الحلقة(34)
الحوش تعبا ناس جيران وأقارب،،بكي ونواح
"قالوا انقلبت الباص اللي كانوا فيها "
"مساكين ماطلع منهم حد حي "
"امه رفعوها المستشفى وخواته بيهبلوا"
"ربي يصبرهم"
***
اني من الأول معارض لمشيته الطريق تخوف واللي توقعته صار ،،ويخبط بإيده ع خيط
عبدو يبكي: وحد ربي يانجيب مقدر ومكتوب
نجيب طلع قعمز برا مدرق عن الناس ودموعه ينزلوا...
آااااه ياأصيل ياقلب أختك مش مصدقه معاش بنشوفك آااااه يااارب
جمانه تبكي: لله ماأعطى ولله ماأخد إنا لله وأن إليه راجعون أدعيله أريج هذا اللي محتاجه توا
مرت عمهم تبكي : إيه يابنتي خوك توا بأمس الحاجه للدعاء
اما ندى فكانت حابسه روحها في دارها وتكلم في هويدا وتبكي
ندى تبكي بالعبرة: ياااناري...خووي ..ياما تراجني قالي نبيها صاحبتك ....قصدي شريف....كلمهالي ياأريج ...وانهارت بالبكي
هويدا تبكي ومصدومه من اللي تسمع فيه: ندى صكري أني جاياتك ....
ندى كانت تبكي ع اتنين ع خوها وقاسم خصوصا إن الحادث مانجي منه حد كلهم ماتوا...
فرج: كيف أني نبي جثة ولدي
عبدالباسط بأسف: لما الباص انقلبت هما تنطروا منها سكت وبألم فيه منهم تقطع قاعدين يلموا في أشلائهم
الحاج فرج معاش قدر يتحمل سكره هبط وأغمى عليه ،،دخلوه مع مرته في نفس العيادة ومعاه صاحبه عبدالباسط ولحق خوه ناصر...
يوم أسود بكل معنى الكلمه مر ع حوش الحاج فرج البنات بيهبلوا ع خوهم والناس تصبر فيهم ،،وخوته مصدومين ومش مستوعبين وصحابه كلهم يبكوا عليه ..
امينه قاعده فاقدة الوعي والحاج فرج حتى هو ...
***
عليك حادث شنيع ياااراجل
عماد يكلم في سليمان
سليمان: إنا لله وإن إليه راجعون ربي يرحمهم ويصبر ناسهم
انفتح الباب
عماد: باهي اللي جيت قريب متت بالجوع في جرتك...
***
ماشي ويجر في رجليه جر فتح عيونه ع وسعهم لما شاف سيارات قدام الحوش قلبه أنقبض وبدي يجري وصل قدام الحوش لقي الباب مفتوح من خوفه خش بخطوات بطيئه ..
....
نزلت أريج بتشرب ميه الدنيا هدوء والحوش ساكن وتسمع في حد يبكي زبطت صوت عبدو خوها نزلت من عيونها دموع ورا بعض خشت للمطبخ لقت باب الثلاجه مفتوح قدمت بالشويه وكان في حد مقمعز ويشرب
"أنت منو "
التفت الشخص
"هاااااااااااااااااااااااااااااااااااااااااااااااااااااااااااااااا"....
***
عماد : ربي نجاكم
سليمان: الحمد لله ع سلامتكم
قاسم : حني اللي عطل بينا إنا وقفنا ع الحادث وقعدنا نساعدوا فيهم في لم الأشلاء والجثث
عماد سكر عيونه بقوه : لاحول ولاقوة إلابالله
سليمان تنهد: الله يرحمهم برحمته
***
متعنقات خوهم وقريب يخنقوه
أصيل يضحك: تي باهي خلاص إنتي وياها حولوا
ندى وأريج: انلاااااا
جمانه بضحكه ودموعها في عيونها: والله ماني مستوعبه لتوا اللي صار كله تقول حلم
نجيب : هيا نوض نمشوا لبوك وأمك
أصيل : لاحول ولاقوة إلابالله الواحد قبل لينشر خبر لازم يتأكد منه
جمانه: يلاا توا الحمد لله إنك بخير ...
***
مشي اصيل لأمه وبوه وبعد فاقوا شافوه وفرحوا هلبه وبعد طلع بوه من العيادة وزع صدقه ع الناس إن ربي نجا ولده
كان ممكن باصهم يكون في مكان الباص اللي انقلب ..لكن ربي لطف..
***
بعد يومين
ندى : باه إنتي شن رايك
هويدا بخجل: مش عارفه..بس نشوف أن مش وقته
ندى تنهدت: والله حتى أني هكي قلت
هويدا تفكر: أسمعي قوليله مازال الوقت نطلع من الثانويه ويصير خير
ندى بضحكه: صار طلعتي تبي خوي من وراي 🙄
هويدا بخجل: لاوالله مش هكي ..😳
ندى: هههههه نبصر عليك يابنتي خيرك هههههه
***
في منطقه ما في طرابلس ،،تحديدا في كافي معروف ..كان مقعمز ع وحدة من الطاولات ..يشرب في قهوة ..ويفكر..هو فضل العزله في الفترة الأخيرة بش يفكر..يفكرفي شكل حياته كيف حيكون...يفكر كيف حيتخطى ألمه ..كيف حيعيش عادي زي باقي الشباب اللي في سنه..بس هو أصلا مش زي باقي الشباب اللي في عمره..حالته خاصه ..وضعه قليل من يعيش فيه ..
"عييت والله عييت يعني فوق مانخدم فيهم فوق مالساناتهم سواطير ياسرور ،،والله لو مش على خاطر محمد مانقعد دقيقه "
طلع من دوامة أفكاره ع صوت هالمراة اللي مقعمزة ع الطاوله اللي وراه تشكي في همها وهو فضل يسمع ،،ع الأقل مايحسش روحه هو المهموم الوحيد في هالمكان
"معليشي ياخوله تحملي كلها سنه "
"مش حاسه إنها سنه بس؛ ممكن طول ظروفه صعبه وأني نكتم في اللي يصير معاي بش مانزيداش "
"وهذا الصح بنت الأصول هذا فعلها مادامه كويس اوقفي معاه ماتكونيش إنتي والزمان عليه"
"تنهدت"
"صدقيني كله حيمشي غير يبي شوية صبي"
هو :" صبي!!"
"هذا رايك ؟!"
"مش ياي هدا اللازم يصيي اصبي ياجلك يستاهل"
هو "هههههههه ياجلك"
"إن شاء الله ،والله ريحتيني ياسرور "
"إن شاء الله ديما ميتاحه"
هو "ههههه ياربي عسسسل "
"نطلبك حاجه"
ضحكت"عصيي بيتقال فيش"
هو "لاهلبه هكي لازم نشوفها "
التفت ماكانش يندري ع روحه أن حيكون ع موعد مع هديه من ربي هديه حلوة هلبه وعوض جميل،كانت بنية حلوة ملامحمها مميزة ،،كانت لابسه وشاح رصاصي وعبايه قعد مبلم فيها ،،هي لاحظت وتعقدت منه
سرور: أي خدمه تفضل
هو استاقض : لالا شي أسف وتلفت طول "محلاها "
سرور قعدت هي وخوله يهدرزوا وهو يسمع ومستمتع ع الآخر لذغة سرور في الراء عجباته هلبه وكان يلقى حروف اللغه العربيه كلها تولي راء ...
ناضوا سرور وخوله وطلعوا وهويشوفلهم التفت لطاولتهم ويشبح لعصير البرتقال ويضحك لمح حاجه ع طاوله كإنه شنطه صغيرة"تزدان" قامه وطلع يجري
سرور : تمام كلميني كان صاي معاك شي
خوله بإبتسامه : تمام ..اركبي نوصلك
سرور: لاالاصحيتي نبي نتمشى نشوف المحلات شويه
جي يجري وداهش : معليشي ياأبله
سرور بحده: شن تبي انت فوتني خيي لك
هو بضحكه: غير استني ،،مدلها تزدان
سرور بدهشه: حييي عليا شقا عميي كله فيها ،،فتحاته نفتش فيه
هو: ماتخافيش مش خانب
شبحتله: وشنو عييفني لازم نتأكد
خوله: في حاجه سرور
سرور تلفتلها: لالا مافي شي توكلي حبيبتي
خوله ركبت سيارتها ومشت
هو قاعد واقف ويشبحلها وبإبتسامه مرسومه ع وجهه
سرور بتعجب: خييك شن تبي
هو: نبيك تقوليلي شكرا
سرور من فوق نفسها: شكيا
هو : شنو
سرور: شكيا شكيا قلنا شكيا
هو : أه ياقلبي المتفتيش
سرور بغضب: حول من قدام وجهي دفاته ومشت وقالت:حيوان حقييي
هو ميت يالضحك: يحت فيها خلاص
***
اريج في مكتب واحد من أستاذتها كانت تناقش فيه ع درجة إمتحانها
اريج: معليشي استاذ بس هادي الإجابه الكامله
الأستاذ ابتسم: والله فعلا ،،نعتذر منك وجل من لايسهو ،،وخدي بيرو من بحداه وصلح الدرجه ، هاه هكي كويس؟!
اريج ابتسمت : أيه
الأستاذ : اريج أنتي ع كم صفتي مادة الدكتور جبريل
اريج: 85
الأستاذ بإعجاب : ماشاء الله
اريج: تسلم
طقطقطق
وانفتح الباب: السلام عليكم أستاذ سامي
اريج سمعت الصوت طول كل شي فيها قعد يرجف
سامي : وعليكم السلام قعمز استناني شويه لين نكمل مع الطالبه
ضرار اشر بإبهامه : خود راحتك 👍،،وقعمز ع كنبه كانت مقابله المكتب بس بعيده عليه شويه
سامي: شنو رايك لو نطلب منك بحت بخصوص موضوع معين وإنتي تقدميه لو خدمتيه صح ليك مني هديه مش حنقول عليها ألا في حالة نجح بحثك
اريج برغم حالتها بس تحمست لعرض أستاذها: واني قبلت الطلب شنو هو الموضوع اللي تبيني نبحث عليه
سامي ابتسم: حنقولهولك المحاضرة الجايه
اريج بحماس: تمام ؛معليشي استاذ بنتقل عليك شويه طلعت مذكرة مصورة ورتله فقرة مأشره عليها ،هادي مافهمتهاش
"خلاااص في المحاضرة الجايه تويشرحهالك"
انصدمت اريج وسامي حتى هو قعد يشبح لضرار
ضرار بعصبيه: عندي ماندير ياسامي مانقعدش نستناك لين تكمل هدرزتك مع هادي وهديكا
اريج قريب ماتت جرحها هلبه تلميحه البايخ صكرت المذكرة وشاده دموعها: نستأذن أستاذ ولفت وطلعت بسرعه ،،سكرت الباب ودموعها طول نزلوا حاسه بحرقه في داخلها نااار تاكل في قلبها ومش قادرة اطفيها...
***
لارا واقفه قدام باب مكتب نجيب رجل تقدم ورجل توخر،،بعد طول تردد وتفكير طقت الباب
"تفضل"
خشت طول قدمت بخطوات بطيئة وقعمزت مقابلاته ع كرسي
نجيب من غير مايشوفلها: ماقلتش قعمزي
انصدمت لارا وناضت وقفت
نجيب : خلال الفترة الجايه مهامك في المكتب حتزيد وحتكوني مع نزار واسامه والشغل هلبه ،،اني مش حنجي للمكتب بشكل مستمر حنجي خلال ايام محدده بسبب إرتباطات عمل جديد ،،قعمزي مع زملائك وديري اللي يقولولك عليه
لارا بحزن: حاضر حضرة المهندس
نجيب: تقدري تطلعي
لاراطلعت وبتموت من الغيظ: "انا موريما يانجيب بيك لاتتركني إمتى مابدك"....
يتبع .....
#GomanFared
