قصص واقعية (لهدير ابراهيم)

ضيقي ضيقي حتي تنفرجي

صلوا علي الحبيب المصطفي

##################################

#ضيقي_ضيقي_حتي_تنفرجي

جميله اوي #الرسايل الربانيه اللي بتوصلنا في عز احتياجنا لأي ايد تطمنا وتطبطب ع قلوبنا ..
هي مش قِصه هي رساله صغننه ، لعل في حد هنا كان منتظرها و نزلت مخصوص علشان تطمن قلبه ❤

كالعااااده #هاشتاج باقي قصصنا 👇
#قصص_واقعيه_لهدير_ابراهيم ♡

****************************

السلام عليكم ورحمه الله وبركاته
يمكن تكون القصه اللي هحكيها مفيهاش احداث مثيره ولا هعرف احكي تفاصيل عنها
لكن  اهم ما فيها
المعني اللي عايزه اوصله واللي متاكده ان كتير منكم ممكن يكون محتاجه ولعل كلامي يكون رساله م ربنا لحد بيقراه دلوقتي  عن طريقي وطريق هدير ....

*اسمحولي اسمي قصتي بمقوله سيدنا علي رضي الله عنه
(ضيقي ضيقي حتي تنفرجي)

والحقيقه من الحجات اللي مشجعاني اكتبها اني ف مرحله الفرج
فرج ربنا طعمه حلو قوي وخاصه لما يجي بعد الضيقه
بتحس انك عايز توقف كل حد تقابله وتحكيله حكايتك وازاي تعبت وصبرت وف الاخر بفضل الله انتصرت واتجبرت

*اول ابتلاء مريت بيه ف حياتي
كان شديد وصعب عليا واتعرضت فيه لظلم  واساءه بدون اي وجه حق
فضلت مقهوره كتير وبدعي كتيرررر ربنا ينصرني
وطبعا قلبي كانت بتدخله لحظات ضعف وبرضه متمسكه بالدعاء واليقين ان النصر جاي

وف ليله من الليالي
كنت مع أمي الانسانه اللي ربنا بعتهالي عشان تنور دربي ع الارض
ف بقولها انا تعبت ؛حاسه قوتي خلصت
ردت عليا بآيه وكأني بسمعها لاول مره
ومن يومها دخلت قلبي وعقلي

(أم حسبتم أن تدخلوا الجنه ولما يأتكم مثل الذين خلوا من قبلكم مستهم البأساء والضراء وزلزلوا حتي يقول الرسول والذين آمنوا معه متي نصر الله – ألا ان نصر الله قريب –)

ربنا بيقولنا انتوا فاكرين انكم هتدخلوا الجنه ومش هيصيبكم بأساء ولا ضراء !؟
دا حتي رسول الله وحبيبه والمؤمنون معه زلزلوا(تعبير عن شده البلاء وعظمته)
وسألوا الله متي نصر الله ؟؟
وكان الرد من العزيز.......الا ان نصر الله قريب ❤❤❤

-بعد ما والدتي قالتلي الكلام دا وكنا ف جوف الليل
صفيت قلبي وكلمت ربنا
مكنش ع لساني غير
متي نصر الله؟

والله العظيم نمت صحيت علي نصره وفرجه لكُربتي وجبره ليا
جبر عزيز مقتدر
وحتي اللي ظلموني ربنا كان بياخدلي حقي منهم واشوف كل حد بيحصله حاجه واحس انها ذنبي
ووالله انا كنت وقتها سامحت وصعبوا عليا وكان نصر ربنا ليا كفايه عندي
بس كنت حاسه ربنا بيقولي لا
انا بسامح ف حقي
بس حق عبدي لا 🚫

* الجزء التاني من حكايتي هو الفتره اللي بعيشها دلوقتي
بعد ما ربنا كرمني والحمدلله
مرت الايام والسنين
وجه ابتلاء تاني
ودا لان الابتلاء سُنه كونيه ؛
هي دي الدنيا
احنا مش ف جنه هنا......

المهم الابتلاء دا كمان طوووول واشتد وبدعي كتير والامور بتزداد سوء
وعدت سنين ع الحال دا
ومش هنكر اني قبل الفرج بفتره قصيره جدا

بدء اليأس يلعب بقلبي ؛او نقول قله الصبر( وخلق الانسان عجولا)

بقيت بقول طيب هو فيه حجاب بين دعوتي وبين الاجابه !؟
طيب انا ليا كتيررررر بدعي ......الخ
بس كنت برجع تاني ع طول ،اقول الجمله اللي بحبها قوي
(لن أبرح بابك يالله حتي تستجيب)

عارفين الشحات الرزل ؛اللي يقعد يقولك انا قاعد مش ماشي الا لما اخد حاجتي
وف الاخر فعلا بتديله
ولله المثل الاعلي طبعا
انا كنت بقول كدا
(يارب انا قاعده ع بابك
،سنه اتنين عشره قاعده؛
ما انا مليش حد تاني ارحله
معرفش باب اقف عليه 
معنديش إله غيرك
لو انت مش هتديني مسألتي مفيش حد هيدهاني
مهما اليأس يلعب بيا برضه قاعده ومتمسكه بالدعاء واليقين ان الفرج جاي مهما اتأخر)

**وبفضل الله ربنا رضاني وفرج كربي
وقتها بقول لامي ع الاحساس دا
احساس ان ربنا بيلحقك قبل ما تيأس وينصرك
قالتالي كعادتها الآيه التانيه اللي دخلت قلبي
(فلما استيأس الرسل وظنوا انهم كذبوا ......جاءهم نصرنا)

قالتلي حتي الرسل اليأس كان بيلعب بيهم وبيحاول يدخلهم
بس عشان ربنا كريم بيبعت الفرج
اول ما يحس انك جبت آخرك

ما هو مكنش بيبتليك عشان يوقعك ولا ييأسك
هو بس بيختبر صبرك  واول ما تيحي تقع يلحقك......

سامحوني طولت عليكم
بس نفسي اقول للناس كلها
-اصبروا واصبروا واصبروا
-سبوها تضيق وتضيق وتشد عشان تفرج
-هو سامعك وشايفك وحاسس بكل ذره وجع ف قلبك وهيلحقك ف الوقت المناسب.....متخافش

وبعد ما تفرج هتحس بحلاوه وفرحه ملهاش وصف
وقتها كل اللي هيجي ف بالك
،ياتري انا كانت نتيجه اختباري ايه
ياتري هيتقال عني زي سيدنا ايوب

(إنا وجدناه صابرا.......نعم العبد)

ولا هتكون فشلت ف الاختبار !!؟

****************
#ضيقي_ضيقي_حتي_تنفرجي

ان الله يختبر صبرك ثم يحدث بعد ذلك أمرا...

#احبكم_في_الله ❤

##################################

صصلوا علي من جلس علي ركبتيه يواسي طفلا مات عصفوره