الحلقة(55)
والله لهاللحظه ماني مستوعب اللي درتيه ياأمي !!
فتحيه بغضب: توتستوعب مع الوقت اللي صار بعد العيد الصغير العرس وتم الكلام
شبح لأمه هلبه وفكر هلبه : انت اللي ربيتي سليمان دون باقي خوته اللي كانوا قراب من بوي أكثر علمتيه لو مشي في طريق مايوليش من نصه ولو في حد عبي عليه في حاجه يسعاله فيها ويكملها علمتيه أن يختار الحق حتى لو كان ع حساب نفسه ،،تتوقعي ياأمي أني ممكن نرضخ لأمر واقع انفرض عليا من اي مخلوق،،سامحيني ياأمي حنعصيك لأول مرة وأذكري انك إنتي اللي اخترتي ياأمي إنك تبعديني من هني نهائيا ...ولف سليمان وطلع ومقوي قلبه ع الآخر ،،ماكانش يحب حد يفرض عليه شي مايبيشي ماكانش يحب حد يستغل مكانته بش يحقق اللي مبتغاه مش بشرط هالحد يكون مسؤول في دوله حتى الأب والأم احيانا يستغلوا في مكانتهم اللي عطهالهم ربي في الضغط ع أبنائهم بش ينفذوا اللي يبوه حتى لو كان هالشي في غير مصلحتهم
**
هديكا الليله كانت صعبه ع نجيب اللي كان مجروح في قلبه مجروح بقوة ومتوجع هلبه كلام ريما يرن في وذنه ملامحها نظرتها القاسيه نجيب هذيكا الليله كانت أصعب ليله تمر عليه
اما سليمان اللي روح من البلاد في الليل ومش هامه الطريق الغير آمنه ماشي ومش حاس بشي من الضيق والوجع
أما ريما فكانت مستغربه في نفسها علاش مابكتش زي ماتعودت بعد كل موقف يصير معاه علاش حاسه بإن شعورها جامد للحظه استنتجت ريما إن هادي بدايه الشفاء من عشقها المر .....
**
يوم الخميس
الساعه 11 الصبح
ماشي ورجل توخر ورجل تقدم ماشي وهو يرتب في الكلام اللي بيقوله ،،وصل للحوش لقي باب القراج مفتوح قدم شي لمحه قرب أكثر لقاه واقف ويقرا في كتيب أو حاجه زي هكي كانت قدامه غساله
"فهمت ياعمي المكتوب"
:ايه يابنتي تو نعلمك كيف تستعمليها
وقعد الراجل اللي عمره تعدا السبعين يعاند في هديكا الغساله ويوري في مرت ولده كيف تستعملها لين ولعت
:ساااهله ياعمي ماشاء الله عليك ياريتك علمت فتحي الأنجليزي شويه
بوعماد: راجلك زبيكو مهما نعلمه مايبيش يتعلم
:هههههههههه
ابتسم لا إراديا وقدم وتشجع : السلام عليكم
الكنه شبحت لعماد لكن بوه ماباش يلتفت زي اللي مصدوم
عماد: ماعتبتش الحوش قاعد برا مش حنخش لين تقولي خش، التفتله شبح لرجليه بعدين شبحله حول نظارته :خش
خش عماد وقعد واقف بوه التفت لكنته توا زبطي كيف تخدميها
:ايه ياعمي
التفت لعماد: تعالى دخلها داخل
عماد قعد يشبحله ومتعجب
سعيد: ماتسمعش دخلها هيا
عماد لإراديا جي للغساله قعد يعاند فيها بش يدخلها
سعيد: لما تكمل تعال للمربوعه
دخل عماد الغساله ومشي للمربوعه طق الباب
سعيد: خش
خش عماد وقعد واقف شبحله بوه: قعمز ،،قعمز عماد
سعيد: المفروض إن اللي يسيب حوش اماليه وهو صغير ويقعد في الشارع يضيع لكن معاك انت صار العكس ضعت في حوش بوك واستقمت برا منه
عماد: ربي هو اللي سخرلي كل شي بدون تدبير مني
سعيد: الله يرحمه هذاكا الراجل اللي داره فيك اللي ماقدرتش نديره
عماد: الله يرحمه ويسامحه ويجازيه عني خير الجزاء
سعيد ابتسم: وصاحبك ماشاء الله عليه الناس تشكر فيه وتمدح وكلامهم عليه ريت بعيوني مش بس سمعته
عماد: سليمان رفيق روحي وخوي من هالدنيا
سعيد: تبي تتزوج ؟
عماد ضحك: شوركم وليتوا صحاب
ضحك سعيد: وأكثر منك
عماد : ربي يديم الود
سعيد: ايه كلمني ع موضوعك أكثر ...
***
العشيه كانت عيلة الحاج فرج كلها ملمومه ع عالة أمينه بنات وولاد
اريج: يعني خلاص حددتواموعد نهائي
امينه : 13\6الحفله
جمانه: معناها يبدا من يوم عشرة
أمينه : ايه
ندى: معاش مازال غير اسبوعين بس
جمانه: معناها بيبدا الجري
اصيل: مابعدكم كل شي لازم ياخد وقت كان بتطلعوا تبوا ساعتين بش توا أرواحكم كان بتشروا لبس عيد تبدوا ادوروا من 15رمضان كان عرس قبل بشهرين توتوا و....
عبدو: خلاص صدعتلي راسي
اصيل بتهكم: اسفين ياعريس 😒
فرج يضحك: صدق والله وانت كان تكلمت معاش تسكت
امينه: خيركم مع وليدى!! كمل امي كمل نسمع فيك أني
أصيل شبح لعبدو ورقص حواجبه
ندى: والله ياماما اني اخر العنقود ومصمامصة الكرشه مفروض ليا اني الدلع هذا كله 😔
فرج: انتي دلوعه بابا شن تبي تاني
ندى ابتسمت لبوها: ربي مايحرمني منك ياغالي
جمانه تضحك عليهم وهي ادور بعيونها عليهم لقت نجيب مقعمز في التركينه وسرحان وباين عليه الضيق
اريج : بنديروا محضر كبير ترفع راسك بيه قدام نساباتك
عبدو: هههههههههه كويس
أمينه: شنوخطيبتك كملت
عبدو بإحراج : مش عارف
امينه : غير ادوي ع أساس لاأني ولابوك نعرفوا أنك تكلم فيها
جمانه اريج ندى أصيل 😂😂😂😂
عبدو: مازال لتوا
فرج: بالشويه عليه ياأمينه
امينه بضحكه: مادرتله شي
فرج شبح لأصيل : وانت ياولد امك شن صار في مشروعك
اصيل : إن شاء الله اناقشه بعد العيد
فرج : ماشاء الله عليه استاذك اللي جي في عزي صاحبك الشرقاوي الله يرحمه
ندى 💔
اصيل: ايه أستاذ عز العرب كان يقرا مع نجيب
نجيب لما سمع اسم عز شبح لأصيل وقال بحده: تتخرج من هني تجي تخدم عندي
تجي تخدم عندي من هني مالاش بيك لزوم ومكتب خوك محتاجك
اصيل انصدم من كلام نجيب وماقدرش يرد بكل
فرج: خوك عنده حق انتوا أولى ببعض
اصيل بضيق: حاضر
نجيب بإنفعال: بالك مش عاجبك
اصيل شبحله ومتفاجئ
نجيب : تبي ولا ماتبيش بتسيبه مكتبه وبتجيني تحب ولاتكره
كلهم مصدومين في نجيب
فرج : خيرك تتكلم هكي خوك شن قال
اصيل ماتحملش: خوي الكبير ع عيني وع راسي لكن بش بتتحكم في قرارتي ومستقبلي سامحني مش حنسمحلك
ناض نجيب: يعني بعت خوك ع خاطر هالكم قرش زياده اللي يعطيلك فيهم!!
اصيل وجعاته الكلمه وناضله وقدم: لا مش ع خاطر هالكم قرش ع خاطر هو إنسان متفهم يتعامل مع الكل وكإنهم بخبرته عكسك يانجيب وأنت عارف الفرق بينك وبينه في كل شي
نجيب طارتله من كلام خوه هلبه هو كلام ريما مش قادر ينساه يابال يزيده خوه ومن قوة غضبه يضرب اصيل كف يطيحه عيطوا خواته وبوه شده: قدامي تضربه ولا حاسب لي حساب
نجيب وطى راسه لوطا
اصيل ناض وطلع طول ولحقه عبدو
امينه : حي عليا وين مشي ،وقفت قدام نجيب : تعرف تصير في خوك حاجه مش حنسامحك لين يحطوني تحت التراب عطيك مايكسرلك ايدك اللي ضربته بيها وطلعت امينه متعفلقه ولحقها راجلها
جمانه دعوة أمها خلت قلبها ينقبض ونجيب مصدوم لين خلاص طلع من الحوش حتي هو
اريج: شن صارلهم! نجيب وأصيل قراب لبعض تقول توأم كيف صار هكي
ندى: في أن ..نجيب صايرة معاه حاجه خلاته هكي
جمانه: دعوة أمي تخوف
اريج : من ورا قلبها
ندى: قالتها وهي معصبه
جمانه : هذا اللي يخوف دعوة الأم في حالة الغضب باب العرش مفتوح ليها
خافوا البنات هلبه وفات هذا اليوم بصعوبه عليهم
نجيب روح نصافات الليل خش لداره طول أما اصيل فبات عند صحابه الجدد
اصيل بإحراج: سامحني جتك فجأة هكي
سليمان بإبتسامه: ولايهمك تفضل في أي وقت تبي حاجه ناقصك شي؟
اصيل : لاالا صحيت بارك الله فيك
سليمان: وفيك بارك الله هي تصبح على خير
اصيل : وأنت من اهله ،،سكر الضي وطلع ...
***
في نفس الوقت
جمانه كانت مقعمزة ع سريرها مش جايها نوم بسبب اللي صار خدت تليفونها وخشت ع الفيس
"الوضع مايطمنش في الشرق إن شاء الله خير"
وبين ماهي تتصفح يقابلها منشور لرويدا منزله صور بيانها شافتهم ودارت لايك بس ...
سليمان كان ساهر ع إعلان بيديره ع محاضرة حيقدمها برا طرابلس يوم الإثنين الجاي لقي العقد الفريد أون لاين قلبه فز وبدون اراده منه خش ع الخاص طول
(السلام عليكم)
جمانه شافتها وخشت فتحتها بالقصد بش تطلع عنده تم العرض ومابتش ترد ،،سليمان استغرب
(وين غايبه المدة اللي فاتت إن شاء الله خير)
فكرت جمانه بعدين ردت
(أسباب خاصه)
سليمان فهمها وقعد يضحك بصوت عالي "زعلانه معناها"
(هههههههههه)
(معليشي شنو اللي يضحك في اللي بعته)
(ياستي المرة اللي فاتت كنت انبصر عليك بس أنتي حرجتي وسكرتي طول)
جمانه ابتسمت ومابتش ترد
(صايرة معاي مشاكل عائليه وزادت كبرت)
جمانه اضايقت على خاطره
(إن شاء الله تنحل يااارب)
(آااامين)
(عزموك على فاتحه صاحبتك)
(ايه عزمتني أني وأمي وخواتي )
(بتمشي؟)
(إيه بنمشي أني وأمي )
(شن شعورك بعد صار الصلح وصاحبتك حترجع لزوجها وأنتي ليك يد في االلي صار؟)
ابتسمت جمانه وبدت تعبر
(والله هديكا الليله مارقدت من الفرحه حسيت روحي درت أنجاز كبير)
(وفعلا إنجاز كبير وأجره كبير بإذن الله)
(الحمد لله)
( بس حسيت إن بو البنت متقبل الفكره ماتعبناش معاه وحني نقنعوا فيه شكلك اثرت في أهل بيته بقوة)
(كلمته هو شخصيا)
سليمان اتفاجئ وبرغم عمر جمعه بو مرام الكبير الغيرة تحركت(وعلاش تكلمي فيه أنتي حني قلنا أنتي تكلمي زوجته وبنته مش هو ؟!)
جمانه حست بإن سليمان غار عليها وفرحت هلبه
(بس هو في عمر جدي الله يرحمه)
(مهما كان ماتكلميشي مالا حني شنو لزوم مشيتنا كان أنتي اقنعتيه وتم برتوكول وخلاص !؟؟)
(خيرك علاش انفعلت هكي؟)
سليمان استاقض ومعاش عرف يرد عليها
(هو سمعني لما كنت نتناقش مع عياله وكلمني من ورا ساتر)
سليمان انحرررج ع الآخر
(أسف )
جمانه ابتسمت
(حصل خير )وسكرت
سليمان لما لقاها سكرت "أكيد حرجت مرة تانيه خيرني شن جاني معقول ندير هكي أستغفرالله العظيم " سكر ومشي لفراشه وقعد يفكر لين خداه النوم ،،أما جمانه فكانت حاسه بشعور حلو هلبه ورقدت وهي فرحانه....
**
مكالمه هاتفيه حتقلب حياة نجيب كلها...
لارا: شفت إن في وراه ناس تقال كثير يعني بالمكيده مارح يطلعلك معو
صالح: شنو الحل يعني اللي داره مش حنفوته
لارا بخبث وحقد: إذا بدك ترتاح من نجيب لابد تقطع وجوده بالحياة
صالح: نقتله يعني؟!
لارا: ومارح يطولك شي القانون بالبلد ماألو سلطه لذلك رح تكون القصه سهله إذا انحبكت صح
صالح : في راسك شي
لارا بخبث: يس
صالح بمكر: باه ياحلوة ديرلي زيارة في شقتي ونهدرزوا ع راحتنا
لارا بإمتعاض اخفاته "واطي": طيب بشوفك وصكرت ...
"انت اللي اجبرتني يانجيب"...
يتبع .....
#GomanFared
