قصص واقعية (لهدير ابراهيم)

اختي_خدت_جوزي_بالسحر

صلوا على النبي صلى الله عليه وسلم

_____________________________________

#اختي_خدت_جوزي_بالسحر !!

#قصص_واقعيه_لهدير_ابراهيم 💌

🎀🎀🎀🎀🎀🎀🎀🎀

سلام عليكم
مساء الخير أو صباح الخير عليكوا حسب توقيت سماعكم لقصتي..

مبسوطه اني هشارك معاكوا بقصتي رغم ان انا متوتره شويه..
عقلي عمال يودي ويجيب ومش عارفه ابدأ منين ولا ازاي وخايفه وقلقانه اوي اني اكون رغايه او تقيله ع قلبكوا..

انا يمكن عكس كل اللي قعدوا قدامكوا علشان يسردوا عليكوا قصة حياتهم..
هما بيبقوا حاملين هم فتحهم لماضيهم المُقبض للقلب
لكن انا لما بدأت ارتب احداث حياتي واجمعها لاقيت نفسي ببتسم..
قصتي وجعها مؤلم جدا يمكن لان الوجع حصلي م اقرب المقربين ليا
بس سبحان الله ترتيب ربنا بيخلي العقل يحصله صدمه وعدم استيعاب لفتره م دهشة الجبر..

ف انا يا جماعه الحمد لله من الناس اللي بكت من كتر الفرحه ع جبر ربنا لقلبي..
دا حصل ازاي بقى هحكيلكوا..

وهبدأ معاكوا احداث قصتي بإني اعرفكوا بنفسي
انا نسمه..
البنت الوسطانيه لأب وأم موظفين
قبلي ولد وبعدي بنت..

يُقال ان ف الغالب اكتر طفل بيتظلم هو الطفل الوسطاني..

اخويا اللي قبلي هو الكبير واول فرحتهم وكمان الولد الوحيد طبعا ف كان ليه مكانه ومعزه خاصه
واختي الصغيره هي اخر العنقود وما ادراكوا م اخر العنقود
اما انا بقى ف لا حصلت دا ولا دا ف يعتبر مكانش ليا مكانه واضحه او محدده عندهم..

في الغالب كنت مُهمشة ، مركونه ع الرف دايما
الاااا وقت تنضيف البيت او المساعده ف المطبخ وقتها بيفتكروا ان انا البنت الكبيره ف البيت..

انا ف الشكل كنت دايما اسمع م وانا صغيره ان ملامح وشي جميله وصغيره بس عيوني واسعه وجميله ورموشي تقيله.. ف كان الناس يتغزلوا ف ملامحي..

عمري م انسى جمله واحده قريبتنا قالتهالي قبل كدا : النظره ف وشك مع ضحكتك بتخلي اللي قدامك يدوب فيكي .. لما تكبري هتلاقي العرسان واقفين طوابير قدام باب بيتكوا

بس ماما كانت ترد تقولها : بس لمضه وغلباويه اللي هيتعامل معاها هيطفش بعد يومين..

جملة طنط كنت بحس اني مبسوطه لما بتقولي كدا . لكن جملة ماما كان قلبي بيتقبض منها مع اني مكنتش مُدركه وقتها لمعناها..

اما بقى اختي ف هي ع حسب كلام الناس عاديه ف الشكل بس الفكره انها م النوع اللي بيهتم باللبس والميك اب والحاجات دي م وهي لسه صغيره..
لكن انا كانت اهتماماتي مختلفة شوية..