الحلقة(107)
الشرع حلل اربعه..
امباركه ودموعها في عيونها: هو هذا..الشرع ماتعرفوشي إلا في الحاجات هادي...لكن نبيك تعرف ره حكاية انك متزوج عليا قديييمه ونعرفها .. لكن اللي ماكنتش نعرفه أنك خديت نفس البنت اللي سيبتني نهار الصبحه وهربت ع خاطرها ..وماكنتش نعرف انك متزوجها في السنه اللي تزوجتني فيها...
ضو بلامبالاة: ماتفرقش والله ..اسمعي من الأخير بتقوليلي طلقها احلمي والله ماهي صايره..تبيني نطلقك براحتك ..وضحك بتهكم..لكن هل ياترى بوك وخوتك يقبلوك لو روحتيلهم مطلقه !!
امباركه قدمت وقعدت تشبح لعيونه بغل: لو نبي نطلق ره اطلقت من زمان من أول ماعرفت ..لكن لامانخليكش اتعيش حياتك عادي حنقعد ع قلبك ..وضحكت بسخريه..بعدين انت شن يصير فيك لما نخليك انت ماتتصرفش بدون ماترجعلي نص اللي انت تملكه واللي اغلبه عمي مايندريش عليه بتدبيري كله حصلته ..ولاانت ماتعرف راسك من رجليك..
ضو بتهكم: بنفوتلك طولة لسانك لأن عارفك قاعد حارقك الموضوع ..بس بالله قوليلي مش حلوة هلبه وأحلى منك بوووين..
امباركه كانت تموت من داخل بس مابتش تخلي دمعتها تنزل ولاتضعف قدامه ابتسمت: ايه وطالعين ع بعض وخشت وخلاته ..اما هو خدي تلفونه وطلع..يتكلم ..
امباركه وهي تحول في ذهبها بغل: كله من تحت راسك ياسكينه لكن وربي المعبود لما نردلك نفس الضربه بأقوى منها ..
...
ضو: وانتي عاد ماصدقتي
ازدهار: مالا شنو قلبي مليان عليها من زمان هالواطيه
ضو: ازدهار ماتغلطيش
ازدهار: اكثر اللي قاهرني انك ماترضاش فيها
ضو: مرتي في النهايه وأم صغاري
ازدهار: حتى اني مرتك وأم صغارك
ضو : وهاك قولتيها يعني زيك زيها حتى لو كنت نحبك اكثر منها ..
ازدهار: نعم هو انت تحبها من الأصل؟
ضو: اييييه علينا فكيني من نكد وقوليلي شن درتي اليوم من غير هالمقلب اللي صار
ازدهار: هههههههههه ...رفعت شهودة وطعمتها مع خوي ..
وكملوا هدرزة......
....
ماعندهاش مهرب الليله لازم تبات في دارها خدت شهيق وزفير وقدمت جيهة الدار تسمع في صوته يقرا في القرآن خشت لقاته مقعمز ع كنبه وفي ايده المصحف ويشبح القدام ويقرا..كملت للدولاب طلعت حوايجها وخشت للحمام وهو مازال يقرا...طلعت وقاعد مستمر بدت تحول في ذهبها..وتمسح في المكياج ..مركزة مع قرائته كانت متغيرة شويه كإنه يقرا بقراءة تانيه غير اللي تعودت بيها منه..بس صوته كان رخيم ومنغم ويقشعر البدن..كملت..وقعمزت ع السرير وعاطيه بالجنب وكانت تشوف في تليفونها ..هو سكت ..هي تلقائيا شبحتله ..لقاته يقلب في صفحات المصحف وقام راسه جت عينه في عينها بسرعه غيرت عيونها وردتهم في التلفون ..وهو ابتسم وكمل قراءة ..استنتجت انه كان يراجع في القرآن...بس القراءة ماعرفتش علاش متغيره...حطت تليفونها وخشت السرير ورقدت.. شويه وسكر المصحف وناض خش جنبها...
هي عاطيه بالظهر وهو متمدد...
سليمان: اسف ..الغضب كان مسيطر عليا لما رديت عليك
جمانه: مش مهم..
سليمان: شن هو اللي مش مهم..
جمانه: اعتذارك ..بعدين التفتله وقعدت تشبحله..طبعك هذا ماكنتش نعرفه وتوا عرفته شي مش بإرادتك مش حنأخدك عليه...لف بجسمه جيهتها: باه علاش بتي مع أمي امس
جمانه: كنت زعلانه ...
سليمان بضحكه: وتوا تم الزعل
جمانه : لا بس نبي نتأقلم ع طبعك هذا ونحاول مانزعلش لو تكرر هالتصرف ..
سليمان ضحك: يعني مافهمتش انتي توا زعلانه ولا لا
جمانه : نص نص ..
قرب منها وخداها في حضنه وهي غمضت عيونها وقعدت تشم في ريحته اللي استاحشتها ..
سليمان : اتفقنا قبل حتى لو تزاعلنا مانباتوش بعاد عن بعض ولا ...
جمانه : امممم ...خلاص اخر مرة ...
سليمان ضحك: استاحشششتك ..وضمها بقوة ..
جمانه: هههههه عصرتنا اني وصغارك
سليمان: هههههههههههههه ...بعد وحط ايده ع بطنها ..اسمحولي يابابا راني مستاحش ماما هلبه ...بروا ببوكم وتحملوا ...
جمانه: هههههههههه لا والله تعبانه..
سليمان بشوق : اني التعبان مش انتي...
❤❤❤❤❤❤❤❤❤❤❤❤❤❤❤❤❤❤❤❤❤❤❤❤❤❤❤❤❤❤❤❤❤❤
***
تاني يوم روحوا الصبح لطرابلس ...حطها في حوش اهلها ومشي للجامع ..تلاقت هي وامل اللي كانت جايه تعزم ع بيانها...باركتلها جمانه ..وهدرزوا ...وبعد روحت فاجئوها بأن الاسبوع هذا حيمشوا يخطبوا هويدا لأصيل..وفرحت هلبه...
فات اسبوع كامل من شهر واحد..
خطبوا هويدا لأصيل وفضوا فيها ..وبيدرولها بيان بعد مايروح اصيل لأنه كان يمشي ويجي ع هديكا الدوله زي ماتعرفوا ..
وجمانه مشت لعرس منيرة وتفاجئت برويدا حاضرة واللي صدمها تجاهل رويدا التام ليها ..
في الوقت نفسه ابوبكر كان شادها في جرة سليمان اتصالات..وزينب بعد تفكير قررت تعطي الموضوع فرصه..واتصلت بجمانه وعطتها الموافقه المبدئيه ..
كان يوم"أحد" اللي اتفقوا يجوا فيه اهل ابوبكر يشوفوا زينب وكان لازم يدير نظرة شرعيه ..فخلاها في نفس اليوم...
يوم الأحد
بعد العصر...
هي قالت تبي تكلمه شويه يعني بطول شويه
سليمان : تمام تونقول لعلي...
طبعا طلعت لمرت بوه وخواته اللي عجبتهم زينب هلبه برغم انهم قاعدين منقمصين من الموضوع ..شويه وخشت داخل ...
جمانه: هيا زينب اطلعي للمربوعه ...زينب ناضت وكانت متوتره هلبه ..حطت وشاح ع راسها وكان لونه احمر وكانت لابسه بلوزة سودا طويله ع سروال فضي ..
جمانه: اقري آية الكرسي ..ابتسمت زينب ومشت وقعدت تقرا فيها لين وصلت في الباب غمضت عيونها"يارب اجعله جبري وجميل عوضك ليا"...فتحت عيونها خدت شهيق وزفير وطقت ع الباب وخشت وراسها لوطا..وقعمزت
ابوبكر لما شافها ارتسمت ع وجهه ابتسامه عريضه ونسي خوها المقعمز معاهم ..
علي: احمم ..شويه وجاي وناض طلع وابوبكر مايندريش عليه شن قال المهم طلع ..
زينب كانت ضامه كفوفها لبعض وتفرك فيهم من الخجل والتوتر ورجليها كذلك وراسها لوطا..
ابوبكر بإبتسامه : كيف حالك
زينب وهي في قمة الخجل وبصوت يدوب طالع : كويسه
ابوبكر بمزح : شنو؟
هي زادت توترت : كويسه احمم ..
ابوبكر : حتى اني كويس وتوا وليت كويس هلبه ..
زينب فنصت عيونها وراسها لوطا عمرها ماسمعت كلام حلو من راجل غريب عنها بحكم محيطها المحافظ والمدرسه اللي كانت كلها جنس حواء مافيهاش من جنس آدم غير البواب اللي كان في الستين..
ابوبكر ضحك على لقطتها : ههههههه ...باهي هي اسمها نظره شرعيه قيمي راسك شويه خل نشوفك وتشوفيني..
ببطء قامت راسها وفتحت عيونها ع وسعهم ..شافت شاب في غاية الوسامه نقشه ع الأسود وعنده نقرة زين زايدته على مابيه كان مبتسم ويشبحلها بإعجاب شديد والنقرة زادت غرقت ...
ابوبكر: الهالدرجه عجبتك ...
وطت راسها طول وسبت روحها الف مرة .."ياحمارة خيرك نسيتي روحك هكي..بس ياربي هذا شنو معقوله واحد زيه يبيني اني "
زينب بحزم: انت تعرف شن عندي
ابوبكر بضحكه: شن عندك ترا ..
زينب : نتكلم بجديه اني عندي السكر فاهم شن معني إن عندي السكر..
ابوبكر : ايه فاهم معناها حلوة بزياده ..
زينب قريب انصهرت من الخجل كلامه الحلو عمره ماسمعاته قبل خدودها توردوا وولوا نار من حرارة الخجل..
ابوبكر ابتسم: زينب اني عندي خلفيه تامه عن الموضوع وخل نكون معاك صريح ماكنتش نعرف بمرضك ..ونكون صريح اكثر اني شايفك مرة بالغلط ..بس والله احلى غلط غلطته في حياتي ..
زينب خلاص قلبها بيوقف بس تمالكت نفسها: الموضوع مش ساهل انت انسان سليم مش حتفهم حالتي بعدين حتتعب وتمل وتندم صدقني..
ابوبكر: اسألي عليا ولد خالتك وحيقولك اني منو ..اني مانديريش حاجه إلا وأني عارفها كويس ودارسها زين..زينب من الأخير اني نبيك من كل قلبي ومش حنتراجع ولو شويه ع الموضوع ...وع فكره حتى اني عندي ضعف نظر من غير نظرات بش نقرا ورقه لازم نلصقها في وجهي ..ودار ايده ع وجهه...يعني حنعبى عليك في قرايه الصغار..
زينب: هههههههههه
ابوبكر : اللهم صل ع النبي حتى الضحكه سكر 💓
زينب سكتت وبعدين قالت : باهي زيد فكر في الموضوع اكثر😳
ابوبكر: تم وقت التفكير اني بعد هالمقابله زاد اصراري..
زينب: باه اني حنزيد نفكر ...
ابوبكر تنهد: باه خودي راحتك لكن ماطوليش ..
ناضت زينب بتطلع : نستأذن..وهي ماشيه انفك وشاحها المحطوط وطاح شعرها ع جنب ..فيسع لفت وشاحهها وطلعت وخلاته مسحور فيها"اللهم صل ع النبي وراس بوي ماظال إلا واخدك"..
طلعت وايدها ع قلبها ملخبطه تماما تلقوها وداد وجمانه
وداد بحماس: هاه شنو ..
زينب وجهها أحمر: إن شاء الله خير..
وداد: شفته من فتحة الباب طرف مطرررف ..
زينب: تحشمي
جمانه بضحكه: شكلنا بدينا حتى نغاروا..
زينب غمضت عيونها وضحكت : اسكتوا عاد....😳
وداد وجمانه 😂😂
شويه وقال لأهله هيا ...وزينب ركبت لدارها ..وهي تفكر فيه وفي كلامه وملامحه تسمع في صوته يضحك طلعت لفيراندة الدار وقعدت تشوف فيه من فوق ..تتأمل فيه ومش مصدقه نهائي"هذا يبيني اني " ...
للحظه حست ان الحب اللي فقلبها سنين لسليمان كأنه تحول تماما وكأنه قلبها يتهيأ لإستقبال ساكن جديد..❤
***
فاتوا يومين سليمان كانت مشيه لوحده من المدن الليبيه في الشرق وكان يجهز في روحه بيمشي ...
سليمان : لبستي ملايتك حبيبتي
جمانه هزت راسها بأيجاب والدمعه في عينها ..قدم وحضنها : ياعمري كلهم تلات ايام ..
جمانه : انت تقول تلاته ايام لكن هما عندي 30سنه ..وبعدين الوضع غادي يخوف..
سليمان حضنها بزياده :ماتخافيش المدينه اللي ماشيلها آمنه .
جمانه : مانبيش نعرضلك تمشي وتجي سالم اهم شي رد بالك ع روحك ...
سليمان بعدها وباس راسها: استودعيني الله وماتخافي من شي ...
جمانه : استودعك الله الذي لاتضيع ودائعه ..
كيف جايين بيطلعوا نزلت خمارها هو وقف ورجع صكرالباب قام خمارها وباسها بقوة الشوق اللي حتكون في قلبه وهي بعيده عليه وبعد وباسها من خدودها ورجع حضنها أكثر..وهي دموعها يصبوا ...بعدها مسح دموعها ولبسها الخمار وطلعوا بدون مايقولوا كلمه..
طول الطريق ساكتين وهو شاد ايدها اللي محوله منهم القوانتي بناء ا ع طلبه..وصل بيها قدام الحوش نزلت ونزل خدي ساكوها وخش معاها . سلم ع عمه وهدرزوا شويه وشبحلها بنظرة حب وطلع ..وهي قلبها انقبض ع الآخر..
....
فاتوا يومين كان سليمان يلقي فيهم في محاضرات خلال دورة تطويرذات وهو كان ليه الجزء الديني وتربوي منها ...أذن الظهر صلاه في واحد من المساجد غادي ...وهو طالع كان يهدرز مع مجموعه شباب..في نفس اللحظه في السيارة واقفه من بعيد تراقب ...وقف هو والشباب بدايه الكياس...وتتحرك السيارة هادي وين تقرب من بحداهم يطلع واحد من روشنها وفي ايده كلاشن وضرب 4 رصاصات بالتمام ..وهربوا....والدم سال ع الطريق....💥🍃
....
بشهقه قويه ناضت مفزوعه ...
ندى: خيرك حبيتي ..
جمانه بهلع: سليمان ...سليمان... في حاجه صارت ياندى....في شي صار وانهارت بالبكي.....
طقطق
ندى : منو
فرج : اني يابابا افتحي.....💔💔💔💔
يتبع .....
#GomanFared
