الحلقة(82)
الله اكبر..هذا كله صار وأني اخر من يعلم
سليمان: انت وينك اصلا المدة اللي فاتت كل يومين عندك رحله
وائل: والله مامصدق انت يصير فيك هكي
سليمان: تي غير نصدق أني قبل اللي ع يسار صدري هذا متحكم فيا مخليني ندير حاجات تصدم فيا...
وائل: الحب ياصاحبي ياما يدير بالذات كان خش قلب شيخ لازم يتقنه اتقان هههههههه
سليمان بضحكه: عماد معاش نشوف فيه
وائل: مادام مرته في حوش ماليه بيقعد غادي شن بيدير بوجهك
سليمان ضحك: كلكم هكي اللي هادا تزوج ونساني ..
وائل: كان ربي سخرلك حتخط علينا كلنا يابوصاحب ولاكانك تعرفنا
سليمان تنهد وسكت
وائل: في سؤال في راسي ونبي نسألهولك
سليمان شبحله : شنو
وائل: تو انت حبيتها الحب هذا كله وانت مش شايف شكلها افرض تطلع شينه ولامتعجبكش
سليمان: تصدق لو قتلك مافكرتش بكل في الحاجه هادي
وائل: نصدقك دام سمحت لروحك تحبها دون ماتشوفها ..
سليمان ابتسم: قصدك الحب يستنى من يسمحله
وائل بضحكه: ياعيني ع الكلام والله فتتنا غادي ياراجل واضح الحكايه عندك كبيره
سليمان ضحك ...
وائل: باه ماجاوبتنيش لو طلعت شينه ...
سليمان: مش مهم بكل اللي يهمني شخصيتها تفكيرها أخلاقها وبس الباقي كله زايد ....
***
بدي منك تسامحني وبس
نجيب ساكت ..
لارا تبكي: كل اللي عملتوا كان من حبي الكبير إلك حبيتك كتير وانت تركتني بدون ماتهتم لأمري ..حقدت عليك وعملت اللي عملتوا..وكتير منيح انو ماصارلك اشي
نجيب ساكت ولاكلمه
لارا: رد علي مشان الله قولي إنك مسامحني
نجيب: كنت نقدر نخليك تدفعي تمن اللي درتيه غالي،،لكن اتغاضيت عنك اولا لأنك غريبه في بلادنا تانيا بسبب ظروفك ومرض خوك ..سخفت ع أهلك وماكنتش نبيهم يتحملوا فوق همهم ..جيتك ليا هني ماليهاش لزوم
لارا ونجيب كانوا واقفين في المنتزه اللي جنب المكتب هذاكا الوقت ريما كانت جايه لنجيب بش تشوفه وقالولها انه في المنتزه
لارا شدت ايد نجيب: بدي قلبي يرتاح ارجوك قلي سامحتك
ريما شافت اللقطه هادي انصدمت جي بين عيونها موقف قديم صار في نفس المكان حطت ايدها ع قلبها اللي كانت ضرباته متسارعه من الخوف لأن اللقطه اللي تشوف فيها حاليا ذكرتها بهذاكا اليوم المر💔
نجيب نفض ايد لارا ولف بوجهه عنها شاف ريما تشبحلهم وايدها ع قلبها جاها يجري ولف ايده عليها: حبيبي خيرك
ريما تشبح لعيونه بخوف: ماديرهاش فيا مرة تانيه بالله عليك
نجيب بخوف: ياقلبي انتي شنو تقولي بس
ريما قعدت تبكي: بتسيبني مرة تانيه بتكسرني وتمشيلها
نجيب حضنها وقعد يمسح ع ظهرها: ياروحي نسيبك انتي اني نموت..
ريما : بعيد الشر ..
حضنها نجيب بحرارة اكثر وهي كانت خاشه حضنه وماتبيش تحول بكل
لارا تشبحلهم ودموعها ينزلوا وتأكدت انه نجيب عمره ماحبها وان قلبه لريما بس من البدايه ..مشت وخلتهم....
***
مقعمزة مع شيبانها يتفرجوا ع التلفزيون برنامج سياسي ويعلقوا ويتناقشوا ويتسهوكوا ع الضيوف متاع البرنامج😂
سعيد بو عماد تعود ع سرور كانت تعامل فيه زي بوها وهو حاسها زي بناته مش كنته طيبه وضحوكه وناشطه وتعرف الواجب والأصول خش عليهم عماد
عماد : السلااااام عليكم
الزوز: وعليكم السلام
عماد: شنو بوي مانفتختلكش راسك نعرفها دوتها هلبه
سرور😑
سعيد: ياريت اللي ينفخوا الراس كلهم زيها ربي يحفظها بنتي
سرور:😏
عماد: ماتكبرلهاش راسها يابوي معاش تعدل علينا بكل
سعيد: خلها والله تكبره دام عمها حي
سرور:😋
عماد يضحك ويفنص فيها متاع تو نوريك
عماد: باه ترا نوضي حطيلي غدي
سرور ناضت : حاضيي
عماد قعمز : يحضييلك الخيي
سرور: عمي كلمه معاش يتسهوك ع لذغتي 😣
سعيد : بطل ياولد وخلي المراة في حالها ..بري سلم بنتي وتيله غداه وماتعدليش عليه
سرور:😋 وخشت
عماد يضحك...
***
مقعمزين ع كرسي في المنتزه وقاعده في حضنه
نجيب: هاه حبيبي كويسه توا
ريما هزت راسها بإيه
نجيب: حبيبي حولي من راسك الذكريات اللي تعبك بالله والله نكره روحي كل مانشوفك هكي..
ريما : مش بإيدي غصب عني لازم يجي طيف من الماضي قدامي
نجيب حضنها بزياده : فكري فينا توا خل نديروا ذكريات لينا حلوة مع بعض نذكروها وانتي عزوز واني شيباني وصغارنا كلهم متزوجين ههههههههه
ريما ضحكت وبعدت شويه وتشبحله: قاعد تبي هلبه صغار
نجيب هز حواجبه بإيجاب: نبي كتيبه كامله
ريما ضحكت : تبيني نهبل
نجيب: شن بتربيهم بروحك اني معاك خطوة بخطوه وكان تعبتي هلبه تو نجيبلك وحده تعاونك
ريما: لالا صغاري مايربوهمش الخدم
نجيب بمزح: خدم شني قصدي مرا تانيه
ريما قعدت تضرب فيه ع صدره: تحسابني بنخليك كان درتها نقتلها ونقتلك ونقتل روحي ..
نجيب: ههههههههههههههههههههه
ريما : حول عليا غادي
نجيب: لا
ريما : حول
نجيب: No
ريما: عيب نجيب يشوفونا
نجيب : باه ..حول واتكى بايديه ع رجليه وهي ضامه رجليها جنب بعض وحاطه ايدها عليهم
ريما : شن كانت تبي منك
نجيب: تبيني نسامحها ..
ريما : وانت سامحتها.؟
نجيب: مايهمش بكل ..ماعندي شي يخليني نعطيها هالأهميه نسامح ولامانسامحش ماتفرقش عندي بكل
ريما : حبيتها؟
نجيب شبحلها: منك جد تسألي ؟.
ريما هزت راسها بإيجاب
نجيب: لو حبيتها ماكنتش مقعمز معاك توا
"ياريتك حبيتها راه اني اللي مقمعز معاها توا"
ريما شبحت لمصدر الصوت : هههههههههههههه امتى جيت
عز: بكري شوي..شن الجو
ريما : تمام انت شنجوك
عز : الحمد لله
نجيب ساكت ويهز في رجله ريما شبحاته هكي خافت
عز بيلطف الجو اللي غبره😂: حلال عليك اللي درته في صالح صابر ياكنق
نجيب شبح لريما : من قالك
ريما وجهها يتحمر ويتصفر ويتخضر
عز: منو اللي ماسمعش بيكم 😅
نجيب هز راسه وسكت
عز : يلا ياعرسان عازمكم ع الغدي
نجيب: شكرا مافيش داعي
عز : لافي ..ضروري نستنى فيكم في (******) إلي اللقاء ومشي
نجيب بعد ماكان يشبحله شبح لريما اللي لونها كان مخطوف
نجيب: توا وحني نتغدوا معاه تطلبي منه الإستقاله وتجي تخدمي معاي نقاش لا هذا أمر وتم
ريما هزت راسه بايجاب : حاضر اللي تبيه نديره 😳
نجيب قرب منها: خيرك خايفه
ريما : لالاشي 😯
نجيب ضحك وخد ايدها وباسها من داخل ونوضها : هيا تعالي معاي ندير تشك ع الخدمه ونطلعوا لعزومه الباشا
ريما ضحكت ومشت معاه وهما يهدرزوا...
***
ماتكبريش القصه ..عادي جدا
نهى بعصبيه: شن هو العادي ياضرار المشكله مش اول مرة ملاحظه عليك كذا مرة وهالمرة بزياده
ضرار: نهى ماتصدعيليش راسي اكثر ماهو مصدع
نهى: قصدك حتى توامصدع !!ضرار اني مضطره نكلم مروة
ضرار بحده وبصوت عالي: تكليمها تشوفي وجهي التاني يانهى
نهى خافت وعيونها دمعوا:ع خاطرك ع خاطر صحتك ارجوك برا شوف شن قصة هالصداع ...
ضرار هدي: باهي لما نفضى تو نشوف نهى اني لازم نصكر عندي ماندير
نهى بيأس : باهي ...تشاو ...وصكرت
ضرار تنهد وشد راسه بإيده "واضح من قلة النوم وضغط الشغل طبيعي بيلزمني هالصداع"
جاته رساله فتحها وقراها(اني وراك وراك لين تعاين )
ضحك وهز راسه ايمين وايسار وكمل خدمته...
***
جي رمضان احلى شهور السنه وصاحب احلى روتين بس طبعا في ليبيا كل شي غير ..اقوى مسلسل في ليبيا هذاكا الوقت هو مسلسل هروب الضي اللي يكون حاضر بقوة في رمضان..صيام وصيف وضي هارب الناس قريب هبلت مامحظوظ إلا اللي عندهم مولد كبير زي عيت الحاج فرج وقتها كيف نازلات المولدات وهما عندهم واحد كبير يولع كل شي في الحوش سعووودهم ياكبدي😣..
المهم أول يوم مر كئيب نوعا ما جمانه ع حالها تتجنب في بوها وخوتها اللي صار احرجها هلبه ومتحشمه منهم وتخمم في فيصل المختفي واللي شكله ناوي يخليها معلقه..فرج كان مضايق ويحاول يدرق لأنه من 30سنه كان فطوره اول يوم مع صاحبه ورفيق عمره واول مرة يستقبل رمضان من غيره وهذا اللي زايد مضايق جمانه لأنها حاسه أن هي السبب..
فات يوم اتنين تلاته اربعه لليوم العاشر ريما ليه ليه تشري وتبتت عرسها اسبوع اللي بعد العيد ومش ملحقه
الساعه 1:00 ليلا
نجيب: ههههههههههه
ريما بعصبيه: اضحك عندك حق تضحك شن وراك ماوراك شي اني اللي نجري ونلهد كل ليله بش نلحق نكمل
نجيب: ومن قالك ماوراي شي اني وراي اهم شي
ريما : شن هو ترا؟!!
نجيب: قاعد نعد في الأيام اللي تفصلني ع انك تكون حلالي ومعاي في حوش واحد وفي حضني
ريما : حني في رمضان ره تحشم شويه😳
نجيب: ههههههههههه كلهم 26يوم والحشم يقدم استقالته 😉
ريما : اني التاعبه اللي كلمتك يلا باي 😳 وصكرت
نجيب ميت بالضحك😂😂
.....
طبعا طلعت النتيجه متاع اريج وجمانه وكانوا الزوز مصفيات موادهم كلها جمانه خلاص تعتبر تخرجت وهديكا الماده جابت فيها أقل درجه مع هذا ماحستش بالفرح بكل ولاهون عليها ولو شويه لأن في هموم من ثقلها تخليك مهما مرت عليك لحظات سعيده ماتحسيش بيها..اما اريج فكانت فرحانه ووصلتها هديه نجاحها من معز وكانت سنسله ذهب رقيقه وفيها تعليقه بحرفها مفصصه ألماس ..
رقدت هديكا الليله وهي فرحانه وناسيه شويه الذي مضى..
قبل السحور
جمانه بخوف: اهدي حبيبتي اهدي خلاص
اريج تبكي بهلع: مش قادرة خايفه الحلم يخوف هلبه
جمانه : باه احكيلي
اريج: حلمت بيه كان واقف يشبحلي بنفس النظرة اللي كنت نحبها ...قعدت نشبحله وهو كان يبعد وأني رجليا زي المتصلبات نبي نلحقه مش قادرة...شويه وقف وابتسم وفجأه نشوف في نمل يطلع من راسه...هلبه هلبه نمل غطا جسمه كله كله وأني نبكي ومش قادره نديرله شي ...وقعدت تبكي شبحت لأختها..جمانه شن معناها
جمانه ملامحها ماتتفسرش : انتي تفكري فيه هلبه هذا علاش وممكن حتى حلم من الشيطان يبي يزيد حزنك .. لكن انتي مش قلتيلي حتنسيه
اريج ببكي: ليش انتي قدرتي تنسي الشيخ
جمانه قلبها انعصر : في فرق بيناتهم وأنتي عرفتي ضرار مني يكون وشنو هو..
اريج هزت راسها بالنفي وأشرت ع قلبها: هذا مايفرقش شن بنديرله وقعدت تبكي ...وجمانه نزلوا دموعها..
طقطق
امينه: تعالوا تسحروا
جمانه تحاول تغير صوتها: هيا جايين ...خلاص نوضي اغسلي وجهك وتسحري وبعدها توضي وصلي وادعي لربك بكل اللي في خاطرك
اريج هزت راسها بإيجاب وناضت هيا واختها وقلبها موجوع...
تسحروا وغسلوا الماعين وكل حد توجه لداره يراجو في الفجر ..
لكن هي قلبها مهنهاش بعد ماصلت ركعتين ودعت ...خدت تليفونها وخشت ع الأنستا لقاته مش منزل شي من اخر صورة ليه مع نهى ...زادت خافت..ومشت طول للخاص وتكتبله في رساله وكانت أول مرة تبعتله ع الخاص في الأنستا حتى ايام علاقتهم لما كان يسافر مادارتهاش بعتتها وأذن الفجر ناضت تصلي ....
***
تاني يوم العصر في احد الدول الأوروبيه ...
ضرار في الشركه متاعه اللي هي طبعا ورث من جده اللي كتبها لأمه وأمه كتبتها بإسمه ..يمشي في الممر ويكلم في السكرتيره
ضرار: حسنا اسبقيني إلي هناك وانا قادم خلفك
السكرتيره: حسنا سيدي ..
خش لمكتبه ومقعمزش كان متكي عليه بإيده وخش يشوف في ايميلات جايته خاصه بالخدمه اول مافتح النت وصلوه اشعارات من كل البرامج اللي عنده لفت نظره اشعار في الأنستا وكانت رساله من كاميليا بالإنجليزي استغرب هو مش اول مرة توصله رسائل ع خاص في الأنستا وكان يتجاهل فيهم لكن هادي لفتاته هلبه خش عليها ولما قراها من قوة الصدمه قعمز ع الكرسي بصعوبه قعد يقرا ويعاود ودموعه عبواعيونه كان يمسح في دموعه بعنف بش يقراها زين ومايتشوش عليه النظر يعاود ويقرا وكان يلقى يحضن كل حرف من حروفها
(السلام عليكم
كل عام وأنت بخير
اسفه ع الأزعاج..مانبي شي منك غير نسأل ع حالك بس ونطمن عليك وارجوك جاوبني ولو بكلمه وحده ،،غصب عني مش قادرة مانفكرش فيك لو انت نسيت بسهوله اني نبي وقت..وحننساك خليك واثق من هالشي بس نبي نطمن عليك
ارجوك طمني....أريج)
حط ايده ع قلبه قعد يبكي ويعظ على شاربه التحتاني وغمض عيونه لأن الصداع رجعله من جديد بقوة حاول يتجاهله..ومسح دموعه واستجمع نفسه وقرر يرد عليها رد ممكن يكون قاسي بس مضطر لازم تنساه بش يصرف قلبه ولو شوي عنها خايف يستسلم لإحساسه ويخالف الأمر ويولي لليبيا ويحطها في الخطر هي وأهلها ..غير هكي اهلها مستحيل مازال يقبلوه لو شنو يصير يعني كل الطرق مسدود لااابد تنساه ولو خلاها تكرهه ..يكتب وصداع يقوى اكثر بس يتجاهل ومكمل فيها ...بعد تردد وصراااع بين قلبه وعقله بعتها ...وسكر اللاب توب بسرعه شد راسه بأيديه لإن الصداع زاد ونزل على عيونه
طق باب مكتبه ماقدرش يرد ..اضطرت تخش
نهى: ضرار وين...ضرار خيرك
ضرار قام راسه: مافي شي
نهى قدمت : كيف مافي شي خيرهم عيونك
ضرار ناض : قتلك مافي شي تعب صيام وقلة نوم وتوجه لباب المكتب ..هيا بسرعه بيبدا الأجتماع ..
طلعت وقلبها واكلها عليه وحست بإن في شي مش طبيعي..
***
فتحت رسالته اللي كانت تستني فيها بلهفه
(وعليكم السلام..كل سنه وانتي طيبه...اني كويس والحمد لله ..نبيك تريحي بالك ومعاش تنشغلي بيا نهائي عيشي حياتك واقلبي الصفحه زي ماأني قلبتها...شوفي نفسك ومستقبلك...وياريت ماتحاوليش توصليلي لإني حاليا مرتبط وزواجي قريب وشفتيها بعينك يوم المطار خديت وحده تناسبني في كل شي عمري حياتي وتفكيري وحتى انتي بري شوفي اللي يناسبك وكملي حياتك معاه..مشكورة ع السؤال
مع تمنياتي ليك بحياه سعيده ..وعلى فكره بعد نتأكد انك قريتي ردي حنحطك في الحظر مانبيش نخون الأنسانه اللي حتكون ع ذمتي ولابأي شكل ...مع السلامه ..ضرار)
تقرا فيها وهي مصدومه اسلوبه الكلام اللي بعته وكإنها مكانتش تعنيله في حياته شي للحظه حست روحها عنده في قائمة علاقات أيام الطيش ..انقهرت وكانت حتنهار بس تماسكت برغم دموعها اللي تنزل دارتله حظر وهالحظر ماكانش بس من الإنستا بل من حياتها كلها..مسحت دموعها ومشت توضت وصلت ...ونزلت تعاون امها وخواتها في المطبخ لأنهم كانوا عازمين حوش عمهم ناصر...
....
اما هو فكان واقف ويعرض بالبروجكتر مشروعه الجديد ويشرح عنه لشركائه بس كان تفكيره كله معاها مع رسالتها ومع رده اللي كان كله كذب في كذب كيف حتكون ردة فعلها لما تقراه ..كانت مركزة معاه وعيونها ع الحديده اللي في ايده اللي مانحهاش نهائيا حست بأنها غاليه عنده وانتابها فضول كبير جيهتها..شويه حست بإيده ترجف شافتله لقت وجهه اصفر ومرة مرة يغمض في عيونه وكأنه يتألم "الصداع الأحرف" وقف فجأه وزع نظره ع موجودين
واحد منهم: هل انت بخير ؟
ضرار بابتسامه مصطنعه : نعم ..وكمل شويه وبعدين سكت ...عيونه ضببوا ..الرؤيه انعدمت ..حس بجسمه فشل كله ...وطاح من طوله ...
نهى بعياط: ضرااااااار ...
يتبع .....
#GomanFared
