الحلقة(78)
شن تحسي روحك توا ...
جمانه كانت شاردة تفكر في اللي صار مش مصدقه شي ولامستوعبه حاجه من أخر مرة من هداكا اليوم الأسود معاش شفاته ولاتندري عليه وعقلها وقلبها معاه ومتعذبه في بعده وهو قريب عليه لهالحد شبه يوميا معاه في مكان واحد وهي ماتندريش واللي زاد قهرها أنها عرفت بعد ماولت ع ذمة راجل تاني "يااارب ياحكيم ياعليم علاش يصير معاي هذا كله ؟!يااارب كون معاي ياارب "..
...
"سبحانك ياالله معقوله اني وياها كل يوم في نفس المكان ولاواحد فينا يندري ع التاني!!لهالدرجه كانت قريب مني وأني كل يوم نفكر فيها ومشتاق نسمع عنها أي شي مشتاق نشوفها ...اغفرلي يارب بس وحقك يامن خلقت هالقلب مش بإيدي وانت اللي تعرف..رب انت على كل شيء قدير رب اجعلها من نصيبي يااارب 💔"
***
ندى كانت مقعمزة في الجنان تكلم فهويدا
ندى: هويدتي تربحي تعالي
هويدا: ديما أني عندك تعالي انتي المرة هادي
ندى: مش عارفه تو نشوف بالك نجيك السبت ماما وأريج وعبدو غدوة مروحين
هويدا: يوصلوا بالسلامه ياارب
خشوا جمانه وأصيل
ندى: اهم جوا جمانه وأصيل خل بنسكر توا
هويدا: تمام ،،أكدلي الجيه أمتي
ندى: اوكي بيناتنا آلو باي ..وصكرت
خشت للكوجينه ومنها للصاله لقت جمانه مش مزبوطه
ندى: جمونتي خيرك
اصيل : شكله جاها هبوط
ندى خافت: حبيبتي تعالي نركبوا
جمانه ولاحرف ركبت مع ندى لدارهم...
***
تشبح بعيونها في المكان قداش كان حلو تتأمل في سمك القرش اللي يفصل بينها وبينه حاجز زجاجي قوي كانت تشبحله بخوف "ياماما مكبره ومكبر سنونه 🤤"
كان سمك القرش يشوفلها قرب منها وهي ميته خوف قعدت جامده في مكانها جي في وجهها
"هااااع "
اريج صكتها عيطه ع طول رقبتها بعدين شافتله وهو يضحك وقعدت تضرب فيه ع كتفه
اريج بعصبيه: يابارد يابارد قريب جاني السكر
معز يضحك: الناس يتفرجوا عليك ياغجريه
اريج: غجريه في عينك
معز: هههههههههههه منظرك مش عادي
اريج قلبت وجهها وبعدت عليه
تنهد معز"آااه ياقلبي": باهي خلاص ماتحرجيش
اريج مطنشه
معز : ياودي بصارة خوديها بالجو أضحكي
اريج ماتبيش تعدل عليه
معز: باه شن تبي نديرلك بش ترضي
اريج شبحتله بنص عين: نبيك تشريلي حاجه غاليه وحلوة من هني قبل لنروحوا
معز: من عيوني حاضر
اريج مشت وخلاته
معز ضحك ولحقها ..
**
راقده بعمق تتأمل فيها وتفكر في حالها "أكثر من تعذب فينا انتي ياجمانه مش اصعب من إن الوحده تتزوج إنسان ماتحباش وقلبها مع غيره💔"
طلعت من الدار بهدوء ونزلت للجنان مرة تانيه خدت تليفونها وفتحت الفيس لقت اشعارات خشت لقت اريج مدايرتلها هي وأكثر من شخص تاقات بصور حلوة من قبرص
خشت علقت "والله مقلب درته في روحي😢 تعبت بش درت المسابقه وانتي ع جاهز خديتي السفرة لاوفوقها كنتي في فريق خاسر عليك حظ عندك ياأختاه🙀😹"
طلعت من الفيس لقت اشعار من الإنستا خشت تشوف لقتها رساله من كنان
(وينك يومين مختفيه إن شاء الله مش مريضه بس)
ندى حست بشعور حلو لما قرت الرساله كان خايف عليها واضح
(مشغوله شوي في الحوش نكتوا فيه رمضان قريب)
(اهلاااااا الحمد لله إنك بخير...تنكتي في الحوش هههههههههه)
(شنو اللي يضحك)
(انتي ياشبيرة تنكتي في الحوش)
ضحكت
(وووك منكم مش سادني اصيل ونجيب كملت أنت)
(ههههههههههه بجديات قصيرونه )
(مش لهالدرجه انتوا اللي بالوات وجهامات هذا علاش تشوفوا فيا قصيره هلبه )
(هههههههه ماتزعليش حتى كان قصيرونه حلوة بكل حالاتك)
تحشمت ندى وسكتت
كنان"خيرني اني الهم مش قادر نتحكم في روحي ارزن شويه ياكنان مش هكي"
(من اكثر فنان تحبي تسمعيله)
(وائل كفوري😍)
(حلو حتى اني نحب نسمعله والغرب؟)
(مانحبش نسمعلهم)
(باه شن اكثر اغنيه تحبيها لوائل)
(هلبه بس أكثر وحده رغم انها قديمه قلبي مشتاق )
(تمام بنصكر توا )
(اوكي باي)
(ماتختفيش مرة تانيه)
ضحكت
(باه😊)....وصكرت
***
اهلين ياغالي رغم اني حرجانه منك
سليمان بضحكه ويبوس في راسها: تي غير علاش بس
تبرة: لاتسأل لادور لاتقول نشوف حناي حيه ولاميته
سليمان: بعيد السو عليك ياغلاي وباس راسها ..وين نجي نلقاك عند وحده من عماتي قاعده
تبرة: وهذا الشقفه شن فايدته أشرت على نقاله
سليمان: ههههههه خلاص في الجديد بنشدها في جرتك
بوه: شن امورك
سليمان: الحمد لله
فتحيه : هي شويه ويحطوا العشي
سليمان: شن هو
فتحيه: رز ودجاج في الكوشه
سليمان: الدنيا حمو كان درتوا شرموله وريحتوا أرواحكم
عمران: والله حتى أني قلتها لكن امك ياسيدي كان تلقى في كل جيه نذبحلك
شبح لأمه بحب: ربي يطول في عمرها ع طاعته حبيبة قلبي
فتحيه: ويفرحني بيك ياغالي
عمران: شنويحزها توا
تبرة: يامنجوه ياما دلعناك لتوا وانت بأحفادك لبكري راقد ع رجلي ونفليلك في راسك
كلهم: ههههههههههههههههه
عمران : تفلي في شنو يام ربي يهديك اللي يسمعك شنو بيقول
تبرة : يقولوا اللي يقولوه
امباركه من المطبخ : العشي واتي ياعمتي
ناض سليمان وعمران
عمران: هيا تعال نطلعوا للمربوعه حتى ضو ورضوان قريب يروحوا
سليمان: تمام ....ومشوا...
فتحيه: خايفه ياعمتي
تبرة حطت ايدها ع ايد كنتها : ماتخافيش مش حيصير كان الخير إن شاء الله...
***
ريما تبكي
نجيب: ياعمري خيرك !! ندمت اللي قلتلك
ريما: والله وأني نكون أخر من يعلم
نجيب بهدوء: حبيبتي اني واخد احتياطااتي كلها وحنربيه ولد عمك هذا بهدوء ومش حيكون عنده فرصه للرد
ريما : قلبي مش مطمن مادام دبرلك الحادث ماتعرفش شن يديرلك.مرة تانيه
نجيب: ماعنده مايدير خلي عندك ثقه فيا وادعيلي بس
ريما : ربي ينصرك على من يعاديك ويحفظك يااارب
نجيب: ذكرتيني بأيام كنت نمشي للجبهه
فلاش باك
ريما: نجيب حي عليك لو يحسوا بيك مستقبلك كله يريح
نجيب: شجعيني بدال ماقاعده تتشائمي هكي
ريما :اني خايفه عليك بس
نجيب: اني ماشي نعطي امدادات مش ماشي نحارب
ريما : حتى لو.. لو يندروا عليك...
نجيب: بالله اسكتي خلاص أني الغالط اللي كلمتك وصكر عليها
الوقت الحاضر
ريما اذكرت هالمكالمه وقعدت ساكته ونجيب زبطها
نجيب : آلو ريما
ريما بضيق: ايوه
نجيب تنهد: لو نقدر نمسح كل الذكريات السيئه اللي خليتهالك من راسك بس
ريما ابتسمت: كل شي منك راضيه بيه حتى لو وجعني
نجيب : آاااااه ياربي منك ومن قلبك الحلو هذا نحبكم موووت
ريما ضحكت : وحتى هو ينبض بيك وليك
نجيب: كلمه تانيه نقرا فاتحتك غدوة
ريما: هههههههههه مالاباي ..وصكرت
نجيب ضحك "يارب قدرني نعوضها يااارب"...
***
يوم الجمعه في المطار
خسارة أني جيت أنتم بتروحوا
جمال: خلينا معاك دليل سياحي يعرف قبرص أكثر من ليبيا
ضرار: بس أني الأحد مروح
نهى: خسارة
مروة : مدد وين المشكله
ضرار: عندي ماندير
جمال: ياودي جاملني ع الأقل البنت من طرفي
ضرار شبحلها وابتسم مجامله: معليشي الظروف تحكم
نهى بنظرة أعجاب: من سوء حظي
....
اريج : ياريتنا مددنا
أمينه: خلاص رمضان قرب وبنوتوله
معز: مرة تانيه تقعدي فيها شهر لوتبي
عبدو بمزح: مالا ع حسابك ياولد العم
معز شبح لأريج: فداكم❤
تحشمت اريج وطت راسها
عبدو: هي امتى عاد
معز : مازال 5دقايق بالزبط
...
ضرار: مانوصيكش عليها
جمال: في عيوني ❤
ضرار: هذا هو مكانها الطبيعي
مروة: ربي يخليك ليا ياغاليا
جمال: الصبببببر
ضحكوا كلهم وضرار وهو يضحك دار بعيونه شويه جت عليها..💔 ع روحه اللي رايحه منه ومش قادر يردها يشبح فيها تهدرز وتضحك وغريمه يضحك معاها ومحاوطها بنظرات الحب
في اللحظه هادي أريج صكرت تليفونها وحطاته في الشنطه قامت راسها وجمدت ع لقطه وحده مش مصدقه عيونها تشبحله وكأنها تحلم تشبحله بتركيز بش تتأكد أنه هو مش تهيؤاتها المعتاده اللي من لما فارقها لزمتها عينها في عينه وبس
هو من جيهته كان يلقى يمشيلها يحضنها بكل قوة لين يدخلها بداخله ومعاش تفارقه نهائي لكن اللي داره كان عكس هكي ...هو كان واقف مقابل اخته وراجلها وفي جنبه نهى واقفه خدي ايد نهى وشدها
نهى:😳
ضرار بضحكه مصطنعه: ع خاطرك قررت نمدد للتلات
مروة وجمال:😕😕
نهى بخجل شديد: ششكرا😳
ضرار: وتوا رضيت ياسيد جمال
جمال بأستغراب: ياسيدي بارك الله فيك
مروة كانت حاسه إن في شي خلاه يدير هكي قعدت ادور بعيونها في المكان شافت أريج واقفه ومصدومه شبحت لخوها طول اللي كان مداير روحه مش معاها
..
معز كان مشغول بالهدرزة مع مرت عمه وولدها شبح لأريج لقاها متسمره وعيونها معبيات دموع شبح وين تشبح وركز كويس وعرفه قرب منها شد ايدها
معز: اريج انتي كويسه
اريج بصوت يدوب طالع : لاااا
معز تلفت جهة ضرار وقعد يشبحله بغل شبحله ضرار بنظرة حاده وبعدين غير عيونه جهةتانيه
□□□نداء الرحله......
جمال : هي مالا نشوفوكم ع خير ..وسلم ع ضرار ونهى
مروة سلمت ع نهى بعدين حضنت خوها وهمستله في وذنه:حاول تنساها ضرار حضنها بقوة بعدين بعدهاووباس راسها ودمعته في عينه: جمال بالله عليك ماتخليهاش تزعل بكل
جمال ابتسم: حاضر في قلبي ره ❤
شدوا في ايدين بعض ومشوا ومروة تلفتت شبحت لخوها وعيونها مدمعات هو دارلها حركه بخشمه دارلها 🖐
هي ضحكت وألتفتت القدام ومشت مع راجلها
نهى: متعلقين ببعض هلبه
ضرار: هادي توأم روحي
نهى ضحكت :ربي يخليكم لبعض ...ابتسملها ضرار ابتسامه سحرتها رجع عيونه والتفت جهة اريج لقاها ماشيه مع عيلتها التفتت فجأة جيهته غير عيونه وشبح لنهى وشد ايدها
ضرار بإبتسامه تخفي وجع كبييير: حنعيشك يوم مميز مستعده
نهى ابتسمت: يس ❤
هو ضحك ومشوا ...واريج دموعها نزلوا وكانت مصدومه ع الآخر ومعز كان موجوع قلبه عليها ومغلول ع ضرار هلبه...
***
بعد صلاة الجمعه
تغدوا عيلة سليمان البازين سبر كل جمعه عند الليبين ...
فتحيه: هيا ياإمباركه ويالطيفه تعالوا تغدوا
امباركه من المطبخ: هيااا ياعمتي جايين
امباركه بهمس للطيفه: اليوم حيتموا في الموضوع
لطيفه: يعني هو اقتنع
امباركه: وكيف حيتموا فيه كان ماأقتنعش
لطيفه: باه ولم يتموا شنو ناويه
امباركه بإبتسامه خبث: كل شي في وقته حلو
لطيفه: حطي في راسك علاقه عمي بسليمان تعدلت هلبه
امباركه: ملاحظه لكن مش حيدوووم
امبااااااااركه لطيييييفه هياااا عاد
امباركه:هيا تعالوا نطلعولهم
لطيفه: هيا ومشوا تغدوا
...
غير امتى يأذن العصر
وداد: كيف تامين صلاة الجمعه 😂
زينب: مش مصدقه اليوم بيفضوا فيا ع حبيب روحي
وداد: اهدي والعبي ارضي امك جت
رقيه قعمزت: هيا تغدوا بسرعه ورانا حوسه
زينب بفرح: هيا هي
امها تشبحلها ومبتسمه"ربي يكمل فرحتك يابنتي"
***
روحوا المسافرين من السفر وفيصل حلف يجيبهم من المطار هذا كله بش يرضي عمتك جمانه وشدوه ع الغدي وهو ماصدق 😁
اريج روحت طول دوشت ورقدت وماقالتش ولاكلمه وخواتها مستغربات فيها ..اما معز فعقله كان معاها وخايف يصيرلها شي وتنتكس ..
عمك فيصل بعد الغدي كان متأمل يشوف جمانه بس ماقدرش وهي كانت مرتاحه لأن روح قبل العصر من غير ماتشوفه...
**
تبرة: خليك عاديه
فتحيه: كيف تبيني نكون عاديه واني مرات نخسر أختي لأخر العمر
تبرة: صلي ع النبي ..هو إنتي غلطك أنك تصرفتي من راسك وعاندتي ع هالحكايه ..بس توا اللي صار صار خليها على ربك
...
عمران كان واقف مع سليمان بروحهم
عمران: عارف شنو بيصير توا
سليمان بإستغراب: شنو
عمران تنهد : أمك اتفقت مع أختها وكملت في الموضوع وتوا لازم نمشي اني وخوتك ونفضوا في البنيه
سليمان:ههههههههههههه
عمران : خيرك؟
سليمان: قول انك تبصر وماتتكلمش جديات ..!
عمران: للأسف نتكلم جديات
سليمان ملامح وجهه تغيرت للغضب: تو انت مش قتلي بتصكره
عمران : امك عاندت وقالت يصكره بروحه
سليمان: الله المستعان...هي فتحاته تبيني أني نصكره ؟!!باه تو نصكره ومشي
عمران: وين ماشي ياولدي
التفت لبوه وهو يمشي: ماشي بنصكره...
***
ندى: سعوووووودكم
عبدو: ع عموم الفضل يرجع ليك حصلنا في جرتك هالسفره
ندى: معااااش تغيضني 😣
فرج: تنجحي نسافر اني وياك وأمك وجمانه لتركيا وقبرص
ندى : يااارب غير اذكرت النتيجه بطني وجعتني 😖
امينه: امتى هي
ندى: يافي رمضان يابعد العيد
فرج: بالنجاح يابابا
ندى: آاااامين
فرج: وين أريج
جمانه: راقده ..تعب سفر شكله
امينه: حتى اني خلاص بنصلي ونرقد وناضت
فرج: مالا اني ماشي للجامع ...
جاهم أصيل: هيا بوي
فرج ناض: هيا هي... ومشي هو ولده
عبدو: رسمي تعب بنصلي وبنمشي للمستشفى طول
جمانه: علاش قعدت اليوم ومشيت غدوة
عبدو ناض: مانقدرش واخد 3ايام اجازة بس ..هيا نشوفكم وناض طلع
ندى: اريج اشبح خيرها
جمانه: جرتها باكيه ..
ندى: زعمه تعاركت مع عبدو
جمانه: مااظنش نحس في شي تاني
ندى : أن شاء الله خير..
**
كانت ترجف مع بعضها ودموعها يصبوا وأمها مصدومه وخوها معصب هلبه
سليمان: امي غلطت لكن امسحوها في وجهي أني ..زينب عمري ماشفتها غير ع إنها زي سلمى بالزبط وهي بنت أصل ومتربيه ع دين وخير احسن مني يستاهلوها
علي: شن منظرنا قدام ناسنا لما نقولولهم ماصارش
سليمان: لو نندري من البدايه ماكنتوش انحطيتوا في هالموقف نهائي ..نقدر نمشي الموضوع ونكمله بش نلموها قدام الناس لكن مانرضاش نعشم حد ونسيبه في نص الطريق
علي: لك...
زينب بقوة مصطنعه:خلاص ياخوي كله نصيب وأول الطريق خير من عقابه مانقول غير ربي يسامح خالتي وناضت طلعت بسرعه
رقيه بغضب: وانت طالع قول لأمك تنسى أن عندها اخت اسماها رقيه ..وطلعت ..
ناض سليمان لإن خالته شبه لازته: السلام عليكم ...وطلع
....
عمران: قتلك صكريه لكن انتي عاندتي
فتحيه تبكي: زعما شن دار ...
خش عليهم مشي طول لداره وهو معصب خدي مفاتيحه وطلع شبح لأمه: أخر من توقعته يحطني في هالموقف انتي ياأمي ربي يسامحك ومشي ..
فتحيه انهارت بالبكي حضنها راجلها وتبره طلعت في جرة سليمان
تبرة تمشي بسرعه: ياولد انت نكلم فيك اوقف
سليمان وقف والتفتلها: نعم ياحناي
تبرة: امك دارت اللي دارته ع خاطرك تبي تشوف عويلتك وتطمن عليك وأنت عارف مكانك في قلبها دون خوتك كلهم
سليمان تنهد: لكن مش هكي ياحناي اللي دارته خلاها خسرت أختها وحطتني في موقف بايخ طلعت فيه عيل ياحناي امي تقرر عني واني مانندري ع شي
تبرة: من حبها فيك افهم
سليمان : به ياحناي اني بنمشي قدم باس راسها وبيمشي
تبرة: لو مش هي غيرها
وقف وألتفتلها ومش فاهم
تبرة: حتتزوج تبي ولاماتبيش اختار ولاتختارلك اني
ضحك وقدم لحناه : انتي ادعيلي ربي ينولني اللي في بالي
تبرة بضحكه: معناها في وحيده هنايا ياشويطين واشرت ع قلبه
ضحك : شياطين شني ياحناي بس اعوذ بالله منهم ههههه باس راسها ومشي ..
تبرة: ربي يعطيك ماتتمني
ضحك وهو ماشي الدعوة فرحاته هلبه لبس نظارته اللي كان لونهم عسلي شفاف وركب السياره وهو يضحك اشر لحناه 🖐 وطلع بسيارته..
....
ياعلي الحققققققني اختك وووووه عليا ....
جاها يجري لقي اختك طايحه وطالع من فمها لعاب طبها وطار بيها يجري للمستشفى.....
يتبع .....
#GomanFared
