بشير: والله هذا اللي صاير
ضو : دارو العار وحشمونا
رمزي: تي كل شي يحشم درناه بعد 2011
سليمان شبحله: المشكله مايطلع إلا الشي السلبي بس والإيجابي مادا بينا ندرقوه
رمزي : مافيش إيجابي بش يطلع
سليمان سكت لإنه عارف رمزي يستفز فيه
بشير: سليمان شنجو طرابلس
سليمان : سمحه رغم كل شي
ضو: ديما نظرتك ورديه
سليمان: خير ماتكون سودا 😊
رمزي: هذا الواقع واللي صاير بس في اللي يحب يعيش في الوهم
سليمان غير الموضوع: بشير أمتى بتولي لبريطانيا
بشير: الشهر الجاي إن شاء الله غير أقنع أختك بالله قالتلي إنتي أمشي وأني بنقعد في حوش أهلي
ضو:وين ماأنت وين ماهي غصب عنها تمشي
بشير: مانبيهاش تمشي متنكده سليمان أنت تأثر عليها هلبه بالله عليك كلمها
ضو ورمزي شبحوا لبشير
سليمان : حاضر كون هاني يانسيبنا
بشير: لكن أني بشير مش هاني 😂
سليمان: 😑تعرف كان مش نعرفك راجل كويس كنت عفست في زواجتك من أختي
رضوان وبشير:😂😂😂😂
رضوان: عمي مفتاح جي شكله
ضو : إيه هو هيا نوضوا نستقبلوه
ناضوا كلهم يسلموا ع عمهم وعلى عيلته
***********
عيلة الحاج فرج موزعين ع سيارتين ماشين لحوازة الحاج عيدالباسط ،،وجمانه هالمشيه هم ثقيل ع قلبها ماتبيش تشوف فيصل ولاتبي تسمع تلميحات أمه وأخته عليها هي وفيصل لإنه أم فيصل تحب جمانه هلبه وتبيها لولدها وحتى أخته لإنها عارفه خوها يحب جمانه،،،وطول الطريق وهي تفكر كيف بتفوت هاليوم وهي تجامل وتساير
في الحوازة
أمل : شوفي ولدك ياماما وين واقف
نجيه: ياناري عليه وخلاص والله ديما ندعي ربي يحنن قلبها عليه شنو ناقصه بش ترفضه بس
أمل: لإنهم متربيين مع بعض
نجيه: وكان متربيين مع بعض بالعكس مفروض توافق لإنها تعرفه كتاب مفتوح قدامها واللي تعرفه خير من اللي ماتعرفاش
أمل: هي تشوف فيه زي خوتها
نجيه : وراس بنتي حاولي معاها ع خاطر وخيك
أمل: والله ياماما نحاول لكن والله ماراضيه كإني نذل في خوي وهي شي مطنشه ولاتبي تعدل
نجيه :حاولي سلم بنيتي أنت حتريحي قلب وخيك كان قبلت مش حتذليه وبعدين معليشي الراجل لازم يتعب في جرة اللي يبيها بش يحس بقيمتها "عندها حق"
باب الكونشيلو متاع الحوازة أنفتح
أمل: اهو ياماما شكلهم جو
نجيه: إيه
خشوا السيارات وفيصل عيونه فيهم
نزلوا كلهم وفيصل جي يجري يسلم ويرحب وجمانه فاتت تجري فيصل عيونه معاها
أريج: كيف حالك فيصل
سلم عليها وسلم ع ندى
فيصل : الحمد لله كيف حالكم أنتم
الزوز: الحمد لله
جوه الولاد سلم عليهم وخشوا لداخل والبنات مشوا جهة النساوين
**********
سكينه مرت رضوان أذوق في مرقة البازين
سكينه: ملحها كويس ياعمتي
فتحيه : باه وتوا القعاد
والبنات كانوا يوتوا في الصفر
رانيا : حطي في كل الصفر شاني
منال : علاش
رانيا: سليمان يحبه ماتندريش ع أما سفرة يقعمز
وداد: وكان جت الحكه قدام واحد تاني بيقوله ترا بالله بدلي !
زينب ضحكت
رجاء : هيا بسرعه كملوا اللي في إيديكم
إمباركه تسلفر في الفواكه ومعاها لطيفه
عاد توا شنو بيخلصنا من عمتك سليمان وسليمان وتوا بتزن ع راس راجلها بش يكتبله حاجه تانيه غير العماره اللي طرابلس والحوازة اللي هني
لطيفه: حني ماصدقنا افتكينا منه وقلنا خلاص تو كله بيقعد تحت رجالتنا لكن شي عظم في اللهاة .
إمباركه: تو كان زوجوه معاش تحز وكان خداها من طرابلس حي ياحي
لطيفه: باه شنو الدباره
أمباركه تشبح لزينب : يصير خير
سلمى: شنو تهدرزوا إمباركه ولطيفه خل نشاركوكم
إمباركه: 😅لاشي غير نحكيلها ع لمة أختي
لطيفه: ايه 😅
سلمى: به 😏
احمممم
فتحيه: منو سليمان
سليمان: أمي واتي الغدي
رانيا وسرور وزينب😍😍😍😍😍😍
فتحيه : هي شويه نادي ع الولاد يجوا يرفعوا معاك
عمته سعيده : خش ياسليمان ماشفتكش ره أني
سليمان مايبيش يخش لكن تحشم من عمته خش سلم عليها وطلع طول
عمته سعيده: اللهم صل ع النبي غزال مصور وليد وخيي
والله لو عندي بنات مانفوته
فتحيه : هههههههههه ومانلقى خير منهم مادام إنتي أمهم
سعيده: سلمك مرية خوي
الحاجه تبرة خشت: تي شنو قاعدات اديروا سقدوا أرواحكم يامسكسكات
قعدوا يحطوا في القعاد في الصواني ويمدوا وطبعا سليمان ماباش يجي ويرفع تحاشيا من مقابلة زينب أو وحده من البنات
**********
في الحوازة البنات مقعمزات يهدرزوا ويدوروا حواليهم العاملات يوتوا في الغدي وأم جمانه وأم فيصل واقفات عليهم
جهة البنات جت رساله ع فايبر لأمل أخت فيصل
(نبي نشوفها)
شبحت الرساله وشبحت لجمانه اللي لاهيه هي وأختها في التليفون
(كيف يعني )
(شنو كيف نبي نشوفها نبي نشوف وجهها ليا عامين ماريته)
(سلم وخيي مش وقت هبالك توا)
(أمل دبري راسك نبي نشوفها )
الصبر ياااربي
(حسي بيا أمل )
وجعها خوها
(باه تو نتصرف)
(والله أنتي أحسن وحده وتليفون جديد بعد يومين عندك )
(😂😂😂😂ربي يعطيك مافي بالك وخيي)
(آمييييييين ❤)
************
رايكم
#GomanFared
الحلقة 7
ابدأ من البداية
