قصص واقعية (لهدير ابراهيم)

معجزة_لقلبي

اللهم صلي علي رسول الله

هدير إبراهيم

#معجزة_لقلبي !!

هاشتاج باقي القصص👇
#قصص_واقعيه_لهدير_ابراهيم 💌

بما اني بقالي فتره مش بفتح ولا بنزل قصص ف قولت ارجعلكوا بقصة طويييلة بقى.. والناس اللي بتضايق م الطول وملهاش خلق للقراءه.. اوعوا تشوفوا طولها بعنيكوا شوفوه بقلبكوا  ومحدش يدعي عليا🙈😂 اسيبكوا مع القصة اللي حرفيا خدت قلبي بقى💙
🎀🎀🎀🎀🎀🎀🎀🎀🎀🎀
عدا عليا وقت طويل كل اللي كنت بعمله اني بقعد اتخيل شكل واحساس الناس اللي ربنا بيحقق معجزة ف حياتهم.. اتخيل الناس اللي مش قادره تنام بالليل مش م الهم أو الحزن لا م كتر الفرحة اللي ربنا بعتها ليهم..
اقعد اتخيل وشويه اقول لا لا دا مش زمن المعجزات وحتى لو في معجزات ف هي مستحيل تتحقق معايا... وشويه تانيه ادعي ربنا بخجل ان نفسي جدا جدا تتحققلي معجزة ويكون ليا فيها فرحة كبيرة..
بس عمري م قدرت اتخيل شكلي ولا احساسي لو دا حصل لاني زي م قولتلك شايفه ان تحقيقه اقرب للخيال والمستحيل -ودا طبعا دا كان سببه سوء ظن مني وبعد قلبي عن ربنا- !!

انا بنت اتولدت في اسره مستواها متوسط دا بالنسبة للحاله الاجتماعيه اما حال الدين ف بيتنا ف كان والدي بس هو اللي بيصلي وولا مره حاول حتى انه يتكلم معانا ف شئ يخص الدين..
احنا بنتين وولد وأنا الكبيرة... م وانا صغيره مكانش ليا حلم دخول كلية معينه ولا ف دماغي خالص اني اشتغل لما اكبر علشان كدا دخلت الكلية اللي اختارها مكتب التنسيق بالتالي مكانش عندي شغف في الدراسة وكان ممكن اخد السنه في سنتين..
ع عكس المتوقع ف انا مكنتش ناقمه ع حياتي يمكن لان جالي تناحه ومناعه بسبب تعامل اهلي واصحابي وكل اللي حواليا اتجاهي
عندك مثلا اخويا الصغير ماشاء الله م صغره مهتم بدراسته جدا.. واختي كل اهتمامها كان بشكلها ومظهرها ف قدروا يلفتوا انظار الناس ليهم ويسمعوا منهم كلام حلو.. خدي عندك أنا بقى ولا اهتمام بشكل ولا مظهر ولا تعليم ف تخيلي معاملة الكل ليا 🤷‍♀️

في بداية حياتي كان جسمي صغير ومتوسط لا رفيعه ولا تخينه.. دخلت ثانوي بدأ شكلي يتغير..ظهر ف وشي حب شباب كتير جدا وبدأ جسمي يتخن..
طلبت م والدتي اني اكشف سواء ع حب الشباب او زيادة وزني.. بس كان ردها ان دا طبيعي لكل البنات في المرحله دي وبكره لما اتجوز حب الشباب هيروح لوحده وبالنسبه لجسمي ف كانت تقولي بطلي أكل شويه وانتِ تخسي ي كرنبه - ممكن تقولي كدا قدام اي حد وتضحك هي وهما عادي جدا- ف بقى اسمي م ثانوي عند كل اللي يعرفونا #كرنبه !

اللي زعلني أوي ان انا فعلا اكلتي ضعيفه جدا وبالنسبه لحب الشباب ف هو اول م بدأ يظهر لأختي والدتي جريت بيها عند دكاترة الجلديه واهتمت بيها مش زي م عملت معايا..
كنت دايما بحس ان والدتي بتفرق دايما ف المعامله بيني وبين اخواتي وكانت دايما تردد انتِ مش بنتي انا ماجبش بنت بالوحاشه دي.. انتِ طالعه شبه عيلة ابوكي.. وم كتر م كانت بتردد الكلام دا اخواتي نفسهم بقوا بيستعروا مني..
هحكيلك موقف بسيط.. في مره اخويا الصغير نسي الساندويتشات بتاعته ونزل المدرسه ولانه عنده حساسيه م اكلات معينه ف مينفعش ياخد اكل م غيره والا هيتعب.. قولت لوالدتي تخلي اختي تنزل بسرعه تلحقه بس اختي رفضت وقالت انها اصلا مش نازله مدرستها لانها عاوزه تنام ف مش هتنزل لحد.. وكان رد والدتي انها قعدت تقولي م تنزلي انتِ تروحيله ي كرنبه.. ولما بصيت ع رجلي اللي كنت واقعه عليها وتعباني قالتلي م انتِ لو مش شبه الكرنبه مكانش زمانك ادحرجتي ع السلم وكنتي هتكسريه.. دا كان ردها نسيت اخويا بحساسيته بأكله بكل حاجه وقعدت تعاير فيا🙂
دخلت لبست ونزلت اجري ف الشارع وانا عماله اعرج برجلي ولما وصلت المدرسة وشرحت للمدرس الموقف وافق اني اطلع لاخويا الفصل.. وكان رد فعله اول م الولاد قالوله اختك هنا عنيه كانت كلها دموع وقالهم لا دي مش اختي.. سيبتله الساندويتشات ونزلت وانا عماله بعيط وبسأل نفسي هو ايه بالظبط اللي انا عملته اغلط استحق عليه كل دا !!