الحلقة(1)
طرابلس
الساعه 5:30 فجرا
في أحد مساجد العاصمه المشهورة صوت جميل يتغني بالقرآن ينسمع في الحي اللي فيه المسجد في داخل المسجد عدد المصلين كبير فيهم الشاب والشايب والطفل يأدوا في صلاة الفجر وكلهم خاشعين في معاني الآيات اللي يتليها إمامهم الشاب الثلاثيني واللي كان معروف بين أهل الحي ب"الشيخ"
انتهوا من أداء الصلاة واللي توكل ع ربي بش يشوف رزقه واللي قعد بش يسبح ويذكر الله واللي روح لحوشه بش يكمل باقي نومه ....
في الشاب عمره مايفوتش 20سنه تقدم لبداية الصف ووصل لعند الإمام اللي قاعد مقعمز في محرابه ويذكر ربه قعمز الشاب
محمود : السلام عليكم
تقبل الله ياشيخ
الشيخ عرف الصوت أبتسم وألتفت لمحمود ومد يده وسلم عليه بإيده الزوز
الشيخ: وعليكم السلام ورحمة الله وبركاته وينك يامحمود
معاش شفناك ليك وحشه
محمود:والله ياشيخ صارت معاي ظروف لكن الحمد لله عدت
الشيخ :إن شاء الله الوالدة حالها باهي ؟
محمود:الحمد لله حالها أحسن تسلم عليك هلبه وتدعيلك وقالتلي لازم تعزمه نهار ع الغدي وكان ماجاش مش مسامحاتك !
الشيخ "ضحك": أنت عارفني مانحبش نكلف ع حد لكن مدام فيها سماح والدتك تو نجي بإذن الله مايهونش عليا تغضب عليك بسببي
محمود :إيه والله ماصدقت رضت عليا
الشيخ شد ع إيد محمود :خليها ديما راضيه ره بدون رضاها ماتسوى شي
محمود ابتسم:حاضر ياشيخ هي أمالا نستأذن توا ونشوفوك إن شاء الله وماتنساش العزومه نهار نكلمك نقولك تفضل مانبيش عذر
الشيخ"ابتسم": حاضر رقمي عندك أمتى تتصل وتقول تم نجيك طول
محمود: السلام عليكم
الشيخ :وعليكم السلام
شبه فضي الجامع والشيخ طلع من الجامع بش يشوف حاله طبعا هو طالب دراسات عليا في كلية الدراسات الإسلاميه ركب سيارته وبطريقه للجامعه... +
*********
في نفس الوقت
في أحد أحياء طرابلس
في فيلا متكونه من دورين كان في الدور الثاني في وحده من الديار صوت حلو يتغنى بالقرآن بس كان صوت خافت شويه لإنه صوت أنثوي ،،بعد ماأدت صلاتها قعمزت "جومانا "تقرأ في القرآن زي عادتها وفي نفس الدار كانت معاها أختها راقده في سابع نومه 😅
كملت جومانا قراية القرآن ورجعت مرة تانيه تنوض في أختها
جومانا: ندى ندى نوضي تحركي صلي ووتي روحك للمدرسه
ندى: 😪😪😪😪
جومانا :مستحيل تنوض بذوق الإنسانه هادي
جومانا تهز في أختها : ندى نوضي نوضي ياندى نوضي بسرعه
ندي ناضت مخلوعه وعيونها حمر
ندى :خيرك شنو في قولي
جومانا بعدت شوي :نوضيي تحركي لمدرستك ولفت بتطلع
ندى: خزي هذا غير دايرة روحك شيخه وكل يوم تنوضي فيا بخلعه ماتعرفيش أن ترويع المسلم حرام !!
جومانا"ضحكت " : نوضي تحركي بلادوة فارغه خير مانبعتلك نجيب ينوضك ؛؛وطلعت وسكرت الباب
وندى ناضت جري طبعا اسم نجيب معناه الرعب بالنسبه ليها
طلعت جومانا من الدار وفي نفس الوقت أنفتح باب الدار اللي جنبهم طلعت أختها أريج طارحة لبس ومكياج والعطر معبي الدنيا
جومانا :صباح الخير
أريج:صباح الخير
جومانا :اروجه مش...
أريج قاطعتها :بالله عليك وفري مواعظك لنفسك طالعه قدام بوي وخوتي ولبسي مستور لاضيق ولاقصير
جومانا:والمكياج والعط....
اريج قاطعتها من جديد: ارجوك معاش تدخلي فيا انتي نصحتني مرة ساد واللي ليه الحق يدخل فيا بس في هالحوش هو بابا وماحد ليه سلطه عليا غير
وبعدين إنتي خديتي غايتك في اللبس والمكياج حتى الحجاب مالبستيه إلا لما خشيتي الجامعه في هالسنتين اللي ألتزمتي فيهم جايه بتغميني معاك بعد ماعشتي بالطول والعرض !؟؟
جومانا:خلاص خلاص إنتي حرة وأني أسفه لأني ننصح فيك ونبيك توصلي بكري للخير اللي اني وصلتله متأخرة ونادمه ع كل لحظه ضيعته قبله،،لكن معليشي"إنك لاتهدي من أحببت"
ونزلت جومانا بسرعه بش ماينزلوش دموعها قدام أختها وهي نازله تلاقت مع خوها عبد الحميد
عبدو: خيرك جمونه شنو في ؟!!
جومانا:صباح الخير
عبدو :صباح النور قوليلي خيرك ؟!
ع نزله أريج
أريج :صباح الخير عبدو
عبدو :معناها الفرخه أريج
أريج:صبح ياااربي
عبدو :تكلمي زين ولاسكري فمك
جومانا :خلاص تعالى افطر مداريتلك كيكة سميرة اللي وصيتني عليها سهرت عليها ع خاطرك
نزلت اريج تشقلب في عيونها وعبدو قريب يطلق عليها الموت
ونزلوا وراها هو وجومانا
♡♡♡
طبعا عيله جومان
بوها فرج تاجر ذهب معروف
أمها أمينه موجهه قديره في التعليم
خوتها أكبرهم
نجيب مواليد 83 فاتح مكتب هندسه معماريه من 2010 وبرغم الأحداث قاعد محافظ ع نجاحه وخدمته ؛حازم وماعنداش الريح وين ادور واعر في الحق وخاطب
عبدالحميد مواليد 86 طالب طب إمتياز طيب هادي بس لو عصب نار حمرا جومانا عنده غير وأقربله حد في حياته
أريج مواليد 90تقرا في القانون أنانيه بطبعها في غرور وعندها حساسيه اتجاه أختها جومانا بشكل كبير ادير مافي راسها حتى لو كلت طريحه نباش القبور
أصيل مواليد 92 جوه مليح لكن محترم يقرا في كلية الهندسه ومثله الأعلى خوه نجيب في كل شي ..
اخر العنقود ندى مواليد 96 تقرا في الثانويه شيطانه
لكن شاطرة هلبه في قرايتها وعنده طموح تبي تخش طب وتتخصص جراحه وتكون طبيبة عالميه ع حسب كلامها 😅
جومانا مواليد 89 بطلة قصتنا بنت محترمه هلبه خلوقه تخش القلب وجميله مواصفتها ع الأشقر عيونها خضر مايلات للأزرق ليها مكانه خاصة عند أفراد عيلتها حتى نجيب يقدرها ويحترمها طالبه في كلية العلوم
التزمت خلال سنتين وإلتزامها مكانش بسرعه كان بالتدريج وبروحها بدون تدخل حد كانت تحب تقرا في الدين وتتفرج ع برامج دينيه وتسمع شيوخ لين وصلت لمرحلة الإلتزام الكامل العبايه الشرعيه والخمار وخشت للجامع لحفظ القرآن
عائلتها منفتحه بس بحدود خواتها طبعا مش محجبات لكن لبسهم ديما محترم وخوتها ملتزمين بدينهم إلتزام عادي ،،وتربوا ع إن كل شي يديروه بقناعة تامه
**********
كلية الدراسات الأسلامية
درست سيارة كامري بيضا نزل منها الشيخ خش للكليه يمشي بوقار ويلقي ع أي مجمع يخطم جنبه السلام حتى لو كان مجمع بنات ،،وكان ديما يلبس في اللبس العربي الطرابلسي ومايحطش في الطاقيه ع راسه كانت طلته بهيه وطلعته مافيش احلى منهاربي عطاه قبول بين الناس وعطاه الجمال خلقا وخلقه طول وعرض وقد تقول سرايا 💓
كان جميل بكل معنى الكلمه قمحي شعرته لونهاقصلي ولحيته قصليه تبرق في الشمس واللي زايده عيونه الكبار الزرق تقول بحر ورموشه اللي زي حد السيف في طولها ونقرة الزين اللي جايته ع اليمين اللي حتى لما يتكلم تبان برغم اللحيه طبعا لحيته مش كبيرة مهذبه ومنظرها حسن
كان حلم كل بنت تشوفه لإنه فيه كل شي تتمناه كل بنت
بس هو كان عاف نفسه عينه مايقيمها من وطى لو جت قدامه بنت أو كلموه زميلاته ع القرايه وفي منهم اللي كانت تتحجج وهو كان يفهم فيهم وكان يتهرب منهم ديما ويتحاشاهم برغم إنه وصل للثلاتين لكن ماكانش مفكر في الزواج ولابأي شكل كان همه كله خدمه دينه وبلاده كان همه هذا كبير شاغله عن كل شي يخص حياته الشخصيه
وطبعا واحد زيه زي ماعنده أحباب هلبه عنده أعداء هلبه بالذات بعد 2011 وحيواجه هلبه حاجات نتيجه حبه لوطنه ووقوفه مع الحق ديما ومكانش يهمه شنو ممكن يصير فيه وديما يقول"دام أني مع ربي ربي حيكون ديما معاي" 1
رايكم♡♡♡♡♡♡
#GomanFared
