قصص واقعية (لهدير ابراهيم)

باب الكريم

صلوا علي الحبيب المصطفي

###############################

#باب_الكريم !!

هاشتاج باقي القصص 👇
#قصص_واقعيه_لهدير_ابراهيم 💌

🌷🌷🌷🌷🌷🌷🌷🌷🌷🌷🌷🌷

قبل 8 سنين من انهارده كنت حاسة اني اتعس انسانة على وجه الأرض !!
حالياً موضوع #التمنر وتسليط الضوء عليه كتير ع مواقع التواصل الإجتماعي بس تخيلي ان التنمر دا يكون من اقرب الناس ليكِ #أمي !
جسمي كان# مليان نوعاً ما ودا كان بيخلي أمي تضايق جداً مني لأنها شايفة ان دا ممكن يكون سبب أساسي في عدم زواجي ،كانت دايماً تسم بدني بالكلام وكل م تشوفني لسه هبدأ اكل تقولي يا #دبة هتقعدي في أرابيزي ومش هتتجوزي مين اللي هيفكر يبص لواحدة زيك بتاكل زي #البقرة !
كنت بسمع كلام منها ابشع وهي متخيلة ان الكلام دا هيأثر فيا، هو فعلا كان بيأثر بس كان بيخليني آكل اكتر ..
نسيت اقولك اني #طبيبة ، رغم ان قرايبي كانوا في ثانوي يضحكوا كل م يشوفوني بذاكر ويرددوا ان عقلي كله في بطني ف اكيد مش #هفلح ،
تعرفي يمكن تنمرهم دا اللي وصلني اني اكون طبيبة واني اثبتلهم عكس كلامهم ، المشكلة كانت في أمي.
كلام الناس والقرايب وأمي من قبلهم كان بيوجعلي قلبي وبدأت فعلا آخد خطوة في إني #أخس لما لقيت عمري خلاص قرب من التلاتين وانا لسه مكاني وللأسف محصلش ان حد اتقدملي غير مرة واحدة دخل بيتنا ومشوفتش ولا سمعت عنه حاجة تانية وكان رد أمي انه اكيد هرب من #البقرة اللي شافها قدامه .. " هكون صريحة معاكِ في كل حاجة عل واحدة تقرأ الكلام دا تكون بتمر بنفس تجربتي "
المهم اني بدأت فعلاً مرحلة اني انزل من جسمي وقدرت الحمد لله وكنت بردد لنفسي اني زي م خيبت ظنهم ودخلت كلية الطب اقدر اخيب ظنهم في اي شئ تاني،
وفعلاً قدر ربنا وخبط ع بابي #عريس !

كان اسوء شخص قابلته في حياتي .. مش بس اجتماعياً ولا مادياً ولا مستوى التعليم لكنه كمان كان شخص مقزز جداً، من أول مره شوفته فيها وانا مفيش ناحيته اي راحة نفسية ، ومع ذلك تخيلي أمي وافقت ؟!
مفيش هنا رأي والدي لأنه غلبان جداً ومش بيحب يقف قدامها كتير وهي اقنعته ان لو دا راح مش هيجي غيره وانها م صدقت ان في واحد وافق ع #البقرة اللي خلفتها ..
كنت بسمع كلامها كله وببكي ورغم توسلاتي ليها وكلامي اني فعلاً بدأت أخس واكيد ان شاء الله هيجيلي حد افضل الا انها رفضت كل دموعي وتوسلاتي وضربت بيهم عرض الحائط ومكانش في حد جانبي وللأسف انا كنت شخصية #سلبية جدا ووافقت .. ورغم اللي شوفته منه خلال شهرين خطوبة وكل مره كنت بتحايل ع امي اني مكملش في الخطوبة دي لوقت م جات الطامة الكبرى ولقيته بيبلغني ان #كتب_الكتاب هيكون اخر الإسبوع !
كتب كتاب مين ؟! كنت في صدمة وجريت ع أمي اقولها شوفتي المجنون دا بيقول ايه ؟!
قالتلي والله م في حد مجنون غيرك .. احمدي ربنا انه مطفش من وشك من اول يوم
استغربت وقولتلها يعني انتِ عارفة وموافقة طيب ازاي ؟! دا انا حتى بنتك الوحيده ليه ترميني الرامية دي ؟!
قالتلي : بنتي الوحيده اللي بسببها الناس واكله وشي في الرايحه والجاية و عراني ؟
قولتلها : عراكِ ؟ ليه دا مفيش واحده فيهم بنتها دكتوره.
قالتلي : بس كلهم بناتهم اتجوزوا ، والبنت طول م هي في بيت اهلها لسه قنبلة موقوته، دا احنا مبنعرفش ننام الليل ولا نمشي في الشارع زي باقي الخلق بسببك.
قولتلها: للدرجادي ؟! ليه كل دا انا حتى لسه م تمتش التلاتين ؟
– البنت اللي تعدي الـ 25 تبقى عنست ومفيش حد هيبص في وشها الا اللي مطلق ولاعاوزها زوجة تانيه ولا كبير وعاوزها خدامه ليه، وتعرفي حتى لو كان جالك واحد من دول كنت هقوله يشيل.
– انتِ متخيلة اللي بتقولية طيب ؟!
– هي كلمة وخلاص وزي م قولتلك احمدي ربنا ان هو اللي طلب يكتب الكتاب لو عليا كنت طلبتها منه من اول يوم ، كنت خايفه ليهرب من وشك !!