Uni
စန္ဒရားသံလေးက ချိုသာစွာပျံ့လွင့်လာသည်။ စင်ထက်တွင် အမျိုးသားနှစ်ယောက်နေရာယူထားကြသည်။ နှစ်ယောက်စလုံးက အနောက်တိုင်းဝတ်စုံအနက်ကို ကော့ပျံနေအောင် ဝတ်ဆင်ထားကြရာ သတို့သားတွေမှန်းသိသာလှသည်။ ယောကျ်ားလေးနှစ်ယောက်၏ မင်္ဂလာပွဲပေမဲ့ နှစ်ယောက်လုံးက ပေါင်းသင်းဆက်ဆံရေးကောင်းပြီး လုပ်ငန်းကြီးတွေလုပ်နေရသူများဖြစ်တာကြောင့် လူလာများကြသည်။ သက်ကြီးပိုင်းကအစ လူငယ်ပိုင်းအဆုံး တက်ရောက်အားပေးကြသည်။ မျက်စိရှေ့တွင်တော့ လိုက်ဖက်ပါပေသည်ဟူ၍ တပြုံးပြုံးဖြစ်နေပေမဲ့ ကွယ်ရာကျ နှာခေါင်းရှုံ့တတ်သော လူ့သဘာဝကိုသိပြီးသားပေမို့ ဒီအပြုံးတွေကြားမှာ သိပ်တော့မပျော်ဝင်လှပါ။ ထားပါတော့လေ။ ဘယ်လိုပဲဖြစ်ဖြစ် ဒီနေ့က သာမန်နေ့မှမဟုတ်ဘဲ။
“ကိုယ်ကတိပေးပါတယ်။ မင်းကို အဆုံးထိစောင့်ရှောက်သွားပါ့မယ်”
ကတိပေးသံသည် ခပ်တိုးတိုးဖြစ်သော်ငြား ပီသလှသည်။ အားမာန်ပါလှသည်။ စကားပိုင်ရှင်သတို့သားသည် လက်စွပ်ကို သူ့ရှေ့မှလူသားအား ဖြည်းညှင်းလေးနက်စွာ စွပ်ပေးလိုက်သည်။ လက်ခုပ်သံတွေညံလာ၏။ ထို့နောက် တစ်ဖက်ရှိအမျိုးသားက လက်စွပ်ကိုပြန်စွပ်ပေးသည်။
“ငါ မင်းအပေါ် သစ္စာရှိပါ့မယ်”
ဒီစကားသံသည်လည်း ခပ်တိုးတိုး။ သို့ပေမဲ့ တည်ငြိမ်ကာ အားပါလှပေသည်။ သတို့သားနှစ်ယောက်သည် အချင်းချင်း လက်စွပ်စွပ်ပေးပြီးသည့်နောက်မှာတော့ လက်အချင်းချင်းကို ထပ်လျက် ဆုပ်ကိုင်ထားလိုက်ကြသည်။ ထိုလက်များကား ပထမ ခပ်ဖွဖွ...။ ထို့နောက် အနည်းငယ်ဖိအားပါပါ... နောက်ဆုံးတင်းတင်းကြပ်ကြပ်...။ သတို့သားနှစ်ယောက်လုံး၏ မျက်နှာပေါ်မှအပြုံးများကလည်း တူညီသောအဓိပ္ပာယ်ကိုဆောင်နေကြလျှက်။
ရှင်းချောင် ထိုမြင်ကွင်းလေးကိုကြည့်ကာ ပြုံးမိရသည်။ ဦးလေးတို့ကို ကြည့်ရတာ သူတို့ပထမဆုံးလက်ထပ်ခဲ့တဲ့အချိန်ကိုတောင် ပြန်တွေးမိစေတယ်။ လူတွေကြားမှာ...ပန်းတွေကြားမှာ...မွှေးရနံ့တွေကြားမှာ...နောက်ပြီး ကတိသစ္စာတွေကြားမှာ သူတို့ပထမဆုံးလက်ထပ်ခဲ့ကြတယ်။ လူတွေရှေ့မှာ တစ်ယောက်ကိုတစ်ယောက်ပိုင်ဆိုင်ကြောင်းကြေညာခဲ့ကြတယ်။ နောက်ပြီး တစ်ယောက်ကို တစ်ယောက် မြတ်နိုးစွာနမ်းခဲ့ကြဖူးတယ်။ ဒီလိုပဲ ဦးလေးနဲ့ ဦးလေးသွေ့လည်း တစ်ယောက်ကိုတစ်ယောက် နူးညံ့စွာနမ်းလိုက်ကြတယ်။ လက်ခုပ်သံညံညံကြားမှာ အော်ဟစ်ဩဘာပေးသံတွေကိုပါ ကြားနေရတယ်။ နောက်ဆုံးတော့လည်း ဦးလေးလူပျိုကြီးကို ဂေါ်မစွံဘဝကနေ ကယ်တင်နိုင်ခဲ့ပြီလေ။
YOU ARE READING
𝚆𝚒𝚜𝚑 𝚃𝚑𝚒𝚜 𝙻𝚘𝚟𝚎 𝚂𝚢𝚜𝚝𝚎𝚖 (𝙲𝚘𝚖𝚙𝚕𝚎𝚝𝚎𝚍)
RomanceUni စိတ်သဘောကောင်းတဲ့ကောင်လေးတစ်ယောက်ဟာ ဖူးစာရေးနတ်မင်းနဲ့ စာချုပ်ချုပ်မိပြီး ဘဝများစွာမှာဝင်စားရင်း ဖူးစာကြိုးနီတွေကို ပြန်တည့်ပေးရတဲ့အခါ... Pls vote me if you like the story because votes are power that can push me to write the story. Cover By Di...
