الحلقة(66)
فاتو يومين ...أريج في حالة صدمه ماتتكلم مع حد فاتحه عيونها وخلاص وسرحانه قلوب أحبابها تتقطع عليها ولاواحد قادر يديرلها شي ،،جمانه نفسيتها كانت تاعبه هلبه كانت كل ماتشوف أريج بهالحاله تزيد تتعب أكثر ..
في ثالت يوم لأريج في العياده ...
طق الباب طقتين خفاف بصبعه ماتلقاش أي رد بعد تفكير للحظات فتح الباب لقاها مقعمزة وسرحانه الوجه أصفر والعيون الحلوة ذابله ..وجعاته هلبه خش وسكر الباب وقف بحدا السرير يشبحلها وعيونه متجمعه فيهم دموع
"كاميليا"
ولأول مرة اريج ادير ردت فعل شبحت لمصدر الصوت شبحتله هلبه وأذكرت...
<< وردة: لما نطلبوك لمعز وأنتي ترفضيه مايجيش تتعاملي معاه بطريقه وكأنه ماصار شي لا ودلعي فيه عزو ومش عارف شني
الولد وجعه خاطره لما ردتيه وأنتي مستهترة بيه لهالدرجه >>
رجعت لفت وجهها زي مكان
معز ابتسم وقعمز جنبها ع السرير: مذكره اسم كامليا لما جدي الله يرحمه كان زارع زهرة الكاميليا وكان محرص علينا كبار وصغار ماحد يجي جيهتها كنت تحبيها ودرتي عيطه ع خاطرها وسكرتي راسك تبي تقطفي وحده،،ضحك،،وقتها قعمزتي مقابله المكان المزروعه فيه الكاميليا وربعتي رجليك وايدك وقلتي مش مروحه لين تاخدي وحده ،،لتوا مذكر شكلك كيف كان عيونك مدمعات وخدودك حمر كنتي قارنه حواجبك ع أساس واعرة
اريج ابتسمت إبتسامه خفيفه شبحها معز وفرح كمل كلامه: خليتي جدي بروحه يقطفلك منها بش روحتي هذاكا اليوم
اريج بضحكه من وسط الدموع: حطيتها في طاسة اميه وحطيتها في روشن داري وقعدت رادة بالي منها لما ذبلت درت ع خاطرها عزي.. وضحكوا هما الزوز
معز قعد يشبحلها وفرحان هلبه أنه هو الوحيد اللي تجاوبت معاه ،،شويه ودموعها نزلوا : أني صارلي زي هديكا الوردة حد سكر راسه عليها وقطفها كان موهمها إنه حيدير باله عليها ومش حيخليها تذبل ...بس ذبلت ..وهو دار ظهره ليها ولاكأنه شافها ولاعرفها ...وبدت تبكي
معز قلبه كان ينعصر عصر ع خاطرها : انت زي الكامليا صح لكن ماتذبليش بكل حتى وأنتي هكي قاعده حلوة وجذابه وخدودك موردات رغم إنه وجهك أصفر
اريج شبحتله : علاش جيت
معز ابتسم: بنت عمي تعبانه وجيب نزورها
اريج: زيارة المريض لازم تكون خفيفه
معز: ههههههههههه، لسانك الطويل مشكله
اريج ابتسمت غصب عنها ...
معز ناض : تمام مش حنثقل عليك ونخليك ترتاحي
طلع من جيبه حاجه ،كانت مذكرة صغيرة لونها أزرق كحلي
اريج: شنو هذا ؟
معز: امرؤ القيس الليبي
اريج ضحكت
معز : كسدي عليها الليله واضحكي وتسهوكي براحتك
وجاي بيطلع
"معز"
قلبه قريب يفر 💓
التفتلها اشرله براسه وكأنه يقوللها شنو
أريج: شكرا
معز ابتسم وبنبرة حنونه وهاديه: العفو ..وطلع وسكر الباب
أما أريج فقعدت تشبح هلبه للمذكرة وفتحتها وبدت تقرا ...
***
اليوم اللي بعد فرق السو لعزي أم سرور
عماد كان يتكلم بالتليفون وسكر وهو خاش للخيمه سمع زوز يتناقشو
:دبر راسك انت الكبير
: ياراجل انت حالك خير من حالي حوشك ملك وخدمتك ثابته مش زيي أني أيجار ونخدم ع تاكسي وفي رقبتي مراة و4صغار
: ماليش علاقه مش مستعد نتحمل مسؤوليتها أصلا هي وتهاني مايتحابوش وحنقعد في المشاكل
: ع أساس هي وساسيه يتحابوا ؟!اختك لسانها طويل ومش سالم منها حد
: باه تقعد بروحها في الحوش
: لاياغالي يفتحلها ربي اني الحوش بنبيعه بش ناخد حصتي من الورث ونسقم وضعي
:تقعد في حوش أختها وخلاص لين تتزوج
:ايه وبالمرة نستعجلوا الناس اللي جايينها يفوتوا 40يوم ودير عرسها ولاع الساكت المهم تنتلف
: هو هذا
عماد معاش قدر يتحمل طلع من غادي وهو مصدوم مش مصدق اللي سمعه بكككل كيف خوتها من لحمها ودمها يدووا عليها هكي كيف هانت عليهم اختهم يتنصلوا منها ويخلوها في حوش الغريب !!؟ عماد من صدمته ولع سيارته ومشي طووول....
**
نجيب فك الجبس ليه يومين وبدي يرجع زي مكان حتى جرح عمليته بادي يبرا وهو ماشي في الكليه تلاقى مع صديقته ❤
ريما بإبتسامه :مبروك مبروك فكينا الجبس
نجيب مبتسم: تعرفي نبرة صوتك وأنتي فرحانه زي النغمه تطلع حلوة بالمرة
ريما : احم....شن حال جرحك 😳
نجيب بحب: الشي هذا بالذات ماتسألنيش عليه جرحي هذا ريته جرح كل حبيب
ريما قلبها يدق بقوة : احم ...حقه شن صار في ورشة العمل حتكون فيها
هز راسه بإيجاب وهو مبتسم
ريما بتوتر: كويس
ع جية عبد الملك: مساء الخيرات
ريما بإبتسامه: مساء النورات هههه
عبدالملك ضحك
نجيب بأمتعاض: مساء الخير😑
عبدالملك : عز بيروح غدوة
ريما : ايه كلمني ،،انت شنو مقايله
عبدالملك غمض عين وفتح التانيه: درت دعايه لمطعم خالك
ريما ضحكت: تو تشوف بيحول المكتب غادي
عبدالملك : والله ياااريت المكان حلو وديكوره مميز وتراثي
ريما: عجبك هلبه
عبدالملك: اسألي خالك قداش جوه زباين بعد جيناه أني وياك هداكا اليوم
ريما بمزح: قول من الأخير تبي نسبتك للدعايه هههههه
عبدالملك: تعجبيني وأنتي فاهمتيها وهي طايره ،،وضحكوا الزوز كملوا كلامهم وهما منسجمين نجيب حس روحه هوا بيناتهم ولاليه لزوم حتى ريما نست وجوده
حس بشعور بالغربه... الوحده ..شعور خيييييي وخلاص انسحب بشويه ومشي وهو قلبه موجوع كان يستنى ريما تستاقض بيه لكن مع الأسف ماسمعش صوتها ينادي في إسمه....
***
سليمان سافر لبريطانيا مع بوه وأمه بش يشوفوا أخته سلمى قريب طارت من الفرحه لما شافته عاش فرحة انه يكون خال للمرة الأولى ونسي مؤقتا كل شي ،،لكن ياريت فلتر الحاجات اللي لازم ينساها لإن في حاجات نسيانها كارثه
محمود زي المهبول يدور كيف يجيب حق جرعات أمه اللي سليمان وعده إنه يتكفل بيهم بس اللي صار معاه نساه كل شي ،،اضطر محمود يدير شي ليه زمان مبطله "الخنبه"
خنب من صاحب محل الأثاث اللي يخدم عنده مبلغ 5000دينار كانوا محطوطات في سيارة الراجل مأمن محمود عليهم لأنه من طرف سليمان بحكم معرفته بيه
وشري الجرعه ومشي يجري للمستشفى اللي فيها أمه بعد مالزتهم العيادة اللي كانت فيها لأنهم مايقدروش يدفعوا مصاريفها ،،وصل بس مالقاش أمه عقله وقف وقلبه قعديرجف من الخوف
"معليشي وخيي المراة اللي كانت راقده هني توفت اليوم الصبح ياريت تبدا في إجراءات الوفاة" ومشت الممرضه
وخلت وراها شخص مصدوم ادمر نهائيا خسر خدمته وخسر نفسه وخسر أمه طاح ع ركبيه وقعد يبكي بحرقه وألم....
***
ندى: ماما
امينه : خيرك
ندى: ماما اليوم بتجيني هويدا تتغدا عزمتها ره
امينه : مرحبتين بيها حتى سوسن صاحبه أريج جايه
خش اصيل
أصيل: آااه ياقلبي على حبيب قلبي اللي يفحفح 😍
امينه بضحكه: كان تلقاه كل يوم عصبان
اصيل بعشق: يااااريت😍😍😍
ندى: يحب العصبان اكثر من هلبه ناس🙄
اصيل فنص فيها ،،وهي تضحك وترقص في حواجبها
أمينه ركزت عليهم: خيركم
أصيل: شي ياأمي غير هالقمله ديما راسها وراسي عارفتيها
ندى: تو نوريك القمله شن دير فيك اليوم وطلعت من المطبخ
اصيل : اشي الرتيله 😕
أمينه بشك: شن شاده عليك قول
اصيل بأرتباك: شن بتشد عليا شن تقولي ياأمي ربي يهديك ،،لكن تو نوريها
امينه: صاحبتها اليوم بتجي تقرا معاها ماتحرجش اختك قدامها
اصيل : هويدا ؟!😍😍
امينه فتحت عيونها ومتفاجئه
اصيل : احمم ..المهم لما يطيب ديرلي رنه وطلع بسرعه
امينه قعدت تضحك : مايطلع منك ..لكن والله البنيه حلوة ..
***
روحت أريج للحوش واستقبلوها اهلها أستقبال عروسه جيت سوسن غيرتلها جوها بخفة دمها وروحها الحلوة حتى هويدا اللي كان اصيل يزربز باش يشوفها داروا عليه جو ومشي النهار بضحك وبصارة اريج كانت تتناسى في آلمها مؤقتا اما جمانه فحالها تغير هلبه ولت منطويه وتجامل وبس اللي صار معاها ماراح من بالها ولانست سليمان نهائي ..
**
وائل: في حاجه صايرة أكيد
ربيع: والله ماني عارف لاعاد ريته لاهوا ولاعماد وسمعته بيه اليوم بس إنه مسافر ...
طق باب الشقه ناض وائل فتح ولحقه ربيع
وائل: نعم تفضل
محمود بملامح جامده: الشيخ قاعد
وائل: لاوالله مسافر ليه فترة
محمود: علاش
وائل شبح لربيع وربيع جاوبه: اخته انزاد عليها عيل ومشي يشوفها
محمود ابتسم بإستهزاء ممزوج بألم: لما يروح قوله اللي يعطي وعد يبدا دين عليه ولازم يوفيه يابال لوكان شيخ
وقوله مبروكه عند ربك ...وجي بيمشي
وائل: لحظه لحظه ..من أنت
محمود ابتسم بسخريه : قوله الخفاش ..ومشي طول
ربيع :ماارتحتش بكل
وائل وهو يسكر في الباب: ولاأني ...يستر الله ....
يتبع .....
#GomanFared
