الحلقة(39)
الحمد لله مبارك مبارك ،،غير توا حط عقلك في راسك ومعاش تفرط فيها مهما صار
ربيع: توبه ياشيخ نقطع لساني ولاننطقها هالكلمه
عماد: يعني يوم الثلاتاء الفاتحه
ربيع: إيه وبندير عشي للأهل والأصحاب ع الضيق يعني
سليمان : كله بالبركه المهم رجعت زوجتك وصغويرتك تحت جناحك الحمد لله
ربيع : الحمد لله
وائل كان يسمع وساكت أو بالأحرى مرت عليه ذكريات مؤلمه
فلاش باك
:انت طلقتها لوحتها في الشارع بدون ماتحط وشاح ع راسها لزيتها هي وبنتك اللي مافاتش عمرها سنه في عز الليل وخليت الناس تحكي عليها وع شرفها ،،تبيني تو نصدق الخترفه متاعك ونردها لك
وائل يبكي: والله ياعمي والله ماكنت بوعيي بشن نحلفلك بس ..نجيبلك الشيخ اللي فك السحر ولانرفعك تشوف السحارة ولاتشوف اللي تسبب فيه ،،ياعمي والله بنتك نحبها نحبها ياعمي ،،وبعدين بالعقل كيف نفرط في كبدي !!التصرفات هادي يديرها أنسان عاقل !!؟
بو مرام: لايديرها ضلالي مايخافش ربي
وائل جي لإيده بيبوسها خواها بومرام : اطلع برا ماليكش عندنا شي لامراة ولابنت وتوا اطلع بالطيب خير مانطلعك مطرود بلاكرامه
الوقت الحاضر
وائل استدرك نفسه وانسحب وخش المطبخ وقعد يبكي بصمت
الوحيد اللي حس بيه سليمان بس فضل يخليه يطلع اللي بقلبه بش يرتاح...
***
خلاص روجتي تو يروح
اريج تبكي: ديما قلبي يقبضني لما يسافر ديما نحس فيه بيمشي ومعاش يولي
ندى: بعيد السوو ؛الراجل عنده إلتزامات يتمها ويروح معاش تخلي الوسواس يتمكن منك
اريج : إن شاء الله خير
ندى : كان نقولك
اريج تمسح في دموعها: شنو
ندى : أصيل خوك يبي هويدا صاحبتي
ندى ضربت خدها ضربه خفيفه: حييي، تصدقي أني كنت حاسه
ندى: ههههههه اني الوحيده اللي ماحسيت بشي
أريج: باه احكيلي كيف صار
رن تليفون أريج تشبح للرقم ورجعوا دموعها ينزلوا
ناضت ندى: ردي عليه روجتي وماتخليشي يمشي وهو متنكد
اريج ابتسمت لأختها وندى طلعت ،،اريج ردت
اريج: الو
ضرار: شن جو
اريج : تمام
ضرار: شنو امورك وشن حال رجلك
اريج حست بإنه يكلم فيها بصيغه مذكر
ضرار: ياشكري حطها غادي ،،اييه امتى تحول الجبس قتلي
اريج ضحكت وحبت دير الجو: بعد غدوة ياروحي
ضرار وجهه ولا أحمر : باه أمتى قتلي أمتحاناتك
اريج بضحكه: الأسبوع الجاي ياقلبي اني
ضرار ارتفعت حرارته : باه كويس ،،ضرار" لحم ولادجاج "،لحم لحم
اريج: صحتين ع قلبك ياغلاي
ضرار خلاص شاد روحه بالسيف بحدا جماعته: تم اني غدوة مع 9متسقد
اريج قلبها أنقبض بس مابتش تكدره: تمشي وتروحلي سالم ياروح أريج نحبك موووت
ضرار ناض ومشي لتركينه مستخطيه: اييه
اريج بدلع : نحبك ضوري نحبك موووت
ضرار: واني نموت فيك ياعسللل
اريج : نهاري الأحرش وسكرت في وجهه
ضرار قعد يضحك عليها "بتهبلني هالبنت"
***
تاني يوم
كانت ملاك توتي لليوم المنشود ،،من العشرة الصبح توتي وادير في تشك ع مفاجائتها بمساعده زملاء عبدو وخواته
وعبدو مايندري عليها منين تزرق
***
درس السيارة قدام محل الحلويات مع الساعه واحد الظهر كان يعد بالساعه والدقيقه أمتي يجي الوقت المناسب اللي اتهيئله إنه ممكن يلقاها فيه
خش ولقاها زحمه كلم واحد من اللي واقفين ع كاشير
عماد: معليشي خوي في وحده هني تتعامل معاكم تجيبلكم في حلويات هيا ادير فيها وانتوا تبيعوا
العامل: قصدك سرور جمعه
عماد بفرح: ايوه إيه هي، بنسأل لو هي مرتبطه بالخدمه مع محلكم بس ولا تبيع حتى بروحها
العامل : استنى لحظه ناديلك صاحب المحل
شويه وجي صاحب المحل: تفضل خوي
عماد: والله نسأل ع سرور جمعه لو هي بس مرتبطه بالخدمه عن طريق محلكم ولا تبيع بروحها
صاحب المحل: هي عندها معمل وتقدر تتعامل معاه مباشرة
عماد: كيف
أبحث ع معمل "برنسس سرور " وحتعرف توصل فيها
عماد: تمام بارك الله فيك
وطلع عماد من المحل "بينسس سيوي ههههههههههههههههه"
***
نجيب في مكتبه لاهي بالخدمه
طقطق
نجيب :تفضل
خش الشخص وقعمز قدامه ونجيب لاهي بخدمته قام راسه بيشوف مني
نجيب بفرح: أووووووووووو بوي شنو هالمفاجأة الحلوة وحضن بوه
فرج :هههههههه اللي يشبحنا مايقولش كنا نفطروا مع بعض الصبح
نجيب بضحكه: ليا قريب 3سنين فاتح المكتب اول مرة تشرفني بجيتك
فرج: المكان متشرف بيكم
نجيب: تسلم ياغالي ،شنو تبي نضيفك وماتقولش لا
فرج ضحك: حاضر قهوة معدله
نجيب : حاضر ...اتصل بالبوفي يجيبوا القهوة
نجيب: نورت المكتب والله فرحتني هلبه بجيتك
فرج: تسلم ولدي
في هاللحظه طقت لارا وخشت نجيب تلخبط قدام بوه خاف منها ادير حركه غلط
لارا :حضرة المهندس هاد التصميم اللي طلبتوا وهي تعطي فيه الملف لمست ايده وفرج لاحظها حتى كيف تشبحله نجيب تمنى الأرض تنشق وتبلعه
نجيب: باه خودي الباب وراك
لاراا طلعت وهي تسحن ونجيب قام عينه في بوه لقاه يشبحله بشك
نجيب: إحمم تبي تشوف شغل المكتب ووين وصلنا خلال هالفترة
فرج: لااني جاي بنشوفك ونبي منك خدمه
نجيب : امر يابوي
فرج : امك
نجيب بضيق : خيرها
فرج : هاين عليك 4شهور لاتكلمها لاتكلمك
نجيب بحزن: هي هكي تبي
فرج: امشيلها مرة اتنين ان شاء الله عشرين مرة ،،الكرامه في كل شي إلا في الحاجه هادي ياولدي
نجيب: تو يابوي هي علاش خدت مني موقف، هذا نصيب ،،يجي منه تقاطع ولدها لهالسبب
فرج: من خوفها عليك،ياولدي طبعك واعر ومش اي وحده تتحمله ،،وهي كانت تشوف في بنت عيله سالم محمد المراة الوحيده اللي تقدر تتعامل معاك
نجيب: لو فعلا تقدر ماكانتش ضيعتني من أيدها
فرج ضحك: ولدي انت اللي ضيعتها مش هي
نجيب سكت لأن كلام بوه ضرب ع الوتر الحساس
فرج: مش هذا موضوعي توا،،اني نبيك تستسمح من امك رهي مش قادرة تتحمل القطيعه بينك وبينها غير تكابر وانت جايب منها هالطبع
نجيب ضحك : حاضر ياغالي
ناض فرج: وين يابوي حتى قهوتك ماوصلت
كيف انفتح الباب وجابوا القهوة قدملها فرج وشرب جغيمتين
فرج : اهو شربنا عندك حاجه هي تو نخليك تشوف شغلك واني نشوف شغلي
نجيب : باه بنسقدك وماتفكرش ترفض
ضحك وطلع هو ولده وسكر نجيب باب مكتبه بالمفتاح
:ال$&^€£# سكره بالمفتاح.....
وصل نجيب بوه برا وكيف بيخش شد بوه يده بالمصافحه وقاله: كان جيت بتبدل الذهب بدله بالماس مش بالنحااس
وابتسم لولده ومشي نجيب فهم قصد بوه وطووول مشي لمكتب لارا خش :ولاء اطلعي شويه،؛ولاء شبحت للارا وطلعت طول
وهو سكر الباب وجاها خبط بإيده بقوة ع الطاولة لين اتنفضت لارا
نجيب بغضب: لولا أن في بيناتنا عقد راه توكلتي من زمان
مانبيش نديرلك شي ياذيك يابنت الناس ماتختبريش صبري...
ناضت وقفت قدامه بدموع: أنت مو معقول مشاعر البشر بتلعب فيا ببساطه بتعمل علاقه امتى مابدك بتترك امتى مابدك وكان العالم تحت امرك فيك تعمل اللي بدك إياه خليتني اتعلق فيك وحبك من كل قلبي ومابعرف شو صار صرت تتغير وتتهرب مني وبعدين تركتني بدون سبب
نجيب: مافي شي بدون سبب لارا انتي ماقدرتيش تتأقلمي معاي ماليناش شهرين بديتي بالنكد والمشاكل وغير هكي حياتك فيها هلبه حاجات غامضه ومؤشر الثقه جيهتك تحرك
وأني اللي مانوثقش فيه مانقدر نتعامل معاه في كل الحالات
لارا : انت في حدا قايلك عني شي
نجيب: زي مني
لارا بأرتباك: اي حدا مثلا ريما خطيبك السابقه
نجيب: ريما ماهيش إنسانه تافهه عقلها كبير ولما تعطي ظهرها معاش تلفت وراها
لارا بتهكم : يااااه ليش تركتا لكن
نجيب سكت وبعدين قال: لارا مانطولهاش وهي قصيرة كل شي تم وانتهى، تبي تكملي في المكتب بإحترامك اهلا وسهلا بديري جو الصغار مع السلاامه وهو طالع
"اصحك تفكر أن ممكن ترجع تطلع فيك مرة تانيه اللي متل ريما متل ماقلت مارح تطلع وراها وانت صرت وراها من زمان ورح تطلع بس لقدام وتلاقي إنسان قلبوا كبير وبيعرف يحب ويصونا ويصون حبا وهذا الشخص مستحيل يكون انت "
نجيب طلع دون مايشبحلها وهي خدت شنطتها وطلعت من المكتب ودموعها ماوقفوش
***
مع العصر
عبدو : مروان انت متأكد
مروان: زي مانشوف فيك في قسم العظام
وعبدو يتصل ويعاود بملاك لارد
ماشي ورا مروان
عبدو: انت وين رافعني😕😕
مروان ساكت طلعوا من البوابه خلفية لمبنى المستشفي
عبدو : تي غير وين ملاك !!تي وين ماشي بيا
مروووان ياجح...فجأة فتح عيونه ع وسعهم
"هابي برزدي تو يو هابي برزدي تويو هابي برزدي تو عبدو هابي برزدي تو يو"
هما يغنوا وهو واقف ويدور بعيونه ع حاضرين زملائه صحابه خوته ماعدا جمانه ونجيب وجت عينه في عين ملاك وقعدوا يشبحوا لبعض بنظرات كلها حب وهيام وملاك خجلانه هلبه
جاهم عبدو بعد ماكملوا وسلموا عليه وعايدوه لين وصل في ملاك
عبدو: هذا علاش ياجحشه ماترديش عليا اليوم
ملاك بأبتسامه : إييه ؛شن رايك في المفاجأة
عبدو: وشنو بيكون رأيي اكيد حلوة عمره العسل مايجي منه إلا الحلو
ملاك تحشمت ،،شويه و
قصوا التورته وعطوه الهدايا وبالنسبه لعبدو كان يوم من اجمل الأيام في حياته
.....
والله فقدتك إنتي ونجيب
جمانه: اهم شي انت فرحان
عبدو: فوق ماتتصوري نحس في روحي محظوظ بملاك
جمانه: إيه والله بنية كويسه وطيوبه وخلوقه وحتي هي محظوظه بيك ع فكره
عبدو: سلم حبيبة خوها 😚
جمانه تضحك
عبدو : حقه جموني
جمانه : نعم
عبدو: فتحت معاك موضوع خالها
جمانه: ايه فتحاته وأني رفضت
عبدو: والله راجل كويس ياجمانه
جمانه: لكن مايمشيش معاي
عبدو: ماعندي مانقولك عندك حق لازم تاخدي شخص يكون بينك وبينه قواسم مشتركه بش تنسجمي معاه
جمانه اذكرت سليمان طول
جمانه: إن شاء الله خير وفي النهايه كله نصيب
عبدو: ربي يعطيك اللي فبالك يارب
جمانه وجهها حمر: آميين
***
"تو هذا معمل فيه عشرين وحده والرقم الموجود في الصفحه متاع المعمل اكيد مش ليها بروحها،صاحب المحل جري بيا "
جرب يتصل وكل مايتصل يرد عليه راجل
"الخسيس صاحب المحل يحسابني بناخد شغلها منه مريض
مافيش غير أني نوقف قدام المحل ونراجيها تجي هو هذا
***
تاني يوم عمك عماد من العشرة مدرس قدام المحل ويراجي ساعه اتنين تلاته وماجتش
عماد " ياعليك تبهديله وخلاص"
فجاة لمح سيارة زي الباص نزلت منها وحده وطلعوا من المحل عاملين يدخلوا في صناديق بعدين شاف البنت واقفه .....
يتبع .....
#GomanFared
