قصص واقعية (لهدير ابراهيم)

فضل_الصدقه

صلوا علي الحبيب

##############################

#فضل_الصدقه !

السلام عليكم يا هدير ...
ده موقف حصل معايا بيبين فضل #الصدقة وحبيت اشارك الناس بيه عشان يتيقنوا من ان (ما نقص مال عبد من صدقة) و ان (ما أنفقتم من شئ فهو يخلفه) ويستشعروا معية الله في السر والعلن وألطافه الخفية بعباده...

اللي حصل أن والدي بيشتغل بره مصر  وبقية أسرتي موجودة بمصر ووالدي بيشتغل بالتجارة فالطبيعي أنه لما بيجيب بضاعة لتجارته بيشتريها بكل ما يملك على اعتبار انه لما يبدأ ببيعها بيجيب منها المصاريف ولكن في اخر مرة اشترى فيها حصل ما لم يكن في الحسبان!!!

وهو اليوم اللي بعد ما اشترى فيه البضاعة بالظبط كل البلد وقفت تماما بسبب #فيروس كورونا

ومعروف في بلاد الغرب أنه القوانين والتعاملات صارمة في الحظر فكان كل شئ متوقف بالبلد اللي فيها والدي حتى الخروج لشراء احتياجات البيت كان بصعوبة...

ومن هنا كانت المشكلة؛ اخر ما يملكه والدي هو بعض الجنيهات اللي بالكتير تعيشه #اسبوع واحد!!

وهو مريض سكر وضغط ويحتاج لعلاج وشرايط قياس السكر وفي ظل الظروف ديه مكنش بيجيبهم عشان اللي معاه يكفي اقصى فترة ممكنة...

على الصعيد الآخر أسرتي هنا معاها الحمدلله ما يكفيها لثلاث شهور تقريبا وأنا بفضل الله بشتغل وبيكون معايا دخل فكان معايا مبلغ وكل ما أعرض على والدتي أننا نبعته لوالدي فكانت تعترض لأن والدي من الممكن أنه يستلف من صاحب ليه هناك لكن احنا هنا صعب نستلف من حد وده غير ان اي طريقة هنبعت بيها هيتاخد نسبة من المبلغ المبعوت

ومن هنا بقيت في حيرة لأني بخرج جزء من المبلغ صدقة ولكن في ظل الظروف ديه وان والدي -لا قدر الله- ممكن وضعه يسوء اكثر فهل اخرج صدقة ولا اسيب اللي معايا لربما اسرتي تحتاج ووالدي!!

ولكن يشاء الله أن واحدة من معارفي تتصل بيا وتقولي عن حالتين محتاجين جدا للصدقة وموثوق فيهم فلو أعرف حد عايز يخرج صدقة اقولها عليهم...

وهنا فكرت كتير واحترت لأن والدي في الوقت ده كان أحوج الناس ولكن مش متاح ليا اني ابعتله فازاي اتصدق هنا ووالدي مش لاقي ياكل هناك!!!
وسبحان من يُلهم عباده بفعل الخيرات! فألهمني بآية (ويؤثرون على أنفسهم ولو كان بهم خصاصة)

مفكرتش بعدها لبست ونزلت وخرجت نصف المبلغ اللي معي للواحدة اللي عرفتني عن الحالتين
من غير ما اعرّف والدتي ولا أي حد من أسرتي بالموضوع (لأنها لو عرفت ماكنتش هتوافق طبعا في ظل الظروف ديه)

بعدها بيومين بالظبط جاء #الفرج
كانت والدتي بتكلم والدي وفضلت تشكر ربنا وظهر عليها الفرحة فلما سألتها حكت لي أن واحد عرف بالصدفة من صاحب والدي بالمشكلة اللي اتعرض ليها فبعت ليه مبلغ صدقة (يكفيه لأكثر من #شهرين)
ولما سألت والدتي كم المبلغ!!
فقالت نفس الرقم بالظبط اللي تصدقت بيه قبل يومين👌

أول ما سمعت الرقم قمت بسرعة واختفيت عن نظرهم لأني ماتمالكتش نفسي من البكاء...
ومش بس كدا ، المبلغ اللي حصل عليه والدي هو نفس الرقم ولكن بعملة البلد اللي فيها يعادل أضعاف مضاعفة من عملة مصر

فسبحان الكريم من يعلم ما يدور بصدورنا حتى بدون ما نتكلم!!

فعلا والله ما نقص مال عبد من صدقة!.

🌸🌸🌸🌸🌸🌸🌸🌸🌸🌸🌸

تطبيق ومثال بسيط ع فضل الصدقة وان مفعولها فعلا #سحر لو قدرنا نسيطر ع جشع نفوسنا ونتغلب عليه واحنا متيقنين ان ربنا هيرده اضعاف مضاعفه..

#من_الرسايل
#حكاوي_هدير
#هدير_ابراهيم

صلوا علي المصطفي