𝚆𝚒𝚜𝚑 𝚃𝚑𝚒𝚜 𝙻𝚘𝚟𝚎 𝚂𝚢𝚜𝚝𝚎𝚖 (𝙲𝚘𝚖𝚙𝚕𝚎𝚝𝚎𝚍)

Part-85

“ချွင်...........ထန်”

ဓားနှစ်လက်၏ ထိခတ်သံက ပိုပိုပြီးကျယ်လောင်လာသလို ရဲမက်တွေကလည်း အဆောင်အောက်မှာ ဝိုင်းလာသည်။ ထို့အပြင် ဘုရင်ဝတ်ရုံဆင်ထားသော လူတစ်ယောက်က အဆောင်ထဲကထွက်လာသည်။ သူ၏ လက်ထဲမှာလည်း စောင်လေးနှင့်ထုတ်ထားသော လူတစ်ယောက်။

သူ့ မျက်လုံးတွေ ပြူးကျယ်ထိတ်လန့်သွားသည်။

“အရှင်........အ.......”

အာရုံသည် အရှင့်ဆီသို့ ခဏလေးရောက်လိုက်ချိန်တွင် တစ်ဖက်လူ၏ ဓားချက်သည် သူ၏ ကျောပေါ်သို့ မညှာမတာ ကျရောက်လာသည်။ ကျောပေါ်မှ အတိုင်းအဆမရှိနာကျင်မှုထက် စောင်ထုတ်လေးထဲမှာ မျက်လုံးလေးမှိတ်လျက်သား ငြိမ်သက်နေသည့် အရှင့်ကို ကြည့်ရတာ ပိုပြီးနာကျင်ရသည်။ တစ်ပိုင်းတစ်စ ပေါ်နေသည့် အရှင့်လည်ပင်းလေးမှ နီညိုညိုအမှတ်တွေကို ကြည့်မိတော့ မျက်လုံးတွေပင် ဝေဝါးသွားရသည်။ အရှင့်နှုတ်ခမ်းလေးလည်း ဖူးယောင်လို့။ ဒီခွေးမသားတွေ......။

“အ......ဖူး......”

ဒေါသကြောင့်လား ဒဏ်ရာကြောင့်လား မသိပေမဲ့ သွေးတွေကို မှုတ်ထုတ်လိုက်မိသည်။ ဒီငယ်သားက ခွင့်လွှတ်ဖို့ မသင့်ပါဘူးအရှင်။ အရှင့်ကို ကာကွယ်မပေးနိုင်ခဲ့ဘူး။ မပြီးဆုံးသေးသော နာကျင်မှုတွေ၊ မပြေပျောက်သေးသော ဒေါသတွေနဲ့ စိတ်မချနိုင်သေးသော ခံစားချက်တို့ကြားမှပင် သူ သတိလစ်သွားသည်။ ဖြစ်နိုင်ရင် သူသတိလစ်သွားသလို လောကကြီးကိုလည်း ခဏရပ်သွားစေချင်မိသည်။ အရှင့်ကို ဒီ့ထက်ပိုမဆိုးခင် ကယ်ထုတ်ချင်သေးသည်မဟုတ်လား။

“အင်.......ဟင်း........”

လက်ထဲက စောင်ထုတ်လေးက လူးလွန့်လာသည်မို့ နော်ဂါတစ်ယောက် သူ့ကိုယ်ရံတော်ကို ခေါင်းညိတ်ပြကာ အဆောင်ထဲသို့ အလွန်သွက်လက်သော ခြေလှမ်းတို့ဖြင့် ပြန်ဝင်လာခဲ့သည်။ တော်တော်လေး ညည်းတွားလိုက်ရသဖြင့် ပင်ပန်းသွားပုံရသော ကောင်လေးသည် အိပ်ပျော်သွားသည်မှာ အတော်လေးကြာပြီ။ သူလည်း ဘေးမှာထိုင်နေရင်း ကောင်လေး၏မျက်နှာကို ကြည့်မဝစွာငေးနေမိသည့်အချိန်မှာပင် တိုက်ခိုက်သံတွေကြားလိုက်ရတာဖြစ်သည်။ အိပ်နေသည့် ကောင်လေးကို တစ်ယောက်တည်းထားခဲ့ရမှာလည်း စိတ်မချတာကြောင့် စောင်လေးနှင့် ပတ်ကာ အပြင်ကို ထွက်ကြည့်မိတာဖြစ်သည်။ ကျူးကျော်သူသည် အချုပ်ခန်းမှာ ချုပ်ထားသည့် ကောင်လေး၏ ကိုယ်ရံ‌တော်ဖြစ်နေလိမ့်မယ်လို့တော့ မထင်လိုက်မိ။ သတ်လိုက်ရမလားဟု အချက်ပြကာ မေးလာသော ကိုယ်ရံတော်ကို မသတ်ဘဲ ဆေးကုပေးလိုက်ဖို့သာ အချက်ပြအမိန့်ပေးရင်း ကောင်လေးနိုးမလာခင် အထဲကို အမြန်ပြန်ဝင်လာခဲ့ရသည်။ ကောင်လေးကို နိုးနိုးချင်းမှာ သွေးထွက်သံယိုတွေ မမြင်စေချင်ဘူးမဟုတ်လား။