الحلقة(92)
اسبوع العرس 💗💗💗💗
تعبا حوشهم بالناس من جديد بعد حوالي شهرين وهالمرة عرس البنت يوم الحنه الكسوة والحفله ..وطبعا نجمة العرس معروفه وبدون منازع ☆شمسه☆ 🤣..
من يوم الأحد رابخين دربوكه وغني وجو مش عادي وجمانه كانت فرحانه ومتوترة في نفس الوقت ..ولأنها ملتزمه عرسها حيكون غير..مش حتمشي للحمام..وحدير صاله لكن بدون أغاني وموسيقي..في بنات شرقاويات يقروا معاها في الجامع جوهم مليح زي شمسه يقيموا العراس قيمان عزمتهم لكن قالولها مانقدروش نجوا إلا نهارالكسوةو الحفله ...
هذاكا اسبوع امينه كانت وين ماتحصل فرصه تقعد فيها بروحها تبدا تبكي ..طلعة البنت من حوش بوها واعرة ..ومش غير هي حتى الحاج فرج جمانه ليها مكانه خاصه عنده برغم فرحته بيها أن ربي عوضها خير..لكن كان مضايق انها خلاص حتطلع من حضنه حضن بوها لحضن راجلها لاخر العمر ..
نهار الفاتحه ...
عند سليمان
كان الجامع بعد صلاة العصر معبي بأحباب الشيخ واصحابه بوه خوته اهله وناسه صحابه وائل عماد ربيع احمد ..صحاب القرايه ابراهيم وعمر .. طبعا الشهود اولهم وائل اللي كان شاهد ع كل شي من البدايه لهاللحظه ..والشاهد التاني الشيخ احمد اللي عطي أمل كبير لسليمان فإنه حينول اللي يتمناه بإذن الله ..
بدت مراسم الفاتحه ..شعور سليمان في هديكا اللحظه كان غريب شعور مخليه من اول مابدوا وهو قلبه يخبط خبط 💗 الإنسانه الوحيده اللي قدرت تغير نظرته للحياه..اللي حركت قلبه ..اللي عرفاته معنى الحب الشوق العذاب اللهفه ..اللي دخلت في حياته لون مختلف عن الألوان اللي يعرفها اللون الوردي اللي خلاه يشوف الحياه بقلب العاشق ..هالأنسانه حتولي بعد لحظات ملكه زوجته نصه التاني خير متاع الدنيا💞💗
عند جمانه
كانت ادور اهني وهني تشغل في نفسها بأي شي تمروح بمروحه البدله البودريه اللي لبستها وطلعت فيها ايه من الجمال ..وقلبها ماباش يهدا بكككل ...
💞بارك الله لهما وبارك عليهما وجمع بينهما في خير💞
خلاص جمانه حلال سليمان وسليمان حلال جمانه
جمانه مرت سليمان وسليمان راجل جمانه 💗
ناضوا الاصحاب والأحباب يهنوا وهو يضحك وفرحته مش سايعاته قبل سنه من توا ماكانش ممكن يصدق انه حيكون متلهف ع الزواج لهالدرجه وحيكون فرحان فرح جم لما يعقد قرانه ...طبعا لايخلو الأمر من بصارة الأصحاب ومناشبتهم الصامته 😁
عند جمانه
ماتندريش ع روحها لين جتها امها تحضن فيها
امينه ببكي: مبارك يابنتي مبارك فرحتك يافرحتي ربي يهنيك ياغاليتي
جمانه دموعها نزلوا فرح وحزن ..جوها خواتها حضنوها ودموعهم مطر والجو خيمت عليه الكآبه ..لكن مع شمسه مافيش كآبه الدربوكه ويالله وهاتك ياغني وشطيح ورقيص وبصارة انقلب الجو في لحظه وجمانه كانت تضحك وفرحانه هلبه ...💗💞
في الليل
كلهم راقدين في الصاله بعد تعب يوم كامل جمانه حولت الردي البودري وقعدت بالقمجه والسروال حتى المحرمه حولتها كانت ممتده بحدا الروشن ومش قادرة ترقد من الفرحه ومن التفكير بالأيام الحلوة الجايه ❤
في عز الهدوء متاع الليله الخريفيه الحلوة رن تليفون جمانه من الربكه سكرت ع المتصل وقعدت تشبح للي راقدين ماحد ناض"الحمد لله" دارت تليفونها صامت وشافت الرقم لقاته غريب ..حطت التليفون جنبها وبتولي لوضعيتها الأولى ..ضوا التليفون ...كان نفس الرقم ..قعدت تشبحله ومابتش ترد رن مرة اتنين تلاته اربعه وفي الأخير كانت رساله 💌ردي ياعقد حبي الفريد❤..
جمانه تقرا وتعاود وحاطه ايدها ع قلبها ..ناضت بالشويه وتخطت الراقدين غصب عنها ..طلعت للجنان من جيهة المطبخ ..قعمزت تحت المظله ع روس اصابع رجليها ومتكيه عالحيط في ايدها تليفونها وعيونها ع الشاشه ..والأيد التانيه على خدها وصبعها الغنصر في فمها ..وقلبها مداير مهرجان 💞
اتصل ...حطت ايدها ع قلبها ..غمضت عيونها بقوة"يااارب ياارب" فتحت عيونها وبصبعها اللي يرجف فتحت الخط وحطت التليفون ع وذنها
سليمان : السلام عليكم
هي ساكته مش قادره تنطق حرف سمعت صوته قشعريرة ضربت جسمها كله
سليمان: قلنا السلام عليكم ..
جمانه ولاحرف ولاكلمه كإن لسانها معاش يقدر يتحرك وقلبها قريب يطلع من مكانه
سليمان بضحكه: السلام على من اتبع الهدى
جمانه تلقائيا: هههههههههه
ياحي عليها شن دارت فيه بهالضحكه الراجل تلخبط كل شي فيه ..عقله قريب طار من مكانه ...تمالك نفسه بصعوبه ..
سليمان : مبارك عليك وعليا 💓
جمانه بصوت يدوب طالع: الله يبارك فيك 💓
سليمان : شن مسهرك لتوا ..
جمانه بخجل: اللي مسهرك انت لتوا..
سليمان بمزح : اني مسهريني المولدات البشريه اللي راقده بحداي
جمانه: ههههههههه
سليمان"معاش بنضحكك قلبي خلاص معاش طايق صبر"
جمانه: آلو ..
سليمان: معاك 💓
جمانه: احمم ..شنو ادير
سليمان: نكلم فيك
جمانه : ههههههههه
سليمان خلاص: ضحكتك تذهب العقل وانا للخمر لست بشارب 💓
جمانه بعدت السماعة عن وذنها وقعد تمروح ع روحها وحطت ايدها ع قلبها: اه ياقلبي ❤
ردت السماعه: احمم شكرا😳
سليمان حب يخلي الجو اريحي أكثر بضحكه: حوشكم زحمه زي حوشنا...
جمانه بعفويه: مانحكيلكش ..بس حلوة اللمه لما يبدا فيها الناس اللي تحبك يزيدوا فرحتك لما يفرحوا معاك
سليمان:صح وهذا اللي حسيته بين احبابي وناسي اليوم
جمانه: قال بابا اصحابك وأحبابك هلبه ماشاء الله..
سليمان ابتسم : الحمد لله هذا من فضل رب ..
جمانه جت بتتكلم:هااااتشييي
سليمان: يرحمكم الله
جمانه: هداكم واصلح بالكم
سليمان. بضحكه: غدوة بيجوكم افواج ره من توا نقولك "قصده الكسوة"
جمانه ابتمست: مادام اهلك مرحبتين بيهم ع العين والراس
سليمان ابتسم: بالشويه على قلبي ياآمة الله 💓
جمانه : هههههههه
سليمان: شن كنت نقول توا ؟
جمانه بخجل: انت اضحك فيا
سليمان بحب: وحنضحكك ديما طول ماانتي معاي ❤
جمانه حطت التليفون ع قلبها بحركه تلقائيه ومغمضه عيونها من تأثير كلامه الحلو ونبرة صوته الهاديه والحنونه...بعدين رجعاته ع وذنها ..
سليمان: آاالو
جمانه: معاك 💓
سليمان: العمر كله إن شاء الله 💓
جمانه بخجل: آاامين😳❤...هااااتشي
سليمان: يرحمكم الله
جمانه : هدا...هاااااتشي ..هاااااتشي
سليمان بخوف: انتي وين ؟..
جمانه بضحكه: في الجنان.. هااااتشي
سليمان: في الجنان في هالوقت ولابسه خفيف شكلك..نوضي خشي
جمانه ناضت: حاضر ..قعدت تمشي لين خشت للمطبخ طلعت منه اتجهت للصاله ..قعدت تتخطى في الراقدين بحذر شديد ..لين وصلت في الدروج وقعدت تركب ..وصلت في دارها وفتحت الباب
سليمان: وصلتي لدارك؟
جمانه: حيي قاعد معاي ع الخط؟
سليمان: ههههههههه
جمانه "كان ضحكتي اني تذهب العقول ضحكتك انت شنو😍"
جمانه قعمزت ع كرسي متاع طاوله القرايه اللي عليها اللاب توب: تعرف اني وين مقعمزة
سليمان ابتسم: وين ؟
جمانه : ع الكرسي متاع طاولة القرايه متاعي اللي قدامها اللاب اللي نفتح منه في الفيس ونتابع في صفحه مميزة ..فيها آدمن مستفز ..علقتله مرة تعليق ماعجباش خش ع الخاص وهزبني ..
سليمان : ههههههههههههههه ...احسن حاجه صارت كان هذا ماكنتش عرفتك وخشيتي حياتي وغيرتيها للأجمل..
جمانه ذااابت من كلامه ومشاعرها تلهب في صدرها وقلبها يفر فران ..💓
الله اكبر الله أكبر
سليمان: هذا الآذان الكاذب ..خل بنمشي نصلي الوتر ونستعد للفجر ..وحتى أنتي نوضي صلي وادعيلنا ..❤
جمانه: حاضر
سليمان: يحضرلك الخير يازوجتي المطيعه
جمانه"اه قلبي يااارب ":تسلم 😳
سليمان ابتسم: السلام عليكم..
جمانه : وعليكم السلام ..وصكرت .وحضنت التلفون للحظات وهي مش مصدقه شي من اللي صار ..بعدين ناضت توضت وصلت ودعت ربي يكملها ع خير هي وسليمان "رب أغلى امنيه في حياتي انك تجمعني بيه دنيا وآخره ..رب اجعله زوجي في الدنيا وزوجي في الجنه ياذا الجلال والإكرام"💓
***
يوم الكسوه 💓
واقفه ع مرايه المدخل تلقي نظرة اخيره ع شكلها ..لابسه تركيبه تركوازيه تجنن وطالعه فيها اطير العقل
ندى: عسسسل ياماميتي والله لو يشوفك بابا يخطفك
امينه بضحكه: تي بري ديري اتشك ع الطاولات الناس قريب يجوا ..
...
جمانه: توا قصدك
سليمان : توا توا طلعوا قدامي ..
خشت عليها اريج: جمنووو
جمانه تأشرلها تسكت: ايه به خل نبلغهم
سليمان : كويس هي السلام عليكم
جمانه: وعليكم السلام ...وصكرت
اريج بمزح:ايوا حني مكالمات وجو هههههههه امتى صار ياعروسه
جمانه : هههههههههه ..اليوم قبل الفجر
اريج : وقبل الفجر فوقها شكله الشيخ رومانسي يابت
خشت ريما : خلاص الناس بيوصلوا
جمانه: توا كيف طلعوا من حوشهم
ريما: كيف عرفتي
اريج: مكالمااات وجو من ورانااا 😌
جمانه: ههههههه ياباردة
فجأة جتها رساله 💌
فتحتها وكانت صورته مقعمز في السياره ورفع نظارته فوق ومبتسم وكاتب عليها كويسه اللحيه هكي ولا نخففها؟
اريج وريما لاحظوا ابتسامه جمانه ووجها كيف احمر ..دكوا روسهم معاها في التليفون
اريج: أوييييييييلي ياناس خيااال هو وهالعوينات
جمانه غارت وتلقائيا قرصتها
اريج: أاااااي ياغيورة
ريما: قالك نخففها ولا لا ؟
جمانه: حلو بكل حالاته 😍
اريج: اه ياااقلبي ع الحلو بكل حالاته اختي راحت فيها خلاص
جمانه : اريييييج 😳
ريما واريج : 😂
بيييييييب بييييييييب بييييييييييب 🚗🚗🚗🚗🚗
ريما : جو هيا ...
طبعا ريما كانت لابسه البدله الصغيره وملاك الكبيره ..
....
كانوا مجهزين الجنان برا لأنه كان كبير طاولات وكراسي ومخليين مساحه في النص لمراسم يوم الكسوة كانوا حاطين فيها كرسي كبير لونه احمر وحواشيه ذهبيه بش تقعمز عليه جمانه لما يجيبوها مغمومه في ردي البدله الكبيرة ..
المهم..جوا عمات سليمان كلهم وخالاته حتى من رقيه وامه وأخته طبعا وحناه وامباركه ولطيفه وسكينه وكانوا مصدرات ...واخته كانت لابسه الشرقاوي وأمه تركيبه ياجوريه طالعه فيها تهبببل 😍...المهم جابوا كسوة كبيره مافي شي مش فيها ...اقارب جمانه وجيرانهم حلو فمهم فيها ...بعد الإستقبال والترحيب حطوا السوابيت وعمات سليمان وخلاته بدوا يصفقوا ويشتوا عليها ..وشمسه وقريبات جمانه يردوا عليهم ..
اهل العريس
حل الباب ع وسيعته ...جاك اللي متعلي صيته
يردوا وراهم
اهل العروسه
تفضل ياعالي الأقدار...تبي كيلو تاخد قنطار
اهل العريس👏
هن هادين كساوي ريدك..كان ماسد عليك يزيدك
اهل العروسه👏
مقبولات هدايا صوبه...هلي كيف الريش هدوبه
اهل العريس👏
معنقر طاقيته مادل...اللي شرطوه عليه نقل
اهل العروسه👏
اللي جبتوه كله شوي..ع مولات الصيت الحي
اهل العريس👏
ياوش قريتي وش دعيتي ..اللي فزول الغالي طقيتي
اهل العروسه👏
قيسه بوه عليه مربح ..في العين الخضراء يتصبح
اهل العريس👏
ويش قريتي من أيات ..حصلتي سمح الصفات
اهل العروسه
خديتوها مال وجمال ...يامش خسارة دفع المال
ولعت ولعت💥💥
اهل العريس👏
الغالي ناويلك ع الراحه ..دايرلك حوش بمفتاحه
وبش تنتهي هالحرب 😂
شمسه
هو ريم وهي ريمه ..أن شاء الله بعشره عمره ديما
وردوا وراها 👏
اهل العريس 👏
يامبروك عليه دهوبه ..جاب بنت عرب مأدوبه
......
دخلوا السوابيت وجو لجمانه خالتها ومرت عمها ومرت خالها وغموها بردي البدله الكبيره وهما يغنوا عليها بوطويل ..وشدتها خالتها من جيهه ومرت عمها من جيهه وطلعوها وهما يغنوا
وكانوا قدامها ريما وملاك شادين المرايه واختها ندى مترد الفخار وفيه شماعي ...مشوا لين وصلوا بيها برا وقعدوا يدوروا بيها ويغنوا ويدربكوا ويعدوا السبعه دورات
دوروا بيها دوروا بيها ...وإن شاء الله السعد يواتيها
كملوا الدورات وجتها مرت خالها وقامتها السبعه قيمات
واااااحد
اتنيييين
تلااااااته
اربعععه
خمسه
سته
سبععععه
وانطلقت الزغاريط روووووورووووووورووووووورووووري
وكملوا باقي الطقوس ..وطبعا جمانه كانت تبكي كالعاده المعروفه عن البنت في هالمراسم ...وخشت بعدين
قعمزوهم وجابولهم ضيافه من احسن مايكون ..وعشي حاجه صح ..فتحيه فرحانه بيهم وشافت روحها بيهم قدام حمواتها وخواتها ...وطبعا امباركه ولطيفه يسحنوا سحن خل والله يطربقوا 💥😂
وجي وقت مرواحهم روحوا بالأغاني والدربوكه ...طبعا هما جوهم العشيه وقعدوا للمغرب وروحوا...
****
في الليل
قبل الحنه ...
ريما في شقتها كيف خشت لدار النوم بتغير الصدرة وتلبس حاجه بسيطه ومريحه للسهريه متاع الحنه ..نجيب خش للشقه وشاف الكندرة قدام الباب وكان كعبها عالي عصب لأن منبه عليها ماتلبسش كعب نهائي في فترة الحمل..خش طول للدار وهو ناوي يعارك لقاها عاطيه بالظهر وتحول في حدايدها
نجيب: اني شن مقايل ع الكعب
الفتت ريما وقعدت تشوفله بخوف: مانقدرش نلبس صدرة من غير كعب
نجيب: يااااروحي انتي مين تجيبي في الجمال قوليلي 😍😍
ريما : هههههههههه مهبول
جاها وشد وجهها بإيديه وقعد يبوس فيها بشغف شديد
طبعا في هالوقت كانت امه راكبه تشوفها لأن حستها تعبانه خشت ومالاحظتش كندرة نجيب مشت للدار وتشبح لقطه من العشق الممنوع قدامها 😲 امينه طلعت تجري ريمه استقاضلها فنصت ودفت نجيب
نجيب بلهفه: خيرك ياعمري
ريمه : امك كانت هني 🤤
نجيب: شن تقولي 😨
ريما: والله العظيم ..عليك عاااار ياحشمتي وخلاص
نجيب: هههههههههه ربي يهديها هي علاش جايه هني
ريما: لاحظت عليا التعب شكلها
نجيب بخوف: تعب شنو
ريما بربكه: لاشي عادي..يعني الصدرة متعبه واني حامل ..واكيد مرت خوك مشتلها حتى هي
نجيب بجديه: ريما والله مامسامحك كان تحسي بشي وماتقوليليش
ريما ابتسمت: عادي تعب ومشي ع حاله
نجيب: اكيد مشي ع حاله
ريما بضحكه : ايه
نجيب مشي سكر باب الحوش بسرعه وولا لدار نوم وخش وسكر الباب وراه وشبح لريما شبحه خبيثه
ريما : شنو 😯
نجيب بضحكه: شي ياقلبي بنساعدك بش تحولي هالبقاج اللي لابستيه
ريما بملل : نجيييييب
نجيب حط سبابته ع فمه : اصصصصصص ولاحرف 😍
💓💓💓💓💓💓💓💓💓
****
السهريه
كانوا مفرشين حصاير ومقعمزين في الجنان بعد ماحولوا الطاولات والكراسي والجنان كان كبير،ملتمين وبدت الدربوكه تربخ بعد ماجو الناس طبعا سوسن صاحبه اريج جت كانت عروسه وباينه فيها العرسه ولابسه بدلة قونه متاع مناسبات وطالعه حلوة ..المهم جمانه كانت مقعمزة بين صحباتها منيره ومرام جت حتى هي والبنات الشرقاويات وهايمين مع الدربوكه والهياجه ...وقفوا شويه بش يرتاحوا بعد شوط سمح .. وبدوا يفرقوا في الضيافه
منيرة: رويدا تزوجت
جمانه تنهدت : ربي يهنيها ..وانتي امتى عرسك
منيرة : بعد مايروحوا بوه وامه من الحج
جمانه: ربي يتمملك ع خير ويهنيك
منيرة بأبتسامه: اجمعين حبيبتي ...
....
سوسن: ماشاء الله باين عليها فرحانه جمانه
اريج تنهدت: بتاخد اللي تحبه وتتمناه وماتبيهاش تفرح
سوسن شبحتلها: شن جوك انتي ومعز
اريج بأبتسامه مزيفه: كويسين..وانتي شنو مدايره مع عصام
سوسن: الحمد لله ..بس امه مرة مرة تلقح لكن اني مطنشتها
اريج : احسن..حتى اني هذا النظام اللي متبعاته مع اللي عندي
سوسن : مادام الراجل باهي ..طنشي...
بعد الهدرزة والماكله والشراب شمسه واختها شدوا دربوكه
شمسه: هييي جمنو ياعرووسه
جمانه بضحكه: نعم ياشموسه
شمسه: نوضي وريني ميلان خصرك شن مقعمزتيلي هكي
جمانه: هههههههه
شمسه: هي هي نوضي
جمانه متحشمه لكن الموجودين شجعوها ..جتها اريج نوضتها ترقص فيها ...
اشششي عليها هيا اششي زهر وميا
ويردوا وراها
واللبس البودري محلاه وكل بنيه تتمناه
ويردوا وراها
ياتفاحه بين صواني ياخسارة حازك براني
ويردوا وراها ويضحكوا
وجمانه شويه شويه انطلقت وبدت ترقص بروحها ترقص وفرحانه من قلبها ..فرحة عمرها ..كلهم منبهرين برقيصها كانت تهبل ..وامهاتشبحلها وشاده دمعتها بالسيف ..
ناضوا خواتها رقصوا معاها وكانوا فرحانات اكثر منها اهو ع الأقل وحده فيهم وصلت في حبيبها💔
الحكايه ربخت بزياده بعد خشوا فيها الشرقاويات والدنيا انقلبت والشارع اللي ساكنين كله يصدح بصوت غناهم وزغاريطهم ودربوكتهم ..
...
خشوا داخل وكانت الصاله مفرشه بفراشات عاديه بعد قاموا جلستها قبل العرس ..وتوا مكان لجمانه بش تحني ..وحنوها خالتها ومرت عمها ومرت خالها..ونساوين كبار من العيله يغنوا عليها وكان الكلام مؤثر خشت امينه للكوجينه وقعدت تبكي ومعاها كنتها ريما تهدي فيها وبعدين لحقت وحده من خواتها بش تسكتها ..وجمانه حست بيها وبدت تبكي قعمزت جنبها ندى اللي كانت شادة روحها بالسيف وتمسح في دموعها ..شويه وناضوا غيرو الجو وقعد يشتوا بحداها
ياام صباع تقول شماعي جيتي للحنه تداعي 👏
يامبروك عليك الحنه وإن شاء الله الدنيا تهنى👏
ياسلم بو عين كبيره حناياته تقول مسيرة 👏
....
ووحنوها والناس روحت وقعدوا ضيوف العيله المقيمين
كانت ندى جنب جمانه تهدرز عليها ...ولحقت اريج وبعدها ملاك وريما ..
اريج : مابعدك من الحنه بإذن الله مش حنديرها
ندى: غير والله نقرشي غصب عنك حديرها بالذات وراجلك يحبها
اريج:😒
ريما: حقه جمانه الشيخ يحب الحنه
جمانه وخدودها توردوا: مانعرفش 😳
فجأة رن تليفون جمانه وكانت رساله
اريج : هو اكيد ..
جمانه: ترا افتحيها ندى ووريهالي
فتحتها ندى وطول ورتها لجمانه
(إن شاء الله غير كترتي الحنه نحبها ره)
جمانه ضحكت ووجهها احمر
اريج: شن قالك
جمانه: اقريهالهم ندى😳😍
ندى:قاللها إن شاء الله كترتي الحنه لإنه يحبها
ريما بضحكه: ع هكي اشري صندوق حنه وين اطير تعاوديها
كلهم 🤣🤣🤣
....
مش فاهم علاش مادرتش نظرة شرعيه
سليمان: ترا قولي قداش مرة سألتني السؤال هذا اليوم 😒
وائل: مش عارف كيف تفكر؟! لو ماعجباتكش كيف ادير ترا
سليمان:وائل خيرك..اني نحبها ياابني وماريتش منها حاجه مش حيفرق معاي بكل شكلها
وائل: مرات يفرق ياسليمان
سليمان: لما نبدا شخص سطحي حتفرق معاي
وائل بضحكه: مشكور
سليمان ضربه ع رجله: عارف كويس اني مانقصدكش
وائل : ههههههه عارفك ياصاحبي..لكن الدين عطاك حق تشوفها
سليمان: عطاني حق نشوفها لكن مافرضش عليا
وائل: الرسول قال تنكح المرأه لجمالها
سليمان : وختم الحديث بفاضفر بذات الدين تربت يداك وأنا ظفرت بذات الدين ...
وائل: شنو بنقولك ربي يهنيك ..
سليمان ابتسم: اللهم آاامين...💓
***
يوم الحفله
الساعه 12
جمانه وهي بتتسقدكانت تسلم ع أهلها ودموعهم مطر ..خلاص حتطلع من الحوش اللي تربت فيه وعاشت فيه عمرها حتطلع من عيلتها وتبدا تجيهم زيارات بس صعبه طلعت البنت هلبه 💔...وهي طالعه لقت بوها مشتله تحضن فيه وتبكي وهو دموعه ينزلوا ويمسح فيهم وصاها ع راجلها وناسها وعطاها كم نصيحه وباس راسها ودعالها وخوتها الولاد سلموا عليها بحرارة ..عبدو قعد يبكي وهو يحضن فيها...ونجيب دموعه في عيونه ..اما اصيل فاختفي بسرعه مايحبش يبكي قدام حد ..طلعت جمانه ورفعتها ريما مع بعض في نفس المزين ...
"خل نقوللكم ع فيلو جمانه..قماشته تشبه لقماشه فيلو ميغان ماركل اللي تزوجت الأمير هاري ولد الأميره ديانا ..مخصر من فوق لعند الخصر ومنفوخ شويه بسيطه من تحت من قدام قصير مبين رجليها لفوق القدم ومالورا طويل ومغطي رجليها من فوق فيه زي اللفه مغطيه صدرها وكتافها وذرعانها من فوق وظهرها من فوق الدور الداير ...وكان ابيض ناصع ...وكان بسيط مظهره لكن حلو في لبسته هلبه ..."
الساعه 6
جمانه كملت وطلعت لريما
ريما بإنبهار شديد: طالعه زي الملاك 😍
كانت لابسه الفيلو اللي سبق وصفه وبدون طرحه وشعرها مرفوع لتحت الراس وملفوف لداخل مزين من ب"هيد بيس لونه ابيض في الذهبي ..وقصتها مفروقه من القدام جزء اكثر من جزء بطريقه حلوة هلبه إلى جانب خصلات بسيطه واصله لتحت خدها بالزبط ..حاطه روج أحمر دمي ووعيونها مكياجهم مكانش ثقيل بس كان مبرز لونهم الفيروزي هلبه ..مكانتش مكثرة مكياج كان مكياج عروسه ناعمه زي الأجانب بالزبط ولابسه تاكم فضه ناعم وحلو هلبه وفي ايدها باقه ورد طبيعي احمر في الأبيض وكانت ملفوفه بدانتيل ابيض ومربوطه بشريطه ذهبيه ...
جمانه: حق حلوة ؟.
ريما : حلوة شني يابنتي اللهم بارك راااائعه فاتنه ...
المزينه: والله احلى وأميز عروسه تطلع من عندي من نهار فتحت المزين ..
جمانه: شكرا 😳
ريما : ربي يهنيك يااارب ♡♡..هيا نجيب يستنى برا..جي روح بسيارتي ولالنا ..خدت الكاب ولبست جمانه بحرص شديد ولبست هي عبايتها ونزلت خمارها وطالعين جاهم نجيب ديديشهم بشويه لين ركبهم السياره
نجيب: مبروك ياقلبي
جمانه: الله يبارك فيك ياغالي ويفرحني بصغارك
ريما ونجيب: تسلمي 💓
وصلت للصاله وخشت للدار شافوها امها وخواتها قريب طاروا عليها رقوها وشربوها مية رقيه ..شويه وطلعت للناس وكانوا فاتحين اغنيه ماهر زين يارسول سلام عليك من غير موسيقى ..والناس انبهروا بيها وبجمالها كانت زي الأميرات الأوروبيات بالزبط ...
طبعا دربوكه وغني قامولها الجو حتى لو كانت بدون موسيقى اللي يبي يفرح حيعرف يفرح ...
بعد نظام الحفلات المعروف ..جو اهل سليمان الساعه 11
وجمانه قلبها بدي يخبط خبط ...والتوتر بدي فيها...قعمزوا شويه وعشوهم ...وقالوللهم هيا ..طلعت جمانه من القاعه وجوها خواتها لبسوها الكاب وكانوا يبصروا معاها ويضحكوا بش مايصيرش فيها الدموع ..ومشوا معاها هما الزوز ..
طبعا روح بيها سلفها الكبير مع اخته سلمى وامباركه اللي قريب تنحرق من الحسد 💣...
وصلوا للحوش ..
طبعا حوش سليمان حاليا هو حوش اهله قبل لما كانوا عايشين في طرابلس ..كان ع دورين وكبير هلبه فيه برا صاله كبيره خاصه بالمناسبات نسائيه وتانيه رجاليه ...اول ماوصلوا دخلوا جمانه من الباب اللي يفتح ع الصاله النسائيه واستقبلوها عماته وخلاته بأغنيه "مرحبا يالافيه ...
🎵مرحبا يالافيه ..مرحبا يالافيه ..مرحبا يالافيه ..قدومك عافيه ...إلى أخر الأغنيه🎵
حولت الكاب والناس حلوا فمهم فيها ..ع جمالها وطلتها وعزوزتها هبلت فيها وشافت روحها بيها هلبه . 😁
...
عماد: شنو المعنويات ياشيخنا
سليمان بضحكه: زي ماتعرفتي تعانق السماء
ربيع : نقص ايدي من منبتها كان مش قلبك مدايرة نوبه داخل
سليمان يضحك
احمد بضحكه: حتى اني ركزت عليه منين سمع صوت الكلاكسات وجهه ولا طماطم
سليمان: ريحوا ارواحكم 😒
وائل: ربي يهنيك يابوصاحب
سليمان: اهو هادي الدوة اللي تنقال 😌
احمد وربيع🤣🤣
...
خششوا جمانه داخل في دار المعيشه كان برا في زي الصاله الصغيره تربط بين غرف الدور الأول ..جمانه في الدار واقفه مع حماتها وخواتها الزوز وعمة سليمان الصغيره
عمته: وليد خوي مايطلع منه غير وين طاح فيك
جمانه مبتسمه بخجل
سلمى: سلمها المتحشمه ..
اريج : هي خجوله ره ...
عمته : واضح عليها ..
ندى: جموني شن جو
جمانه ابتسمت وبصوت يدوب طالع : كويس .
سلمى تقلد في صوتها: كويس
ضحكوا كلهم ..
خشت فتحيه : هاه حبيبتي شنو حالك
جمانه بخجل: الحمد لله كويسه
فتحيه ابتسمت: اهو كلمت سليمان شويه وبيخش
جمانه خلاص قلبها بيطلع من صدرها وتوترت هلبه
سلمى: ماتتوتريش ارخي روحك ياحلوة وغمزتلها 😉
...
سليمان خش من جيهة الباب الرئيسي وخش الداخل
سليمان : بسم الله ..وخش للصاله ... أمي ..
جمانه سمعت صوته شدت بقبضه ايدها ع الباقه بقوة وسلمى وخواتها يشبحولها ويبتسموا 💓
...
فتحيه طلعتله: توا بنطلعهالك وبتطلع انت وياها تمشوا في الممر وعماتك وخالاتك بيغنوا عليكم شوي بعدين اركبوا
سليمان بضحكه: باهي ..والتفت قعديشبح لدرع محطوط ع طاوله لاصقه في الحيط كان لبوه زمان لما شارك في الحركه الكشفيه وكان عاطي بالجنب..طبعا كان لابس اللبسه الطرابلسيه بس كان لونها رصاصي هااافت بزخرفه ذهبيه وساعه فضه وخاتم فضه بالفص الأسود وهذا ديما يلبس فيه
...
فتحيه : هيا حبيبتي ..طلعت جمانه وخواتها قعدوا واقفات يشبحوا من الباب..شافاته كيف واقف وايديه مشبكهم ورا ضهره المفرود وكالعاده كان في غايه الأناقه والجمال😍
كان مركز هلبه في الدرع لين وقفت جمانه وأمه واختها قدام الطاوله الصغيره المرش اللي تفصل بيناتهم ..
فتحيه: سليمان ...
تلفت ع جنبه ...ولما تلفت ..بالنسبه ليه الدنيا وقفت ...تلفت بجسمه كله وعلامات الذهول ع وجهه مش قادر يرمش بكل ..كل الوجوه اختفت ..كل الماديات اللي حواليه.. مايشوفش غير فيها ..وزع نظراته المبهورة عليها بكل تفاصيلها من راسها لرجليها ..قلبه نبضاته سريعه وقويه ..وشوقه تحرك بشكل قوي ...قاعد يشبحلها بنظرة المفتون ويقول في نفسه "ياإلهي اعطي قلبي قوة قلبين بش يتحمل هذا كله ..اني من قبل ما نشوفها وحالي ماهو حالي ..يابال شفتها شفت ابداع صنعك فيها ..قلبي يااارب عطيه قوه قلبين هلبه عليا هلبه ...💓💓💓"
سلمى : خوي راح فيها
جمانه سمعت كلمتها تحشمت ووطت راسها ..
فتحيه: احمم سليمان
لاحياة لمن تنادي
فتحيه بصوت أعلى : سليماان
استاقض : هاه ...
سلمى شاده ضحكتها وخواتها يشبحوا من بعيد ومبتسمات ..
فتحيه : هيا حبيبتي تعالي ..
قدمت وقدم وقعدوا يمشوا جنب بعض لين وصلوا في الباب وأمه وأخته ووخواتها وراهم ..
سلمى: هيا ياعروسه شدي ايد عريسك
جمانه التفت وقعد تشبح لأيده وهو يشوفلها بحب ومبتسم مدت ايدها وقربتها من ايده ..لمست بطرف سباببتها الغنصر متاعه الزوز حسوا بشعور حلو هلبه ..وهو شد ايدها وعانق بصوابعه صوابعها وتشابكوا ببعض ..هي مش مصدقه نهائي ...حطت ايدها التانيه ع ذراعه
سلمى بمزح : شوفيها كيف شادته..مانلومكش ياكبدي حتى هو خوي سلومه
جمانه طلعت منها ضحكه وقامت راسها جت عيونها في عيونه هو ضحك وهي ضحكت ..وبعدين
وبعدين طلعوا ..قعدوا يدربكواويغنوا عليهم طول ماهماماشيين في الممر كانوا يضحكوا وفرحتهم تعادل الدنيا..وهو يشد ع ايدها وهي تشد ع ايدده ويرشوا عليهم في الزهر والورد ..وصلوا للدروج التفتت لخواتها وعيونها دمعوا وهما نفس الشي ..ودارولها 🖐 هما الزوز ..وركبت هي وعريسها ...بزغاريط .....🎵🎵🎵🎵❤❤❤❤❤
يتبع .....
#GomanFared
