𝚆𝚒𝚜𝚑 𝚃𝚑𝚒𝚜 𝙻𝚘𝚟𝚎 𝚂𝚢𝚜𝚝𝚎𝚖 (𝙲𝚘𝚖𝚙𝚕𝚎𝚝𝚎𝚍)

Part_29

သူနဲ့အနီးဆုံးမှာ မိန်းမကြီးတစ်ယောက်ရပ်နေသည်။ သူမ ကြည့်ရတာလူလိုပေမဲ့ ရင်ဘတ်ကြီးမှာ ဓားတန်းလန်းကြီးရှိနေသည်။ ဓားက သစ်သီးလှီးတဲ့ဓားဖြစ်ကာ လူထိုးခံရတာမဟုတ်ပဲ မတော်တဆသေရပုံပင်။ နောက် သရဲတွေကတော့ အော်ဂလီဆန်စရာကောင်းလှသည်။ ခန္တာကိုယ်တစ်ခုလုံး မီးလောင် ထားသည့်အရာတွေနဲ့ ရုပ်ပျက်ဆင်းပျက်...........။

သူက အရာအားလုံးကို မသိချင်ယောင်ဆောင်ကာ အသံတစ်ချက်မထွက်ပဲ ခပ်တည်တည်ပဲဖြတ်လျောက်လာခဲ့သည်။ လှေကားထိပ်မှာက ကောင်မလေးတစ်ယောက်နှင့် ကောင်လေးနှစ်ယောက်၊ သုံးယောက်စလုံးက အထက်တန်းကျောင်းဝတ်စုံလေးတွေကိုယ်စီနှင့်။ ကောင်မလေးခေါင်းမှာက ဦးဏှောက်တွေထွက်ကျနေကာ ဦးဏှောက်ကကျလာသည့်အရည်တွေက သူမရဲ့ ပုခုံးတွေမှာ စိုစွတ်နေသည်။

ကောင်လေးတစ်ယောက်ကတော့ ပါးစပ်မှဘာမှန်းမသိတာတွေကို တဖွဖွရွတ်ကာ ထောက်ချွန်တစ်လက်နှင့် သူ့ကိုယ်သူထိုးဆွနေသည်။ နောက်တစ်ယောက်ကတော့ မှန်စအကြီးကြီးလည်ပင်းမှာစိုက်လျက်............။ သူက ဘယ်လိုပဲအားတင်းထားပေမဲ့ အော်ဂလီဆန်ပြီး အန်ချင်စိတ်တွေပြည့်နှက်လာသည်။ ဒီမှာ လူအမျိုးမျိုး၏သေပုံအမျိုးမျိုးကို သူမြင်နေရသည်။ သူ့မျက်လုံးကနေ မျက်ရည်တွေအဆက်မပြတ်ကျဆင်းနေကာ သူ့တစ်ကိုယ်လုံးလဲ ချေွးစေးတွေနဲ့အေးစက်လျက်ရှိသည်။

တစ်နေ့လုံး ရေသော်မှမသောက်ရသေးသည့် ခန္တာကိုယ်က အားပျော့နေပြီဖြစ်ကာ စိတ်တအားဆောင်နေ၍သာ ယခုလို လမ်းလျောက်နေနိုင်ခြင်းဖြစ်သည်။ သူက ထိုအထက်တန်းကျောင်းသားလေးတွေကို ဖြတ်ပြီး လှေကားကဆင်းလိုက်သည်။ သစ်သားလှေကားသည် တက်လာတုန်းက တိုသလောက် အခုမှတော်တော်ရှည်လျားနေဟန်တူသည်။ အိမ်ရှေ့တံခါးမကြီးကိုလာသည့်တလျောက် သွေးတွေအပြည့်နဲ့ အလုပ်သမားတွေကို သူမြင်ခဲ့ရပြီးပြီဖြစ်သည်။ အသံမထွက်ပဲတအီအီငိုနေမိတာကို ကိုယ့်ကိုယ်ကိုယ်သာ သိလေသည်။

စိတ်နှလုံးထဲမှာ ကြောက်ရွံ့ခြင်းတို့အပြည့်။ နှုတ်ခမ်းတွေကလဲ ခြောက်ကပ်နေကာ တဆတ်ဆတ်တုန်နေသည်။ ဖိနပ်ဆိုတာက ဘယ်နားရောက်နေမှန်းမသိ၍ အုတ်အကျိုးတွေနဲ့ ထိခိုက်မိထားသော ခြေဖဝါးနုနုက သွေးတွေရွှဲလျက်။ တစ်ကိုယ်လုံးနွမ်းဖတ်နေသည်ဆိုတာကို သူသိသည်။ ကြောက်လန့်ခြင်း၏အဆုံးစွန်ဘက်ကို သူရောက်နေသည်။ ဒီမြင်ကွင်းတွေ၊ ဒီအသံတွေ၊ ဒီအေးစက်စက်ခံစားချက်တွေ............ သူကောင်းကောင်းမျိုသိပ်ထားပါသည်။ရောက်တော့မှာပဲ။ အပြင်ကိုရောက်တော့မှာပဲ။