الحلقة(43)
فات باقي اليوم بدون احداث تذكر ،بس هديكا الليله جفي النوم هلبه عيون ،،عيون سرور اللي قاعده صورة عماد قدامها وقت لجابت سيرة أمه بسوء دمعته اللي نزلت قدامها والكسرة اللي مشي بيها من حداها ترررن في وذنها كلمة"الله يرحمها" اللي كانت طالعه بنبرة ألم ووجع واضحه سرور نزلوا دموعها بدون إراده وتمنت من ربي لو تقدر تشوف عماد من جديد وتعتذر منه،،أما اريج فكانت تبكي من شوقها من خوفها من قلقها فوق عشرة أيام ماكلمهاش ابدا ولاتعرف عنه حاجه،،أما نجيب فكان طول ليله مشغول بريما اللي حس روحه كإن رجع يحبها من أول وجديد بس هالمرة الباين حيتعذب حق،،ريما كانت راقدة ودموعها ينزلوا بروحهم مش هاين عليها ولاحيهون كرامتها غصبتها تتصرف معاه هكي وكلام سارة اللي كان في الصميم أثر فيها هلبه ومع هذا قلبها ينبض بس بيه وليه..
جمانه رقدت في نوم عميق عكس سليمان اللي كان قلبه عاصيه وماخلاشي يرقد حس إن العقد الفريد أو ناديه خدت كل إهتمامه بس مش قادر ياخذ قرار، اللي هو عليه يلزمه أنه يكون وحيد تماما يبعد عن كل حد ممكن يتأذى بسببه حتى بعده عن أهله كان لحمايتهم اكثر من أي شي ماكانش يبي تولي عنده ايد توجعه يمسكوه منها ويرغموه ع شي مايبيشي،،"ياريتني ماعرفتك "
***
تاني يوم
اصيل بكامل اناقته في السيارة يستنى في ندى بش يوصلها تكفل بهالمهمه وخلاها هي وصاحبتها يلغوا اشتراكهم في الباص بش يحظى بفرصه شوفت هويدا حبيبة القلب
اريج تشبح فيه من روشن المربوعه وتضحك
اريج بضحكه: غير امتى يلحق يوتي روحه بس
عبدو ناض وشبح وين ماتشبح: علاش
اريج بأرتباك: لا غير توا الساعه سبعه ونص وهو قبل ينوض بالسيف
عبدو:😞
اريج طلعت من المربوعه وتوجهت برا وين مافي سيارتها ركبت وبتطلع
طلعت ندى تجري وركبت
اصيل بحده: ساعتين
ندى: هذاكا هو انت اللي نايض قبل الشحاته وبنتها
ضربها ع راسها ضربه خفيفه وهو يضحك
ندى: أااي
راجا اريج لين تطلع وطلع وراها
ندى بخبت: ماتخطمش ع هويدا
اصيل بتعجب: علااااش
ندى : بيوصلها ولد خالها
اصيل وقف السيارة ع تركينه وشبح لندى : ولد خالها !!؟
ندى: ايه باييتين عندهم ع خاطر عرس اختها فبيوصلها هي وخواته
اصيل شبح القدام وأضااااايق لين خلاص وكمل بندى للمدرسه وهو ساكت
***
الساعه 11:00
منيرة: مناقشتك غدوة
جمانه: ايه متوترة هلبه
منيرة : حيمشي كله حتى اني زيك توترت هلبه وبعدين عادي
جمانه: بس اني مفتوح
منيرة: حتقديه صدقيني
جمانه ابتسمت
منيرة: ماقلتلكش
جمانه: شنو
منيرة: رويدا امس فضانيتها
جمانه: الله يهنيها
منيرة: خطبها صاحب خوها ووافقت عليه
جمانه ابتسمت بتهكم
منيرة فهمتها وردت نفس الأبتسامه
***
حلو ممتاز يا بثينه
بثينه بنظرة إعجاب : شكرا استاذ
نجيب: استمري هكي وحتشوفي وين توصلي اهم شي تحبي الحاجه اللي تخصصتي فيها حتنجحي وتبدعي فيها
كانت عيونها عليهم طول الوقت تشوف في نظرات زميلتها لحبيبها ذكرتها بنفسها اول ماقراها ..
فلاش باك
نجيب: فهمتي توا
ريما بخجل: ايه ماكنتش نحسابه ساهل هكي
نجيب ابتسم: اسمك ريما
ريما شبحت لعيونه: ايه
نجيب قعد يشوف لعيونها الكبار والسود يهبلوا وضاع فيهم ريما مسحورة بنظرته ليها هو استاقض حك راسه
نجيب: ع العموم اي شي مش فاهمتيه تعالي في أي وقت
ريما بخجل: تمام
الوقت الحاضر
ركزت ع بثينه وهي ماشيه من قدامه وحركت عيونها جيهته لقاته يشبحلها تخلبطت وانسحبت طول
نجيب تنهد ومشي...
***
مع الساعه 2:00
أريج طالعه بتروح بس رجليها رفعوها جيهة مكتبه المسكر من لما سافر وين وصلت تفاجئت لما شافته مفتوح بشوق مشت وقفت قدامه لقت المكتب فاضي تماما حيوط وزليز بس
"خير ياطالبه تبي حاجه "
التفت : لالا
قدم واحد من الموظفين في الكليه بيخش داخل بعد وخرت اريج من الباب
اريج ودموعها في عيونها: معليشي بنسألك
الموظف: تفضلي
اريج بخوف: علاش تفضوا فيه
الموظف: الأستاذ ضرار معاش بيداوم هني
انصدمت قلبها وجعها لين حطت إيدها عليه انسحبت بسرعه ودموعها ينزلوا وتوجهت لسيارتها
***
خيرك سرور من امس مش عاجبتبني
سرور بحزن: لالا مافي شي
منى: امك حالها باهي
سرور : الحمد لله
منى: باهي خيرك
سرور شبحتلها وابتسمت: تعبانه شويه بس
منى: خلاص روحي وتو نكمل اني والبنات
سرور وهي ماشيه: لاالا خليني الخدمه تييح فيها هلبه
منى: براحتك
***
مقعمزة قدام البحر المكان اللي رفعوها ليه عجل سيارتها اللي كانت بعيده عليها بمسافه دموعها سيييل ينزلوا مش فاهمه شي يعني كيف معاش في ضرار معاش بتشوفه باهي اقل شي كان ودعها مهدلها أنه بيطلع من حياتها مرة تانيه قلبها يوجع فيها لين خلااص ،،سمعت صوت بنيه صغيرة تغني شبحتلها لقتها بين بوها وأمها شادينها من إيدها بعدين البنيه بعدت وقعدت تلعب بروحها وبوها وأمها قعمزوا قراب ع بعض حطت المراة راسهاع كتف راجلها وهو حط راسه ع راسها ولف أيده عليها وحاوطها ويشبحوا لبنتهم ويهدرزوا اريج ابتسمت هونوا عليها، بعدين بعتت مسج لأمها وجمانه إنها حتعطل شويه طلعت سمعاتها
من شنطتها وركبتهم في التليفون وحطت ع قائمة التشغيل اللي كانت معبيه أغاني ليبيه اللي هو يحبها كانت كل ماتستاحشه تسمعهم حطت سماعاتها في وذنها وفتحت ع أغنيه"هز الشوق" كيف بدت الموسيقي متاعها ودموعها عبوا عيونها ،،فجأة حست سماعتها اليمين تحولت من وذنها وشافتها تحركت بروحها من قدام عيونها تبعتها لين شافت ع جنبها فتحت عيونها ع االآخر وقلبها قريب وقف 💓
حط السماعه في وذنه اليسار وهو مقعمز جنبها كيف بدت الأغنيه قعد يغني "هز الشوق حنايا الخاطر حنايا الخاطر " وهي تشبحله ومش مصدقه وتسمع في صوته قداش كان حلو مع بحته المميزة ودموعها ينزلوا وقعدت تتأمل فيه وهي حاطه ايدها تحت خدها وهو يشبح للبنيه الصغيرة ومبتسم ويغني شبحلها وهو يغني ابتسم ومسح دموعها بطرف صبعه هي ضحكت وهو مكمل يغني قعدت تغني معاه خدي ايدها وحطها جيهة قلبه لما جي فاصل موسيقي متاع الأغنيه شبحلها :استاحشتك مووووت
هي بشوق ودموع: مش أكثر مني
ضحك ومسح دمعتها وكمل غني وهي كملت تغني معاه
الراجل والمراة قعدوا يشبحولهم
هي: ذكروني بينا قبل 6سنين
هو: ماكنتش متوقع أني ناخدك وقتها
هي: ولاأني
هو : تعرفي لو بوك صكر راسه وماعطاكش ليا كنت خاطفك خاطفك
هي ضحكت : الحمد لله عدت ع خير،، وشبحت جيهة العشاق الحلوين ،،زعمه ياخدوا بعض
هو : إن شاء الله....
****
:"حضرة المهندسة"
ريما كانت طالعه من المكتب بتروح لما سمعت حد يناديها من وراها التفت وانصدمت
لارا:بدي اخد من وقتك شوي لو سمحتي
ريما : خيرك شن تبي
لارا: ماراح طول صدقيني
ريما هزت راسها بإيجاب ومشت هي ولارا لسيارتها....
***
اريج: هذا البارد علاش يقولي معاش بيداوم
ضرار يشبحلها بحب وهو شاد أيدها: هو شن قالك بالزبط
اريج: قالي الأستاذ ضرار معاش بيداوم هني
ضرار بضحكه: صح معاش بنداوم في المكتب هذاكا حولت لواحد تاني
اريج بعصبيه: وعلاش مايجاوبش إجابه كامله
ضرار يضحك
اريج شبحتله ع الجنب: لما تتكلم تقول نضغضغ فيك وانت ماغير تضحك وخلاص😒
ضرار ماات ضحك
اريج: 😑😑
ضرار قرصها من خدها: تهبببلي وأنتي معصبه ياقطوستي
اريج حولت يده : متاخدش راحتك هلبه حطت أيديه ع رجليه وربعت إيديها وشبحت قدامها
ضرار: تعرفي كيف زي ماخطبتك من غير علمك حنقرا فاتحتك بدون علمك
اريج ضحكت وغيرت الموضوع: وين هذا كله معقوله حتى مكالمه ماقدرتش تكلمني
ضرار شبح للبحر: ضغط خدمه وبعدين ماقعدتش في مكان واحد سافرت لأكثر من بلاد في هالمدة
اريج شبحتله زين: خايفه نسألك هذاكا السؤال تتهرب مرة تانيه
ضرار شبحلها وأبتسم: نخدم مع الحكومه
اريج شبحتله وسكتت
ضرار: خيرك؟؟
اريج ابتسمت وهزت كتافها: شي
ضرار ناض ومد يده ليها : هيا نوضي روحي الوقت تأخر
اريج عطاته إيدها ونوضها : حاضر
نفضوا حوايجهم وكملوا طريقهم وهما يهدرزوا لين ركبت سيارتها ومشت وهو وراها
***
نجيب: بس كبير عليها
فرج : عارف لكن لما سألت عليه شكروه هلبه
نجيب قعد يفكر : يصير خير خل نسأل عليه بمعرفتي وبعدها نردوا
ندى كانت تسمع فيهم من حدا الباب :"حي اريج اكبر منها ب15سنه !!واني ب 20مرة وحده !!"
***
ريما: ماليش علاقه بيكم ومايهمنيش نعرف عنكم شي
لارا: بعرف بس أني إجيت لقلك ، اصحك ترجعي تعطي ثقتك لنجيب لأن مابيستاهلك،،كان لازم اعرف معدنو من البدايه اللي بتهون عليه عشرة 4سنين رح يهون عليه عشرة شهرين
ريما ابتسمت بتهكم: من قالك إن هو يبي يوليلي
لارا ضحكت بسخريه: أنا بعرفوا اكثر ماأنتي بتعرفيه عم بيحوم حواليك مشان ترجعيلوا تركني بدون مقدمات مشان ترجعيلوا؛؛وبالحقيقه اكبر دافع لهالشي هو زميلوا القديم مدير مكتبك واضح أن نجيب بيتحسس منو كتير ولما شافوا صار قريب منك ماتحمل ،،يعني بأختصار هو بدو يرجعك بس مشان ماتكوني ألو،،ولا لمثل نجيب مابيحب غير حالوا وبس
ريما وجعها قلبها من كلام لارا وحست أن هو مكمل لكلام سارة اللي ماقدرتش تقوله بس تماسكت قدام لارا
ريما بإبتسامه مصطنعه: نجيب من لما سيبني وطلع من حياتي سكرت الباب وراه بمفتاح وقفل مستحيل نرجعله مهما صار ،وتوا مادام وصلتي اللي تبيه ياريت تنزلي لأني عطلت هلبه
لارا ابتسمت : كثير منيح وأني هيك ارتاح ضميري
نزلت لارا من سيارة وريما مشت طول
لارا: "لارح طول بلح الشام ولاعنب اليمن يانجيب "
***
فاتت أيام وسرور ع أمل تشوفه قدام المحل أو المعمل حاسه روحها مشتته هلبه ومعاش قادرة تخدم كويس
سرور: ابله زهية
زهرة: نعم سرور بنتي
سرور: حاسه يوحي تعبانه شويه نقدي ناخد إذن نطلع بكيي اليوم
زهرة: سلامتك بنتي مريضه
سرور: لاا شوية أيهاق بس
زهرة : باهي بنتي تقدري تطلعي
سرور: صحيتي ابله زهية
طلعت سرور وخدت تاكسي ومشت لمكان معين بش ترتاح فيه شويه
**
نجيب: تو أنتي قلتي معاش تفتحولي موضوع الزواج بكل لبعد نكمل قرايتي،شنو غير رايك؟؟
اريج بإرتباك: فكرت شويه وقلت مافيش مشكله لو انخبطت وبعد نكمل قرايتي العرس
نجيب: تعرفيه
اريج انصدمت وجهها ولا الوان
نجيب: هو قال شايفك في الكليه
اريج بخوف: هو قال شافني ماقالش نعرفه ويعرفني
نجيب: اكبر منك ب 15سنه عادي !!!
اريج: ايه ناضج وعاقل خير من شباب هالوقت طايشين ومايتحملوش المسؤليه
نجيب يشبحلها بشك
اريج قعدت ساكته
نجيب: بنردوا عليه وبنقولوله اللي قلتيه
اريج بخجل: زي ماتبو
نجيب : ايه ايه صح زي مانبو 😒
اريج:😳
***
خشت للكافي اذكرت اول مرة تلاقت فيها معاه ضحكت وهي ادور ع طاوله تقعمز عليها لمحاته مقعمز هو وواحد ويهدرز ويضحك فررحت لين خلاص قعمزت في طاوله قريبه منه وقعدت تشبحله
عماد: حاضر ياسيدي حنجي معاك
قاسم: يستر الله وحق الله تقول بنعدي نحارب
عماد بضحكه: الحب زي الحرب أصلا
قاسم ضحك: قيسك ياصاحبي مكبد
عماد ابتسم بألم: شر تكبيده
قاسم : من امتى
عماد :من اسبوعين
قاسم : هههههههه اسبوعين وشر تكبيده
عماد: الحب ياصاحبي مايعرفش المده ينقز طول لقلبك ويستعمره بسرعه
قاسم: لالا انت وضعك خطير
ضحك عماد ولف وجهه يمينه وشبحها وانصدم جمد غ نفس اللقطه وقعد يشبحلها وهي تشبحله
قاسم قعد يشبحله ويشبحلها هز عماد من كتفه:هييي ياراجل مش هكي
عماد شبحله :شويه ياقاسم ونجيك ناض ومشي لطاولتها
سرور تشبحله وابتسمت: تفضل قعمز،،قعمز عماد
سرور تشبحله بخجل: كيف حالك
عماد: كويس
سرور : دويت عليك هلبه واستنيتك كل يوم
عماد رافع حواجبه: علاش؟!!
سرور وجهها احمر ونزلت راسها: أسفه ع قلته أخي مية
عماد: معليشي اني كنت حمار ماعرفتش نتصرف
سرور قامت راسها: اني اللي كنت حماية ويديت بأسلوب خيي
عماد قعد يضحك ع كلمه" حماية "
سرور:اسمع معاش تتسهوك ع لذغة لساني ربي هكي خلقني
عماد هدى ضحك وشبحلها: أصلا هادي أحلى حاجه فيك
سرور وطت راسها وتحشمت
عماد: هو انتي كلك حلوة
سرور: هيييه ماتاخدش ياحتك هلبه
عماد ضحك: نبي نخطبك
سرور شبحتله: مازال مش توا
عماد: معناها موافقه 😍
سرور بخجل: من ناحية المبدأ،، خل نتعيفوا على بعض أكثي وبعدين نشوفوا شنو يصيي
عماد: زي ماتبي لكن في الأخير حنخطبك تبي ولاماتبيش
ضحكت سرور بخجل: انت شن اسمك
عماد بإبتسامه: عماد وأنتي "كان يعرف اسمها غير يبي يسمعها كيف تقول فيه"
طلعت سرور مذكرة صغيرة من شنطتها وبيرو وكتبت اسمها ومزقت الورقه وعطتهوله
عماد شاف الورقه مااات بالضحك
سرور: تحسابني مش فايقتلك 😏
عماد بضحكه: تهبلي والله تهبلي
سرور تحشمت وشبحت لقاسم اللي لقاته يشبحلهم ويضحك
شبحت لعماد : خلاص بيا لصاحبك
عماد: باهي وإنتي نوضي روحي طول الوقت تأخر
سرور : بنوض بس ع خاطي الوقت تأخي حق مش لأنك انت قلت تحكم فيا لما نلبسوا دبل
عماد ضحك: مش مطولين هكي صدقيني
ضحكت سرور وناضت طلعت وولا عماد لقاسم
قاسم بضحكه: ربي يسعدك يااارب
عماد بضحكه : ويعطيك اللي في بالك.
تنهد قاسم وسكت ....
يتبع .....
#GomanFared
