الحلقة(100)
في غرفة المكتب متاعه فاتح اللاب توب ويقرا في شي خلا ملامحه يبان عليهم غضب ممزوج بأسف
طقطق
سليمان وهو يشبح للاب: خشي ياعمري..
خشت جمانه وجايبه معاها القهوة وكيكه وحطتهم بحداه ركزت ع ملامحه ..
جمانه: شن في سليمان .؟
حرك اللاب توب جيهتها وهي قعدت تقرا وشهقت بصدمه...
سليمان تفاجأ من دموعها اللي نزلوا: علاش تبكي ؟!
جمانه: وجعني الحق
سليمان : وعلاش يوجعك .؟نسيتي شن دارلنا والموقف اللي حطك فيه ؟!!!
جمانه: ماه انت ماتعرفش ضرار شنو كان بالنسبه ليا ...
سليمان وفاتح عيونه فيها: كيف بالنسبه ليك؟؟؟
جمانه: ضرار كان خطيب اختي ..
سليمان انصدم وقعد ساكت ..توا بس فهم كلمته لماقاله دمرتني مرتين : يعني هو ماكانش يعرف انك اخت خطيبته
جمانه: كان يعرف مكانش دار اللي داره ..تصدق اني ماكنتش نزبط شكله ..بعدين عرفت ان هو نفسه خطيب اختي..
سليمان:اختك..اللي تزوجت البارح ..
جمانه: ايه ولهالسبب دموعي نزلوا ..تخيل يوم زواجها هو يوم موته سبحان الله..
سليمان تنهد ومرر ايده ع شعره بصوابعه للخلف
جمانه: قهوتك بردت...
سليمان شبح للفنجان وشبحلها: خيرك ماجبتيش لروحك
جمانه وبان على وجهها الأشمئزاز: كرهتها هلبه ..
سليمان ابتسم: احسن حبيني اني بس ..
جمانه بدلع: ونموت فيك ..
سليمان : تعالي ..ناضت وجاته وقعمزها ع رجله ..وخدي بوسه من خدها...احكيلي شن صار فيك بعد هذاكا اليوم اللي تفارقنا فيه ..
جمانه ناضت : شويه وجايه ...ضحك وقعد يستنى فيها..خشت عليه وفي ايدها مذكره لونها ياجوري داكن ..
جمانه : من هداكا اليوم للحظه مانقرت فاتحتي كل شي هني كاتباته ..سليمان خدي المذكرة ...
جمانه : ماتقرهاش توا اقراها لما نكون مش بحداك ...
سليمان: امممم معناها اليوم نرفعك لحوش اهلك ونروح نقراها...
جمانه بضحكه : كويس
سليمان فتح ايديه: تعالي وين هربتي ...ابتسمت ومشتله.💖
***
روحت سرور من شهر العسل وكانت ناويه ادير عزومه للناس اللي ماجوش للعرس من معارفها..وطبعا جمانه ماحضرتش العرس لأنها ماتعرفهمش ..بس سليمان كان يبيها تتعرف ع مرت عماد لهذا عماد عزمهم وهما قبلوا العزومه طبعا...
جمانه واقفه ع مرايه لابسه قفطان سماوي مخصر وفوقه طرف طويل شفاف كان يلمع ..شاده جزء من شعرها من فوق والباقي مفرود ومادارتش قصه شدتها اللتالي بطريقه حلوه وكانوا باينات ملامح وجهها اكثر..كملت لبسها ومكياجها ولبست ذهبها ..دير في طلة أخيره حبت تزيد المسكرة..
فتح الباب وهو يشوفلها من المرايه: اه يازينه شن درتي فينا ..
جمانه: ههههههههههههههه
جاها : كملتي التفتله: اممم خلاص شن رايك ؟
سليمان : شنو بيكون رايي تي قريب ندوبك في طاسه اميه ونشربك يامراة انتي ..😍
جمانه: ههههههههه باه هيا وقت ...لبست ملايتها وطلعت هي وياه ..
في الطريق
سليمان : حاولي انك تكسبيها ...عماد نبيه ديما قريب مني ..
جمانه بأبتسامه : حاضر..بس خاطري نعرف قصته ..
سليمان ابتسم: عماد هدا.........
***
بجديات اليوم تعبت
معز: هههههههه مش منك مافيش لعبه مالعبتيش فيها ..
اريج شداته من ايده : خلينا نمددوا عزو ..
معز: ياروح عزو نمددوا ع خاطر هالعيون الحلوة..
اريج : هههههههه باه خل بنخش ندوش
معز : تمام واني ماشي مشوار وجاي
اريج من داخل : تماااام..
طلع معز ..وأريج خشت دوشت وطلعت لبست حوايجها وخلت شعرها مفتوح ومامشطتاش ..شافت اللاب متاعها مفتوح مشت لقاته عالق بالنت ..فكرت تكلم اهلها ليها عليهم اسبوع شافت اشعار رساله في الفيس ..خشت وشافتها
(حد الزين ...نور العين ...
نكتبلك ومش عارف شن لازم نكتب ..بس حنكتب اللي نحس بيه..انت الحاجه الوحيده الحلوة في حياتي المرة ..انتي كنتي نور في وسط حياتي المظلمه..عشقتك بكل أوتيت من قوة ..من اول ماطاحت عيني عليك طحتي في قلبي ..حبيتك ويشهد ربي بقلب صافي ونية طيبه وكنت ناوي نسكر عليك باب حوش بالحلال..لكن مش مكتوبلي ولامكتوبلك تكوني ليا ولانكون ليك..لازم تعرفي ان مافيش في حياتي غيرك ويشهد ربي من بعدك حرمت ع قلبي وع نفسي جنس حوا كله ...كذبت عليك ع خاطرك نبيك تنسي وتعيشي حياتك لإن وجهك الحلو مايليق بيه الفرح وبس ..معز راجل كويس وهذا عزائي الوحيد ان ربي عوضك باللي خير مني..لما تقري هالرساله اكيد اني وقتها وليت من اهل الآخرة ..وبايت في قبري والله أعلم نتعذب ولاربي يرحمني..نبيك تخليني ذكرى حلوة نبيك ماتنسيش ضرار اللي حبك حب مش حتحبه امك ليك ..ارجوك ديما ادعيلي بالرحمه وأن ربي يغفرلي ...بالك يكتبك ليا في الآخره ويعوضني بيك في الجنه... ربي يسعدك ويهنيك ياأغلى ماعندي ..واخر شي اسمعي الأغنيه اللي في الرابط...هي بالسلامه .....)
دموعها سيل ومصدومه ..فتحت ع الأخبار في الفيس وقعدت ادور ..لقت خبر وفاته وكان مصاب بورم خبيث في المخ ..شهقت بقوه ..مات يوم زواجها ...قعدت تبكي وتبكي
.مشت للرابط وفتحاته...
🎶خليك فاكرني يلي بجمالك وبعيونك دول آسرني
خليك فاكرني وان حس قلبك يوم بقلبي ابقى زورني
دنت في عينيا كل اللي ليا فرحة شبابي والدنيا دنيا
🎵🎵🎵
اول ماشفتك لمست قلبي بنظرة وحده نسيت جراحو
لقيتك انت اجمل حكايه نستني اللي راحو
ماتغبش عني وخلي قلبك لو ناديتو يجيني تاني
دحنا اللي بينا الحب كلو وعمر مر معاك تواني
دنت في عينيا كل اللي ليا فرحة شبابي والدنيا ديا
خليك فاكرني يلي بجمالك وبعيونك دول آسرني
خليك فاكرني وان حس قلبك يوم بقلبي ابقى زرني
دنت في عينيا كل اللي ليا فرحة شبابي والدنيا ديا
خليك فاكرني....
طول ما كانت تسمع في الأغنيه كانت تبكي بالعبرة اذكرت اول مرة شافته فيها ادكرت كل مواقفها معاه ادكرت كل لحظه صغيره وكبيرة وتبكي ...وتبكي ..
ع خشة معز اللي جايب في ايده هديه الباين لما شافها بهالحاله جاها يجري نزل ع ركبيه ويشبحلها: خيرك حبيبتي شن في
اريج بخنقه عبرة: ماااات ..ض..رار مااات وقعدت تبكي وهو قعمز جنبها وخداها في حضنه وهي خشت في حضنه اكثر وفرغت طاقتها كلها في البكي لين داخت ورقدت....
***
رحبت سرور بجمانه وتعرفوا ع بعض ..اجواء العزومه كانت حلوة ..وحموات سرور يعولوا فيها من قلبهم..وهذا زاد حقد السلفات عليها..وبالذات عمها إلي هدالها تاكم ذهب يحل العين المغمضه،مش غير هما بس...حتى نساوين خوتها اللي اوهموا سرور انهم يبوا يصفوا العلاقه معاها ويفتحوا صفحه جديده الحسد كان مسيطر على قلوبهم...
جمانه: معليشي نبي الحمام"حشاكم"
سرور: حناااان تعالي شويه ..جتها حنان...بالله حبيبتي دليها ع مكان الحمام ...
حنان ابتسمت: تعالي معاي فوق ..ركبت جمانه مع حنان وورتها مكان الحمام..
جمانه بإبتسامه: جزاك الله خيرا وسامحيني تعبتك
حنان: لا حبيبه ولايهمك ..ونزلت ..وجمانه خشت للحمام ..والدور التاني شبه فاضي ..طلعت جمانه ..وهي ماشيه خشت في وذنها كلمه وقفتها..
:تي هذا يوقف حياتها كلها
:كيف
:حتطلق..وحتخش في حاله نفسيه وأخرتها الموت يعني حتى الشيوخ مايقدروا يفكوه
:احسن جعلها ماولت..
:هي تعالي اوقفيلي خل نحط واحد في محبس الغرس وواحد..في حوايج راجلها ...المهم فهمي هديكا تخليها تركز ع الصونيه اللي بتاكل منها تأمرها زين بش تعطيهالها..
:ماتخافيش فهمتها كويس ..
جمانه كانت مصدومه وخايفه..مش مصدقه إن الناس خلاص قامت ايدها من ربي ..لتوا مش قادره تنسى اللي سمعاته من امباركه وسكينه ..تزيد تسمع توا هالشر هذا كله ..ادرقت عليهم وراجتهم لين نزلوا وتأكدت انهم معاش بيولوا مشت ع تركينه خدت تليفونها واتصلت ...
سليمان : تعرف وائل انت مش بالساهل قلبه يلين
عماد: وربيع احرفين..
رن تليفون سليمان ناض من بحداهم ورد.
جمانه : السلام عليكم
سليمان : وعليكم السلام هاه حوريتي
جمانه : سليمان اسمعني بنقولك ع شي
سليمان : نسمع فيك قولي
جمانه حكتله كل الشي صار ...
سليمان شبح لعماد وزاد بعد: غاليتي عندك استعداد اديري اللي بنقولك عليه ..
جمانه: اكيد انت غير قولي كيف واني نتصرف
سليمان: خشى للمكان اللي محطوط فيه السحر وخودي اي خرقه اي شي المهم دوري بيها وردي بالك تمسيه بيدك لما تلقيه اقري المعوذات وآيه الكرسي طول الوقت ..لما تلقيهم لفيهم في حاجه وتعاليلي ورا الحوش ..
جمانه: تمام
سليمان: عمري راك تنسي ماتمسي شي بإيديك ردي بالك
جمانه: حاضر حبيبي السلام عليكم
سليمان : وعليكم السلام ...وصكر وهو متوتر هلبه ..
جمانه خشت للدار ولحسن الحظ لقت قدامها قطعة قماش محطوطه ع كرسي ..اضطرت تمزق منها ..اول شي فتحت دولاب عماد وقعدت ادور بحذر شديد لين لقت حجاب صغير منظره مقرف طلعاته بالقماشه ولفاته بيها وحطاته ع تركينه ..بعدين شافت محابس الغرس ركزت ع واحد منظره مفركس ..لقت زي اللوحه بحداه شدتها وقعدت ادور بيها لين لقاته وولت للقماشه مزقت منها وخداته بيها ولفاته...حطتهم وهما ملفوفات زين في شنطتها وطلعت بحذر شديد ..
وهي نازله جت سرور راكبه بتبدل ومعاها مرت خوها لما رتها جمانه انصدمت ..لقتها نفسها اللي كانت تتكلم مع وحده تانيه بكري ع السحر...
جمانه بتلقائيه: بنجي معاكم عادي
مرت خوها شبحتلها شبحه غريبه وسرور ابتسمت : تعالي ..
مشت معاها وخشوا الدار ..جمانه عينها ع مرت خو سرور في كل لحظه لين كملوا وبينزلوا..
جمانه: سرور ممكن رقمك
سرور:ايه اكيد ..وقعدت تسميلها فيه ...ونزلوا ومرت خو سرور بتتفجر ...
جمانه مشت سألت حماة سرور: امتى تحطوا العشي
سماح حماة سرور: عشرة دقايق تانيات
جمانه ابتسمت ؛ مالا خل نقول لراجلي يعطل شويه ..
جمانه تصرفاتها كانت غريبه بالنسبه للحواليها بس ماكانش يهمها شي غير انها تنقد سرور من شر شياطين الإنس ..
لبست ملايتها وكلمت وحده من الحموات ادلها ع باب الحوش الخلفي طلعت وكلمت سليمان..وجاها
سليمان: هاه شن صار
فتحت شنطتها وطلعتهم ..سليمان كان جايب معاه زوز كياس وحطهم فيهم ..وربطهم كويس ..
سليمان: مامسيتي شي
جمانه: لالا اطمن ..لكن شن بندير في اللي بيحطوه في الماكله
سليمان شبحلها وابتسم: شغلي دماغك وحتلقي طريقه
جمانه ضحكت: تعرف لتوا قلبي يضرب بقوة من الخوف..
سليمان : سلامة قلبك ياقلبي انتي 💖 خشي توا وماتخلي حد يحس بشي
جمانه : باه انت شن بدير توا..
سليمان: بعدين تو نقولك..خشي بسرعه
جمانه: حاضر...وخشت طول ...اما سليمان فستأذن من عماد وقاله بيمشي مشوار وجاي بسرعه وركب سيارته وانطلق لوجهه محدده...
فات الوقت وجابوا العشي ..وكان صواني ..يعنى رز بالخلطه وحاجات حاره ..المهم كانت جمانه مركزه مع اللي يفرقوا ناضت وقفت حدا سرور ع اساس تساويلها قصتها...قربت وحده جايبه معاها صونيه ومشروب
:هاه سروره عارفاتك جعانه وتيتهالك بأيديا
سرور بإبتسامه : صحيتي سندس
جمانه كان لازم تتصرف تحركت بطريقه تبان فيها انها عترت في قفطانها وضربت الصونيه وطيحتها انسكرت والماكله كلها تمزرطت..
جمانه بتصنع الأسف: معليشي سامحوني عترت في قفطاني اسفه
سرور : ولايهمك حبيبتي ..فداك
سندس بإبتسامه مصطنعه : تو نجيب غيره عادي ..
وجت نفس مرت خوها اللي شافتها راكبه معاها قعدت تلم في الماكله وتسمح ..ومشت
جمانه قربت من سرور وشدت ع ايدها: ردي بالك تاكلي او تشربي اي شي
سرور تشبحلها بإستغراب ..وجمانه ابتسمتلها: ديري اللي قلتلك عليك ..ورقمك عندي تو نتصل بيك ونفهمك..ولت جمانه لمكانها بعد ماسرور هزت راسها بإيجاب وع راسها 100علامة استفهام
....
وفعلا ماكلتش ولاشربت حاجه ولاحظت ع وجوههم ملامح الغيظ ...مش مصدقه الناس خيرهم هكي ولوا معقوله معاش في ولاذرة خوف من الله ..مايعرفوش حكم اللي يلجأ للسحرة ويدير السحر ..انه كافر وحلال قتله ..
سليمان وهو مقعمز ع السرير ويتأمل فيها كيف واقفه ع مرايه تفك في شعرها وتحول في ذهبها..والطرف الفوقاني متاع القفطاني محولاته وقعدت بالقفطان المخصر اللي مفصل جسمها ..وشعر ها الطويل اللي واصل لتحت ظهرها ..مايملش من التأمل فيها ..مفتون بيها ..ومايشبعش منها زي العطشان اللي قاعد في بير اميه حلوة مهما يشرب مايرواش💕💕
جمانه: انت شن درت بالسحر ؟
لارد ...شبحتله لقاته هايم فيها بنظرات كلها عشق وشوق ..
ناض من مكانه وبكل هيام : والله مافي سحر اشد من سحرك عليا 💖..قرب منها حط ايده ع خصرها وقربها منه
وباسها بعمق شديد وشوق قوي هلبه مش حاس بنفسه بكل ..يحبها بجنون يعشقها بكل مافيه ..عمره ماتوقع يجيه يوم ويحب ويعشق ويبدا مش طايق صبر بعيد عن اللي يحبها ..وهو يعبر عن شوقه الكبير وحبه اللي مالاش حد حطها ع السرير وهايم فيها بشوق وهي تبادل فيها بكل حب وعشق ..لين سمع صوتها قالت: اااي
قام راسها وشبحلها: خيرك حبيبتي..
جمانه : بطني وجعتني
سليمان بخوف: اسف ياغاليتي سامحيني تعبتك وانتي حامل
جمانه ابتسمت : لالا مش من منك ليا فتره نحس بيه ..
سليمان : كيف ليك فترة ؟؟علاش ساكته ماتكلمتيش
جمانه: ماحطتيش في بالي قلت ممكن من الحمل عادي
سليمان بعصبيه: مادامك ماتعرفيش ماتفتيش من راسك هادي صحتك ماتلعبيش بيها وفوقها حامل شن الأستهتار هذا ..
جمانه تجمعوا في عيونها الدموع: اسفه..
سليمان غمض عيونه وتنهد: اعوذ بالله من الشيطان الرجيم ..قرب من راسها وباسه ..حقك عليا ياحوريتي بس انفعلت من خوفي عليك ..ردي بالك تعاوديها وادرقي عليا ابسط حاجه تحسي بيها قوليلي ..
نزلت دمعتها: حاضر..وهو مسح دموعها وباس عيونها 💕ونوضها ...طلع بيجامه سميكه شويه غيرلها حوايجها ولبسها وهي تتأمل فيه كيف حنون هلبه وهمه كله راحتها..برغم انه حست إن كان يبيها بقوة بس ماهماش نهائي قدام صحتها شي ..حطها ع السرير وهو تمدد جنبها وخداها في حضنه..
جمانه: اسفه لإني حارماتك من حقوقك هلبه في هالفتره
سليمان: شن تقولي انتي..ولاحاجه تهمني جنب صحتك وراحتك ...انتي حامل وتعبانه انتي اللي سامحيني اني فكرت بنفسي للحظات ونسيتك ..
جمانه حضناته بقوة : انت احلى رزق رزقهولي ربي نحبك هلبه فوق ماتتصور
سليمان ابتسم: واني نعشقك عشق مالاش حد..بدي يقرالها في القرآن ويمسح بإيده ع شعرها لين خداها النوم ورقدت وهو رقد..
"مع الأسف في ازواج يشوف لزوجته ع إنها جاريه لازم تخدمه وتلبي طلباته في كل وقت وتحت اي ظرف ..تعبانه مريضه حامل ..مش مهم بكل حالتها المهم هو يشبع رغباته زي الحيوان الهمجي بالزبط..."
***
خش شهر 12 ووصل في نصه ..ندى كانت عايشه في حالة حزن..طول وقتها تفكر في كنان وخلاص بعده زاد اكدلها مشاعرها اكثر..فكت الحظر عنه حسابه في الأنستغرام وكانت مخيمه في حسابه وتشوف فيه شن ينزل كانوا دموعها يغلبوا فيها كل ماتشوف فيديواته وصوره ..قبل لترقد لازم تفتح ع صوره اللي حفظتهم في تليفونها وترقد وهي تتفرج عليهم ودموعها ع خدها..
يوم 16\12\2013
الساعه 3 ظهرا
كملوا محاضرتهم بكري قعمزت تستنى في هويدا بش تروح بيها..هويدا دارت سيارة طبعا بعد محاولات لاقناع اصيل..
هويدا كانت تصور في شيتات ..وهي كعادتها لما تكون بروحها تذكره هو بس ..حطت سمعاتها في وذنها وحطت ع اغنيه لوائل كفوري تسمع وتغني معاه..
🎶ياهوى روح وقلوا قلوا كثير اشتقتلوا
لو بدو عمري كلوا بعطيه
لما ياحب تردوا رح كمل عمري حدوا
نار اطفيلوا برده وادفيه
ردوا ياهوى لعندي قصرلي المسافات
حامل بإيدي وردة آهات وذكريات
حبيبي يلي بحبوا قلبي معلق بقلبوا
حبيبي يلي بحبوا قلبي معلق بقلبوا
وعم بإحلم فيه..
حولت السماعات وقعدت تبكي بصمت...
"بغنيلوا مابيسمعني حتى يحن ويئشعني
من يوم اللي ودعني بناديه "
مش مصدقه ودانها .."صوته والله صوته"..التفت شافاته مش مصدقه عيونها بككل..تمسح في دموعها تبي تتأكد.."هو ياااربي هو" ..قعدت مقعمزه تشبحله بنظرة شوق عتب فرحه ..ودموعها ينزلوا ناضت وقفت تشبحله: كناان
هو: ايه كنكون ...
حطت ايدبها ع وجهها وقعدت تبكي وتبكي وهو تلخبط معاش عرف يتصرف ...قرب منها..
كنان: ندوشتي خلاص اسكتي ارجوك ...
ندى قعمزت وهي بنفس الوضعيه : حول عليا غادي امشي
كنان: هههههههههههه متأكده انولي من وين ماجيت
حولت ايديها من ع وجهها: عينك ...
كنان ضحك بصوت عالي : ااااه منك قداش استاحشتك استاحشتك استاحششششتك مووت
ندى تضحك بخجل وساكته ...
اما هويدا اللي كملت تصوير من وقت قعدت واقفه تشبحلهم ومبتسمه ..قامت تليفونها واتصلت بحبيبها اللي حياته ولت سفر بين ليبيا ودوله تانيه ...كلموا بعضهم وتبادلوا عبارات الحب والشوق ...♡♡
***
كيف مش عارفين ماكلمكم حد بكللل ...باهي ..جاي ..هيا السلام عليكم ..
جمانه بخوف : شنو في
سليمان وهو يوتي في روحه: ماترعشيش حبيبتي وتي ساكوا فيه حوايجك ..بنمشوا للبلاد
جمانه : باه قولي شن صار
سليمان: خوي رمزي ليه يومين ماروحش ومايعرفوا عنه شي
جمانه شهقت ..وسليمان قاللها: هيا ياروحي وتي روحك بسرعه
جمانه: حاضر...
يتبع .....
#GomanFared
