قصص واقعية (لهدير ابراهيم)

من الرسايل(العوض)

صلوا علي الحبيب

###############################

#من_الرسايل !!

مش عارفه اللي هحكيهولك دا يندرج تحت مُسمى ايه بس حبيت جدا اشاركه معاكِ ومع الناس اللي ع صفحتك..
انا عندي 35 سنه دلوقتي بس بدأت حكايتي من وانا في عمر 21.. اتقدملي جاري اللي من أول ما وعيت ع الدنيا تقريبا وهو حبه متمكن من قلبي!.
صحيح عمرنا م اتكلمنا بس كل واحد فينا كان حاسس ان ليه قدر كبير عند التاني وكنت بدعي ربنا ليل ونهار ان يجمعنا بيت واحد
وكان أخري اسمع صوته كل #رمضان في صلاة التراويح..
لحد م حصل واتقدملي وكانت أحلى لحظه في حياتي لحد م عرفنا سبب انه جاي لوحده وان والدته رافضه ارتباطه بيا لأنه دكتور وانا في كلية الآداب!!
ورغم انه حاول يقنع والدي انه قادر يفتح بيت لأن دخله كويس كمان عنده اللي يقدر يسنده شويه م #ميراث والده الله يرحمه
بس بردو والدي عاند اكتر ان ازاي والدته رافضه نسبنا..
تعرفي اني كان ممكن اسامح والدي لو كان تفكيره فيا انا وفي كرامتي، بس للأسف انا والدي كان بيعاند والدته وبس
متخيله ان جاري دا جاب عيلته كلها بس بردو والدي كان مصمم انه مش هيوافق الا لو والدته بنفسها اللي جات لحد عندنا وطلبتني واترجته كمان
ودا طبعا محصلش!!

بين كل فتره والتانيه كان جاري بيوسط ناس تكلم والدي وبيحاول م الناحيه التانيه مع والدته ومفيش فايده..
بقت سنة تمر ورا سنة ولأننا جيران وفي منطقة كل الناس فيها شبه يعرفوا بعض مبقاش حد يتقدملي لان الكل كان عارف الحكايه كلها وزودوا عليها طبعا كلام م عندهم
الأيام والشهور والسنين بتمر واحنا ع حالنا مفيش بإيدينا أي حاجه نعملها غير اننا مكملين في دعواتنا لربنا،وكنت بستنى رمضان كل سنه بلهفه لان دا الوقت الوحيد اللي بسمع فيه صوته وهو بيصلي بالناس في التروايح..
وكنت خلاص اتأكدت اني هعيش وهموت وانا لوحدي لحد م والدي تعب جدا وبالظبط هما 5 شهور واتوفى!
تعرفي بقى يا هدير ان المدهش والله العظيم الناس لما كانوا بييجوا يعزوني كانوا بيقولولي #افراااااج واخيرا خدتي براءه !!
متخيله لأي درجه الناس نفسها كانت حاسه بالسجن اللي والدي كان معيشني فيه!
الكل كان متوقع ان جاري هيرجع يتقدملي تاني لان هو كمان محاولش اصلا يتقدم لبنت غيري واخيرا بقى الكل متوقع اننا هنتجوز
لحد م حصلت حاجه مدهشه وهي
ان والدته اتوفت في نفس الشهر اللي والدي اتوفى فيه ؟!!
الناس كلها كانت هتتجنن ورجعت من تاني قِصتنا تتحكي في كل بيت!

انا مؤمنه إن لربنا #حكمه في كل شئ بس ممكن من الصدمه مش قادره لحد دلوقتي اجمع حكمة ربنا من كل اللي حصل معانا
عارفه المدهش اكتر بقى ان كل دا حصل وانا عندي 32 سنه يعني بعد11 سنه م اول مره دخل بيتي فيها!!
الناس كلها كانت شيفانا #مجانين بس هو بالأخص لان الكل كان مندهش اييييه اللي يخلي واحد زي دا تبارك الله أدب واخلاق وتعليم وجمال يتعلق بواحده اياً كانت هي مين للدرجه دي
ولولا ان الكل كان شاهد ع ان والدي منعني م الخروج بعد م خلصت الجامعه وكان عامل عليا رقابه شديده كانوا شكوا ان في #علاقه بينا!!

سيبك من كل وجع القلب اللي فات دا لاني مهما فضلت احكي او اتكلم مش هقدر اوصّل ولو لحظه من العذاب اللي مرينا بيه
بس خلينا في جمال عوض وجبر ربنا بعد م كل الوجع دا
اقولك ايه بس عن يوم م دخل بيتي واقنع خالي انه يوافق ع اننا نتجوز في خلال شهر واحد
مفيش حد قدر يعترض ولا يفتح بؤه بإن في عندنا حالتين وفاه
بالعكس والله كل الناس كانت مأيده قراره وبسرعه اتكتب كتابنا ومن كتر اندهاشنا والله كنا بنقعد مع بعض مفيش حد فينا عارف يتكلم
كان بياخدني معاه في كل مكان واشترينا سوا كل قطعه في بيتنا
اتجوزنا بسرعه وقررنا نكمل باقي الشقه واحنا مع بعض في بيت واحد
وبعد جوازنا في من الناس اللي كانوا شايفين انه مجنون اتجوز واحده عدت التلاتين وبعد كل دا مش هيبقى عنده ولاد
وفي اللي كانوا شايفين ان معجزة ربنا دي اكيد هتكمل بإننا نجيب توأم وبكدا يكتمل #العوض
بس الحقيقة إن عوض ربنا مفيش حد يقدر فعلا يتوقعه وملهوش مثيل وربنا رزقني بالحمل في تلات توائم مره واحده (بنتين وولد) واصر زوجي انه يسمي البنت الكبيره منهم ع اسمي..

انا بكتبلك كل دا ومتلغبطه خالص والله مش قادره اجمع كلامي بس متخيله اني عايشه معاه بقالي 4 سنين هما بعمري اللي فات كله وبمجرد م بصحى من النوم كل يوم الصبح بدعي ربنا افتح الاقيه جانبي وميكونش كل دا حلم...
مش عارفه احكيلك ايه ولا ايه هعتبر نفسي كبرت خالص في السن وهقولك ان ممكن اللي احكيه عن علاقتنا شباب اليومين دول ممكن يقولوا عليه #مُحن 😃 ف خلينا في القدر دا بس لاني عارفه ان مهما الناس تخيلت من جمال ف علاقتنا هتكون أجمل م أي تخيل❤

هرجع تاني واقولك مش عارفه ايه اللي خلاني ابعتلك وانا لسه عرفاكي من امبارح بس لما شوفت حد واخد شير من عندك لحكاية البنت وعقوق ابوها ليها يمكن افتكرت كل اللي فات من تاني
يمكن حبيت احكيه علشان اطمنها هي او غيرها ان في حاجه جميله جدا مهما اتأخرت اسمها #عوض ربنا
يمكن حبيت اوصل للبنات ان لسه في رجاله بجد وان مفيش حاجه اسمها #ظروف
مش عارفه بس مبسوطه اني حكيت حتى لو كلامي كان ملغبط ومش مترتب بس اكيد وصل لقلوبكوا اللي عاوزه اقوله❤

🌸🌸🌸🌸🌸🌸🌸🌸🌸🌸🌸🌸🌸🌸🌸
يعلم ربنا انا كنت محتاجه اد ايييييه لرساله زي دي بعد كم النكد ووجع القلب اللي في المسجات💔
مش لاقيه تعليق مناسب من كم الوجع اللي مرت بيه وكم بردو الجبر اللي ربنا رزقها بيه..
ربنا يبارك في عمرها وعمر زوجها ع طاعته ويبارك في خلفهم ويجعلهم ذريه صالحه يارب تنسيهم كل المر والوجع اللي مر عليهم💙

#من_الرسايل
#حكاوي_هدير
#هدير_ابراهيم

صلوا علي رسول الله