𝚆𝚒𝚜𝚑 𝚃𝚑𝚒𝚜 𝙻𝚘𝚟𝚎 𝚂𝚢𝚜𝚝𝚎𝚖 (𝙲𝚘𝚖𝚙𝚕𝚎𝚝𝚎𝚍)

Part-85

တစ်ဖက်မှာလည်း ဂေါ့က နန်းတော်ရှိရာဆီ မှန်းသမ်းပြီး ခရီးဆက်နေရသည်။ စစ်တပ်ထဲက အောင်မြင်စွာထွက်လာခဲ့ပြီး မြို့တော်ဈေးထဲရောက်လာပြီမို့ နန်းတော်ရှိရာဆီသွားရတာက လွယ်ကူလှသည်။ မနက်ပိုင်းဖြစ်နေတုန်းမို့ မဝင်သေးဘဲ ညအမှောင်ကို စောင့်နေလိုက်သည်။ အရှင် ဘယ်လိုနေလဲ သူသေချာကြည့်ရမည် မဟုတ်လား။ နေဝင်လာတော့ အမှောင်ရိပ်မှာ ချိန်းတွေ့နေကြတဲ့ အစောင့်တပ်သားနဲ့ အပျိုတော်တစ်ယောက်ကို မေ့လဲသွားအောင် လုပ်လိုက်ကာ အပျိုတော်လေးရဲ့အဝတ်အစားကို လဲလှယ်၍ နန်းတော်ထဲကို ဝင်လာလိုက်သည်။ ညလည်းမှောင်လာပြီမို့ ကင်းလှည့်နေသည့် ရဲမက်တွေမှတပါး အပျိုတော်တွေတောင် အပြင်မှာသိပ်မရှိတော့။ လူအလစ်တွင် ဧကရီဆောင်ဟု ထင်ရသော အဆောင်ပေါ် ခပ်ဖွဖွခြေလှမ်း၍ တက်လိုက်သည်။ ခေါင်မိုးပေါ်ခြေချမိသည်နှင့် အေးစက်စက်အထိအတွေ့က လည်ပင်းကို လာထောက်သည်။

ကျစ်.... ဒီကောင်တွေ ထင်ထားတာထက် ပိုပြီးလျင်သားပဲ။

ဟိုရွံစရာလူဆီက ဆွဲလုလာသည့်ဓားကို ထုတ်ကာ နောက်ကလူကို တစ်ပြန်လှည့်၍ တိုက်ခိုက်လိုက်သည်။ သာမန်လူဆိုရင်တော့ ကိုယ့်လည်ပင်းကို ဓားထောက်ခံထားရသည့်အချိန်တွင် မလှုပ်ရှားနိုင်မှာ သေချာပေမဲ့ ဂေါ့က သာမန်လူမှမဟုတ်ဘဲ။ အရင်ထဲက သေရမှာကို မကြောက်အောင် လေ့ကျင့်ပေးခံခဲ့ရသလို အခုအချိန်မှာ သူ့ရဲ့စိတ်အခြေအနေကလည်း ဘာမဆို တုံးတိုက်တိုက်ကျားကိုက်ကိုက် ဇွတ်တိုးမည့်အခြေအနေဖြစ်နေသည်။

တစ်ဖက်လူကလည်း ခေတော့မခေ။ အင်းလေ။ မခေလို့ ဘုရင့်ကိုယ်ရံတော်လုပ်နေတာပေါ့။ အစကတော့ ဂေါ့လည်း အသံမထွက်အောင် ထိန်းပြီးတိုက်နေပေမဲ့ စိတ်ထဲကတောက်လောက်နေသည့် ဒေါသတွေကို ဖြေလျော့ဖို့ရာ တစ်ဖက်လူကို အသေအလဲ လိုက်လံတိုက်ခိုက်မိသည်။ သူရဲကောင်းတစ်ယောက်က သူ့စိတ်သူမထိန်းနိုင်ရင် အဲ့တိုက်ပွဲကို ရှုံးလိမ့်မယ်ဆိုတဲ့အကြောင်း သူ မကြားဖူးလို့တော့မဟုတ်။ သို့ပေမဲ့ အခုအချိန်မှာ အနိုင်အရှုံးထက် သူ့ရင်ထဲက ဒေါသတွေကို လျှော့ပစ်ဖို့က ပိုပိုပြီးအရေးကြီးနေခဲ့သည်။