الحلقة(103)
واقف ع المرايه يمشط في شعره ..انفتح الباب وخشت...خدت حاجه وجايه بتطلع اعترض طريقها ..
جمانه بدون ماتشبحله: حول في حاجه ضروريه بنرفعها لعمتي
سليمان بعشق: تس...مش حتطلعي قبل لنرضيك.
جمانه: حول توا مش وقته
سليمان : لا...توا وقته ..
جمانه قامت عيونها: اليوم جمعه...
هو برفعة حاجب مع ضحكه: ايه نهار جمعه مش رمضان ..
هي شدت ضحكتها : باهي حول ..
هو لف ايديه ع خصرها وقربها ليه وحط خشمه ع خشمها: قلت لا مش حتطلعي لين نرضيك
هي درجت حرارتها ارتفعت وقلبها قريب يطلع من صدرها وتتنفس بصعوبه :سليمان ..حوول
سليمان بعشق وهيام: لا..وباسها بوسه طويييييله كلها شوق وشغف وحب ..وهي حاولت تقاوم ماقدرتش مستاحشاته هلبه 💓
......
تو بعتت جمانه تجيب شريط الدوا
تبرة: خيرها عطلت ..لازم تاخديه ع الفطور ..
فتحيه تنهدت وناضت مشت للدار وصلت وطقت ع الباب: جمانه بنتي ..
جمانه بعدت عنه وهي تتنفس بصعوبه : حي عليا..وصتني نجيبلها دواها ...كله منك حول ..دفاته وفتحت الباب وطلعت..
فتحيه: خيرك بنيتي وجهك احمر إن شاء الله مش ضغط
جمانه بربكه : لا..لا ..اهو عمتي شريط الدوا😳😅
خدت فتحيه الشريط ع طلعت سليمان من الدار
فتحيه: انت كنت داخل ؟
سليمان بإبتسامه ويسرق في نظرات لجمانه: ايه ..
فتحيه : شوف مرتك حسيتها تعبانه
سليمان بضحكه مكتومه لف وجهها ليه بصوابعه : ايه صدقتي واضح
جمانه : مافيا شي 😳
سليمان برفعة حاجب : لاا فيك ..وشدها من ايدها ..خشي ارتاحي..ومعطهاش فرصه ادير ردت فعل خش هو وياها وسكر الباب وخلا فتحيه تضحك ومشت..
جمانه: شن الحركات هادي 😳
سليمان :انتي اجبرتيني وتوا اسكتي ومانبيش نسمع منك كلمه خليني نرضيك ياحلوتي 😍💓
ووطبعا حني نخلوه يرضيها ونطلعوا ونسكروا الباب 😂
***
يابنتي استهدي بالله وقعمزي
سرور ببكي : ياعمي تيبح خليني نطلع ياسي عييت
سعيد : تو انتي بتاخدي ع كلامه ره هذا لما يتكنطى يقول للي يجي ويندم بعدين
سرور: يندم ولامايندمش معاش يهمني اني هني مش حنقعد
سعيد: باه وين بتمشي
سرور : لحوش اختي
عماد: جربي اديرها
سعيد: انت تسكت وماتتكلمش،يابنتي مايجيش انتي قاعده عروس عيب في حقك ره
سرور: العيب اللي قاله ولدك عماد ياعمي اللي مفيوض يكون ياجلي وقديي من قدييه طيح قديي واهانتي وأني والله الإهانه مانقبلها لو نطلق
عماد: تطلقي عينك
سعيد: بتسكت ولاتقلب وجهك
عماد تنهد ومسح وجهه بايده وبهدوء: يابنت الناس الكلمه طلعت مني في لحظه غضب مش عارف كيف قلتها ..ريته انقص لساني ولاقلتها
سرور : ياييت ..
عماد:🤤
سعيد: 😆...اححم طلعه من الحوش والله مانك طالعه واللي يطلع هو وشبحله هيا وجهك والباب ...
عماد: حاضر تو نطلع المهم هي ماتطلعش وخدي مفاتيحه وتليفونه وطلع ..
سرور: كان خليتني نطلع بس ..
سعيد : لايابنتي انتي بنتي ياسرور مش كنتي..وقدرك عالي ومستحيل نخليك تطلعي من حوشي مكسورة الخاطر..توا سلم بنيتي بري توضي وصل ركعتين وبعدها ديرلي فنجيل قهوة 😊
سرور تمسح في دموعها وابتسمت : حاضر وخشت داخل..
***
فات الوقت ..بعد صلاة الجمعه العيله تغدوا وكان ناوي سليمان يروح هو وجمانه بعد الغدي..سليمان كان واقف مع بوه ويتناقشوا ويشوفوا فيهم من بعيد ضو ورمزي
ضو بخبث: اكيد يتفاهم هو وياه يسلمه اللي كنت مسؤول عليه
رمزي بغيظ: كل مانبي نصفى من ناحيته يدير حاجه يأكدلي فيها انه خبثي ومنافق ...
ضو بخبث اكبر: مازال ماتعرفوشي ..ديما نقول فيها البلي كله مايجي كان من الناس اللي زيه اللي يمثلوا الخوف من ربي قدام الناس وهما يعرفوش ربي في الأصل ..
سلم سليمان ع بوه وعمران طلع بالسيارة ..وجي لخوته بيسلم عليهم..سلم ع ضو وبعدين رمزي
سليمان بإبتسامه : نشوفكم ع خير
ضو: خل جيتك قريبه مش تبطا زي عوايدك
سليمان حس بنبرة صوته فيها تهكم وقف وحط ايده ورا ظهره : إن شاء الله حتكثر جياتي هني..
رمزي استنتج ان كلام ضو صح وبوه سلم سليمان الرزق اللي كان هو مسؤول عليه وقعد يحرق
ضو : اها معناها في حاجات هلبه ربطاتك بالبلاد
سليمان بضحكه: تقدر تقول هكي
رمزي كعادته يبي يستفزه : مايربطه شي هنايا بكل يبال عنده الطرابلسيه اللي زادت جراته معاها..
سليمان في اي موضوع فيه جمانه يولي حساس..مش حساس لا.نظره عينه الموجهه لرمزي كانت تبين انه ولا وحش مخيف ..بحركه سريعه ضربه براسه ع وجهه جي طايح ..رمزي شد خشمه وناض: تضربني ياكلللب ..وناضله يجري وضربه بوكس ع وجهه ..سليمان الكلمه ترن في ودنه قاعده ضربه ع بطنه لين طاح ونزل فيه ضرب ..
ضو الأخ الحاسد يتفرج ومستمتع ..كان عارف قوة سليمان وان رمزي مش حيقدره ..ولو صارت حاجه في رمزي حينحط الحق ع سليمان بالذات وإن رمزي اكبر منه ..جي رضوان اللي كان مصدوم ومش مصدق وبصعوبه فك سليمان عن رمزي ..
رضوان بعصبيه: سليماااان شن جاك هبلت ولاكيف
رمزي : لاا هوهذا قاعد يبان وجهه الحقاني شوي شوي
سليمان بإزدراء : مريض وليس ع مريض حرج ..هالمرة جاتك هكي مرة تانيه تجيب سيرتها ع لسانك اندمك أشد الندم يارمزي ..
ونفض رضوان ومشي ..رمزي حتى هو ركب سيارته وطلع
رضوان يشبح لضو اللي كانت باينه عليه الشماته: كيف تشبح فيهم يتقاتلوا ومافكيتهمش من بعض؟!!
ضو بتهكم: ماعنديش ليهم جهد..
رضوان : مش عارف قلبك ليش اسود عليه لهالدرجه ..
ضو شبحله بشر: لأنه هو ديما رقم واحد وحني رقم عشرة ..لإن هو ديما الباهي وحني الكيين..وهو المتعلم وحني الجاهلين..وهو الواعي وحني المتخلفين..لأن امك ديما شايفتنا٣ حني بعده برغم اننا كلنا طلعنا من رحمها ..تعرف نهار نخلص منه نهار عيد عندي نقولها ومش خايف وكان بتعادوها عاود..ومشي وخلاه..خلاه مصدوم ومش مصدق
معقوله في خو يكن كل هالكره لخوه لحمه ودمه ومن بوه ومن امه !!.....ايه معقول هلبه يارضوان ولانسيت قابيل هابيل ...ولاخوت النبي يوسف ...الحسد وين يخش قلب بنادم يخليه لايعرف خوه ولاغيره ..الحسد من اشد الذنوب وابشع الصفات ..الحسد هو اللي طلع ابليس من الجنه للأبد وخلاه مايحلمش بيها حتى الحلم...🖤🖤🖤
...
خش بعصبيه :جمااااانه هياااا
جمانه ناضت من مكانها مخلوعه اول مرة تسمع صوته بهالنبره قامت شنطتها وجت طالعه ووراها عزوزتها وجدته
فتحيه: خيره وجهك ...
سليمان وهو يشبح لوطا: ماخيره شي ..خدي الشنطه من جمانه وجاي بيطلع : بسرعه الحقيني.هي السلام عليكم ..وطلع زي الريح ..
فتحيه تسلم ع جمانه: شن تراله.
جمانه : اول مرة شوفه هكي
فتحيه : ردي بالك تكلميه بكل طول الطريق إلا لو كلمك
جمانه خافت ..تبرة سلمت عليها : ماتخوفيهاش ..يابنتي ماتخافيش غير هو لما اطيرله ماينقربش ..انتي ماتسأليه شي ألا لو هو كلمك ..
جمانه هزت راسها بإيجاب وهي خايفه
بييييييييييييييييييييييييييييييييييييييييب
فتحيه:اطلعي بسرعه ..
جمانه قلبها بيوقف من الخوف ركبت السياره شبحتله كان لابس نظراته ويهز برجله...
سليمان بعصبيه: سااااعه..
جمانه بصوت يدوب طالع :اسفه ..
ولع سيارته ومشوا وهو قاعد معصب ع اخر فتح ع القرآن ويسمع وساكت وهي مرة مرة تشبحله كيف ملامحه كلها غضب وايد ع الستيرسو والإيد التانيه تحت ذقنه ..
"زعمه شن صار وعلاش وجهه فيه اتر ضرب ..منظره يخوف ..ضحكت في سرها بس حتى هو معصب محلاه .."
التفت ع جنبه لقاها تشبحله غيرت عيونها بسرعه من الخوف ..سكر الراديو..
سليمان : قيمي خمارك الطريق فاضيه مافي حد
جمانه تلقائيا قاماته ..شبح لوجهها ..
سليمان ابتسم وشبح القدام: دواي انتي راحتي يابنت الناس شوفة وجهك بس تغير حالتي في لحظه ..
جمانه ابتسمت وعضت ع شاربها ..هو شبح اللقطه
سليمان : ههههههههه..آااااه ياقلبي نحبك والله العظيم زي المجنون شن درتي فيا بس
جمانه كلامه الحلو نبرة صوته اللي قاعده حاده شويه مخليه قلبها يفر فران تلقائيا حطت ايدها ع قلبها وهي مبتسمه بخجل هو شبحها وضحك بصوت عالي ..شبحتله منظره كان خيالي ..ضحكته ترفع القلب وتوطيه تشبحله وملامحها كلها مفتونه بيه ..
سليمان: نزلي خمارك
نزلاته وهو ولا فتح القرآن وقعد يسمع فيه..وهي نفس الشي..
قبل المغرب وصلوا لطرابلس
سليمان : بنحطك في حوش اهلك تو نجيك في الليل ان شاء الله
جمانه بفرحه: حقققه !!
سليمان بضحكه: لهالدرجه فرحتي
جمانه : استاحشتهم هلبه
سليمان ابتسم : تمام ..هي اهو وصلنا ..درسوا قدام الحوش ..انزلي وتوا اني بنمشي للجامع بنلحق ع الصلاة ولما نجي مروح بيك ننزل ..
جمانه : حاضر..نزلت وجت بتاخد شنطتها
سليمان : خليها ماعندك ماديري بيها
جمانه ابتسمت: باهي رد بالك ع روحك
هو ابتسم : حتى انتي ..السلام عليكم
جمانه وعليكم السلام ...ومشي
وهي لقت الباب مردود فتحاته بالشويه وخشت قعدت تتفرج ع الجنان حست بشوق كبييير للحوش لجنانه لكل شي فيه ..
خشت للداخل الباب الدخلاني كان مردود شبحت كنادر قدام الحوش ابتسمت خشت بالشويه وتسمع في صوت ضحك..
ندى: والله احلى مفاجأة..
اريج : عزو هو اللي فكر فيها
نجيب : ابو الأفكار السمحه ..
ندى: ياااه امس يروح اصيل واليوم اريج ..
عبدو: ناقصه غلاي جمنو
ندى بحزن : حتى اني استاحشتها موووت
اريج :والله وحتى اني ...
"وأني اكثر والله "
اريج وندى بعيطه : جماااااااااااااااااااااااااااااننننننه ..ومشولها يجروا ويحضنوا فيها ..معز ناض وقف : كيف حالك بنت عمي
جمانه: الحمد لله ..حمد لله ع سلامتك
معز : الله يسلمك ..انسحب معز بش يخليها تاخد راحتها
قامت خمارها وخواتها يبوسوا فيها وهي تبوس فيهم ..دفهم عبدو وحضنها وباس راسها وبعده نجيب وأصيل ...
نجيب : وين الشيخ
جمانه: بيلحق ع الصلاة..تويجي بعدين
قعمزوا وقعدوا يهدرزوا ..
وطبعا هذاكا اليوم عبدو كان رافع مرته لحوش اهلها بتقعد عندهم كم يوم لإنهم جايين زياره لليبيا..ونجيب حتى هو رفع ريما تبات عند امها لإنها كانت تعبانه من الحمل شويه..
والحاج فرج وأمينه قاعدين في الزاويه ...
وقعدوا الخوت مع بعض بعد ماسقد نجيب معز..
***
بعد المغرب في عمارة سليمان ..
شقة ايام العزوبيه 😁
عماد وسليمان مقعمزين يهدرزوا ..
عماد تنهد: مش عارف كيف طلعت مني كيف قلتها بس
سليمان : ربي يهديك ..اكثر حاجه كانت خايفه منها درتها ..
عماد: والله الندم بيقتلني بالله..
سليمان : هون على نفسك تو تاخد وقتها وتمشي غير انت تتعلم منه درس ومعاش تكررها ..
عماد : توبه وحق الله
طقطقطق
عماد:منو
سليمان ابتسم وناض: من غيره المستشار النفسي والعاطفي
عماد بضحكه : الله ..
هز سليمان راسه بإيجاب ومشي فتح الباب:
وائل بقلبة وجه مصطنعه : حصايل حصلت فيهم وخلاص ..السلام عليكم
سليمان بضحكه مد يده وشحه داخل وسكر الباب: وعليكم السلام ياغليظ القلب
وائل: كتفي خلعته ياشيخنا الجليل..
جاه عماد: اوووووووووه حراج افندي ..وسلموا ع بعض
وائل:غيروا الدسكه بالله ..
سليمان وعماد:😂😂
***
الخوات كانوا مقعمزات في الصاله ومولعين الدفايه ويهدرزوا
اريج : ربي يعقد عسلكم حبيبتي
جمانه: اجمعين يااارب
ندى : مش متعب حملك
جمانه: الصراحه ايه ويجيني مرات مغص قوي وناكل بشراهه لاتوصف
اريج : واضح ماشاء الله زايده..
جمانه: حتى انتي..شنو ماتقوليش درتيها
اريج : هههههههه لا طبعا قلتلكم نبي نفوت اربعه شهور وبعدين يصير خير...
جمانه: ربي يرزقك بالذريه الصالحه
اريج : اجمعين ياقلبي
جمانه بإبتسامه : شنو ندوش شن جو القرايه
ندى: الحمد لله تمام التمام
اريج غمزتلها: مافيش جديد
ندى وجهها ولااحمر
جمانه شبحت لأريج وشبحتلها: شنو في ..
اريج بضحكه: شكلها ريما بتولي حماة ندى حتي هي
جمانه بضحكه: منو منهم
اريج: كنان ..
جمانه: اها هدا اللي قعد حني ..سكتت وبعدين..قصدك هو هذا علاش قعد في ليبيا
اريج : ههههههههه ايه
جمانه : وشنو ناويين
ندى: بعد اتم السنه هادي يخطبني والزواج لما هو يكمل
اريج: يعني بتكملي عنده
ندى: ايه 😳
جمانه بإبتسامه : ربي يتمم ع خير ويسعدك يازغده..
ندى: هييييييييي جمانه حتي انتي
جمانه واريج: هههههههههه
خشوا الاولاد
نجيب: ياااالله قداش استاحشت هاللمه ..وقعمز
عبدو قعمز: والله وحتى اني
اصيل: شن رايكم نعادوا عشي السنه اللي فاتت
جمانه : يااااريت ..
عبدو : خلاص حني فيها
نجيب: تو نكلم رجالتكم ونستأذنوهم مش حيقولوا لا
ندى بتوسل : باتو بالله عليكم
اريج وجمانه شبحوا لبعض
جمانه: مش عارفه مأظنش يوافق رغم انه خاطري
اريج : حتى اني
نجيب : ماتفكروا في شي تو نقنعهم..طلع نجيب بش يكلم معز وسليمان...
اريج: استاااحشت حوشنا هلبه
جمانه: والله واني اكثر شعور غريب حسيته لما خشيت كإني كنت مسافره وروحت
اريج : زيك غير اني كنت مسافره حق
كلهم ضحكوا
ندى: ياااارب يقولوا باهي
اصيل : حيقولوا باه إن شاء الله
خش نجيب بعد لحظات : قالوا باهي
جمانه: ع البيتان ولا الطلعه
نجيب بضحكه: ع الزوز
ندى: وووووووووووووووه يسسسسس
كلهم: ههههههههههههه
..طلعوا البنات في سيارة نجيب وعبدو وأصيل كل واحد لحق بسيارته ...وصلوا لنفس المطعم اللي تعشوا فيه من سنه ولحسن الحظ لقوا نفس الطاوله ..قعمزوا ..وبدوا يهدرزوا طلبوا العشي..وكملوا هدرزة ..
عبدو: من السنه اللي فاتت لهالسنه تغيرت هلبه حاجات..
اصيل : ايه
نجيب ابتسم واتكي بإيديه ع الطاولة: السنه اللي فاتت كنت مرتكب اكبر غلطه في حق نفسي وسيبت ريما..ماكنتش حنصدق لو جاني حد وقتها وقالي ره السنه الجايه حتجي لنفس المكان وريما زوجتك ...💖
اصيل : فعلا سبحان الله ..
اريج تنهدت: ولااني ماكنتش ممكن نصدق لو جاني حد وقالي انك حتولي هني السنه الجايه وانتي زوجة معز ..وشبحت جيهة الطاوله اللي قعمز فيها ضرار السنه اللي فاتت وجي بين عيونها لما غمزلها وضحك💔 ..دموعها عبوا عيونها وشبحت لخوتها وقالت ..كله نصيب 💔..
ندى : اني حسيت روحي في هالسنه كبرت سنين بس اكتر حاجه تعلمتها إني لازم نعطي للحاجات الحلوة فرصتها بش تخش حياتي ونكون واثقه بالله انه زي مايوم بكيت حيضحكني
نجيب بضحكه: كلامك حلو يازغدة اللي يسمعك يقول عايشه عمر جدي
كلهم 😂😂
ندى😒
عبدو: الحمد لله ربي من عليا وفتحت عيادة اني ودكتور كبير وشغلنا ماشي تمام ومتزوج ملاك البنت اللي تمنيتها ونراجي في بنتي او ولدي امتى يشرفوا ع الدنيا ونولي اب
جمانه: وأحلى أب 💖...عبدو بعتلها بوسه طايره
نجيب بإبتسامه : وانتي جمنو
جمانه ابتسمت : اني نحمد ربي ونشكره ع كل شي ع مرة قبل الحلوة اللي عشتهم خلال هالسنه ..لأن لولا هديكا الأيام الصعبه ماحسيش بحلاوة العوض اللي اني فيه💖
كلهم ابتسموا
اصيل : اني طموحي زاد كبر اكثر..ولما شفت في (*****)كيف حلمي قاعد يتنفد ع ارض الواقع وكل الإمكانيات مسخره ليا ..بديت نفكر بجديه في قرار الإقامه غادي ..
كلهم اتفاجئوا..
اريج : امي مستحيل تخليك
ندى: وهويدا اصيل كيف يصير فيها؟
اصيل : بلا هويدا مايصير شي أصلا💖ولو هي قالت لا اني حنسلم امري لله ونقعد
اريج: مالا يارب تقول لاا
نجيب: ماتقوليش هكي خليه يجرب فرصته مش كل مرة تجي للأنسان فرصه زي هادي
اصيل ابتسم: إن شاء الله خير..
كملوا هدرزتهم وجاهم العشي تعشوا وروحوا ...وهما متفقين انهم حيعاودوها السنه الجايه ..بس الله أعلم من هاللحظه لهذاكا الوقت شن بيتغير في حياة كل منهم ....🍃
***
سليمان كان يقرا في القرآن وبعد كمل بدي يقرا في واحد من الكتب ..تعب وسكر الكتاب ..وخدي تلفونه وتلقائيا حط ع رقمها ..
...
الخوات كانوا مفرشات في دار المعيشه وبحداهم الدفايه ويهدرزوا...
اريج: الحمد لله مرتاحه معاه هلبه ..عمره ماوجعني وحاسه روحي بديت نحبه
جمانه: به كملي شن شعوره لما شافك منهارة ع موت ضرار
اريج : مانعرفش بس طبيعي كأي راجل صعبه عليه هلبه ..لكن احتواني ياجمانه ماخلانيش نفارق حضنه ..تخيلي قالي فضفضي طلعي اللي في داخلك كله وماتفكريش فيا ..واني طلعت اللي في نفسي كله بس تعرفي شنو اللي صار..
ندى: شنو
اريج: لقيت روحي نفضفض بطريقه حسيت فيها فعلا إن ضرار ماضي وراح واني كنت نتجنب نجرح معز وخايفه ع زعله..
جمانه: معز راجل فريد من نوعه ردي بالك تخسريه ياأريج
اريج: مستحييييل ..
قطع كلامهم رنة تليفون جمانه اللي لما شافت الأسم قلبها فز وعيونها لمعوا ووجهها تحمر وابتسامتها شاقه وجهها 💓
اريج بضحكه: ردي عليه ..
جمانه ردت : السلام عليكم
سليمان تنهد وغمض عيونه : وعليكم السلام ياروحي اللي بايته بعيد عني
جمانه قلبها ذاب وتحشمت: شويه بس استنى ..
زبط ان في حد بحداها ..لبست طرف غليط عليها وكانت لابسه بجامه شتويه واخدتها من اريج ولبست وشاح وطلعت ..لمحت من الروشن المطر
جمانه: يابنات المطر تصب ..
ابتسم سليمان : ايه توا واقف قدام مرش الفيراندا نتفرج عليها
ضحكت جمانه ولبست في رجليها وطلعت ووقفت بحدا الباب وتتفرج ع المطر: استاحشتك
سليمان: انتي اللي مسيبتيني
جمانه ابتسمت: والله جي خاطري في البيته وجمعة خوتي وخواتي
سليمان : قضيتي جو حلو؟
جمانه بحماس : هلبه..
سليمان : الله يديم الفرحه اللي نسمع فيها في نبرة صوتك يانبض قلبي💖
جمانه : آااه ياني من لسانك وكلامك اللي يخلي حالة قلبي حاله..💓
سليمان : يشهد عليا ربي ان قلبي هو اللي يخلي في لساني يتكلم ..جمانه اني ممكن مية مرة قلتهالك ومانملش واني نقول فيها نحبك نحبك لدرجه لاتوصف ياريت لو نقدر ندخلك لقلبي وتشوفي بعينك مكانك فيه وتفهمي اللي نحس بيه ..❤
جمانه بحب: والله كله واصلني وحاسه بيه من نظرة عيونك فاهمه كل شي ..
سليمان تنهد: غدوة بعد الفجر في حوشكم مانعرفكش تعارضي
جمانه ابتسمت : ومن قالك بنعارض ..حتلقاني قدام الباب اول ماتوصل 💓
سليمان : آااااه يارب نحبها هالمخلوقه نحبها ❤
جمانه: ههههههههههه 💖
....
معز : والله معاد صايره مرة تانيه واهو قلتهالك
اريج بضحكه: ههههههههههه باه ...تعشيت
معز: الحق ماقدرتش
اريج : تتكلم بجديات !!
معز بحب: والله من غيرك ماعارف ندير حاجه ولاخاطري في شي
اريج : نوض امشي للمطبخ وكلمني فيديو
معز بضحكه : علاش
اريج : اسمع الكلام وماتناقشش ..
ومشي معز للمطبخ كلمها ..وقعدت تعلم فيه كيف يدير العجه وفعلا دارها وماارتاحتش لين كلي قدامها"اول الحب إهتمام ❤"...
....
مكالمة فيديو
ندى: كنان يامختش خش داخل
كنان وهو تحت المطر: والله شعور فانتاستك ياندوشي
ندى: تمرض وبعدين قول فانتاستك
كنان: هههههههههه واخد ع صقع اقوى من هكي ندو ره
ندى : صقعنا حني غير يمرض حتى الروسيين ..
كنان: ههههههههه .
ندى : تعرف سهفتني نطلع
كنان عصب: تطلعي عينك ..ندى انتي مراضه والله ياندى تطلعي تشوفي شي مايعجبكش
ندى بضحكه: باه اهدا ههههههههه مش طالعه
كنان شبحلها ع جنب: اطلعي الواحدعن طوره
ندى: هههههههههههه يضحك منظرك كيف مبلول زي الفلوس
كنان: فلوس صار...تو نوريك ياشبرلو
ندى😑
كنان:😂
واستمرت الأحاديث الغراميه❤ ..ع زخات المطر 🌧..والصقع 🌬اللي ماحسوش بيه العشاق💑 بسبب دفء قلوبهم 💖...
يتبع .....
#GomanFared
