الحلقة(99)
يوم الخميس
مشت جمانه للبلاد هي وعزوزتها واللي رفعهم عمها ..سليمان كان مشغول وكانت وراه خطبه جمعه ...فبيلحقهم الجمعه بعد الصلاة..جمانه كانت مضايقه حتبعد عليه يوم ونص حستهم 10سنين وهو نفس الشي..المهم مشت غادي ..واستقبلوها سلفاتها سكينه ترحب وتهلل وامباركه ولطيفه من فوق النفس ...امباركه لاحظت إن جمانه تشبحلها في شبحات غريبه وقعدت تحاول تفسر شبحاتها ..طبعا مشي يوم الخميس وجمانه مع عزوزتها وجدة سليمان وسكينه اللي نوعا ما ارتاحتلها ..هذا غير جنى اللي لاصقه في جمانه وماكانتش تبي تطلقها بكل ..سليمان يومها ماأتصلش بكل وحتى هي ..كانوا عارفين إن اتصالاتهم حتزيد شوقهم لبعض اكثر ...وسليمان وقتها كان يبي يركز ع موضوع الخطبه اكثر تجي في باله في كل لحظه بيقيم التليفون بيكلمها يتراجع يحس لو كلمها حيركب سيارته ويمشيلها طول بدون تفكير💖
***
شوف كيف ولا شكله..
جمال: طبيعي الكيماوي هكي يدير
مروة وعيونها مطر دموع: بالله عليك قولي حقه مافيش امل ..
جمال تنهد: مع الأسف ...
مروة بعد غمضت عيونها بشده وفتحتهم : آاااه ياربي كيف بنتحمل كيف ..مش قادرة نستوعب ولانصدق..شبحت لصورته ..هذا مش خوي بس هذا بوي هذا أمي هذا عيلتي صدقني عاطفة الأم شفتها فيه اكثر ماشفتها في امي حنان الأب اللي ماريتاش في بوي بكل هو عوضني عنه..كان لما يغيب هلبه ..كنت نتصل بيه ونكذب عليه مرة نقوله تعالى صارتلي مشكله ..تعالى امي مريضه...تعالى في حاجه ضروريه لازم تجي ..كان يعرف انه كذب ويجي ومرات كان يصدق ويعصب مني هلبه بس يرجع يراضيني ويغيرلي جوي كله...اني عايشه بحسه ياجمال كيف بندير لما ....وانهارت بالبكي وجمال اللي كان متأثر هلبه خداها في حضنه وكان يحاول يهديها ...💔
***
خلاص اخر كلام
اريج بإبتسامه : ايه 25\11
معز بفرحه : بنبدا نعد ونخط ع الايام في التقويم توا..لين نوصل فهاليوم...
اريج بضحكه خجوله : احمم امتي الأجتماع
معز بإبتسامه : بعد ربع ساعه ❤
اريج تعودت ع معز وتأقلمت معاه هلبه ..في الإجتماع كان يتكلم وكانت سرحانه فيه "مرتاحه معاك هلبه وواثقه ومتأكده حيجي اليوم اللي حنحبك فيه لإنك أجباري تنحب..اما الماضي حيقعد ماضي ومحطه في حياتي مريت بيها وخلاص..انت حاضري ومستقبلي والحمد لله اللي ربي عوضني بيك💖" ...وزع نظراته ع الموجودين في الأجتماع جت عينه عليها وهي سرحانه فيه ابتسم ابتسامه خفيفه وهي قعدت معاه بعيونها....بدت هي تتكلم وهو اللي جي دوره يملي عيونه منها وقلبه يرفرف..كانت تتكلم بثقه وكانت تهبل بكل معنى الكلمه هوعاشق لتفاصيل وجهها الناعمه والحلوة اللي بانت فيهم الجديه وهي تتكلم .. جت عينه في عينها ابتسمت ابتسامه خفيفه وكملت كلامها....
تم الإجتماع وكانت الدنيا مغرب ..طلعوا الزوز بيروحوا ..وطبعا في سيارته ...
معز: طبعا قبل لنروح بيك نبي نرفعك لمكان ...
اريج بإبتسامه: وين ..
معز شبح القدام وهو مبتسم ولابس نظراته السود: تو تعرفي
قعدت تتأمل فيه شويه بعدين.. شبحت القدام وهي مبتسمه وحاسه براحه ..وهو فتح اغنية راغب علامه ...اللي كان يحبه زي نجيب...ع أغنية ◇بعشقك◇
تسمع في كلماتها وحست بكل كلمه فيها وكإن معز يبي يوصللها مشاعره بيها ..هي حست بقلبها يدق بقوة وكانت حاسه بشعور حلو هلبه 💖...
***
جي يوم الجمعه ...
الساعه 3:30
وجمانه كانت مع عزوتها وسكينه في المطبخ يوتوا في الغدي..
سكينه : عمتي وين القرفه ..؟
فتحيه: علاش
سكينه :بنديرها ع البصله
فتحيه وجمانه: سليمان مايحبهاش ...
شبحوا لبعضهم وضحكوا ..وابتسمت سكينه: خلاص مش لازم مالا ..
جمانه كملت شغلها اللي ادير فيه وعزوزتها تشبحلها وفرحانه..فتحيه في الأول كانت متحسسه منها خافت تاخد ولدها منها..بس اللي صار العكس تماما ..وفتحيه الراحه والفرحه اللي تشوف فيها ع وجه ولدها مخليتها اسعد ام في الدنيا وتحس بإنها ممنونه لجمانه اللي بسببها سليمان قرر يتزوج وقعد قريب منها وسعيد هلبه...💕
ماريه جت تجري للمطبخ:حناي عمو جي بابا قال سقوا الغدي..
جمانه قلبها يفر فران من كثر شوقها ليه ..
طبعا مقدرش يخش لأن في رجاله معارفهم جايينه وماقدرش يخليهم ويخش ..حتى الصفر طلعهم رمزي ..
وهذا اليوم لطيفه وامباركه في حوش اهاليهم وهما بالعادة لمايمشوا يخلوا في صغارهم اللي يفضلو القعادفي حوش جدهم عمران ...
***
الله..
اريج : تعرفي يهبل ياندى تفصيلته اثاته ..حتى المدخل متاعه ..كله كله زي ماني نبيه ..ليه وهو يبني فيه وداره كله زي ماكنت نبي ..هالإنسان يعرفني اكثر مايعرف نفسه
ندى: حبيتيه؟
اريج : حاسه ناحيته مشاعر قويه مش فاهمتها كل اللي نعرفه أني نبي نكمل عمري معاه وخلاص...
ندى ابتسمت: كان عرسكم يوم 25 معناها مازال 22يوم ...
اريج: عيد ميلادك الاحد ندوشي ...
ندى: والله مافي بالي بكل امتحاناتي قربت وتو بيجوا مع عرسك ...واااااك
اريج: هههههههههه مش حنديره كبير كلهم نهارين سهرية الحنه ويوم الحفله ...
ندى: والزحمه والناس صدقني زي عراس خوتك من السبت حيجوا هني..
اريج : هههههههههههه...ادبسي من توا
ندى: وهذا اللي بيصير...
....
(نبي نفاجئها ونبيك تساعديني )ايوب..
رساله تانيه
(نبيك اديرلي خدمه بسيطه نبي نفاجأ ندى في عيد ميلادها)كنان..
صفاء"من غلاها عندي تطلبوا مني انتوا الزوز في وقت واحد نساعدكم بش تفاجئوها ...لكن ماعلينا خل نلعب لعبه حلوة ممكن تفديني هلبه 😏"
***
تعرفي والله ساهل ..
سكينه : خلاص تجيني نهار تاني ونديروه مع بعض ..الحق المقروض يبي وسعة بال
جمانه بضحكه وهي تغسل في الماعين: صح لكن توتجيبه لما تزبطي مقاديره زين...
الدنيا هدوء وهي لاهيه تغسل :تعرفي ياسكينه الكعك الحلو هو اللي عندي فيه مشكله مانجيبش فيه كويس ..تعرفي اديريه سكينه..؟
لارد ..
جمانه : سكينه ....فجأة حسيت بإيدين التفوا ع خصرها..وصوت يهمس في وذنها بنبرة حنونه "استاحشتك "
هي غمضت عيونها وهو باسها من خدها بوسه اتين تلاته اربعه
جمانه بهمس: هههه خلاص حول ..
سليمان: وين نحول وين مستوعبه انتي قداش قعدتي ساعه بعيده عني..ورجع يبوس فيها..
جمانه : خلاص سليمان تو كان تجينا حناك وتشوفنا تقول مش عندكم دار
سليمان : هههههههههه مش حتكلمنا المرة هادي حتضرب طول ...بعد عنها ...هادم كلهم بتغسليهم بروحك.؟
جمانه: ايه ماه قسمت اني وسكينه اني نغسل الماعين وهي اضم المطبخ...
سليمان حول الطرف الفوقاني للبسه متاعه وحطه ع الباب وفك بطم كمام السوريه متاعه وبدي يتني فيهم
وجمانه تتامل فيه وخلاص😍..جي وقف جنبها
سليمان : هي انتي تكدي واني نمصمص
جمانه: هههههههههههههه اطلع اطلع حي عليا كان يشوفوك
سليمان ابتسم وهو ذايب ف ضحكتها: وين المشكله وكان يشوفوني ...الرسول قال" خيركم خيركم لأهله وانا خيركم لأهلي" ..اني بنطلع خير من رسول الله ..اللي مافي حد يسوى تراب خطاويه ..
جمانه ابتسمت: اللهم صل وسلم وبارك على نبينا محمد"اللي يقرا يصلي ع الرسول❤"
سليمان جبد منها صونيه كانت تكد فيها وبدي يمصمص وهي تكدو تتأمل فيه..كان جميل بكل معنى الكلمه من داخل ومن برا كل شي فيه حلو كل شي حتى وهو واقف ع حوض غسل الماعين كان جذاب هيبته مانقصتش ولو مثقال ذرة ..كانت في خصله من شعره نازله ع عيونه كان منظهره يهبببل بيها ..جمانه"ااااه يارب سبحانك ابدعت فيه من كل شي ...يارب احفظهولي احفظلي هالنعمه الحلوة اللي وهبتهالي ياااارب وارزقني منه بصغار ينسخوه نسخ في كل شي 😍❤❤"
سليمان: شن الأجواء
جمانه بإبتسامه : حلوة
سليمان شبحلها برفعة حاجب: اكيد ..
جمانه : والله حلوة 😍
سليمان : انتي الحلوة وبعتلها بوسه طايره..😚..وهي ضحكت
جمانه : قولي كيف طلعت سكينه من هي ..
سليمان بضحكه: بعتلها جنى طلعتها وقلتلها تأشرلها تطلع بش ماتحسي بشي
جمانه: ههههههههه..كملوا الماعين وهما مرة يهدرزوا ومرة يضحكوا ومرة يحبوا في بعض ...خشت فتحيه لقاته ينشف في المطبخ وجمانه ترد في الماعين بعد جففتهم..
فتحيه: ربي يخليكم لبعض ياغواليا ..شبحولها وابتسموا
فتحيه: ولدي بعد تكمل برا لبوك يبيك في الإسطبل
سليمان بإبتسامه : حاضر حبيبة قلبي ..ابتسمت امه وطلعت
جمانه : توقعت تعصب لما تشوفك هكي
سليمان ابتسم: هي اللي علمتني نعاون اهل بيتي ..خوتي حتى هما هكي اسألي نساوينهم ...
جمانه ابتسمت : ربي يحفظها ...
سليمان : آامين ويحفظك ياحوريتي 💖
جمانه:😍❤❤
....
ركبت حصان قبل ..
جمانه وهي تتفرج علي سليمان وهو راكب ع فرسه: حقه!! ماخفتيش
جنى: لاالا شديت في عمو بالقوة وقعد يمشي بينا..لكن ماريه خوافه مابتش تركب ...
ماريه اللي كانت واقفه جنب جداها: عينك اني مش خوافه لكن عمي يجري ومرات انطيح زي ماطاح هو زمان..
جمانه : طاح ..
فتحيه: ايه الفرس كانت هايجه اشبح شن صارلها طيحاته وجي لوطا ع ايده انكسرت ..
جمانه تشبحله بخوف: زعمه ماديرهاش توا
فتحيه بضحكه: ماتشوفيش فيها كيف هاديه وحنينه..
جمانه بضحكه : من امتى عنده
فتحيه : من لما كان في 15
جمانه تشبحله: اها ...قدم جيهتها بالفرس ووقف قدامها
سليمان وكان لابس كاجول وقتها سروال زيتي وفانيله كم سودا وطاقيه سودا ونظارات سود وطالع كالعاده خيااال😍
:تركبي
جمانه بحماس: ياريت
سليمان ابتسم : تمام البس خمارك هي ..
نزلت خمارها ومشتله وهو نزل ركبها قعمزت وكأنها مقعمزة ع كرسي بالجنب وهو ركب وراها وشد زمام الخيل ومحاوطها بإديه يمشي بالشويه بالشويه وهي كانت فرحانه ..
جمانه: مش عارفه علاش كنت نخاف نركبه حتى مع بابا زمان مانركبش ..
سليمان ابتسم: معناها اني اول واحد تركبي معاه ..
جمانه ضحكت : ايه
سليمان: شدي فيا كويس
جمانه لفت عليه ايدها وحاوطت ظهره وهو بدي يجري بالفرس..وجمانه تضحك ومستمتعه وهو يضحك ع ضحكها شويه وزاد السرعه وهي حضناته بقوه..اشبح كيف حست روحها بدوخ : سليمان وقف شويه ..
سليمان بضحكه: خفتي ياخوافه ..وقعد يجري
جمانه خلاص شبه دايخه هو حس بيها ارتخت هدا شويه
سليمان بخوف: حبيبتي خيرك
جمانه بصوت يدوب طالع:دايخه ...
سليمان خاف هلبه ولا بيها للحوش رفعها وهي في حضنه ودخلها للدار ومعاه امه وحناه ..
تبره: خيرها شن صارلها...
سليمان بخوف شديد: مش عارف ياحناي حول طقيته من على راسه...وقعد يضرب في خدودها بخفه ..جمانه حبيبتي ..جمانه تسمعي فيا ..جمانه ياعمري
ناسي وجود امه وحناه من خوفه عليها...
فتحيه: علاش تجري بالفرس ياولدي بس
سليمان بأسف: ماتوقعتاش يضرها ياامي ..جمانه جمانه
فتحت عيونها شويه شبحتله بعدين داخت مرة تانيه ..
سليمان قلبه بيوقف: جمانه ياروحي انتي ..قامها وطلع بيها يجري للمستشفى وامه مشت معاه...
***
عماد : خيرك سروري فشنو سارحه ..
سرور شبحتله: توا اني المفيوض نفيح بخوتي انهم ولولي وتصالحنا..علاش مش فيحانه مش عايفه
عماد : تبي الحق حتى اني ماارتحتش
سرور: شن قصدك...
عماد: قصدي علاش توا وبدون مقدمات شن اللي بيغيرهم هكي طول..؟
سرور تنهدت: والله نفس الشي..يستي الله
عماد حط ايده ع ايدها: ماتخافيش حبيبتي محد حيضرك وانتي معاي ...سرور كانت محتاجه تحضنه وحضناته كانت خايفه وحاسه بشي حيصير...
عماد: ماتخافيش حبيبتي فكري في عرسنا بس ...
سرور: باه...
***
الدكتورة طالعه من الحجرة ..
فتحيه جتها وسليمان يشبح من بعيد وكله خوف
الدكتورة ابتسمت: بنتك هي ..
فتحيه : لالا مرت ولدي
الدكتورة : واضح عليها عريسه...المهم اطمني حامل ..
فتحيه قريب طارت من الفرحه سلمت ع الدكتوره من خدها : الله يبشرك بالخير ..ومشت لسليمان : مرتك حامل ياغالي
سليمان تلخبط : حامل !!
فتحيه: ايييه ..وحضناته
سليمان : نبي نشوفها ومشي هو وامه طقوا وخشوا اول ماشبحتهم جمانه ضحكت وهو قعد يشبحلها بنظرة حب وابتسم بإرتياح وجتها عزوزتها سلمت عليها بالخد: مبروك بنتي تحلي عويناتك انت وجنينك ع خير
جمانه : اللهم ااامين ربي يحفظك ياعمتي ..
***
حااااااامل ...
ندى: ايه ياماما توا تصلت بيا وقالتلي
امينه : خل بنمشي نكلمها ...
ريما بفرحه : ربي ينوضها بالسلاامه وتشوف طفلها ع خير
ملاك : والله فرحتلها ...صغارنا بيجوا مع بعض اللهم بارك
ندى: وبيتعبا هالحوش فصاعين صغار يقولولي ياعمتي وياخالتي ..
ع نزلة اريج من فوق: خيركم شن في
ندى: جمانه حامل ..
اريج: يااااقلبي اني ...
وطبعا امينه كلمت بنتها ووصتها ع هلبه حاجات..وفرج فرح هلبه بالخبر وصدق عليه ..وعمران تقول اول حفيد بيجيه ذبح وصدق عليه ..اما سليمان فهو من قبل كان يلقى مايخليهاش تمشي ع الوطى يابال توا ...جمانه كانت فرحانه احلى شعور حساته في عمرها وهي تحس إن في روح في داخلها قطعه منها ضناها ..شعور الأمومه مافيش احلى منه "ربي يرزق كل محروم"...
***
يوم الاحد...
كنان كان مخطط يدير عيد ميلاد لندى كلم صفاء ع اساس تستدرجها للمكان اللي مرة قعمز فيه معاها لما حكتله ع قاسم..المهم هو يجهز المكان طورطا وهديه وباقه ورد وكان يبي يصارحها بحبه ويقنعها تعطيه فرصه لإنه مهما جاه منها قاعد يحبها ويبيها من قلبه ..في نفس الوقت طلب منها ايوب ادير نفس الشي وكان في مكان تاني من الكليه فطبعا هي ساعدت ايوب ووهمت كنان انها ساعدته ..
الساعه 11:00
بعد ماوتا كنان المكان وكان يدير في بروفا مع نفسه كيف بيكلم ندى وشنو بيقوللها وكيف يتصرف معاها...جاته صفاء وشبحت للمكان كيف كان حلو وزادت كرهت ندى..
كنان : خيرك جايه بروحك
صفاء بتصنع خيبة الأمل: شن بنقولك ..مشت مع ايوب
كنان رمش عيونه بعصبيه متسائل: كيف شن دارت ..
صفاء : حاولت فيها قلتلها تعالي نبيك شويه بنكلمك في موضوع مهم جاها ايوب قاللها نبيك شويه ومشت معاه
كنان بغضب ممزوج بالصدمه: وييين مشت معاه
صفاء بخبث مخفي ورا اسف مصطنع: يااربي...لقيته مفاجئها ومدايرلها عيد ميلاد وهي فرحانه بطير ومعاها القروب وزملاء ايوب ..تبي تشوف بعينك تعالى معاي
كنان مصدوم وقلبه والعه فيه نار مشي معاها ..ولقاها تضحك وفرحانه وجوها حلو وكانت جنبه شويه وهو خداها من ايدها ومشو بروحهم
صفاء: مع الأسف اللي في بالي شكله صح
كنان بدون ولاحرف انسحب وفيه ايده الباقه والهديه لوح الباقه في الكناسه والهديه خداها معاه ركب سيارته وطلع بسرعه وهو منصاب بأكبر خيبة أمل......
....
بعد المغرب كنان مابردش بكل فقرر يدير حركه متهوره طلع من الحوش متوجه لحوش اخته ريما..رحبت بيه وهدرزوا شويه لين روح نجيب
نجيب: أوووو كنان شن جو يادكتور
كنان سلم عليه : تمام التمام انت كيف حالك
نجيب : الحمد لله ..
كنان: نجيب نبيك في كلمتين
ريما استغربت ونجيب نفس شي وقعمز نجيب
نجيب : خير إن شاء الله
كنان وناره مابردت وبين عيونه اللي شافه اليوم: يعلم الله بمعزتك عندي وخواتك زي خواتي ومانرضى فيهم
ريما خافت.. ونجيب اكثر: خش في الموضوع ..
كنان : ندى قاعده صغيره والجامعه تعرف جوها هي نشهد ع حسن اخلاقها بس مشكلتها طيبه وماشيه بنيتها وتتعامل مع اللي يجي ..
نجيب بعصبيه: كيف شن قصدك
كنان: في واحد يحوم حواليها واختك صغيره وينضحك عليها بالساهل حاولت ندخل لكن في النهايه ماعنديش اي صفه لكن انت خوها
ريما : كنان انت شن تخرف ندى بنت عاقله وتعرف تحافظ ع نفسها
كنان وهو معمي من الغيره ع الآخر: لكن صغيره وطيبه وساهل يضحك عليها واحد مايخافش ربي ..
نجيب ناض وطلع بسرعه ...
ريما: نجييييب ياااااانجيييب ..شبحت لخوها..شن درت انت شن درت تو كان يديرلها حاجه نجيب لما يعصب مايشوف في شي ..
كنان استاقض لنفسه وحس بحجم الغلط اللي داره طلع من حوش ريما وركب سيارته ومشي."شن درت ياغبي ياحمار شنو درت يااااعيييييل ...والله مانجي رااااجل ع اللي درته مانجي راااجل هذا وين خسرتها حق"...
....
ندى: والله العظيم مافي حاجه الله
اصيل: الولد اني نعرفه وكويس هلبه يانجيب وتعامله معاها في حدود القرايه بس
نجيب تنهد: استغفر الله العظيم وخلاص ..المهم ردي بالك ياندى اني نعرفك عاقله هذا علاش جيت وسألتك ..
ندى بدموع حاقده : من قالك عليا دوة غلط زي هادي
نجيب: مش مهم خلاص توا اركبي اقري وانسي الموضوع
ندى هزت راسها بإيجاب وفمها مقوس وبتبكي وركبت لدارها وزبطتت كويس من وراء هالدوة "خسارة ياكنان خسارة💔"
***
مقعمز ع الكنبه في الصاله وشاد كتاب ويقرا فيه وهي راقدة ع كتفه وتسمع فيه شن يقرا..الكتاب كان يحكي ع سيدنا عمر اللي لو طلع جنينها ولد حتسميه عليه وحتربيه بطريقه تخليه لما يكبر يولي زيه ..كان الكتاب يتكلم ع شخصية سيدنا عمر بطريقه حلوة وجديده وعميقه هلبه ...
جمانه: روووعه كيف تكلم ع النقطه هادي كيف فسرها عبقري ...
سليمان سكر الكتاب:هي معاش في بكل ..
جمانه قامت راسها: تو بالله عليك مش هذا رايك فيه حتى انت
سليمان : رأييي مش رايك تي حتى عيونك يضحكوا لما تتكلمي عليه
جمانه ماتت بالضحك
سليمان : انسيه الكتاب بنرفعه للشقه
جمانه: معقوله من جدك تغار منه هكي ..
سليمان بجديه : وانتي شن رايك ..
جمانه: مش معقوله حبيبي ..اني حتى كلامي ع اسلوبه وفكره مش عليه هو معقوله تغار من شي زي هذا ..
سليمان: لااسلوبه ولاغيره ..اني نبيك ليا بروحي نبي اعجابك يكون بيا اني بس بأسلوبي بتفكيري اني بس نبيك تمدحيني اني بس ..جمانه مانبيش حد في الدنيا يبهرك غيري
جمانه بإبتسامه قربت وتلعب بخشمها ع رقبته: وهو في غيرك في قلبي ومالي عيني وعاجبني ..ونموت فيه موت فيك غيرك مستحيل ..
هو يضحك ع حركتها وحضنها وباس راسها : ايوه هذا اللي نبيه ...
جمانه: باه كمل قرايه ..
سليمان ساكت قامت راسها : هيا كمل ...
سليمان قام حاجبه الإيسار: نقرا تسمعي وتسكتي تطلع منك كلمه معاش تفكري تشوفي شكل الكتاب حتى من برا ..
جمانه: ههههههههه باه ..حطت راسها ع صدره وهو كمل قرايه...
***
تاني يوم في كلية الطب..
كانت ادور عليه وهي في قمة الغضب عمرها مازعلت من حد زي مازعلت منه جت عينها عليه وهو واقف مع صاحبه مشت بسرعه وقفت عليهم وتشبح لوطا ورجلها تهز من الغضب
ندى: ممكن لوسمحت تخلينا بروحنا شويه ..حكيم انسحب من بحداهم جت قدامه وقامت راسها وتشبحله بنظرة حاقده بعيون مليانه دموع : يعلم الله قداش كنت نعزك ونحترمك حتى لما عرفت بحقيقة مشاعرك اتجاهي قررت نسحب نفسي منك بش مانجرحكش لكن طلعت ماتستاهلش وطلعت مع الأسف عيل ياكنان..اللي درته امس عمري ماحننساه طحت من عيني مرة وحده ..ياخسارة ..ابعد عن طريقي نهائي حتى لولقيت النار والعه فيا ماتجيش جيهتي ..حاول بأي طريقه ماتخلنيش تشوف وجهك..ومشت وخلاته ..خلاته في حاله يرثي لها خلاته بعد صنعت في قلبه جرح كبييير ..عارف روحه انه غلط هلبه بس كلامها كان اقسى بهلبه من فعله ..كنان هذيكا اللحظه تمنى لو مات وماسمع منها اللي قالاته....💔
***
فات يوم ورا يوم
اريج كانت تستعد لعرسها وتجري هني وهني بش تلحق
ومعز كذلك كان ينظم في وضعه لإنهم حيسافروا مباشرة بعد العرس..ندى حالها تغير هلبه حاسه بشي في قلبها واجعها طول الفترة اللي فاتت معاش تشوف في كنان هو دار اللي هي طلباته منه بس كانت حاسه انها فاقداته برغم زعلها الكبير منه..جمانه عايشه في دلال مابعده دلال ووحمها كان فريد من نوعه توحمت ع سليمان بالحب ..زاد حبها الدبل ديما لاصقه فيه وبعد يطلع تقعد تبكي تقول ماشي يهاجر ولما يعطل تاخد حوايجه تشم فيهم وتحضن فيهم واكثر من مرة يروح يلقاها راقده ومحاوطينها حوايجه وحاضنه نصهم ويقعد يضحك عليها.😂❤
عماد وسرور تزوجوا وسافروا لتركيا بطلب من سرور شهر عسل...وعايشين احلى حب 💖
نهار الجمعه
15\11\2013 غرغور💔
الناس كانت محتقنه هلبه من الوضع وتحديدا من وجود الكتايب المسلحه في العاصمه ..قرروا يطلعوا مظاهرة هذاكا اليوم مطالبين الكتاايب اللي جايه من خارج العاصمه بالرحيل عنها ...
هذاكا اليوم كنان خدي عنوان ايوب من السايح ..كان يبي يصلح غلطه مع ندى... في باله إن ندى وايوب يحبوا بعض..فكان ناوي يعتذر من ايوب ويوصيه ع ندى بعد ماوصل لنتيجة تقوله اللي يحب حق يتمنى اللي يحبه الخير لو ربي مااردالهمش يكونوا مع بعض ..وصل في الجامع اللي يصلي فيه ايوب الجمعه صلى غادي ..وبعد كملوا الصلاة يشبح في ايوب مع جماعه ويتناقشوا تردد هلبه يمشيله ويكلمه لين لقاه ركب السيارة هو واللي معاه ركب سيارته ولحقهم...
"المقطع اللي حتقروه حاليا من من وحي الخيال وماصارش في واقعة غرغور بكل"
لحقهم كنان ولقي مجموعه واقفين وكأنهم كانوا يستعدوا لشي معين بيحاول يكلم ايوب من جديد ماقدرش كانوا حواليه هلبه شباب ..شويه وبدت الناس تتحرك وبدوا يهتفوا كنان لقي روحه ماشي معاهم خداه الحماس والهتاف خلاه يحس بشي من الوطنيه..قعد يهتف معاهم..شويه لين قرب من ايوب ..
كنان بصوت عالي: ايوووب
ايوب يدور ع مصدر الصوت
كنان ويأشر : هني هني ايوب
انصدم لماشافه قرب له بعد ماتخطى الناس:شن ادير هني ...
كنان: نبيك في كلمتين
ايوب: والله ماهو وقته
كنان : اسمعني شويه بس اني بنسيب البلاد
ايوب: احسن شي اديره ..
اصوات الهتاف تعلت ..
كنان وايوب هتفوا معاهم....
كنان: ايوب ندى في امانتك ..
ايوب ماسمعاش من صوت الهتاف والدوشه:خيرها ندى
كنان بصوت عالي : في أمااااانتك ..
شبحله ايوب بنظره ليها معنى وابتسم ابتسامه مافهمهاش كنان ..
شويه وبدي ضرب الرصاص الحي ..والناس بدت تجري ..ايوب وكنان يجروا ..طاح ايوب ..كنان ولاله سنده بسرعه ..وطلعوا يجروا ...
كنان: ماتنساش ياايوب ارجوك رد بالك عليها
ايوب وهو داهش: مجنون بيها انت حتى والموت محاوطتتنا تفكر فيها هي ..
كنان كيف جاي بيرد...تجي رصاصه غادرة تصيب هدفها المحدد.....💔
***
لاحول ولاقوة إلا بالله ..
رضوان : هادم ماشيين ينتحروا ..
سليمان : في حد جرهم بش يديروا هكي يبي يصنع حدث ويستخدمه سياسيا ..
عمران: والشعب راقد الريح ديما حطب لهالنار
سليمان : مع الأسف ...
ضو: ياغيبة بوعباة وخلاص ..
سليمان : سيوره بينتهي هكي ولا هكي الدايم وجه ربك ..
ضو سكت ...
عمران : ربك يستر من اخرتها..
***
الكناين في حوش شيبانهم مع حمواتهم يهدرزوا ع عرس اريج والتحضيرات ع قدم وساق..
ريما : هكي احلى صدقيني ..
اريج: مش عارفه ..
ملاك : حتى اني نقول زي ريما لقطه حلوة وتمشي معاك..
ندى ساكته ومش معاهم ..
رن تليفون ريما: هادي رنا ..ردت
ريما : ايوه رنوش
رنا بعياط : كنااااان ماااات ياريماااا ماااات
ريما بعياط : شن تقوووووولي ..
رنا : ماااااات ياريماااا...وسكرت
ريما ترعش ودموعها مطر جوها اريج وملاك
اريج: خيييرك شن في
ريما برعشه: كنننان خوي كنااان ماااات
ندى من صدمتها قعدت في مكانها تشبح لريما وبس خطم بين عيونها شريط ذكرياتها مع كنان اللي كان برغم قصر المده إلا انه معبي ذكريات حلوة ومرة جي بين عيونها يوم لما لقاته يعزف لناس ع البحر وكانت تتفرج عليه وعجبها هلبه صوته وعزفه ولما شافها غنالها اول اغنيه سمعتها منه
"قمرين ... قمرين دول ولا عينيك... قلبي بيسألني عليك.. اتاريني بفكر فيك "...💔
***
مانبيش هالسر يطلع حتى لرمزي ماقلتش
جمانه : وعلاش قوليله خليه يفرح
سكينه : ايه بنقوله بس بطريقه خاصه..
جمانه بإبتسامه : ربي يفرحك ويكمل عليك وتشوفي طفلك ع خير..
سكينه : اجمعين يااارب..بعد شوق وعلاجات بش صار منه يااارب يثبت ..
جمانه : اللهم آااامين يااارب..واطمني مش حتطلع مني لحد..
***
تفضلوا هني في مجموعه جثث حاولوا تتعرفوا عليه ..
خشت رنا هي وخالها يدوروا رنا قلبها قوي وتتحمل المناظر هادي عادي برغم عيونها الحمر وجهها الأزرق من العياط
خالها: ماهناش زعمه يكون في مكان تاني ..
رنا بصوت مبحوح: تعال نسألوا ...طلعوا ومشوا في الممر لقو ممرضه بيسألوها ..
رنا : عفوا في جثث في مكان تاني غير هديكا الدار
الممرضة : تقريبا في الجيهه التانيه من غادي واشرتلهم بصبعها ...
"شن اديروا هني"
التفتت رنا لمصدر الصوت واغمى عليها طول
***
قصدك انت البنت اللي يبيها كنان ..!!
ندى تبكي: بنموت ياأريج مش مصدقه علاش هكي يصير معاي اللي نحبه يسيبني ويموت علاش..!!
اريج : انتي تحبيه ندو؟؟
ندى تبكي وتشهق: مش عارفه...امتى وكيف ..لما بعد عني اكتشفت اني نحبه ...مشاعر كنت نتجاهل فيها ..بس بعد هلبه حاجات..صارت تأكدت بس بعد شنو..مااات حتى هو ..وانهارت بالبكي وحضنتها اختها تهدي فيها..
***
حيوانااات مرض يسبلهم
كنان بضحكه: تي باهي حولي خنقتيني..
رنا : اسكت وسكر فمك
كنان يضحك..
خاله: غير شن رفعك غادي بس
كنان: قصة طويله ياخال ..حولي رنا خل بنمشي نشوف الوليد ونجي ..بعدت رنا ..وهو ناض وتوجه لغرفه معينه وخش ..
كنان: هاه شن حالك ..
ايوب بضحكه: ع اساس بتنقدني من الرصاصه فشختلي دماغي ع الحيط ..
كنان بضحكه: نستاهل
ايوب: هههههههههه هدى الضحك..اللي درته حيقعد دين في رقبتي
كنان: لادين ولاغيره .نبيك ترد بالك ع ندى بس، مادام هي تبيك واختارتك ..ماعندي ماندير ..
ايوب : هههههههه ...لاتبيني ولا وحده ياراجل
كنان بإستغراب: كيف...؟
ايوب :.....
فلاش باك...
ايوب: ندى اللي بنقولهولك توا ليا سنه مأجله وتوا جي وقته من نهار شفتك في البازار الخيري وانتي في عقلي وخشيتي قلبي ..وكل يوم تزيد مكانتك وتكبر مشاعري جيهتك هلبه ..ندى اني رايدك بالحلال وصدقيني مش حتندمي بكل لو واقفتي ..
ندى ابتسمت وتنهدت: اولا شكرا ع المفاجأة الحلوة والهديه الحلوة ..تانيا انت انسان كويس ياأيوب وماريت منك إلا كل خير وأحترام بس الصراحه اني مانقدرش نقبل عرضك سامحني ..
ايوب: تبيه ولا؟
ندى شبحتله بإستغراب: من هو؟
ايوب: كنان ..ندى ماتنكريش
ندى دموعها نزلوا وقعدت ساكته ..
ايوب ابتسم بألم: عندك علم ان واضح عليك حتى من نظراتك ليه غير اني ماكنتش نبي نصدق ..ماعندي مانقول ربي يسعدك وخلاص ..برغم اني والله حبيتك من قلبي ..
ندى مسحت دموعها : اسفه ايوب
ايوب تنهد: ولايهمك.
الوقت الحاضر
ايوب : هذا اللي صار بالزبط
كنان كان مصدوم ع فرحان ع مضايق مجموعة مشاعر وأحاسيس مش مفهومه...انسحب وطلع ع طول..
***
فاتت مدة طبعا عيله ريما دبحوا صدقه ع سلامة كنان وانه ماصارله شي وان الخبر كان مجرد اشاعه ندى اللي فرحتها كانت سايعه الدنيا ماتمت ..لما عرفت أن كنان ولا لأوكرانيا من جديد بدون مقدمات..💔
اريج خش اسبوع عرسها ..مانبيش نقول انها كانت فرحانه بس ماكانتش تعيسه ..كانت مرتاحه وراضيه بالنصيب...
***
25\11\2013 💔
طقطق
تفضل ...
نهى: قاعد تكتب
ضرار: خلاص كملت ..
نهى: شن رايك نطلعوا لحديقة المستشفى الجو حلو
ضرار: لاالا صقع اليوم هلبه ..
نهى : باه شن في بالك.
ضرار ابتسم: في بالي تقعمزي وتسمعيني ..
قعمزت نهى ع السرير مقابلاته والدموع محبوسات في عيونها : قول نسمع فيك..
ضرار: نبي نوصيك ع حاجتين ..اولهم ..اشر على ايده..الحديده هادي عطيها لمروة قوليلها قالك ضرار حافظي عليها هادي اغلى حاجه ع قلب خوك..كان جاها ولد تراجيه يكبر تلبسهوله و إن شاء الله يكون حظه خير من حظ خاله ياارب...تاني شي انتي يانهى وافقي ع مراد راجل كويس ويبيك بقلب صافي عطيه فرصته انتي تستاهلي كل خير..فكري في كلامي
نهى وهي تمسح في دموعها: خلاص ارجوك اسكت
ضرار شد ايدها بايديه العاجزات الضعاف:ارجوك يانهى وصيتي نبيك اديرها ...
نهى بخنقة عبره: حاضر..اللي تبيه يصير
ضرار : ريحتيني الله يريحك..نهى...اطلعي شويه نبي نرقد وخودي اللاب توب معاك...
ناضت نهى وخدت اللاب توب وطلعت ..وضرار كان حاس بألم فضيع تمدد وسكر عيونه.
....
الساعه 8:30 مساءا..
طلي بالأبيض طلي يازهرة نيسان
طلي ياحلوة وهلي بالهوش الريان ..
خشت اريج العروسه الجميله وذراعها متعنقه ذراع خوها اصيل كانت مرتاحه فرحانه في هديكا الليله.. صورت مع اصيل وطلع...وبدت الحفله واجوائها الحلوة ..وكانت اريج عايشه جوها ..ناضت ورقصت اكثر من مرة وهيجت مع صاحبتها واختها وريما وملاك وامل ..وشمسه مالاشنو😂
المهم..كانت حفله حلوة ..معز ماباش يخش وكان هذا طلب من اريج اللي بدت تغارعليه هلبه..طلعت بعد وداع ودموع ..وركبها معز السيارة وركب جنبها وانطلقوا بطريقهم للحوش طول ومافيش اي فواصل لأن الصاله كانت مشتركه...
....
فتح عيونه فجأة دار بعيونه في الدار كانت فاضيه كان في ضي بسيط خاش من الروشن...كانت في نسمه بارده هلبه تهب ع وجهه كان حاسس بروحه صقعان هلبه هلبه ..شبح للسقف حس وكأنه فاقد للجاذبيه مش حاس بجسمه ..عيونه معلقات في السقف وخلاص...جت بين عيونه ملامحها كامله ..ابتسم تلقائيا اذكر نهار لما قعمز هو وياها ع البحر وكانوا يغنوا في هز الشوق ..يسمع في صوتها وهي تغني وكأنها جنبه بالزبط...
....
معز : هيا ياعروستي انزلي ...نزلت اريج وساعدها معز وسكر باب السيارة تعنقت بذراعها ذراعه واتجهوا لباب حوشهم
...
يسمع في صوتها تغني..وبدي يغني معاها بصوته التعبان اللي يادوب يطلع..
هز الشوق ....حنايا..الخاطر ..حنايا الخاطر...حظر طيفك ..ياعيني حظر ....طيفك ياعيني ..ياعيني خاطر...
...
خشي برجلك اليمين ياعروسه..
اريج سمت بالله وخطت أول خطوة في حياتها الجديده
...
خطرت انت... مسحت دموعي ..خطرت انت... نورت شموعي
يلي حتى ...وانت مباعد ..وين تخطر... تهدا الخواطر ..حبيبي تهدا الخواط...رر...
الرؤيه ضبابيه ..ولت سودا.. الجسم فشل بالكامل العيون تسكروا...
جهاز القلب ...الخط مستقيم .....
انتهت حياة ضرار...في الوقت اللي بدت فيه حياة اريج الجديده ......
"نحبك ونموت فيك ومن غيرك 💔"
يتبع .....
#GomanFared
