الحلقة(35)
تشوف فيه مقعمز تحت شجرة كبيرة مظلله عليه وهو مسترخي تحتها ومرتاح ومغمض عيونه،، بعدين شافت أفعى كبييرة هلبه لكن منظرها حلو تزحف جيهته،،فتح عيونه شافها عجباته ابتسملها ومدلها إيده بش تجيه..جاته وقعد يداعب فيها بإيده والأفعى كانت منسجمه معاه،،بعدين هو سحب إيده ورجع لوضعيته الأولى: فجأة الأفعى شكلها تغير ولونها تغير قربت منه وقعدت تلف عليه وهو مش حاس بيها لفت ع جسمه كله لين وصلت لرقبته عظاته بقوة والدم ينزف من رقبته وهو كان يتألم وجهه ولا ازرق والأفعى تعض فيه بكل قوتها
شهقت وناضت من النوم وقلبها قريب يطلع من صدرها من الخوف وبحركه تلقائيه قامت تليفونها واتصلت برقم محدد
...
في عز نومه ناض ع رنه تليفونه اللي نساه صامت هديكا الليله وهو من عادته يخليه صامت اويصكره لما بيرقد
خدي تليفونه وبدون مايركز منو المتصل ورد
نجيب بصوت ناعس : ايووه
ريما سمعت صوته قعدت تبكي
نجيب سمع البكي قعمز ع حيله: منو معاي
ريما ببكي وخوف: انت وين توا قولي
نجيب عرف الصوت ناض وقف: خيرك ريما شن في!!
ريما تبكي بالعبره
نجيب مات من الخوف: صكري هاني جاي
ريما بسرعه:لالااااا ماتجيش
نجيب بإستغراب مصحوب بخوف: خيرك ريما شن صايرلك
ريما هدت شويه وبعفويه: شي والله شي بس شفت حلم وسكتت
نجيب قام حاجبه الإيسار : حلم!!؟
ريما بخجل : خلاص اسفه ع الإزعاج صكرت الخط وقفلت تليفونها
"حيي عليا اني شن درت عليك عااار وخلاص"
***
تاني يوم
الساعه 9:00
وائل: يعني حتمشي اليوم
سليمان : إيه بنروح من الكليه طول بإذن الله للبلاد
وائل: توصل سالم
عماد: والله متحشم الحق بصفتي شنوماشي معاك
سليمان: بالله عليك افطر واسكت
وائل بضحكه: امه تبيك تجي معاه قداش ليها
عماد ابتسم بألم: ربي يحفظهاويطول في عمرها 💔
وائل بيغير الجو: اشربوا وقولولي رايكم🤗
سليمان: شن هو
وائل: عصير برتقال فرش😘
عماد: ههههههههههههههههههههههههههههههههههههههههههههههههههههههههههههههههههههه
سليمان ووائل :😨😨
وائل: شنو قلت بش تضحك هكي 😕😕
عماد بضحكه: هههههه ترا عاود شن هو هههههههه
سليمان: عصير برتقال فرش شنو اللي يضحك في الموضوع عماد هستر من الضحك🤣🤣😂😂😂😂
سليمان ووائل: 😞😞
***
سوسن : والله ولاحتى في الخيال
أريج بضحكه: معناها هو فارضك ع امه
سوسن : هذا اللي بان
اريج: باه شنو حديري
سوسن: تبي الحق..استريحتله هلبه ،،وعجبني كيف يتكلم بثقه بالذات لما قالي "اللي يكلم فيك راجل "حسيت بالأمان"
اريج ابتسمت وتخفي في وجعها: مادام حسيتي معاه بالأمان توكلي ع الله الأمان أهم من هلبه حاجات اهم من الحب نفسه
سوسن لمحت الدموع يلمعوا في عيون صاحبتها وجعتها : إن شاء الله خير
في هاللحظه طلع ضرار وكان يتكلم بالتليفون وماانتبهش لأريج كان يتكلم واريج سرحانه فيه في شدته للتليفون.. لما يمشي ويجي.. ويوقف فجاة.. لما يحط إيده في جيبه.. ولما يضحك او يبتسم ..اويقرن حواجبه...اويضيق عيونه ..الحركه الأخيره كان يدير فيها هلبه لما يتكلم مع حد ع التليفون او مباشرة أريج كانت تحبها هلبه،سوسن كانت مركزه مع صاحبتها بس ماقدرتش تكلمها حستها تبي تملي عيونها منه وكأن نار قلبها تبرد وهي تتأمل فيه
هو كان يتكلم وحاط إيده في جيبه قعد يدور بعيونه في المكان وجت عينه في عين اريج اللي لقاها سرحانه فيه قعد يشبحلها وخلاص ومايندري ع اللي يكلم فيه شنو يقول لحظات نساته كل شي ،،هو في الحقيقه مش مذكر شي غير إنه يعشق هالإنسانه اللي قدامه
: استاذ ضرار الووو ضرار الووو
ضرار وهو سرحان فأريج: تو نجيك غادي ونتفاهموا وصكر
ارييييج
استاقضت تدور ع الصوت شهههقت من الفرحه
هييييييي ملوكه
ملاك جت سلمت عليها بالأحضان
اريج التفت لسوسن : تعالي سوسو
جتها سوسن: هادي ملوكه خطيبة عبدو خوي ملوكه هادي أنتيمتي وحبيبتي سوسن ،،سلموا ع بعض سوسن وملاك
اريج : شنوالمفاجأة الحلوة هادي
ملاك بضحكه: والله اليوم بنخطفكم كلكم حمواتي بناخدك وبنخطموا ع جمانه وبعدها ع ندى وبنتغدوا غدوة حلوة برا
اريج : احلى خطفه والله
سوسن قامت إيدها بتدعي: ياااارب عطينا كنه زيها
ضحكوا اريج وملاك
ملاك صفقت بإيديها: هيا روجتي معاش في وقت
اريج: استني نجيب شطنتي ،،اريج وهي ماشيه تجيب شنطتها حست ضرار قاعد واقف لكن مابتش تشبحله
سلمت هي وملاك ع سوسن وبوجهتهم للعلوم سوسن شبحت ضرار عيونه مع اريج لين مشت وبعدها لف وخش داخل
"ع قد ماتموتوا في بعض ع قد ماتعذبوا في بعض"
***
ريما واقفه ع زميلاتها في الدراسات ويهدرزوا بعدها خشوا للقاعه بش بياخدوا محاضرتهم
دوشه ..هدرزة..كل اتنين أوتلاته مع بعض ...
"زعمه الدكتوره تجي ؟!"
"ماأعتقدش نحس فيها حتولد هالأيام"
"ايه صح"
ريما كانت تسمع في كلام زملائها وتسلل بداخلها شعور قلق ع خوف وبدي فيها المغص ،،لأنها متوقعه شي معين من كلامهم ..
"السلام عليكم"
خش بخطوات مستقيمه لابس جاكا جلد سودا فيها خطوط بيض من الكتاف لنهايه اليد تحتها فانليا سودا وسروال أسود وفي رجليه" أديداس "سودا
بملامحه الجاده الممزوجه بالغرور ،حول شنطته حطها ع الطاوله اللي قدامه وحط نظارته وتليفونه ومفاتيحه،،حط إيديه الزوز ع الطاوله ودار نظرة سريعه ع كل القاعه
"صباح الخير"
الطلبه : صباح النور
:معاكم نجيب فرج الشريف ..تخرجت من الكليه هادي وكنت معيد فيها ..قريت ماستر في بريطانيا ..روحت وأسست مكتب ليا مع مجموعه من المهندسين اللي ليهم اسمهم وشغلهم الممتاز،،وتوا حبيت نرجع بش نفيد باللي تعلمته،سكت شويه،،ونستفيد ،،طبعا الأستاذه اللي قبلي ظروفها الخاصه حتمنعها إنها تولي لهذا حنكمل معاكم باقي السمستر ...
طبعا البنات في القاعه مبلمات وخلاص حالهم من حال ريما اللي نست نهائيا كل اللي صار معاها،،حست كإن الوقت رجع للورا أربع سنوات أول مرة عطاها فيها هو نفسه ماتغيرش هو هو نجيب اللي قلبها رعش اول ماشافه وللآن هي نفس الرعشه الحلوة تصيبه كل مايلاقيه
***
عماد: تو أني وين نفهم فيه الجو هذا ،،"برا شكلي مجموعة حلويات بش نرفعوهم "،،الصبر وخلاص
درس سيارته ونزل لمحل حلويات مكانش معروف هلبه بس عجبه منظره الخارجي وخش طول ،،لقي زباين واقفين
قعد يتفرج ع العرض ومحتار شنو يختار وكيف يشكل وهو في عز حيرته
:مقيوض وغييبه
عماد"شنو اللي سمعته توا!!؟" تلفت طول شافها واقفه تتكلم مع شخص يبان صاحب المحل
صاحب المحل: والله في أقبال عليهم لدرجه اللي يخش يسأل عليهم هما الأولات
سرور بفرح: الحمد لله ،،باهي أني حنزيد نوع تاني
صاحب المحل: مادا بينا لأن شغلك مداير الزحمه هادي
دارت بعيونها وهي مبتسمه تشوف في الزباين لين لمحت واحد شايفته قبل متسمر يشوفلها وإبتسامه عريضه ع وجهه،،تلاشت إبتسامتها وفتحت عيونها ع وسعهم"هذا منين طلع !!مبيده و هو يبتسم زي العبيط "
صاحب المحل: ع العموم تو نشوف الوضع ونخبروك أمتى اضيفي النوع الجديد
سرور ركزت معاه: حاضي نستني منكم تليفون ..وكيف جايه بتطلع
"معليشي ياأبله "
وقفت سرور وشبحتله من فوق للوطا:نعم!!
عماد وبنفس الإبتسامه: نبي منك مساعده لو سمحتي
سرور بإستغراب: مساعدة شنو !!
عماد حك راسه وشبح ايمين بعدين اشبحلها: نبي نشري حلويات مشكله بش نرفعهم لناس أول مرة نزورهم واني والله مانفهم فيه الجو هادا وهما أهل أعز أصحابي مانبيش نرفع أي شي ..
سرور ورافعه حاجبها اليمين بإستغراب:والمطلوب
عماد بأبتسامه: نبيك تختاريلي
سرور: 😒
عماد: 😟
سرور:😑
عماد:🙁
سرور: باه وأهو يكون مقابل معيوفك معاي المية اللي فاتت 😌
عماد"ياقلبي من معيوف الميه اللي فاتت": بارك الله فيك
مشت معاه سرور ع العرض وقعد تشوف وتتمعن وهو يشوفلها ويتمعن بعدين قال: اهم شي هذاكا اللي محشي بالتمر ياربي المعسل هذاكا..شن سماه ربي؟!
سرور وهي تشبح للعرض: مقيوض
عماد"آااخ ياقلبي": ايوه هوهدا وحتى التانيه هديكا المكركبه اللي ذوب في الفم شن إسمها؟!🤔
سرور شبحتله شبحه ع الجنب: غيييبه 😒
عماد"روحي فداها الغييبه أني ": ايوه صحح
سرور : ممكن تخليني نختاي بياحتي وأنت تسكت مية وحده
عماد "الله يكثر من الكلمات اللي فيها حرف الراء ": حاااضر 😍
ورجعت سرور تشبح للعرض من جديد وعماد يتأمل فيهاوساكت..
***
جمانه: ماقالش عبدو
ملاك بإبتسامه : مايعرفش
اريج: كان عرف ره جي معانا
وملاك: هذا علاش ماقلتلاش نبي نستفرد بيكم
ندى: احلى حاجه درتيها بالذات إنك طلعتيني من حصة الرياضيات
كلهم:😂😂😂
وكملوا طريقهم هدرزة وضحك لين وصلوا للمطعم اللي بيتغدوا فيه
***
تمت المحاضرة
والقاعه بدت تفضى وهي متوترة ومحرجه بالذات بعد اذكرت إتصال أمس،،استغلت إنشغاله بمكالمه هاتفيه وجت بتطلع من التوتر ناشت وحده من الطاولات طاحت من إيدها مذكرتها هو كان مركز معاها بحركه سريعه قدم ونزل وعطهالها هي ماقامتش عيونها فيه بككل خدت المذكرة وطلعت وهي في حالة يرثى لها ،،طلع وراها وهو قاعد يتكلم بالتليفون تسمع فيه وحست المسافه قريبه بيناتهم بتحاول تسرع خطوتها بس رجليها يمشوا بالسيف من التوتر ،،حست الممر طويل وماباش يتم وهو شكله بينهي المكالمه
نجيب: تمام خلاص نص ساعه نكون غادي نتلاقوا وصكر
ريما قريب تموت من الخوف حست إنه حيكلمها ،،تراجي في شي ينقذها من اللي هي فيه
"استاذه ريما"
"يااارب الحمد لله جيي في وقته"
ريما قدمت بسرعه لعز العرب: صباح الخير استاذ عز
عز بإبتسامه : صباح النور
فات نجيب من جنبهم :صباح الخير أستاذ وكمل طريقه طول
التفت عز ورد عليه بعدين شبح لريما اللي لقاها تشبحله وجهها أحمر
عز: ضايقك
ريما شبحت لعز: لا ابدا
عز:شن شعورك توا وهو أستاذك وحتشوفيه هلبه الأيام الجايه
ريما بتصنع: عادي استاذ يقري فيا زيه زي غيره
عز أبتسم: تمام ،، كان ماعندك شي هيا للمكتب
ريما ابتسمت: هيا 😊
***
نبي نديرهوله في المستشفى
اريج: وااااااو بجد حلللوة الفكرة
ندى: هللبه😍
ملاك : وأنتي جمانه شن رايك
اريج بمزح : جمانه ماتعترفش بهالمناسبات
جمانه ضحكت: حنعتبر إنك تبي تفرحي خطيبك وحنقولك إن فكرتك حلوة وحتفرح عبدو هلبه
ملاك فرحت: احلى حموات والله 😚😚😚
يتبع .....
#GomanFared
