صلوا علي من جلس علي ركبتيه يواسي طفلا مات عصفوره
##################################
#صغيرتي_مريم
#قصص_واقعيه_لهدير_ابراهيم
صحيت من النوم انهارده كان قلبي مقبوض جدا من غير سبب كان جوايا احساس غريب مش فاهمه في ايه اتوضيت وصليت وقرأت قرآن والاحساس باردو بيزيد لدرجه اني حسيت بخنقه رهيبه ....
فضلت اعيط من غير م افهم في ايه ف قررت اروح المكان الوحيد اللي مجرد م بدخله برتاح وبخرج منه شخص تاني ... وهو المسجد وقولت بالمره انهارده الاتنين وممكن اشوف مريم ...
مريم بنوته داخله 3 اعدادي ... عرفتها بعد م بدأت الالتزام بفتره صغيره كنا دايما نتقابل ف المسجد قبل صلاه العصر ونفضل لصلاه العصر نصلي وننزل ... اخدت بالي منها كذا مره لاني كنت دايما بشوفها يوم الاتنين والخميس ف المسجد ....
بنوته بتحب الضحك والحركه كانت بتلفت انتباهي دايما خاصه انها ماشاء الله عليها عسوله وروحها حلوه مع كل اللي حواليها ...
كان سبب تعارفنا هو النقاب بتاعي .... لقيتها جايه ف يوم بتسألني ازاي بلفه كدا لان شاكله غريب بس حلو اوي ... ودا سؤال اتعودت عليه من اول م لبست النقاب ...
المهم قولتلها ودي كانت بدايه الكلام .... بقيت اول م ادخل المسجد ادور عليها ونقعد نتكلم شويه وبعدين كل واحده فينا تكمل مذاكره ...
كنا بنتكلم ف الدين كتير بس عمرنا م اتكلمنا عن النقاب ولا انا حتي قولتلها ازاي لبست النقاب ...
وفي يوم لقيتها جايه منهااااره جدا وفضلت تصلي وتعيط كتيييير ... سألتها مالك ؟؟؟ قالتلي في بنت ف اعدادي اسمها سلمي ماتت قولتلها ايوه عرفت الموضوع دا من واحده صاحبتي #ماهيتاب بس دا يا حبيبتي قدرها وهي عند ربنا دلوقتي ف مكان افضل ان شاء الله ....
قالتلي انتي عارفه انها كانت خلاص هتلبس النقاب ونزلت صورتها بيه ع الفيس بس مش لحقت تلبسه يا هدير 😭😭😭😭
تفتكري كدا هي عند ربنا لبسته يعني هي كانت في نيتها خلاص هتلبسه بس عمرها خلص 😭😭 تفتكري هي فرحانه عند ربنا دلوقتي 😭😭
مريم فضلت تعيط جامد وانا مش كنت عارفه اهديها لاني كنت مستغربه جدا تأثير ان سلمي اتوفت قبل م تلبس النقاب بأيام تقريبا ... خاصه ان انا ومريم يعتبر مش اتكلمنا ع النقاب ك حكم الشرع فيه ان كان فرض او سنه .... كانت بتحب شكله اوووي بس ....
واليوم دا يعتبر اول يوم نتكلم عنه ف عادي قولتلها ان انا حاليا مقتنعه انه فرض لاسباب كتير اهمها اننا ف زمن الفتن ....
مريم من وقتها بدأت تفكر ف النقاب بس مع الوقت نسيت شويه خاصه من رد فعل اهلها ف البيت انهم رفضوا النقاب تمااما بحجه انها لسه صغيره ....
لوقت وفاه #حياء الله يرحمها .... مريم شافت حياء بس وقت العصر ومشيت راحت درسها بسرعه مش لحقت تعرفها او تتكلم معاها ... ولما اتقابلنا بعدها حكيتلها اللي حصل وان البنت اتوفت ... مريم كانت مصدوووومه جدا من اللي حصل مع #حياء لدرجه انها بقيت من بعدها تتعامل ع ان الدور عليها هي وان وقتها قرب ينتهي ف الدنيا ....
كنت دايما اقولها ان دا احساس بيجي لاي حد فينا بيكون تحت ضغط كبير ان اللي حواليه بيموتوا ف طبيعي تحس بالموت قريب منها ....
مريم نزلت اشترت معايا اسدال الصلاه نوديه المسجد بدل اللي حياء كانت اخدته ومش عرفت ارجعه ....
يومها قالتلي انها هتشتري هي كمان واحد يكون صدقه جاريه عنها لما تروح عند ربنا :(
حياه مريم اتغيرت تماما بقيت اول م ادخل المسجد الاقيها مستنياني واول م تشوفني تقولي ازيك من غير م تبصلي حتي وتمسك شنطتي تطلع التاب تقولي ها في ايه جديد عندك وتفضل تقلب ف الفيديوهات والدروس اللي عليه ؟؟
كنت بضحك من طريقتها جداااا كنت بحب روحها طريقه كلامها البراءه اللي فيها واللي حاليا بقي نادر اننا نلاقيها ....
كنت بشجعها تسمع وتقرأ في الدين خاصه النقاب ... بس جيت ف مره وبطلت اكلمها عنه بسبب ان في بنت اكبر منها بسنه لبسته بعد وفاه #حياء بس للاسف قلعته :( كنت خايفه انها تلبسه وترجع تقلعه تاني وممكن يأثر ع نفسيتها :(
هي لاحظت بس انا قولتلها مش تاخدي الخطوه دي غير لما تكوني متيقنه انك هتفضلي متمسكه بيه للنهايه ... بقيت اتجنبها فتره مش عارفه ليه بس يمكن بس شده اقتناعي بإن النقاب فرض خاصه ف زمننا دا ... ف كنت خايفه اتكلم معاها ف تلبسه وترجع تقلعه تاني زي البنت التانيه :(
كمان هي اهلها كانوا معترضين تماما خاصه مامتها وكنت مش حابه يحصل عندها مشاكل ... كنت شيفاها بنوته صغيره لسه بدري عليها تشيل هم حاجه ويحصل مشاكل بينها وبين اهلها ...
اتفقت معاها نتكلم ف اي حاجه بعيدا عن النقاب وهي وافقت بس كان شرطها ان اول م ادخل المسجد تاخد النقاب بتاعي تفضل لبساه لحد م ننزل ... وقتها ضحكت ووافقت ... اول مره لبست النقاب بتاعي اخدتها ف حضني جامد وعيطت ... عيطت لانها مجرد م لبسته فضلت تحضنه وتعيط 😭😭 فضلت تقولي دلوقتي عرفت ليه سلمي كانت متمسكه تلبسه ... دلوقتي عرفت ليه #حياء اول م لبسته مش قلعته تاني خالص غير بعد م روحها طلعت عند ربنا 😭😭 فضلت تعيط بطريقه هيستريه ...
حضنتها وقولتلها لو ربنا كاتبلك تلبسيه صدقيني هتلبسيه ....
كانت بتفضل لبساه ومش بترضي ترفعه عن وشها غير قليل ... كنت بقولها انتي مجنونه الناس م بتصدق تدخل ف مكان مفيهوش اختلاط علشان ترفعه وانتي تفضلي لبساه !!!
كانت دايما تقولي ايه لازمتها بقي لو رفعته م انا كدا مش هحس اني لبساه :(
كانت دايما تعمل كأنها لسه جايه من بره وانها فعلا منتقبه وترفعه عن وشها وشويه وتتخيل كأن راجل دخل علينا ف تنزله بسرعه ع وشها ... كنت بفضل اضحك دايما ع طريقتها كانت اللهم بارك تدخل القلب بسرعه .... كمان كانت حركتها كتير ولما تيجي تذاكر تفضل رايحه جايه ف المسجد ... كان لينا ركن معين خاص بينا ف المسجد ...
كانت بتحب تتكلم مع اي بنت وتتعرف عليها خاصه المنتقبات ...
كان افضل ايامي هي الاتنين والخميس لما بقابلها ف المسجد ...
وكنا نخلص صلاه وننزل مع بعض ...
كنت بحس انها بتتحول ف الشارع ...
بتبقي ماشيه باصه ف الارض صوتها واااطي جداااا اللي يشوفها ومش يعرفها يتوقع انها بنت خجوله جدا ومش بتتكلم ولا بتخطلت بالناس ....
مريم بقت كدا بالظبط من بعد وفاه سلمي الله يرحمها ... كمان كانت بتقلدني ... كنا الاول لما نمشي ف الشارع كانت تعاكسني كأنها ولد بس كنت دايما اقولها النقاب هيربيكي واصلا فرض عليكي انتي بالذات بسبب اللي بتعمليه ف الشارع دا ... كانت تفضل تضحك كتير ... سألتها سبب التغيير قالتلي : يعني هو ولا نقاب ولا حتي اخلاق النقاب !!؟؟
قولتلها اولا المفروض ان اي بنت حتي لو مش محجبه اصلا تكون ماشيه ف الشارع مش صوتها عالي ولا بتضحك بصوت عالي ولا كدا ... ثانيا انا اكتر واحده مبسوطه علشان اترحمت من طريقتك وحركاتك طول م احنا ف الشارع 😂
كانت تضحك وتقولي ماشي لينا مسجد يلمنا 😀
أنت تقرأ
قصص واقعية (لهدير ابراهيم)
Spiritual^-^ صلوا علي حبيب الله^-^ قصص واقعيه بسرد الاشخاص الحقيقين لهذي القصه اكيد كتير وهو داخل يقراء عارف من هدير وايه هي قصصها قصص منها من يبهرنا ومنها من يجعلنا نحمد الله ومنها من تشعرنا بالسعاده والامل جميهم اشخاص تعلقو بالله لينعمو ^-^صلوا علي حبي...
