قصص واقعية (لهدير ابراهيم)

ارجوك لا تتزوجني

صلوا علي من ياتي يوم القيامه يقول امتي....امتي

#################################

#ارجوك_لا_تتزوجني !!

انا كنت بنت زي اي بنت في الزمن اللي احنا عايشين فيه دا ،
اهتمامي كله باللبس والخروجات ، بسمع اغاني ..
اللي هو عادي يعني بعمل زي كل البنات دلوقتي ،
واكيد باردو زي كل البنات حبيت ،

كنت بحب ابن الجيران ، كنت اول مابشوفه قلبي بيدق جامد جدا ،
كنت قويه قدام الناس كلها بس باجي عنده هو بضعف جدا ..

بس المشكله ان هو كان عكسي خالص ، كان مربي دقنه وبيقولوا عليه عامل فيها شيخ بس بصراحه كنت شيفاه احسن مني وانا مستاهلش واحد زيه ،
كنت متأكده انه مستحيل يفكر فيا او يفكر يتجوزني ،
بس قلبي مش بإيدي وكنت بتمناه من نصيبي باردو ، كنت حاسه اني متلخبطه ...

وفي يوم كنا بنصلي التراويح في رمضان ، وبعدها سمعنا درس ،
هو كان درس صغير بس سبحان من خلى قلبي يلين في الوقت دا ،
الشيخ كان بيتكلم على الناس اللي رمضان بيضيع منها خلاص يا ترى هيعيشوا لرمضان الجاي ؟؟
طيب يا ترى هتكون ليهم فرصه تانيه زي فرصة رمضان !؟
الشيخ سألنا سؤال ، لو عرفتوا انكوا هتموتوا بعد دقيقه واحده من دلوقتي هتعملوا ايه !؟
بكيت كأني خلاص هموت فعلاً بعد دقيقه ، كنت مرعوبه من الموت اللي اصلاً عمري م عملتله حساب ،
كنت خايفه اقابل ربنا وانا عارفه اني كلي ذنوب وسيئات ..
قررت بيني وبين نفسي اني هطلع من المسجد واحده تانيه خالص ،

وفي خلال سنتين او اقل  حصلت معايا حاجات كتير من عند ربنا وصلتني #للنقاب ، كنت بفكر فيه من زمان بس كنت خايفه مكونش اده لحد ما جاتني الشجاعه ولبسته بفضل الله ، والطبيعي اول ما لبسته ندمت على كل دقيقه كانت بتبعدني عنه ..

بعد ما لبست النقاب ب 3 ايام عرفت ان جايلي عريس ،
عادي محطتش في دماغي ولا اهتميت لان يعني الحمد لله كان بيتقدم ناس كتير ، بس كانت المفاجأه لما سألت مين العريس ؛

العريس كان جاري ، ابن الجيران اللي كنت متعلقه بيه اوي وحتى بعد ما ربنا هداني ، وكنت بدعي كتير يكون من نصيبي ،
بس كرهته اول ما عرفت ان هو اللي متقدملي ،
اول حاجه جات في تفكيري انه اتقدملي بعد ما لبست النقاب ،
اللي هو ما انا كنت مرميه قدامه سنين اشمعنى دلوقتي خد باله مني !؟
وخدت قرار اني هرفضه وقولت لوالدتي اني مش عاوزاه ،
بس هي قالتلي لازم تقعدي معاه الاول وبعدين ارفضي لو مش ارتاحتي ..

وفعلا اتقدم ، وكنت بعيط جدا ، كنت مستغربه نفسي ، اليوم اللي كنت مستنياه جدا و يوم م يجي اكون بعيط ومش عاوزاه يجي !!

ودخلت وقت الرؤيه الشرعيه وأول م سابونا لوحدنا ، هو اتكلم عن نفسه وحياته وشغله
ولما الدور كان عليا انا وسألني مش عاوزه تقولي حاجه ، قولته :
ارجوك متتجوزنيش !؟

استغرب جدا ردي ، وسألني انا فيا حاجه مضيقاكي !؟
ليه خدتي قرارك بسرعه قبل م تعملي الاستخاره حتى !؟

قولتله : انا قدامك من زمان اشمعنى دلوقتي افتكرت تتقدملي ؟
انت اتقدمتلي دلوقتي علشان بقيت شايف اني اتغيرت للمواصفات اللي انت عاوزها في البنت اللي انت عاوز تتقدملها ،
مع انك لو كنت اتقدمتلي قبل م اتغير كنت وافقت عليك ، مع اننا كنا مختلفين في حاجات كتير وكنت عارفه ان حياتي معاك هتكون عكس حياتي اللي عايشاها ، بس باردو كنت هوافق عليك ،
لكن دلوقتي بقولك شكراً ، انا مش بضاعه جاي تعاينها ع هواك !!

بصلي وضحك وبضحكته حسيت انه بيسخر مني او عاوز يستفزني ،

بس لقيته بيقولي : طيب وليه مسألتيش نفسك انا ليه طول الفتره اللي فاتت مش ارتبط ، مع ان والدتي كان كل البنات اللي بتختارهم ع حسب كلامك فيهم الصفات اللي انا عاوزها !؟

سكت ومعرفتش ارد ، ضحك تاني وقالي :
انتي فعلا قدامي من زمان ، وكنت بتمناكي جدا ، ولو تفتكري كنت خليت بنت خالي تجس نبضك قبل كدا في انك توافقي ترتبطي بواحد بمواصفاتي ولا لأ وانتي رفضتي وقولتيلها انك مش بتحبي الناس المتشدده اللي كل كلامها بالحلال والحرام والبسي دا ومش تلبسي دا واسمعي دا ودا لا ، فاكره !؟

انا كنت مش قادره استوعب كلامه خالص ، قولتله : انت كنت بتتمناني انا ؟؟
انا فعلا قولت الكلام دا لبنت خالك ، بس كنت هقولها ايه يعني خوفت انها تكون لاحظت عليا حاجه من ناحيتك ، فقولتلها كل كلامي دا ، بس انت طالما بتتمناني ايه اللي منعك تتقدملي !؟
علشان انا عكسك صح ولا علشان اهلك كانوا هيرفضوني !؟

قالي : لا دا ولا دا ، انا زي ما قولتلك بعد اللي قولتيه فقدت الأمل خالص انك توافقي عليا لو اتقدمتلك ،
بس كنت دايماً بدعي ربنا تكوني من نصيبي ، ومصدقتش نفسي لما لاحظت انك فعلا بدأتي تتغيري ، بس كنت خايف تغييرك المفاجئ دا يكون بسبب حد معين ،
لحد م انتي لبستي النقاب ، قولت مستحيل تكوني لبستيه علشان حد معين في بالك ،
ف خدت الخطوه بسرعه واتقدمت اهو ☺

انا كنت  مكسوفه جدا بعد م كنت مش طيقاه حسيت اني فعلا كنت ظلماه وان كل اللي حصل معانا كان بترتيب ربنا ..

انا وهو عمرنا م اتكلمنا مع بعض ولا كلمه قبل كدا ،
واكتشفنا ان كل واحد فينا كان بيتمنى التاني يكون من نصيبه برغم اختلافنا في كل حاجه ،

بس قدر ربنا جمعنا بعد كل دا ، واكيد الحمد لله ارتبطنا ومعانا دلوقتي بفضل ربنا بنتين وولد هما عندنا اغلى من نور عيونا ،
وبندعي ربنا نربيهم تربيه صالحه ..
وعاوزه اقولك يا هدير ، اني والله العظيم لو لفيت الدنيا كلها عمري ما هقابل في حنية ولا في كرم زوجي ، حسيت معاه كل حاجه حلوه في الدنيا وبحمد ربنا كل ثانيه انه رزقني بواحد #بياخد_بإيدي_للجنه ..

قولي لكل البنات نصيحه ؛
نصيبك كدا كدا هيجيلك ف خليكي في بيتك محافظه على شرفك وكرامتك وهو هيجيلك لحد عندك ، واوعي تقللي من نفسك علشان أي حد ، واوعي باردو تقربي من ربنا غير علشان هو ربنا اللي فوق الكل مش علشان خاطر مخلوق ..
وصدقيني كرم ربنا هيدهشك وينساكي اي وجع متقلقيش :)

وربنا #يرزق كل البنات يارب :)

################################
صلوا علي حبيب الله