الحلقة(84)
هو كيف صاربالزبط؟
باسط بخوف: روح البارح وصار بيني وبينه نقاش ..هددته إني حنحرمه من كل شي لو ماطلقش بنتك وهو سكر راسه وطلع من الحوش معصب ومانندروش ألا رقمه يتصل بأخته وين ردت قالولها داير حادث...
فرج حط ايده على ايده صاحبه: حينوض منها بإذن الله
نجيه كانت واقفه بعيد تبكي في حضن بنتها: كله في جرايرها حسبي الله ونعم الوكيل
امل: ياأمي هي شن ذنبها..ولدك اللي جابه لروحه ماتتحسبيش عليها..
طلع الدكتور مشوله يجروا
باسط بخوف: طمني
الدكتور : اطمنوا كسر في ذراعه ومدمدم بس ومافيش نزيف داخلي ولاأي مضاعفات الحادث ماكانش قوي
باسط : الحمد لله ...فرج حضنه: الحمد لله ع سلامته
نجيه ببكي: نقدروا نشوفوه
الدكتور : نص ساعه تانيه ..
***
جمانه سمعت بالخبر واضايقت مستحيل تشمت فيه في النهايه تربى معاها وبيناتهم عشرة ...قبل الفطور شدت في خوها عبدو يرفعها ماكانتش تبي تمشي بروحها..مهما كان في النهايه اسمها زوجته ومراعاة للماضي الأخوي اللي عاشوه مع بعض ..
...
نجيه: هادي شن جابها
امل تشوف: جمانه !!!
جمانه وصلت فيهم: السلام عليكم
ردوا عليها كلهم ماعدا نجيه
جمانه : عمي باسط لاباس عليه وسامحني اني السبب
باسط : شن ذنبك انتي هو الغالط غلط في حق نفسه وفي حقك
جمانه التفت لنجيه : لاباس عليه وسامحيني
نجيه قلبت وجهها: ربي اللي يسامح
جمانه بضيق : لاباس علي خوك ياأمل
امل: الله لايوريك باس وانتي اللي سامحي خوي ع اللي داره فيك ...امها فنصت فيها وامل تجاهلت
طلعت الممرضه تقدروا تخشوله فايق
خشوا كلهم ماعدا جمانه وبوها ...
...
نجيه حضنت ولدها وتبوس فيه: الحمد لله على سلامتك حبيبي
فيصل ابتسم : الله يسلمك ياغاليه ..
امل بدموع: الحمد لله ع سلامتك يامجنون
فيصل بضحكه: الله يسلمك ..قعد يشبح لبوه ومتحشم وبوه ماباش يقول ولاكلمه ..
امل : حتى عمي فرج وجمانه برا ...امها نخصتها
فيصل بأندهاش: جمانه !!
امل: ايه ..
سكت فيصل شبح جيهة الروشن بعدين شبحلهم: ممكن تنادوهالي نبي نكلمها بروحنا
شبحوا لبعض بإستغراب
باسط : اطلعوا هيا ...طلعوا
باسط : عمو جمانه فيصل يبيك من بعد اذنك يافرج ..
فرج شبح لبنته اللي هزت راسها بالإيجاب
فرج: خشي يابابا ..
مشت جمانه طقت الباب وخشت لقاته يشبح للروشن
جمانه: السلام عليكم
فيصل وهو يشبح للروشن:وعليكم السلام
قربت جمانه شويه: لاباس عليك الحمد لله ع سلامتك
فيصل: لايوريك باس والله يسلمك
جمانه: علاش ادير في روحك وفينا هكي ؟
تلفتلها فيصل وعيونه تعبوادموع: جمانه ..ارجوك قيمي خمارك
جمانه سكتت ومابتش تقيمه
فيصل: ارجوك ..وبعدين هذا يجوزلي
نبره صوته كان فيها رجاء وجعها قامت الخمار بصعوبه
فيصل قعد يتأمل فيها ونزلت دمعه من عينه: عشت عمري واني نحلم بيك راقد وفايق كنت فرحان لأني كنت اقربلك حد ..لما كانوا يقولوا سر جمانه عند فيصل وجمانه وفيصل توامه بالروح كنت نفرح بزياده..مشاعري ليك كانت ديما مشاعر حب قعدت نخفي فيها ..عشقتك ..وانتي تكبري وتزيدي حلاوة..وبديتي تنخطبي ..وقتها خفت ..خفت هلبه ياخدك حد غيري واعترفتلك بمشاعري ..صدمتني ردة فعلك القاسيه قاطعتيني وكإنك عمرك ماعرفتيني جن جنوني معاش مستوعب نبيك ليا ..حتى بعد كلمتيني واقتنعت اني نبعد عنك انجرحت من كلامك لكن حبك مانقصش مثقال ذره ...درت اللي درته لإن حبي ليك كان فوق طاقة تحملي البعد نبيك تكون ليا ومش مهم كيف...غلطت في حقك وحق نفسي وعيلتي وعيلتك ...سامحيني ..
جمانه دموعها يصبوا واذكرت ايام زمان ماكانتش تتمنى يصير هكي بكل ولاتوصل بيناتهم لهني : مسامحاتك
مسحت دموعها ونزلت خمارها وجت بتطلع
فيصل : جمانه
جمانه وقفت بدون ماتلفت
فيصل شبح للروشن وغمض عيونه : إنتي طالق
جمانه هزتها الكلمه والتفت شبحتله
فيصل : حتوصلك ورقتك بعد العيد ..ومن قلبي نتمنالك تكوني سعيده ياحب عمري 💔
جمانه بكت وطلعت تجري ..تلقوها قدام الباب وقعدوا يشوفولها وهي ماشيه بوها ماباش يلحقها لين وصلت في خوها اللي كان في نهايه الممر ومشوا مع بعض...
***
آااااه ههههههههههه
الشيخ عثمان: خيرك ضحكنا معاك
سليمان بضحكه: والله مانعرف ..حسيت روحي فرحان ومش عارف ليش
عثمان بضحكه: ربي يفرحك ويفرحنا
ضحكوا الزوز وكملوا شغلهم.....
***
جمانه كانت طول الطريق تبكي فرحانه وزعلانه حست انها كانت أسيرة وانفك اسرها"الفال لكل وحده ابتلاها ربي بواحد مايخافش لاالله لاعبد ومخليها معلقه..ربي يفك اسرهم"..
وزعلانه لأنها ماكانتش تتمنى هذا كله يصير...
***
في الليل
اصيل روح من التراويح وخش للحوش يضحك
اصيل بصوت عالي: ندىىىىىىىىىىىىى
ندى انخلعت طلعت من المطبخ لأنها توتي في النسكافيه تشبحله وخلاص
جمانه وأمها طلعوا من دار المعيشه: خيرك
اصيل: البقه هادي جابت 97%
ندى بصدمه: كيف في شنو؟؟
جمانه بفرحه: طلعت النتيجه
اصيل : ايه وكلمت واحد نعرفه شافلي نتيجتها ندى مشت تجري حضناته قريب قتلاته 🤣 وحضنوها امها وأختها
ونزلت اريج من صوت الدوشه عرفت وفرحت هلبه وحضنت اختها وقعدت تزغرط وتحمست عمتكم امينه وزغرطت معاها ...ع خشة فرج اللي كان جاي من العيادة وتلاقى هو ونجيب وعبدو في الباب
فرج: خيركم ..
ندى نطت تجري وحضنت بوها: نجحت يابابا نجحت
بوها شد عليها في الحضن وقامها وقعد يلف بيها وهما يضحكوا ...طلقها وجبدها نجيب حضنها وباركلها وبعده عبدو
"قداش خاطري ندير عيله حلوة زيهم ويكون عندي راجل زي فرج ...😢"
المهم هديكا الليله مشت بالفرحه وجمانه كانت اكثر وحده فرحانه وحاسه بإن الجبل اللي كان ع صدرها وكاتم ع نفسها انزاح ...وهما مقعمزين في دار المعيشه جمانه وزعت نظرها عليهم
جمانه: بابا
تلفتلها فرج: نعم
جمانه: فيصل طلقني ...
كلهم انصدموا وقعدوا يشبحولها ...
امينه: امتى
جمانه تنهدت: لما مشيتله اليوم في العياده
امينه: وهذا وين تقولي ..وبعدين شبحت لراجلها..حتى بوك ماكانش يعرف
عبدو: قالتلي اني بس وحرصت عليا مانقولش تبي تقول هي بروحها
اريج: مبروك حبيبتي
فجأة ضحكوا كلهم ع اريج
نجيب بضحكه: والله عندها الحق هذا وين ارتحت
فرج ابتسم: ربي يعوضك خير يابنتي
جمانه : آمين
ندى: وبهالمناسبات السعيده نبوا زرده
ضحك فرج: في العيد إن شاء الله ...
وكملوا هدرزتهم وكلهم مرتاحين من داخلهم لأن هم جمانه كان همهم كلهم وانزاح عنهم.....
***
تم رمضان والكل يسأل الله يعيده عليهم وهما والبلاد في احسن حال 💔...
العيد الصغير أجوائه الحلوة ماتكونش إلا في الصبح طبعا
بعد صلاة العيد روحوا الرجاله للحوش وكانوا طارحين بالعربي ويهبلوا وعيدوا ع امهم وخواتهم .. واللي هدا من الشباب رن تليفونه كبيداتهم يعيدوا عليهم ❤😁
مشي بعدين فرج وولاده عيد ع خوه ناصر لأنه الكبير وبعدين مشي لباسط عيد عليه وطبعا المعامله رسميه جدا بينهم وبين فيصل...عزمهم فرج ع زرده نجاح ندى اللي حتكون تالت يوم العيد ....
وماجي الظهر لين بدت الغيبوبه 😴😴
....
سليمان من ليلة العيد في البلاد وعيد مع أهله وعيدوا ع جماعتهم وناسهم وقاعد جابد روحه من أمه شوي ..هي صح أمه ومهما ادير مفروض يتغاضى ومايقساش عليها ..بس كان يبي يحسسها بغلطها ..كان حاسس ديما بمسؤوليه اتجاه المواقف اللي يكون فيها صح وغلط أنه لازم يوجه للصح لما يعرفه ومايفرقش معاه شي ....
طبعا فراسه كان في مشوار لازم يديره وأجله لبعد العصر..
***
كنان من اخر مرة كلم فيها ندى معاش جي جيهتها كان يبي يطلعها من راسه ..بس مش قادر ،خاش يدهور في صفحتها ويشوف في منشور النجاح متاعها والتعليقات وركز ع تعليقات لقاهم خوتها ماعدا واحد كان مسمي روحه بروف ايوب بالأنجليزي كاتبلها"كليه الطب ترحب بك🌷"
تكنطى لين خلاص ومتكي ويشوف في نقاله بايد وحاط دراعه ع راسه ..
عدنان: اطلقه شويه وارقد
شبحله كنان وكان في قمة الغضب: خليك في حالك
عدنان: هذا كله ع خاطرها
التفتله كنان: شن تخترف
عدنان شبحله بنص عين: نخترف صار 😒 ،،خيرك شن جاك تي انت البنات يجروا في جرتك وعمرك ماعبرت وحده فيهم تي الأوكرانيات اللي يطيروا العقل من الراس ع قد ماحاولوا فيك مادورتهمش ،،شن فيها هادي مش ملفته هلبه ره..
كنان بعصبيه: ماليكش علاقه بيها ماتجيبش سريتها وماتقارنها بحد
عدنان: هههههههههههههههه ...حي عليك حي رسمي الولد
كنان ناض قعمز: بنروح لأوكرانيا تالت يوم العيد
عدنان: احسن ابعد وانساها خير حتى عرس اختك تعالى في اخر يوم بش نولوا مع بعض...اخت نجيب هادي لما تمرمدك في جرتها فوتها من توا
كنان ناض بعصبيه وطلع من الدار
عدنان" احسن حاجه قلبي ميت لاليا في الحب ولا المشاعر"
***
سليمان رفع امه ومشي لحوش خالته استقبله راجل خالته وولد خالته وعيدوا عادي وهو طلب يشوف خالته رفضت بس زينب طلعت وعيدت عليهم وبانت انها تقبلت الأمر الواقع برغم انها تتقطع من داخل ..وبعد محاولات اقناع امها طلعت وسلمت ع اختها وقاعد خاطرها مش طايب ..سليمان استريح نوعا ما وأمه حتى هي....
***
دارو زردة ندى وبوها دبحلها قعود ياحنه حتى هي حبيبة قلبه❤ الصغيره وكان يوم ولاأروع في الحوازة طبعا في الليل
نزلت بوست ع الزردة والصور والأجواء متاعها وقعدو اللايكات والتعليقات يهلوا ..وهي تقرا صادفها تعليق ايوب
"نبوا زردتنا حتى حني 😁" ندى ضحكت وردت عليه واني نبي هدية 😂 ماردش ايوب طلعت من البوست وقعدت تتصفح عادي جاها اشعار وكان كنان سالم رد على تعليق بروف ايوب ..
استغربت ندى وخشت شافت الرد لقاته
"هديتي ع صفحتي في الفيس🌹"
ندى ابتسمت وطول لصفحته ..لقاته منزل فيديو
كان مقعمز في ميدان الشهداء ولابس تشرت اخضر فيه كتيبه بالأسود وسروال جينز ازرق كحلي وكان حلييووهلبه 😍
يعزف ع القيتار غنالها ميكس بين أغنيتين الأولى
"يالعزيز عليا مبروك عيدك يالعزيز عليا مبروك عيدك يالعزيز في كل عام أيام هنيه مبروك عيدك "
وخش ع التانيه
" والله فرحنا وغنينا بنجاحك يالغالي علينا" ...إلى أخر المقطع هذا
طبعا ندى فرحتها لقطته ومشت خشت ع الأنستا بتكلمه
هو كان ع اعصابه شاد تليفونه ومقعمز في الجنان وراسه فوق ومغمض عيونه..لين سمع صوت إشعار ..
فز قلبه وشافه لقاه رساله منها ..عيونه ضحكوا قبل فمه💓
(مرحبا ،،كل عام وانت بخير )
(اهلا ..كل سنه وانتي طيبه)
(روووعه صوتك وغناك وعزفك 😍)
قلبه بيفر💓
(مشكورة ..المهم عجباتك )
(هللللبه شكرا كنكون)
كنان ضحك ع الإسم اللي نداته بيه وعجبه هلبه
(كنكون😅)
(خيره مش حلو 😯)
في خاطره كل شي منك انتي حلو حتى لو حدفتيني بالرشاد 😍
(لاحلو بس ضحكني 😂)
(هههههههه)
(حلوة اجواء الزردة الباين )
(ايه تجنن ❤)
(ايه امتى تسجلي في الجامعه)
(بعد العيد)
(اها بتمشي تمي اجرائتك بعد عرس خوتك )
(لالا اني مش حنمشي حيمشي اصيل تفاهم هو وطالب غادي حكيتلك عليه قبل عرفته ع اصيل وقال حيتم الموضوع معاه )
كنان يغلي غلي قريب يتفجر
(من هو هذا اللي ديما يعلقلك ؟)
(ايه ايوب طالب سنه رابعه بشري وماشاء الله خدوم ومحترم وعضو في اتحاد طلبه)
كنان كتله نار ينحرق حرق تشكر فيه قدامه وكلامها ينزل عليه زي السم
(تمام ...تصبحي ع خير)
ندى استغربت
(وانت من اهله)
كنان صكر وزفر بقوة "يارب هالبنت شن دارت فيا ملكتني ومش متحمل حد يقرب منها غيري الغيره تاكل فيا ماكله "
عدنان طلعله برا: اسمع نصيحة خوك وفوتها
كنان شبحله وناض : انت اللي فوتني..ومشي
عدنان "ربي يهديك"
طبعا كنان وعدنان توأم مختلف ومايتفقوش هلبه بس روحهم معلقه في بعض ينجرح واحد تاني يحسها فسط قلبه وعدنان كان خايف ع خوه لأنه حساس وعاطفي وعصبي هلبه وماخشش في علاقات من قبل ولا حب قبل وحس ان ندى فيسع ماخدت قلب خوه وخايف اللي صار مع ريما اخته يصير معاه...
***
فات اسبوع العيد جي اسبوع العرس ....💕💕💕
يتبع .....
#GomanFared
