الحلقة(91)
خش سليمان بعد ماروح من صلاة المغرب للحوش لقي امه وحناه واخته مقعمزين في الصاله ويشربوا في الشاهي
سليمان: السلام عليكم
شبحوله التلاته بصوت واحد : وعليكم السلام
سليمان قعد ساكت ويشبحلهم كيف يشربوا في الشاهي ولاكأنه في شي ..
سليمان : اححم ..شن صار
سلمى بضحكه: واحد نقز واحد طار🤣
سليمان : 😒
امه شبحتله بنظره حاده: خليك صريح معاي وقول الحق
سليمان تفاجئ ورفع حواجبه وبضحكه: علاش امتى كذبت عليك
فتحيه: انت مش شايفها بكل
سليمان: ههههههههههههه استغفر الله العظيم ..والله ماشفت حتى ظفرها ..برغم إني مش مضطر نحلف
فتحيه تشبحله ع جنب وساكته ...
سلمى بتصنع: ياخوي شن بنقولك..هما عيله كويسه صح بس البنيه مش ولابد
سليمان: كيف ؟
سلمى: شوينه وخيي الحق ..ماتجيش في جنبك شي زيد فكر وخيي ره هذا عمر ..
سليمان: مش مهم وقلتها من قبل اخر همي ..
تبرة: لوح عليك وليدي قطاف اختك ..العيله اللهم صل ع النبي والبنيه بزايد زي الغزاله
سلمى بضحكه: والله ياوخي نشبحلها ونفكر في صغاركم كيف حيطلعوا طروف مطرفه
فتحيه : ماتبالغوش😒
تبرة: بالله اسكتي ترا تي هي لما خشت عيونك قريب طلعوا فيها ...قد وطول وسماحه ولا عويناتها ولا الشعر اللي يضرب لوين مافيها لولا
سليمان:💓💓💓💓💓💓❤❤❤❤❤❤❤💕💕💕💖💖💖💖💖💘💗💗💗💗💗💗💗💞💞💞💞"بإختصار راح في عالم تاني🤣"
سليمان وجهه احمر: المهم تفاهمتوا
تبرة: اللي هناك قلناه حتى ع موعدالعرس وهما قالوا توا يردوا علينا
سليمان بلهفه: وامتى قالوا بيردوا
فتحيه حمقت وناضت: وانت خيرك مستعجل ماهيش طايرة
سليمان: هههههه تي غير وين ماشيه ياحلوة
فتحيه وشاده ضحكتها: برا عليا غادي بنمشي نشوف العشي
ومشت للمطبخ
سلمى: استعدوا من توا حي عليكم حي 😂
سليمان : هههههههههه ...المهم عجبوكم
سلمى وترقص في حواجبها: هلبه هلباااات 🙄
سليمان ابتسم وهز راسه ايمين وايسار وتوجه لداره ..
***
فرج : وبنتك مش معارضه ؟
امينه: تبي الحق حسيتها فرحانه ..
فرج ابتسم: وهذا اللي نبيه ..فوتوا يومين وردوا عليهم ..
امينه ابتسمت : حاضر...
***
كنان بعد اكثر من 4ساعات قرايه ..اتكى ع سريره وخدي تليفونه وللفيس طول ومعروف وين مخيم في حساب ندى😁.....المهم لقي تاق من ايوب لندى في صفحتها المناشير هادم متاع ..تتمتع طالبة الطب بخفة الدم والجمال والخ ..اكيد عرفتوهم...بدي عمكم كنان يسحن خش للتعليقات لقي ندى معلقه بسمايل هذا😎..ورد عليها ايوب "يحق لك مالا يحق لغيرك "ولقي ندى مدايره لايك بس..
قريب طار ..خش هكرله حسابه وسكرهوله 😂
شويه ..وخش لندى ع خاص بأنفعال ..
"ماتعطيش وجه لحد مرة تانيه واللي يبعت تقبليه ارزني "..بعتها وهو معمي من الغضب ...وندى كانت مسكرة وقتها ...من غيضه خش دوش قريب نص ساعه ولبس وطلع برا الحوش...
***
ايه حفلتها التلاث وغدوة سهريه ...
معز: الصاله قريبه عليكم ولابعيده
اريج : تعتبر قريبه صاله (******)
معز: كويس ..شن جو القرايه
اريج : ماشيه الحمد لله
معز: في موضوع في راسي بنديرهولك غير يفوت الأسبوع هذا
اريج بتساؤل: شنو ؟
معز بضحكه: في وقته حتعرفيه ..واطمني موضوع يخصك بروحك مايخصناش مع بعض ..
اريج : تمام ..هي توا بنسكر عندي قرايه "تتحجج"
معز فهمهاوتنهد: تمام تصبحي ع خير
اريج: وانت من اهله..سكرت ..وارتمت ع السرير وتفكر في حالها وكيف حيصير في علاقتها بمعز ...
***
ندى كيف سكرت من هويدا وخشت ع الفيس ..مالقتش التاق متاع ايوب استغربت ..بعدين لقت اشعار الرساله خشت قرتها وانصدمت...اضايقت هلبه وردت بكلمه وحده بس
(شكرا..) وسكرت
***
في البلاد ....
امباركه قريب تطربق : إن شاء الله ماتمله حاجه يااربي
لطيفه: وطي صوتك ..
امباركه: تو تشوفي شنو يصير غير يتزوج بس ويجيب الطرابلسيه ..اللي هناك بياخده الباشا ..
لطيفه:مستحيل عمي يظلم ولاده
امباركه : اضحكي حتى انتي ..ضو قالي بوه يلمح بإنه حيسلم معرض السيارات اللي في طرابلس ليه بعد شافه كيف ممشي شغله في محالاته وعنده في التجارة..غير يتزوج الطرابلسيه الخير اللي غادي كله حيولي تحته ..
لطيفه: معقوله ع خاطر بياخد من غادي..
امباركه: ايه يادماغ لإن الزواج حيقيده وحيخليه يحط عقله في راسه ويبعد عن الوجيج اللي هو فيه وهكي حيبدا جاهز بش يستلم كل شي واللي خداها طرابلسيه معناها حيقعد غادي من غير شي عايش غادي ..اححححح..قبل نبيله زينب بش تشده هنايا لأن ماليها مش حيخلوها تبعد عليهم لإنها مريضه ويضطر يقعد هنايا وزينب درويشه وغشيمه ساهل تمشيها ...
لطيفه : عليك هم وخلاص ..
امباركه : لكن تحسابيني بنسكت تي والله ماني مهنيتهم ببعض ولامخلياته ياخد شقا رجالتنا وتعبهم ع الواتي...
مايندروش ع سكينه وذانها ع الباب👂...
***
اليوم اللي بعده ...
كان واقف ويستنى فيها ..مارقدش طول الليل وهو ياكل فيه الندم ع الكلام اللي بعتهولها في لحظة غضب . غيرته اقوى منه ..كان يلقى يحطها في قلبه ويسكر عليها ومايشاركه حد فيها...
هاي كنان ..
كنان التفت : هاي
صفاء: شن الأخبار
كنان: فاين ثانكيو
صفاء: من بكري نشبح فيك واقف بروحك وكأنك تستنى فحد
كنان ابتسم مجامله: انتم امتى عندكم محاضرات؟
صفاء ابتسمت بغرور: الساعه 10
كنان شاف لساعته لقاها 9:30
صفاء : اممم قالوا انك تعزف وتغني
كنان ومش لاهي بيها: ايه
صفاء تسحن تبي تلفتله انتباهه بأي طريقه : كنت تقرا في اوكرانيا
كنان : امم
صفاء : تمام ممكن نطلب منك طلب
كنان فوق من نفسه: تفضلي
صفاء بخبث: ماده علم الحيوان مدرهتلي كبدي واني نبي مني يساعدني فيها ..هو صح ايوب يقري فيا بس مش هذاكا الشرح يتفلسف بس
كنان ركز معاها: انتي بس ولا القروب كله ..؟
صفاء: الصراحه هو معرفة ندى والقروب يجاملوا فيها وخشوا الكورس ع خاطرها وبس ..
كنان: علاش على خاطرها..؟
صفاء بخبث اكثر: هو اني مش متأكده بس ع الأغلب في بيناتهم شي ..
كنان بان وجهه انه اتكنطى لين خلاص قلب وجهه للجهة التانيه لقاها جايه مع هويدا ..نسي كلام صفاء ومايجي منه ومشالها ...وقف عليهم
كنان : صباح الخير
هويدا :صباح النور
ندى مابتش ترد
كنان: ندى ممكن شويه بس
شبحتله شويه وبعدين شبحت القدام : عندي محاضرة
كنان: غ...
صفاء: هيا وقت ع المحاضرة كان عطلنا مش حنلقوا مكان
مشوا هما التلاثه وكنان اضايق هلبه ومرر صوابعه ع شعره بقوة وتلفت بيمشي لقي ايوب جاي من بعيد خطم من بحداه وشبحله بكبر ومشي للبنات وقفهم وقعدوا يهدرزوا لين خشوا داخل ...وكنان بينفجر....
***
قالبه الحوش ع راسها تغسل في البساطات استغلت مشي شيبانيها لعزي برا طرابلس وقعدت تغسل في الباسطات
لابسه قفطان قصير لفوق الركبه وكان ربع كم وقايمه شعرها كله فوق وطايحه دعك في البساطات
عماد خش يشبح في الميه والصابون : ياستير هذا شنو ..خش داخل وشافها كيف تدعك في البساطات ومنظرها كان يضحك ويهبل في نفس الوقت🤣😍
عماد: نعاونك ياحلوة
سرور رفعت راسها وشافته شقلبت عيونها وكملت كدان
عماد بيخشلها داخل ..شافته قامت المكنسه فوق
سرور: هيييييي خليك غادي تشبحش فيا قاعده نكد😡
عماد بضحكه: ياودي بناخد عنك المكنسه وبنعاونك بس
سرور: بيا غادي قلت
عماد ماباش يعدل عليها ضرباته بالمكنسه حسها وتلبزوا حوايجه بالميه والصابون ..تكنطى ع الأخر وجاها يجري بحذر لكن هي بتهرب بسرعه زلقت وقريب اطيح خلاص
عماد شدها : هكي كويس يامهبوله قريب تكسرتي
سرور تبي تتخلص منه: حول عليا
عماد : لاا
سرور: حول قلت تحشششم
عماد: راجلك ياغبيه ..
سرور : لاا حول ..قعد حاضنها بقوة هي اشبح شن صارلها قعدت تشبحله وهفتت وهو يشبحلها وعيونه ذابلات وهي مستاكيه قرب اكثر ومعاش يفصل بيناتهم شي ..
ياسرووور
سرور وعماد 😨😨
بعدوا عن بعض وسرور خشت تجري
حنان خشت للحوش: كيف حالك عميده
عماد: كويس 😅
حنان: وين سرور
عماد : مش عارف عطتني نكد البساط وخشت اشبح شن بدير
طلعت سرور لابسه قفطان طويل : اهلا حنونه وسلمت عليها ..
حنان: شنو تغسلي انتي وياه في البساطات
سرور: ههههههههه لاوين فيقة حاله جاي يتبيد ويزلحق في الصابون زي الصغاي وكاسيلي يقبتي😌😓
عماد🤤
حنان: ربي يهديك ..خلاص اطلع خل نكملوا هيا ..
عماد يفنص في سرور ويتوعد 😠وهي ولاعلى بالها وتهدرز مع حماتها 😏😏😏
***
فات باقي اليوم عادي ..في الليل روحت من سهريه سوسن وتهدرز مع خواتها عليها..
اريج: كانت فرحانه برغم انه كل شي بسيط بس الأجواء كانت حلوة وهي تهبل بالبودري
جمانه : ربي يهنيها
اريج: آاامين وتنهدت ..لما يكونوا اللي بيتزوجوا يبوا بعض او اقل شي مقتنعين ببعض تبان عليهم الفرحه والراحه ويحسوا بيها
ندى: صح ..
جمانه شافت الدموع في عيون أريج ووجعتها لأنها مرت بنفس الشعور من قبل ..
***
تاني يوم
كنان مشي للجامعه وحاول ع قد مايقدر يكلم ندى لكن ندى كانت تتجاهل فيه ومع صحباتها طول الوقت ..حاس روحه مخنوق ومضايق هلبه حتى ع الفيس معاش يلقى فيها ..
...
اريج مشت العشيه للمزين ع خاطر حفلة سوسن وروحت للحوش قبل المغرب بشوي لبست قفطانها اللي جابه معز وطاقم الفضه والكندرة وحطت العبايه في ايدها ومعاه شنطه مناسبات صغيره حاطه فيها التليفون ..وهي نازله لقت ملاك وجمانه وندى في الصاله ..
ندى: واااااااااو اريج تهببببلي
ملاك: ماشاء الله خيااال
جمانه: ربي يحميك حبيبتي
اريج ابتسمتلهم: تسلمولي 😙
خش عبدو ..
عبدو: ماشاء الله ماشاء الله طالعة طرف ياطنجرة 🤣
كلهم:😂
اريج : شكرا 😑
عبدو بضحكه: راجلك يستنى فيك في المربوعه
اريج تفاجئت: علاش؟
عبدو: هو اللي بيرفعك ..ومشي للمطبخ ..
اريج قعدت تشبحله لين خش للمطبخ: الصبررر
ندى: اطلعيله خليه يشوفك نحلف عليه لما يروح بيك لحوشه
اريج : 😒 ومشت للمربوعه
ملاك : ياريت تعطيه فرصه راجل كويس ويحبها
جمانه تنهدت
....
كان مقعمز وحاط رجل ع رجل ويتكلم بالتليفون ..لما خشت عليه تلخبط ومعاش عرف شنو يقول للي يكلم فيه كان يبي ينهي المكالمه وخلاص ..
معز: تمااام تمام...نكلمك بعدين ..سلام ..سكر وتنهد وقعد يشبحلها وخلاص
اريج: احمم بنعطلوا ره الحفله باديه ليها نص ساعه
ابتسموناض من مكانه قدملها حط ايد ع راسها وقعد يرقي فيها ..هي كانت حاسه براحه عجيبه وهو يقرا عليها..حاسه بإن الإنسان اللي قدامها همه بس راحتها وسعادتها وأنه يحميها ع قد مايقدر ..كمل ..وباس راسها: ربي يحفظك 💖
اريج شبحتله هلبه وبعدين ابتسمت ..خدي منها العبايه ولبسهالها وهي مستسلمه تماما حط الكاب فوق راسها وغطى وجهها شويه شدها من ايدها وطلعها بشويه بشويه لين وصلوا في السيارة فتحلها الباب وركبها..ودخل عبايتها داخل ..وركب هو وطلعوا من الحوش ..❤
***
بنديره كامل ماتنقصها حاجه ..
تبرة: كان ردوا علينا امتى بتمشوا تفضوا فيها
سليمان: الجمعه بإذن الله
فتحيه: مرات يردوا عليا ويقولوا مافيش نصيب
سلمى: ماااماااا😮
فتحيه :😞
سليمان بضحكه: امي ماتبيش فرحتي شكلها
فتحيه عيونها دمعوا: خزززززي عليك ..معقوله هكي تفكر في امك ؟!
سليمان ناض وباس راسها وقعمز حداها: باه علاش مانشوفش فيك فرحانه
فتحيه: مش هكي..لكن انت طاير بيها هلبه ومازال ماوصلت فيك مالالما توصل شن ادير 😔
سليمان: ههههههه ربي يهديك والله ياأمي بنيه طيبه تو تجينا وتعرفيها بروحك
فتحيه: وانت شن عرفك انها طيبه 😒
تبرة وسلمي🙄🙄
سليمان بربكه: راجلك وين ياسلمى
سلمى:ماشي لخواله😁
سليمان ناض : كويس ..هي اني ماشي للجامع 😳..وطلع
فتحيه: هوبي عليك ياشيخ ..
تبرة وسلمى:هههههههههههههههههه
***
ريما جابها كنان لشقتها بتاخد حاجات وركب معاها..فتحت الباب وخشت ..لقت الحوش هادي قعمز كنان ع الصالون وهي خشت لدار النوم ..لقت نجيب راقد ووشاحها في ايده
قعدت تتأمل فيه ودموعها في عيونها"ماتخليتش يجي يوم وتحبني فيه هالحب هذا كله ..نحبك يااغلى شي عندي"
بهدوء قعدت تاخد في حاجاتها ...
...
طقطق الباب ..ناض كنان بيفتح
كنان فتح الباب : ندى
ندى اتفاجئت لما شافته : لوسمحت نبي خوي
كنان :مش حنسمح🙄
ندى: حول شويه ارجوك
كنان: انتي اللي ارجوك اسمعيني ..ندى اني اسف والله ماني عارف كيف طلع مني هالكلام..بس دراه الكبد اللي اسماه ايوب جابهالي سفار ..
ندى شدت ضحكتها وشبحتله: وانت علاش ماتحباش
كنان اشر ع رقبته : مانزليش من هني
ندى: ههههههههه
كنان"نجيلي هالضحكه": سماح معناها
ندى : ايه ومعاش تعاودها بتعاودها مش حنسامحك بكل
كنان ابتسم: وعد معاش تتعاود
ندى: باه نبي نشوف خوي ..
كنان:ريمه داخل
ندى: تمام تو نمشي توا ونجي بعدين ..كنان شد ايدها : خليك
ندى لما شد ايدها تكهربت وقعدت تشبح لإيده هو تحشم وطلقها: احمم..لين تطلع ريما 😅
ندى: باه😳
....
خدت ريما حاجاتها وهي طالعه حطت شنطتها ع كرسي الزيانه قربت ع نجيب وباساته وهو كالعاده جبدها طول وحضنها🤣
ريما : ههههههههههه امتى تبطل حركاتك هادي
نجيب: باتي هني ليله تحملي شويه
ريما : نجيييب
نجيب: خلاص اني بنبات تحت حوشكم
ريما : واااك
نجيب شادها وماباش يطلقها
ريما استسلمت : باه خل نكلم كنان نقوله يروح
نجيب : حبببي اني وقعد يبوس فيها ...
ريما : هههههه نجيب خوي برا
نجيب ناض جبد تليفونه ..
..
كنان : اهم شي ركزي في المصطلحات بس
ندى: تمام 😊
رن تليفون كنان شبح جيهة الممر ورد بإستغراب : ايوه نجيب
نجيب: روح بروحك
كنان: علاش
نجيب:اختك بتبات في حوشها يللا سلاام وسكر عليه
كنان: هههههههه خوك جو عليه..هيا خل بنوض انروح
ندى: تمام ..وطلعوا من حوش ريما وقعدوا يهدرزوا لين طلع كنان من الحوش...
***
ايه....ع خير إن شاء الله ..نبلغ الحاج ونحددوا موعد ..ايه ..هي تصبحي ع خير بالسلامه ...
سليمان :😓
فتحيه : عطونا الموافقه ..
سليمان 😥
سلمى: الحمد لله ..مبارك عليك ياغالي ربي يتمملك ع خير
سليمان ابتسم : اللهم آاامين تسلمي ..المهم اني تفاهمت مع بوي وقالي امتى ماتبي انت لذلك كلميهم غدوة إن شاء الله وقوليلهم الجمعه الفضانيه
فتحيه : تقول يجروا وراك ولاهي بطير
سلمى بضحكه : ماما خلاص عاد ولدك حبيبك بيتزوج مش هذا اللي تبيه افرحي ياسمحه
فتحيه ضحكت: اني فرحانه ..بس نبيه يعرف مافوق غلاي عنده حد ولا؟
سليمان: ههههههههه ايه ياغاليه مفروض ماتشكيش ولو شويه مافي حد يجيك جنبك ياقلبي
فتحيه بضحكه: ربي يتمملك ع خير وليدي
سليمان ابتسم : حناي رقدت خلاص
فتحيه : هذا وقت نومها ..
***
اتصل عمران بفرج وتفاهموا ع نهار الفضانيه الجمعه بعد العصر ..وجمانه كانت اسعد وحده في الدنيا 💕
طبعا امباركه الشيطانه طلعت دوة بين الأقارب والناس في البلاد ان سليمان بياخد وحده مطلقه والناس بدت تألف في القصص وصلت الدوة لعمران وطبعا مايعرفش من طلعها فقرر ان مهر جمانه يحطهم 25الف ويبي يحضر في الفضانيه من اعيان البلاد بش يشهدوا ويعرفوا الناس كلها قدر كنته الجديده ومعروف ع عمران مايحطش فلوسه في اي شي ....
جي نهار الجمعه ..
بعد العصر ..
جمانه كانت تشرف ع الضيافه وكله ع احسن مايكون ..
كانت متوترة ع اعصابها ...
اريج : بطني واني مادخليش
جمانه: تزيدي توتري فيا 😯
اريج: هههههههه توتر الحقاني مش توا 😉
جمانه: مبردك 😳
ريما : هههههه خفي عليها شويه اريج
اريج: لا والله ماني طالقتها بتاخد هداكا الطرف اللي تقول ملاك ع صورة بشر وتبيني نخليها
جمانه غارت: خلاص اريج
اريج : ياناس اني ع غيورين اللي وجهم ولا احمر من الغيره ياناس
ندى: هههههههههه خلاص ياباردة
جتهم امينه: مبروك ياماما اتفقوا ع كل شي
روووورروووووووورووووووورررري روووووروووووورووووروري 🎵🎵🎵
تسمع في الزغاريط وقلبها يرفرف من الفرحه تحضن احبابها ومش مصدقه انها حتاخد حبيب قلبها الإنسان الوحيد اللي ملكها بكل مافيها وتمناته ليل مع نهار ..قبل شهرين لوقالولها إن حيجي يوم زي هذا ماكانتش حتصدق ..سبحان مدبر الأمر..💗
***
عمران في السياره مع سليمان وضو وراجل اخته بلعيد
عمران: عيله معروفه عيلتهم وناس مشهودلها بالسمعه الباهيه من يوم يومهم ..يازين مااخترت
ضو: بس علاش شرطوا بنتهم تعيش في طرابلس ؟.
سليمان: هكي ولاهكي حتعيش في طرابلس لإن اني مش حنطلع منها
ضو"طلعت من تحت لتحت ياشيخ"
بلعيد: ربي يكملك على خير ياولدي
سليمان : اللهم آمين تسلم ياعمي بلعيد...
***
وتحدد موعد العرس قبل عيد الأضحى بأسبوع وجمانه تجري وتوتي ..وسليمان يصين في الفيلا اللي حيعيش فيها مع جمانه طبعا امه في الدور الأول زي ماوعدها وهو وجمانه الدور التاني ..
....
اريج وندى وجمانه وملاك وريما طالعين في سيارة عبدو للسوق واللي تسوق ملاك
اريج : احلى حاجه الفيلو بابا حيجيبه من برا حاجه خاصه عاد
ريما : متلهفه نشوفك فيه لأنه مميز هلبه
جمانه: مانحبش جو الفيلوات اللي توا منفوخ ومبهرج هلبه كنت نبي حاجه بسيطه وبابا ربي يهديه كلف ع نفسه وجابه من برا ..
ملاك: بس زي ماتبي بسيط وحلو
جمانه: ايه
ندى: جموني شن شعورك توا وانتي خلاص مازال عشرة ايام وتعيشي مع الشيخ في حوش واحد 💞
جمانه بضحكه: مش عارفه شن نقولك ..شعور مش مفهوم ملخبط هلبه ..تبوا الحق حاسه روحي نحلم
ريما :ههههههههه زي ماصارلي بالزبط ..
ملاك: حلاوة قصتكم انتي وريما اللي صار فيها ..الفراق والعذاب للحظه حسيتوا أن كل شي انتهي للأبد لكن هو بدي من جديد بدايه احلى من الأولى
جمانه وريما: صححح
ضحكوا كلهم ..
ملاك حطت سيدي في مسجل السيارة وقبل لتشغله: وتوا معليشي جمونه نبي منك تعطيني استثناء ...وشغلاته
كلهم عيطوا ماعدا جمانه تضحك
كلهم بصوت واحد ماعدا جمانه
يامحلا الدنيا لما تبي تجمع بينهم
غزيل وغزاله دارو الصح وربي يعينهم
يبوا يعيشوا الحلال ويبوا يتموا دينهم
جمانه تضحك وعيونها معبيات دموع وفرحانه لين خلاص
من نظره عين غواها...راها مرتين هواها ..بعت ناسه
تموا معاها وهذا هو المزبوط
وكملوا غني وضحك ..ودارو في المحلات من 11الصبح روحوا السبعه المغرب ..حتى الحوامل نسوا انهم حوامل ورجالتهم عاركوهم بس مش مهم المهم هيجوا 🤣
"ملاحظه مرات نلبز في كلمات الأغاني مانحفظش هلبه تغاضوا وفوتوهالي وعيشوا الخيال 🤣💗
يتبع .....
#GomanFared
