملت ولامازال..
سليمان: مازااال ما قلت شي ..الحمد لله ع سلامتك ياام عمر..
جمانه بضحكه : الله يسلمك ياابو عمر..
سليمان بضحكه: قداش فرق الوقت بيناتهم
جمانه : ههههههه 5دقايق..
سليمان : شنو صحتهم
جمانه : الحمد لله كويسين حتى اوزانهم كويسه يوزنوا 4كيلوا كل واحد فيهم
سليمان: اللهم بااارك اللهم بارك..توقعت لأنك وليتي دبه قبل لنخليك..
جمانه بزعل مصطنع : دبه صار !
سليمان: وأحلى دبه ...الحمد لله ياعمري ..ربي يباركلنا فيهم ويرزقنا برهم وينبتهم نبات حسن..
جمانه : اللهم آااامين،مازال مطول ؟
سليمان : في حدود يومين ان شاء الله
جمانه: استاحشتك موووت
سليمان : مش اكثر مني ...
شيخ سليمان تعال يامعود الباص رح يروح
سليمان بضحكه: هيا جاي ..حبيبتي لازم نصكر توا نكلمك بعدين ...السلام عليكم ..
جمانه : وعليكم السلام ...صكرت..
...
طلعت جمانه من المستشفى اليوم اللي بعده وأهلها لما سمعوا بيها مشولها ..أمها وبوها بس وبدت الناس تجيهم...يباركوا بالأحفاد الجدد ويواسو ع اللي صار لسكينه..اللي جتها حالة نفسيه وقعدت عازله نفسها عن كل ناس ورمزي يوميا يمشي ويجي ع حوشهم يبي يشوفها وبلا فايده..
20رمضان من سنة 2014...
طرابلس..
حرب المطار 💔
الحرب هادي اللي دمرت مطار طرابلس وانحرقت فيه طياراته.الحرب اللي كانت بين الخوت اللي كانوا في الأمس قريب مع بعض كتف بكتف يحاربوا في الطغيان والظلم ...اصبحوا هما ظلمه وطغاة وحاربوا بعض..
مع الأسف سليمان ماقدرش يروح بسبب الحرب ..وجمانه تنكدت ع الآخر
امينه : ياماما مش باهي ليك انتي نافس ماترعشيش روحك
جمانه ببكي: مش قادرة ياماما ليا اسبوع جايبه وهو مش معاي كيف هو بوهم ولتوا مايشوفهم
فتحيه: معليشي يابنتي هكي ربك كاتب تو تهدا الأمور ويروح المهم انتم وهو صحيحين ومافيكم شي..قولي الحمد لله سلم بنتي ..
سلمى خشت : جمانه وين تليفونك
جمانه : والله مانندري عليه
سلمى: سليمان كلمني قالي قوليلها ترد
جمانه فزت: الله...ليه تلات ماأتصلش وماحصلتاش..ناضت ادور زي المهبوله ..وين تليفوني وينه...سلمى ادور معاها لقاته ..
سلمى: مافيشي شحن
جمانه بضيق : الله المستعان ..رن تليفون سلمى
سلمى : هاكي هذا هو ..خداته جمانه وطلعت
جمانه: السلام عليكم
سليمان بعصبيه : وعليكم السلام ..تليفونك وينه ياهانم
جمانه: ليك تلاته ماأتصلتش ولاقدرت نوصل فيك طارتلي منه ولوحته ومعاش نندري عليه ...اسفه
سليمان تنهد : حسبي الله ونعم الوكيل ..اسف حوريتي لو عصبت عليك ..والله قاعد ع اعصابي ..لامن حال البلاد ولا من بعدي عنكم ..أسأل الله الفرج القريب
جمانه تبكي
سليمان: ارجوك جمانه ماتبكيش ..حبيبتي خليك قويه ع خاطر عمر وعلي انتي في النفاس ومايصلحش بيك البكي والرعاش ..جمانتي خلاص..
جمانه: مش بإيدي ..بعدك عني هادلي حيلي مش متحمله من غيرك ومش مستوعبه كيف ولدت وانت مش جنبي ..
سليمان وقلبه ينعصر عصر وبصوت هادي : حوريتي ..الصبر تحلي بالصبر ..وديما خلي ع لسانك الحمد لله ..دام ربي أراد هكي معناها خيره ..وإن شاء الله في القريب العاجل يجمعني بيكم ونضمكم لحضني...ههههههههههه..انتي ترقدي جهة قلبي ..وهما الزوز واحد ايسار صدري والتاني بيناتكم ...
جمانه ضحكت من بين دموعها: لارقدت وصار اللي صار
سليمان : لانرقد واحلى نومه هالنومه....
جمانه بحزن: غير امتي بس
سليمان : قولي يااارب..
جمانه: ياااارب..فجأة فصلت المكالمه ..الو سليمان...سليمان ..آاالو..اضايقت هلبه..وخشت داخل
فتحيه : هاه شنو قالك بنتي ..
جمانه: حاله باهي الحمد لله بس حاليا مايقدرش يجي
....
وعلاش مايقدر يجي ..يقدر من تونس
عمران: اني نبهت عليه يقعد بعيد هالفترة
مفتاح ولد عم عمران: سامع حاجه
عمران: لاا بس تحسبا لأي شي نتأكد ان الأمور تمام وبعدين نقوله يروح ..برغم اني خايف يديرها ويروح من غير مانقوله
ع جية الحاج فرج اللي كان يتكلم بالتليفون قعمز
فرج: الحال صعبه غادي ..المطار راح فيها
عمران: لاحول ولاقوة إلا بالله
فرج : ياحاج اني تأذنلي غدوة متسقد إن شاء الله
عمران : كيف ياحاج وا.....
شد فرج ع ايده : تربح ماتحلفش نبي نمشي نشوف صغاري وعيالهم
مفتاح : قاعدين في طرابلس
فرج : لاالا طلعوا للزاويه اليوم الصبح ..
عمران تنهد : على كيفك ياحاج..لكن حط في بالك يصير شي تحتاج حاجه مايحشمك شي طول كلمني..
فرج ابتسم : بارك الله فيك..
اليوم التاني تسقدوا فرج وأمينه للزاويه يلحقوا ولادهم اللي يراجو امتى يجي بوهم بش يولوا لطرابلس يقعدوا في الحوش ويشوفوا اعمالهم ورزق بوهم...
جمانه نفسيتها كانت زفت ع الآخر بس كانت تقوي في روحها بالصلاة والذكر والقرآن وتغصب ع روحها تاكل بش ترضع صغارها...سليمان يوم يكلمها ومرات يقعد باسبوع مايكلمهاش ..وهي مش عارفه السبب..بينما هو كان مشغول بمتابعة وضع البلاد من بعيد وفي نفس الوقت ينسق مع المشايخ من غادي بش يشوفوا اوضاع الناس النازحه ويمد فيهم بالسيوله ..وكان يعرف ناس مأنهم ع رزقه غادي ورزق بوه ويطمئن بين الفترة والتانيه...رجع لنشاطه في صفحة (صوت الحق) اللي اصبح مشرف عليها اشراف بعد زواجه..
بس حاليا اصبح يكتب ع الحرب ولم يؤيد أي طرف فيها..
صراع ع سلطه..حرب ع الدنيا ومتاعها ..حرب واللي ينتصر فيها حيتسلط ع هالشعب المنكوب ورزقه ...مافيش طرف معاه حق ولو طلع القمر على جبينه...
...
فات شهر كامل والحرب خلفت ماخلفت من دمار وخراب ..والكفه رجحت لطرف من الأطراف..وبدوا يلزوا في الناس اللي تنتمي للطرف اللي تقاتلوا معاه..حرقوا احياشهم وخدوا ارزاقهم وقتلوا اللي قاعد منهم وكان يدافع عن ماله ..
"من مات دون ماله وعرضه فهو شهيد"...
...
الأيام هديكا اسوأ ايام مرت عليا اني شخصيا ..شفت فيها الموت والرعب ع اصوله لأني نسكن قريبه من المطار..نزحنا وتشردنا فوق الشهر بعاد عن حوشنا وشفنا ايام سود الله لايعيدهم💔💔
....
في يوم ..
الصبح الساعه 6الصبح
جمانه كانت راقده ع سريرها الدنيا نو..وكانت من غير غطا لابسه قفطان كريمي قصير لفوق الركبه ربع كم صدره مفتوح بش تقدر ترضع صغارها ..والعه المكيف وكان مش قوي هلبه خايفه ع صغارها..كانت تتأمل فيهم جنبها راقدين في سريرهم تتأمل فيهم ودموعها تنزل ..
"معقوله فات شهر كامل ماشاف فيه صغاره من لما جو ع الدنيا..معقوله بنطهروهم وهو مش معانا...آااااه يااارب"
ناضت ولبست ملايتها وطلعت وهي رافعه معاها مراضعهم بش بديرلهم حليب بش يساعدها شويه مع الرضاعه الطبيعيه..كانت ادير في الحليب ودموعها ينزلوا..وكانت طول الوقت تسبح بش تقوى وترتاح ..كملت وخدت المراضع كل وحده في ايد وين وصلت لجناحها قعدت تسمع في صوت حد يلاعب في الصغار بصوت مضحك ..قربت ببطء وفتحت الباب اللي كان مردود..وشافت اللي خلاها تجمد في ارضها..كان عاطي بالظهر..لابس تيشرت اخضر وسروال جينز اكحل ومقعمز ع روس صوابعه يلاعب في الصغار ..كان ضاعف ..لكن عضلاته بارزة ..ضحكت في نفسها لإنه تعرف إنه مستحيل يسيب الرياضه حتى في اصعب الظروف ..قعدت تتأمل فيه وبس ..هو باسهم وناض تلفت وقعد يشبحلها وهي تتأمل فيه وعيونها معبيات دموع ..كان مسمر شويه وشعره طول نازل لتحت رقبته ولحيته كبيرة شوي بس كانت حلوة ..كان يهبل منظره مختلف هلبه والسمار ع عيون الزرق زايده وسامه..هي مش قادره تتحرك وتمشيله خايفه يكون حلم... تهيئات..
لين هو فتحلها ايديه "تعالي بسرعه"..مشت تجري لحضنه ..حضناته وايديها ورا رقبته والمراضع في ايديها انخبطوا ببعض ودارو صوت ..هو ضحك ..وقعد يحضن فيها ويشم في ريحتها ومغمض عيونه وهي تشم في ريحته ومغمضه عيونها تتحس فيه بإيديها بش تتأكد ان هو مش سراب..وهو يضم فيها ليه بكل قوة كان يلقى يدخلها في صدره من داخل..هي دموعها بدت تنزل..قعدوا ع هالحال فوق عشرة دقايق ..لين قطع عليهم لحظة شوقهم هاذي ثمرة حبهم الفريد❤..يعيطوا جعانين ..بعدوا عن بعض وهما يضحكوا ويشبحولهم...
....
هي شاده مرضعه وترضع في عمر..وهو شاد التانيه ويرضع في علي ..كانوا متقابلين ويشبحوا لبعض..وعيونهم كانت تتكلم مع بعض..
جمانه : مش مصدقه عيوني
سليمان بضحكه: لا صدقيهم الحمد لله اللي جمعني بيكم وشفتكم ياأغلى مانملك..
جمانه ابتسمت : كيف روحت
سليمان : عن طريق مطار مصراته ...
جمانه: اها...وماتعرضت لشي في الطريق وأنت جاي
سليمان هز راسه بالنفي : مافي شي..بس كان خاطري نمشي لطرابلس ونشوف حالها..
جمانه : والله حتى أني استاحشتها هلبه..هيا الحرب خلاص ولا
سليمان: ايه شبه منتهيه..لكن مازال خل تزيد تستقر الأوضاع ونروحوا إن شاء الله..
جمانه : إن شاء الله ..شافت لعمر لقاته رقد حولت الرضاعه وحطاته في سريره ..وسليمان نفس الشي ..حطوهم مع بعض كيف قاموا روسهم جت عيونهم في بعض وكانوا قراب هلبه ..باسها بوسه لطيفه وبعد..
سليمان بضحكه: خل ندوش وبعدين ساهل وغمزلها..
جمانه خدودها توردوا من الخجل ..هوضحك وقاللها تويتله حوايج ..وخش دوش ..هي حولت ملايتها وبدت ادورله وطلعتله بدي وشرط للركبه وغيرهم..شويه وطلع من الدوش..كان لاف الفوطه ع خصره وينشف في شعره بفوطه تانيه هي مستوهه فيه وخلاص تشبحله بشوق ..وهو قام راسه شبحلها قعد يتأمل فيها وبادلها نفس النظره..كان شعره مبلول وخصلات منه نازله ع وجهه وهو طويل لرقبته..منظره كاااااان فوق الخياااال ..قلوبهم ادق بأقوى قوة عندها..
سليمان بعشق: انتي تصلي ولالا
جمانه اتحشمت ونزلت عيونها وهزت راسها بإيجاب ..
سليمان بشوق ولهفه: تعالي ياحوريتي تعالي...
مشتله بشوقها الشديد واستقبلها شوقه الأشد ..شوق ليه اكثر من شهر..وهو يكبر ويكبر ..هو يبعد عنهاساعه يستاحشها تقول بعد عنها دهر يابال42يوم..وهي أشد وأشد... شوقهم ماليه حد ..لإتنين حبهم لبعض حب مايشبهش أي حب ..حب ربي حطه في القلوب وجمعهم تحت عقد الحب الفريد❤..عقد الزواج ..العلاقه المقدسه..الميثاق الغليظ...وزي ماقال من لاينطق عن الهوى"مارأيت للمتحابين خيرا من النكاح"......
***
في اخر ايام الحرب ...عبدو كان مداوم في العياده..طلع من مكتبه وسمع دوشه قعد يجري بش يشوف شن في ..لقي واحد لابس سروال صاعقه وكانيترا شاد دكتور من رقبته ويعيط عليه وحواليه دكاترة وممرضات وناس يتفرجوا وخايفين
: نبيكم تحييوه يموت نحرق عيادتك وأنت فيها
الدكتور : الحياة والموت بإيد الله هذا لو كنت تعرفه ..
ضرب الدكتور كف قدام اللي حاضرين الموقف..عبدو انصدم وقعد يشوف في دكتوره وقدوته والإنسان اللي ياما تعلم منه ينهان بهالطريقه..فار الدم في عروقه وقدم بسرعه شحه من كناتيرته وردله الكف بإتنين وجه وقفا..
هذاكا طلعوا الشياطين قدام : ي&¥$€#..ي عن€$#₩£
وشد عبدو وقعد يضرب فيه قعدوا يضاربوا وماحد جرب يحز غير الدكتور نفسه اللي انضرب كف..شويه وخشوا مجموعه ضربوا الدكتور ع راسه طيحوه ..وطاحوا ضرب في عبدوا قريب قتلوه لين فقد الوعي..ضربوا رصاص في الهوا طلعوا اللي في العياده هربوا كلهم ..وخشوا هما دقدقوا العياده كلها بالكامل ..
:نطربقوهم...
:لالا سادهم هكي ..هيا طلع الراس بسرعه ..طلعوا المصاب متاعهم وطلعوا من العياده وخلوا عبدو والدكتور اللي معاه فاقدين الوعي...
***
سليمان كان في المربوعه الناس كانت جايه تتحمدله بالسلامه...وصلت لتليفونه رساله لما قراها تفاجأ
(ياولد العروس وينها الأمانه ..ياعارف بالله ياحافظ قرانه)
سليمان عاود قراها اكثر من مرة واذكر.."أمانة قاسم"...
يتبع ....(القسم التاني)
#GomanFared
