صلوا على رسول الله
#ليلة_رأس_السنة !!
#قصص_واقعيه_لهدير_ابراهيم
*** القِصة طويلة بس اتمنى بجد بجد تطبطب ع قلبكوا وتديكوا أمل خاصة اننا بنختم عام وبنبتدي عام جديد ❤
🎀🎀🎀🎀🎀🎀🎀🎀
عاوزه اقولك بس في البداية اني مبسوطة جداً انك رجعتي تفتحي الفيس بوك من تاني وخاصة في التوقيت دا وحسيت ان دا فيه اشارة ليا بعد تردد كبير اني ابعتلك قِصتي، ودا لأن اليوم اللي اتغيرت فيه حياتي تماماً كان #ليلة_رأس_السنة علشان كدا رجائي منك انك تنزليها في نفس اليوم دا لعلها تكون رسالة اطمئنان لقلب احدهم ان القادم افضل وان الفرج مهما اتأخر ف في لحظة هيجي وهتتغير معاه كل حياتنا...!
أنا سلمى دكتورة أسنان عمري 46 سنة...
حكايتي متختلفش عن حكايات كتير لبنات من نفس مجتمعي وهي تأخر سن زواجي وحتى بعد زواجي اتأخر حملي ف عيشت تجربتين من أصعب التجارب اللي ممكن تمر بيها بنت.. بس انا مش بعتالك النهارده علشان احكي عن معاناتي دي أد م بعتلك علشان احكي عن قوة وعظمة ترديد #حسبي_الله_ونعم_الوكيل وأد ايه كان ليها أثر عظيم في حياتي وتغييرها !!
انا ع عكس معظم اصحاب القِصص اللي عندك في بداية قصصهم
انا كنت بعتبر نفسي من الناس المتدينه القريبة من ربنا..كنت ملتزمه ولله الفضل ب حجابي كامل ولبس فضفاض وملتزمه بالصلاة..حياتي كانت ماشية طبيعي وكويسه نوعا ما اللي هو العادي لحد م وصلت للسنين الاخيره في الجامعة، كل اللي اعرفهم حواليا بدأوا يتخطبوا ويتزوجوا.. حتى اختي الصغيره اتخطبت وتزوجت وانا كانت حجتي قدام والدتي ان دا علشان كليتها مش عملية وان هدفي اخلص جامعتي الأول لوقت م بدأ اصحابي اللي من دُفعتي هما كمان يرتبطوا..
مش هقولك ان مكانش بيتقدملي حد الفكرة ان كل اللي بيتقدم كان فعلا مرفوض تماما بالنسبالي...
بعد الجامعة كان كل حلمي افتح #عيادة خاصة بيا لكن أهلي رفضوا جداً بحجة ان التفكير في الزواج أهم واني احاول من خلال شغلي الحالي اني اوقع أي حد وان هي دي الشطارة لكن تفكيري في مستقبلي المهني كانوا بيقولوا عليها خيابه وقلة عقل وان البنت مهما وصل تعليمها في النهاية مصيرها بيت زوجها،
ولما كنت بسألهم طيب ليه من الاول دخلتوني كلية طب ! قالوا ان دا سببه فخرهم قدام الناس ان بنتهم دخلت كلية الطب وهتبقى دكتورة لكن لو كانوا يعرفوا ان دا هيقعدني في وشهم من غير جواز كانوا قعدوني من الثانوية اصلا..
دا بالظبط كان الحوار بينا كل م افتح موضوع العيادة...
بدأت معاناة بقى مختلفة وهي ان الناس تقولي في وشي مش حتى م ورا ضهري ان سني بيكبر واني قربت ع التلاتين ولو وصلتلها م غير زواج مفيش حد هيعبرني ولا هيبص في وشي..
وعديت التلاتين وانا لسه الناس وأمي والجيران والقرايب والكل بيسم في بدني وترديدهم ابشع كلام ممكن تسمعه بنت م ان عمري بيجري وقطر الجواز خلاص في اخره بالنسبالي ومش هيرجع تاني واللي يردد ان فرصتي في الحمل خلاص قربت تنعدم مش بس تقل
وأبشعهم ع الاطلاق واحدة ست عمري في حياتي م هبطل أحسبن عليها كانت جاية مع ابنها وقت الرؤية وكانت كل شوية تتكلم ع العيادة اللي انا شغاله فيها وكأنها عيادتي ولما صححتلها المعلومة بإني بشتغل فيها بس قالتلي نصاً: يعني مش كفاية عندك 32 سنة لا وكمان معندكيش عيادة خاصة تجيب لابني دخل مادي وانا اللي كنت راضية بواحدة بايرة زيك الناس كانت تقولي بلاش دي تربتها بور مش هتحمل ولا هتخلف عيال وانا اقول معلش هبقى اخليه يتجوز واحدة للخلفة واللي يشفعلها ان عندها عيادة أسنان خاصة تطلعي في الآخر معندكيش حاجة خالص !!
ولما قولتلها ايه اللي حضرتك بتقوليه دا انتي جايه تتقدمي لبنت ناس ولا جاية تأمني لابنك دخل مادي ع قفا واحدة ست !
قالتلي يعني بايرة ومفيش حد بص في خلقتك ولا عبرك وكمان بجحه !
واخدت ابنها ومشيت ونازله عماله تشتم وتبرطم ع السلم وفرجت علينا الجيران
الست دي وغيرها طبعا مهما مر من عمري ابداً م هنسى ولا حرف قالوه سموا بيه بدني وولعوا بيه النار بيني وبين اهلي بس دي بالذات كانت ست قليلة الأدب والذوق والاحترام بزيادة وم وقت الليلة دي ولحد النهارده عمر م لساني بطل يحسبن عليها..
وغيرها بقى كتير مثلا اللي تفضل تردد ان ابنها #مهندس ف لازم يتجوز دكتورة أسنان أو صيدلانية اللي هو م الاخر مشروع مادي مش مشروع زواج خالص ولما انطق ولا افتح بؤي يقولولي احمدي ربنا وبطلي تتأمري
من بعد م عديت التلاتين بقى وانا الكل بقى يقولي ان معنديش اصلا اختيار واني المفروض احمد ربنا وابوس ايدي وش وضهر ان حد لسه بيدخل بيتي اصلا...
عديت ال 35 ووقتها لهجة الكلام اتغيرت وبقى مفروض عليا اوافق ع اي شخص مش مهم بقى أرمل ولا مطلق معاه اطفال كبار ولا صغيرين واياً كان عمره..
وكنت كل م اقول لحد اني عاوزه واحد اكون اول بخته زي م هو هيكون اول باختي
كانوا يفضلوا يضحكوا عليا ويقولوا بطلي تعيشي في اوهام وانزلي ع ارض الواقع
وافتكر مره واحدة ست كبيرة في المسجد سألتني لو مش مرتبطة قولتلها لا قالتلي ان عندها ابنها مطلق وعنده ولدين وهي عاوزه تجيبله واحدة تربيله ولاده علشان بيرجع م شغله متأخر
ف قولتلها بكل غباء انتي بتسألي ع مربية يعني ! قالتلي لا ع عروسة وانتي شكلك سنك كبير اه بس مش مشكله واهو كله بثوابة مع ضحكات متقطعه كلها سماجة ولما قولتلها بكل ذوق وادب شكرا قالتلي شكرا ايه هو انا بديكي باكو لبان
استأذنت منها ومشيت لقيتها بتقولي بتتأمري ع ايه إلهي م توعي تتجوزي ولا يشوفولك خلف !
متخيلة دعائها !! انا وقفت في مكاني وحسيت وكأن رجلي اتشلت والناس اللي في المسجد بدل م تقولها ايه اللي بتقوليه دا ي ست وعيب ولا حرام بقى كله يردد قال بنات اخر زمن عمالين يتأمروا..
اللي وجعني اكتر ان المسجد دا في منطقتي واللي كانوا فيه اغلبهم يعرفوني كويس ومفيش حد فيهم جالي شغلي الا وسيبت اللي في ايدي علشان اقف معاهم واخدمهم لحد م يخلصوا وفي النهاية ولمجرد تأخر سن زواجي بقى اللي يشمت واللي يبصلي بشفقه ولا كأن عندي مرض مميت واللي يردد ان دي اخرة تكبري واني بتأمر...
جات عليا فترة كنت بعدت فيها عن ربنا مش اللي هو انقطعت عن الصلاة لا ابداً ولله الحمد بس كنت بصلي وقلبي م كتر الهموم اللي فيه كان كأنه مختفي وضايع مش لقياه
بصلي لمجرد الصلاة حتى كنت بطلت ادعي..
لحد زي م قولتلك اليوم اللي حسبنت فيه ع الست دي وبعدها بفترة وصلني عنها وعن ابنها اخبار من الوسيط وكانت بتضحك وتقولي بطلي بقى تحسبني عليها وكفاية اللي هما فيه
بس ابدا من وقتها وانا يقيني بالله رجع تاني وبزيادة وكان اللي بيقوي قلبي ان كل م حد يردد كلام يوجعني ويحرق قلبي ويقهر اهلي عليا كان سلاحي دايما هو #حسبي_الله_ونعم_الوكيل وقسماً بالله م قولتها في حد إلا وربنا جابلي حقي منه وقصاد عيني وفي فرق كبير بين الشماته طبعا وان ربنا يبعتلك اشارات تطمن قلبك ان امشي في الدنيا مظلوم ولا تمشيش ظالم وهتاخد حقك تالت ومتلت لحد م تقول يارب رضيت وقلبي ناره هديت...
دا حرفياً اللي كان بيحصل معايا وكل م تيجي اشارة جديدة كل م قلبي يقينه بالله يزيد اكتر واكتر وكل م اضعف في لحظة واسأل طيب ليه زواجي اتأخر
الاقيني بسرعه برفع راسي لفوق وبقول يارب انا راضية ع كل اللي بتبعتهولي المهم رضاك انت عليا...
خرجت فكرة الزواج من دماغي واقنعت اهلي واخيرا ان طالما مفيش جواز بدل ركنة فلوس جوازي افتح عيادة..موضوع اقناعهم مكانش سهل ابدا وكان لسه عندهم بردو أمل اني اتجوز حتى لو عمري خلاص بيقرب ع ال 40.. بس في مره بهزر مع والدتي قولتلها يمكن عن طريق العيادة دي الاقي ابن الحلال واهو وقتها مش هيبقى لحد حجة وبقى عندي عيادة خاصة
وكأن والدتي م صدقت واخدت كلامي ع انه جد وسبحان الله م وقتها وهي كانت اكتر واحده بتسعى معايا اني افتح العياده
ورغم كل حاجه صعبه واجهتني الا اني كنت بنام احلم بيها وقررت اني هفتحها أول يوم في العام الجديد وقررت بكدا اني هفتح صفحة جديدة كلها ل شغلي وبس وابدأ اهتم بحياتي وسعادتي بعيدا عن الزواج وكلام الناس حتى اني قررت ابدأ حلم جديد وقتها وهو اني هعمل كل اللي اقدر عليه في شغلي لحد م اغير مكان سكني واسكن في منطقة مفيش حد فيها يعرفني ولا حد يشغل نفسه فيها بزواجي ولا حد يعايرني بسني وتأخير زواجي..
م بعدها وانا بقيت بنام مرتاحة البال وكل م الزواج يخطر ع بالي وقلبي يبدأ يتوجع احط ايدي ع قلبي بسرعة واطبطب عليه واقوله فين يقينك بالله
ربنا مش بيقدر لحد غير الخير ولعل دا كان شر وبعده ولعل دا كان لسبب وحكمة لا يعلمها الا الله المهم اني راضية وافضل اطبطب ع قلبي بإيدي ودعائي لحد م انام...
وجات ليلة رأس السنة وخلاص دي آخر ليلة ع الافتتاح وتحقيق حلمي
واقفة في شباك العيادة ومغمضة عيني وبحلم لقيت فجاة ايد بتهزني جامد فتحت عيني بسرعه مخضوضة لقيت واحد واقف قدامي وعمال يتكلم بلغة الاشارة ووشه لونه احمر جدا وعمال يشاور بإيده ع حاجه ورايا
مكنتش فاهمه منه اي حاجة ولا سامعه بسبب الدوشه اللي جايه م الشارع لقيته قفل الشباك بسرعة ووقتها حسيت ان طبلة ودني اتخرمت م صريخه وهو عمال يقول سناااااااني عمال اشاورلك ع سناني وكأني بكلم هوا
انا من خضتي سألته: بكل غباء مالها سنانك ؟
قالي: هو انا دخلت هنا بالغلط ولا ايه مش المفروض انتي اللي تقوليلي سناني مالها بردو !!!
قولتله: اها اها معلش بس مش هينفع..
سألني: ليه مش دي عيادة دكتورة اسنان زي م مكتوب بره بردو ؟
قولتله: ايوه ايوه بس لسه الافتتاح بكره
المره دي عنيه هي اللي كانت لونها أحمر وبتطلع شرار وقالي: افتتاح ايه اللي بكره هو انا داخل محل أكل ! هي مش العدة موجودة بردو ؟!
قولتله: عِدة !!
قالي: ي ست الحكيمة انجزي
قولتله: حكيمة !! انجزي !!
قالي: وربي دا انا لو بكلم بغبغان م هيردد بالطريقة دي
ابوس ايدك ي خالتي انجزي هموت من وجع سناني
انا سمعت كلمة خالتي دي وفتحتها ع البحري بقى وايه خالته دي وهو باين انه اكبر مني اصلا وبهدلته ع الآخر والجدع اللي يوقفني بقى
لقيته قعد ع الكرسي ووشه عليه صدمه وسكت خالص ومقالش غير كلمة واحده : ياماه
انا سمعت الكلمة مع ريأكشنات وشه والخوف اللي كان ظاهر عليه حتى لو كان بيمثل بس مقدرتش اتمالك نفسي وقعدت ع الارض اضحك
انا كنت بضحك حقيقي من قلبي وحسيت بإحساس غريب من الراحة لاول مره احسه
انا اتعودت طول سنين عمري ان صوتي يفضل واطي وميطلعش مهما كان كلام اللي قدامي واني بنت ولازم اتمالك نفسي علشان مفيش حد يقول عليا صوتي عالي وقليلة الادب
كل كبت السنين اللي عيشته طلع جزء كبير منه ع الشخص دا وحسيت وكأن جبال من الوجع والألم اتشال م ع قلبي...
بصيت عليه لقيت ع وشه وفي عنيه نظره مقدرتش احدد معناها بس قولتله: انا هعتذرلك بس مش علشان انت تستحق الاعتذار، انا هعتذر لسبب هخليه في نفسي.. اتفضل حضرتك علشان الكشف
قالي: اتفضل فين آجي اقعد جانبك ع الأرض !
اخدت بالي وقتها اني اصلا كل دا قاعده ع الارض لأول مره رجلي متشلنيش مش من وجع قلبي المرادي لا م كتر الضحك...
قولتله لا اتفضل ع اوضة الكشف ولما سألته مالها بقى سنانك
قالي: انتي جايه اشتغلي ايه !
لفيت وشي وضحكت وبعدين رجعت بصيتله بنظرات كنت بحاول تكون جد وقولتله طيب افتح بؤك بقى وكفايه رغي لسه هيتكلم روحت فاتحه بؤه جامد وبعدين سألته هي سنانك بتوجعك ؟
بعد وشه م ايدي خالص وقالي هو انا كنت بكلم شبح م اول م دخلت ولا انتي مين بالظبط انا عارف انها ليلة غريبة والسنادي مقرره تعمل معايا واجب قبل م تمشي اصل ازاي يعني تمشي في سلام !
قولتله: خلصت ندب !
قالي: ندب !!
قولتله: ممكن تنجز !
قالي: انجز !!
قولتله: ايييه دااا دا انا لو بكلم بغبغان مكانش هيردد كدا (كنت بتكلم بطريقة كأني بقلد كلامه اللي قالوا م شويه) مسك بطنه وقعد يضحك وبيقولي هو انتي ادتيني مخدر ولا مخدرات وعمال يضحك ومصهلل ع الاخر
قولتله لا دا ولا دا انا كنت لسه هسألك ع وجع سنانك لان الضرس محتاج يتخلع
بصلي بصدمه وقالي بجد مفيش مخدر اومال انا حالتي عامله كدا ليه ؟
قولتله حضرتك واضح انك عامل دماغ قبل م تيجي بقى انا اعملك ايه ؟
قالي: طيب بس كلام بقى وشوفي شغلك..
قولتله: انت اللي كلمة زيادة وهوقعلك صف سنانك
لسه هيتكلم شاورتله انه هووس خالص
ولحد م خلصت معاه مفيش حد فينا اتكلم فعلا وكأن كل واحد فينا كان في عالم تاني
انا كان كل تفكيري مشغول ف الراحة العجيبة اللي قلب حاسس بيها لمجرد اني هزأت حد وان صوتي طلع اصلا..
اول م خلصت هو سألني ع الكشف وتمن الخلع رفضت آخد منه حاجه وقولتله اعتبرها هدية العام الجديد ضحك وقالي حيث كدا هابي نيو يير يا #خالتي
بصيتله وكنت هطلع اجري وراه وقولتله بصوت عالي ياريت م اشوفش وشك هنا تاني مسمعتش غير صدى ضحكته وهو خارج..
انا مأخدتش منه ولا مليم لان م جوايا كنت ممتنه ليه جدا انه مقابل ثورتي عليه بقلة ادب وانه سابني اطلع كل اللي جوايا وكأنه حاسس بيا وكمان لاني كنت متضايقة اني خرجت كبتي كله ع شخص مقالش حاجه تستاهل لدرجة اللي عملته فيه علشان كدا قولت لنفسي ان دا اعتذار تاني مني ليه.. ورددت لنفسي جملته هابي نيو يير وانا بضحك وافتكرت ان ايه دا دي اخر ليلة في السنه انتي نسيتي ولا ايه وبكرة افتتاح اول احلامك
فضلت اتنطط والف حوالين نفسي بسعادة ورجعت البيت وانا مبسوطة ومستنية ولاول مره يطلع النهار بأي طريقة ومكنتش اعرف ان صبح ونهار جديد وحلم قديم هينور في حياتي !!
اول م فتحت عيني الفجر صليت ودعيت ربنا يكرمني ويوفقني في حياتي الجديدة وان العام الجديد يكون كله خير عليا وع كل العالمين
استعديت ولبست اللبس الجديد اللي اشتريته مخصوص لليوم دا كنت بالبس وكأني بالبس فستان فرحي او لبس العيد وانا طفلة المهم ان كان في احساس فرح وسعادة غامر قلبي ولله الحمد
روحت العيادة وكنت خايفة ومتوترة بس اول م وصلت وقعت عيني ع الشباك وافتكرت احداث الليلة اللي فاتت ابتسمت بلف وشي لقيته واقف قدامي بصيتله وانا فاتحه بؤي وببتسم نفس ابتسامة الايموشن دا بالظبط 😃
لقيته ضحك وقالي انه حب يعوضني عن امبارح وانه خلاني اشتغل مخصوص يوم اجازتي بإنه يجيبلي الورد بنفسه بدل م كان يبعته مع حد وان معاه هديه تانيه ودي تعويضاً عن اني مأخدتش منه فلوس انه جابلي كل اللي معاه في شغله وبيشتكوا م اسنانهم وانه بعت يشكر فيا لكل قرايبه واصحابه وقعد يمدح فيا اني غيرت شويه فكرته عن دكاترة الأسنان
من بعدها بقيت بقابله كتير خاصة ان الشركة اللي هو بيشتغل فيها في نفس العمارة اللي عيادتي فيها رغم ان طبيعة شغله ك مهندس ان وقته يكون بره الشركه اكتر الا اني اكتشفت بعدين انه كان بيستغل اي فرصة يشوفني فيها لدرجة كان اوقات بيجي مخصوص مع اي حد تبعه هيكشف لحد م في مره جالي لوحده وقطع كشف ولما سألته عن اخبار اسنانه ولو في وجع جديد لقيته نام ع سرير الكشف وبص ع السقف واخد نفس طويل وقالي: انا هحكيلك حكايتي يا دكتوره
قاطعته وقولتله بابا دي عيادة اسنان مش طب نفسي
قالي: شوفتي قولتيلي بابا اهو وانا لا اتنطط ولا اتعصبت زي م عملتي فيا ولا قولتلك بابا مين بس دا علشان انا فعلا اكبر منك مش لدرجة اد باباكي طبعا بس اتمنى اكون باباكي
قولتله: نعم !
قالي: جزء م احساسك ليا يعني اني زي باباكي
ولما لقاني متنحه ومش فاهمه قالي: انا زي م انتي عارفه انا مهندس ميكانيكا عيشت بره مصر فتره طويله لحد م نزلت وقدرت افتح المكتب دا ولله الحمد مع شريك ليا صديقي.. اهلي كانوا بيتعاملوا معايا وكأني بنت وكل شويه زن زن علشان اتجوز وفعلا خطبت وكتبت كتاب بس محصلش نصيب وم بعدها قولتلهم حاولت اهو علشان خاطركوا بس طلع ماليش حظ في الجواز وم وقتها كان تركيزي كله في شغلي وكان هدفي اكبر فيه واحقق فيه نجاح كبير ودا اللي حصل بفضل الله وولا مره حسيت بميل للزواج ولا للجنس الآخر لحد م شوفتك
هنا بصلي ب ابتسامه وانا مفيش بردو ع وشي غير اني متنحه وبس
ف قالي: انا سألت عنك وعرفت انك مش مرتبطه
قولتله: اه
قالي: اه ايه مالك ي خالتي
بصيتله بعصبيه ولسه هتخانق لقيته بيضحك وبيقولي هو انا لازم اقول كدا علشان لوح التلج اللي قدامي يفك
قولتله ي ابني احترم نفسك وخد بالك م الفاظك
قالي: هي وصلت لابنك م بعد م كنت بابا م شويه
قولتله: بقولك ايه ي أخ
هنا قالي لااااااااا كله الا دي أخ مين انا عمال اقولك تاريخ حياتي ومسيرة عمري وفي الاخر تقوليلي أخ !!
قولتله: يعني عاوز ايه بردو
قالي: هي البعيده مبتفهمش !
قولتله: اطلع بره دلوقتي احسنلك
قالي: اتجوزك انا عاوز اتجوزك
(صوت صرصور الحقل)
كمل كلامه انه حس براحه ناحيتي اول مره شافني فيها وانه كان مستغرب انه ازاي مردش عليا لما كنت عماله اتخانق معاه وصوتي كان عالي وانه بالعكس حس كأني كنت محتاجه سبب ولو تافه علشان انفجر واخرج كل اللي جوايا وانه جالي تاني يوم وفضل يردد لنفسه انه بيردلي الجميل لكن كل م كان بيلاقي نفسه سايب كل اللي ف ايده وقاعد تحت العماره مستنيني انزل علشان يعمل نفسه طالع ويقابلني وكأنها صدفه ويكلمني ان دا مش مجرد شعور ارتياح ولا امتنان وانه اول م قال لاهله فرحوا جدا لانهم كانوا يأسوا م انه ممكن يفكر في الجواز اصلا في سنه دا..
انا كان قلبي طول م هو بيتكلم بيدق جامد جدا واول م ذكر كلمة اهله قلبي دق اكتر بس م الرعب
سألته هو قالهم ايه عني قالي انه قالهم كل حاجه يعرفها عني..
سألته اللي هي ايه ؟ وانا طبعا خايفه من تعليقهم لو عرفوا سني !
قالي: زي انك بنت ناس ومحترمة ومقولتش طبعا ان لسانك طويل(كان بيضحك وبيحاول يهزر بس مكانش في مني استجابه م كتر خوفي وقلقي) ف كمل.. وشغلك وكدا يعني
قولتله كدا يعني اللي هو ايه ؟
سألته انت تعرف انا عندي كام سنه ؟ قالي اها دي بالذات اعرفها بالتفصيل لانك اصغر مني بيوم وضحك وقالي اكبر منك بيوم يعرف عنك بسنه وكان بيهزر
ف انا سألته واهلك يعرفوا بردو عمري ؟
هنا بطل ضحك وبصلي وسكت انا طبعا خمنت انه ي قالهم سني واتضايقوا جدا ورفضوا ي مقالش ودا دليله انه عمال بيتكلم دلوقتي
بس هو قطع تفكيري وقالي انتي عايشه في اي عصر ي بنتي ؟ ماله عمرك عمرك اللي مخلي وشك لونه اصفر كدا وانتي بتسألي
اه قولتلهم عمرك كام وجملة اكبر منك بيوم دي والدتي اللي قالتها وهي بتضحك واصلا مفيش حد اهتم بغير انهم حمدوا ربنا انك بنت ناس ومحترمه ونفسهم يقابلوكي جدا ويشوفوا مين اللي وقعت اشهر #عازب وسيم في العيلة وهنا غمزلي ورجع يضحك تاني ويهزر
وقالي: مردتيش ع سؤالي
سكت شويه
ف قالي: السكوت علامة الرضا
قولتله :سكوت ايه انا عماله افتكر كان ايه سؤالك اصلا !
قالي: ولو قولتلك غبية بتضايقي... ضحكت
قالي: الضحك علامة الرضا وسابني وخرج...
قعدت ع الكرسي وانا حاطه ايدي ع قلبي واول م المساعدة بتاعتي دخلت سألتها ع اسم الشخص اللي لسه خارج علشان اتأكد انه كان حقيقه مش حلم..
كملت اليوم وانا حاسة اني في عالم تاني واول م رجعت البيت لقيت والدتي بتقولي كنت لسه هنزل واجيلك قولتلها ليه خير انتي تعبانه قالتلي بصي ع موبايلك اللي عملاه صامت دا ع طول شوفي رنينا كام مره شوفت عدد الرنات واتصدمت وقولتلها ايه اللي حصل
قالتلي الجدع المهندس دا اللي معاكي في الشغل كلم ابوكي وقاله انه جاي بكره.. انا افتكرته اول م سمعت صوته اصلا مش دا اللي كان جاي وجايب معاه ناس كتير اول يوم في شغلك باين عليه ابن حلال بس طالما كل دا عارفه كنتي ساكته كل دا ليه
قولتلها كل دا اللي هو اد ايه دا هما كلهم اسبوعين واصلا جاب رقم بابا منين
قالتلي طالما مش منك يبقى قلبي ارتاح انه سأل واطقس وعرف عنك كل حاجه ودا دليل حب..
وقعدت تدعي يارب اكتبه م نصيبها ودخل الفرح بيتنا
ولاول مره م سنين والدتي تحضني وتقعد جانبي وتهزر معايا وقالتلي تصدقي كان عندك حق لما قولتي انه هيجيلك عريس من العيادة
كنت اول مره اخد بالي وولا مره اصلا فكرت في كدا لاني كنت فعلا وقتها بهزر معاها وبتكلم بنوع م التهكم والسخرية بس لعل قلبي وقتها كان حاله مختلف وربك فعلا رب قلوب بيعرف اللي جوه قلوبنا ونفوسنا حتى لو فضلنا ننكر...
جالنا فعلا تاني يوم وبالظبط 3 شهور واتجوزنا وعمري م هنسى ولا لحظة في حياتي من اول م دخل فيها لان م وقتها والفرح والسعادة ملت كل حياتي وكأن ربنا بيقول لقلبي كل لحظة ألم مرت بيك هتاخد قصادها اضعاف اضعاف اضعاف من الحب والسعادة...
البنات بتفضل تشتكي قبل الفرح م النزول كل شويه يشتروا حاجات الشقه
بس انا دي كانت م امتع اللحظات ع قلبي
ولا لحظة اختياري لفستان فرحي قلبي كان بيبكي والله قبل عنيا وكنت عمالة ادعك في عيني واقول ي ربي هو دا حلم ولا علم
انا بجد بقيت زي كل البنات وحققت حلم طفولة كل بنت وهو عريس وفستان أبيض وبيت وسكن وفرح !
الجميل بقى ان م كرم ربنا ولاننا بننسى وهو ابدا م بينسى احلامنا ودعواتنا اني م صغري كان حلمي اتزوج شخص متدين وفي نفس الوقت دمه خفيف
الكل كان بيضحد عليا ويقولي مفيش حد بياخد كل حاجة
ف انا يارب لو كان البديل هو تأخر سن زواجي ف انا راضية كل الرضا المهم اني لقيته في الآخر وكان هو فعلا #سكني وحضنه بمثابة #حِصن ليا من كل ألم أو وجع
حتى لما اتأخر الحمل سنه ونص كان هو اللي بيحميني من كلام الناس المؤذي واني احمد ربنا اني لقيت حد رضي بيا واني اصلا هخلف ازاي في سني دا وانا بقيت رجل بره ورجل جوه م القبر متخيله !!
كنت بشوف نظرات الحقد والحسد في عيونهم خاصة انهم كانوا بيتلذذوا في الشماته فيا وانهم يوقعوا بيني وبين اهلي
بس بفضل الله وكرمه مَن علينا بالخلف اللي يارب يكون صالح ويقدرنا ع تربيتهم
هقولك ع حاجة والله يا هدير انا نفسي م كنت مصدقاها وقت م عملت اختبار حمل وطلع اني حامل فضلت اتنطط م الفرحه ومكنتش مصدقه نفسي زوجي فضل يحضني ويثبتي في الارض ويقولي ي مجنونه هتإذي الولاد
ضحكت وقولتله خليتهم #ولاد مره واحده مش ولد واحد قالي ي ستي هو انتي اللي بترزقي ربنا هو الرزاق
لبسنا ونزلنا في وقتها علشان مكنتش هرتاح غير لما يتأكد الحمل وسبحانه الرزاق الكريم صدق كلمة زوجي وعرفنا اني حامل في #تؤام ولله الحمد وقتها والله زوجي سجد في الأرض وقام ضمني لحضنه وفضل ساكت تماما لحد م رجعنا وانا احترمت صمته لان كل واحد فينا كان بيبكي...
والحمد لله اللي جعل بُكانا كله فرح وسعادة وحمد...
لو قِصتي اعطت امل ولو بسيط لاي حد اتمنى بس لا تنسوني من دعائكم انا وزوجي واطفالي.. وعذراً لو طولت عليكم ❤
🎀🎀🎀🎀🎀🎀🎀🎀🎀
أُؤمن بأنَّ القادم سيمحي آثارَ مَا قَد سَلف ، وأنَّ اللَّه سيُعوِّضنا عَمَّا مَرَرْنا به 🌸
#حكاوي_هدير
#هدير_ابراهيم
صلوا على الحبيب