صلوا علي من جلس علي ركبتيه يواسي طفلا مات عصفوره
#الإبتلاء_والفرج !!
هي تعتبر قِصة مختلفة عن كل اللي نزلتهم..المهم كملوا القِصة للآخر ..
🌸🌸🌸🌸🌸🌸🌸🌸🌸🌸
السلام عليكم يا هدير ، كل عام وأنتِ بخير وكل متابعينك بخير وإلي الله أقرب وعلي طاعته أدوم.
اترددت كتير عشان ابعتلك حكايتي وأشارك معاكي في قطايف رمضان قبل رمضان ما يخلص...
ولكن استجمعت قوتي واستعنت بالله وقولت أحكي......
أنا عندي ٢١سنه ، وإحنا ٤بنات وولدين .... الحكاية بدأت لما أختي وقعت في الحمام وأصابها #سحر، وكنت ساعتها عندي ١٥ سنه يعني كنت ف تالته إعدادي...... وما أدراك ما السحر والسحره ودوامة الدجالين والمشعوذين اللي وقعنا فيها والنصب والفلوس اللي ضحكوا علينا بيها بحجه إنها هتخف، وبرده مخفتش..... أختي كانت بتصوت صويت كان يوصل صداه لجيران جيرانا ، غير أنها كانت بتتكلم بصوت مرعب، وتبرق ومكنش على لسانها لو حد قرب مني هأذيه، والله الذي لا اله الا هو إن ده حصل..... ومش افوره ولا تمثيل.......
يا هدير كنت بخاف أنا وأخواتي ندخل الحمام من الرعب اللي كنا بنشوفه.... من ٢٠١٤ حتي أوائل ٢٠١٩.. آخر مصيبه جتلنا من وراء تصديق أبويا ليها لأنه للأسف دنيوي وبيحب الفلوس اكتر من نفسه ، لدرجة انه جاب ناس حفروا في بيتنا بحجه أن الجن اللي عليها قال إن عندنا آثار تحت البيت !!
كان غياب عقل انه يوصل بينا الحال للجهل ده ، بس كنا بنشوفها بتتعذب قدامنا ومش قادرين نعملها حاجه غير الاستعانة بالدجالين اللي مسمين نفسهم شيوخ...
خلال الفتره دي برده ......
أخويا الكبير أمي ساعدته انه يتجوز وفعلا اتجوز، بس مراته ما صانتهوش، وطلقها ، وكان في طفلة بينهم...
ياريت كان طلاقها سهل، كانت محامية وجرجرتنا ف المحاكم ،وخلاص خدت حقها تالت ومتلت من عفش مسبتش قشاية دا غير دهبها اللي خدت نصه وهي ماشيه ومع ذلك خلت المحكمه تحكملها بيه كله حوالي ١٠٠جرام دهب بالسعر الحالي ، وغير نفقه البنت ، دا مش طلاق دا #خراااب ، وياريته برده طلاق عادي زي ما الناس كلها بتتطلق ، إحنا كان فضحتنا بجلاجل..... وفرجت الناس علينا. وطلعتنا إحنا اللي وحشين....
٥ سنين في ابتلائين من أشد أنواع الابتلاءات مستمرين مع بعض، مفيش ولا مشكلة منهم راضيه تتحل بالعكس عمالين يطولوا، ولكي أن تتخيلي الحالة النفسيه للبيت كانت عاملة إزاي ، ......والفلوس اللي صرفناها والفضايح اللي اتفضحناها ، وكمان طول ٥سنين دول إحنا التلات بنات سننا قرب من بعض يعني تلات عرايس ع وش جواز محدش بيتقدم من الكلام اللي طلع علي بيتنا، وكره الناس لينا ولما كان بيجي عريس مكنش بيدخل البيت كان بيرفض قبل ما يجي من الكلام اللي بيسمعه.......
#الفررررررررررج...... ها قولي بقى ربنا فرجها عليكوا إزاي بعد المعاناة دي أكيد اختك خفت، وأخوكي اتجوز، وانتوا التلات بنات العرسان بقت تنزل عليكوا زي الرز صح مش كده........
لأ للأسف مش كده.... أختي اللي حكتلكم عليها دي جالها cancer #سرطان في الغدد الليمفاوية والدكتور بيقول نسبة استجابتها لعلاج الكيماوي ٣٠٪......
أخويا لسه متجوزش ومش عارف يتجوز كل ما يروح لواحده ترفضه أو يخطب وتتفشكل.....
إيه ده انتوا عملتوا إيه في دنيتكم عشان ربنا يغضب عليكم بالشكل ده؟؟؟؟؟!!!!.
اقولك...... أبويا الله يسامحه زي ما ذكرت فوق أنه دنيوي وبيحب الفلوس زي عنيه وميهمهوش في الدنيا غير نفسه وأن الناس تقول عليه فلان سوا وفلان عمل.....اتجوز أمي غصب عنها دا أول الظلم اللي عمله، ولكم أن تتخيلوا واحده تعيش مع واحد مبتحبهوش ومجبره عليه ٣٨ سنه....
أمي غلبانة وقلبها أبيض بس شاطره جدا ف التجارة وتعرف تجيب القرش من بطن الحوت زي ما بيقولوا..... أبويا لهى أمي معاه ف دنيته وهي عشان كانت خايفه علينا سمعت كلامه ف إنها تأمنلنا أكل كويس جدا جدا، ولبس كويس جدا وطبعا فلوس……
كان همهم ف الدنيا أنهم يجمعوا فلوس مش مهم حلال ولا حرام، مش مهم ع حساب ناس تانيه، مش مهم يتخانقوا ويعملوا مشاكل، المهم الفلوووووس.....
أكل فلوس الناس اكلوا، شهاده زوز وشهدوا، مال يتامى وأبويا أكل لأن أمي يتيمه، وناس يتامى غير أمي برده أكل فلوسهم، العامل اللي كان بيشتغل عنده كأنه عبد يشتغل ويتعب واجرته ملاليم.....سرقه وسرقوا مال حرام وكلوا.... ناقص ايه تاااني متعملش........!!!
إحنا اكلنا من مال حرام عايزين حالنا يبقي عامل إزاي... أولياء مثلاً!!!!!.
يبقى نستحق اللي جرالنا ولا لأ؟؟؟؟
بس لأن ربنا #رحيم...... رحيم ومع كل بلاء بينزل معاه رحمته....... كان في فرج ولسه هيجي الفرج لأن ربنا خلقنا عشان يرحمنا مش يعذبنا......
الفرج إنه :
١- ربنا تاب علي أمي وعملت عمره ورجعت ندمانه ع اللي عملته بجهل مناها، ومبتسبش ولا ركعه من صلوات خمسه وقيام ليل وقراءة قرآن....، دا غير كمان إنها بقت بتخاف تاكل حق حد او تظلم حد، وتعمل اللي تقدر عليه واكتر عشان تكفر عن ذنوبها.... دا كفايه صبرهااا ع مرض بنتها وخيانة جوزها لحد دلوقتي.....
٢- أبويا بردو عمل حج بس للأسف رجع أوحش من الأول أسأل الله أن يهديه.....
٣- اختي اللي فوقي اتخطبت لواحد محترم وإن شاء الله يراعي ربنا فيها ويعوضها عن اللي شافته.. ويكمل فرحتها بخير....
٤- صاحبة القصه بقى اللي هي أنا... الحمد الله ربنا من عليا من لبس الكاسيات العاريات اللي هو لابسه ومش لابسه، من بناطيل ولبس كله ضيق إلي الستر إلي العفاف ولباس أمهات المؤمنين #النقاب ❤
وده تغير كبير أوي في حياتي قربني اكتر من ربنا ، أينعم لسه متخطبتش بس اللي رزق أختي قادر يرزقني...
٥- أكبر نعمه ربنا من علينا بيها من الابتلاءت دي... أنه عرفنا عليه، ودي أكبر نعمه أن يعرف العبد ربه.....
///// في حاجه نسيت اقولها... قبل الابتلاءت اللي حصلتلنا دي واللي لسه مستمرة كنت دايما بسمع آيه من سورة البقرة ، كان حد يقرأها قدامي أسمعها ف التلفزيون أشوفها مكتوبه ع نتيجة....
" وَلَنَبْلُوَنَّكُم بِشَيْءٍ مِّنَ الْخَوْفِ وَالْجُوعِ وَنَقْصٍ مِّنَ الْأَمْوَالِ وَالْأَنفُسِ وَالثَّمَرَاتِ ۗ وَبَشِّرِ الصَّابِرِينَ
* الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ * أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ"
دا كان من ضمن رحمه ربنا بيا....
ربنا اللي مؤمنة ومسلمه إن رحمته وسعت كل شيء وقادر يخفف عنا ويبعتلنا الفرج اللي نسينا كل الابتلاءات اللي مرينا بيها...
🌸🌸🌸🌸🌸🌸🌸🌸🌸🌸🌸🌸🌸🌸
كتير كنت بتضايق لما حد يعمل حاجة غلط واسمع الناس تقولهم هيترادلكوا في #ولادكوا !!
كنت بقول ولادهم ذنبهم إيه في فعل أهلهم؟!
لحد م بقيت بشوف #الابتلاءات اللي ربنا بينزلها عليهم وأد ايه انها بتكون ابتلاءات #تربية
يعني حتى لو في أهل فضلوا مكملين في أذى الناس ف ولادهم بيتعلموا ومستحيل يكملوا مسيرة أهلهم في ظلم الناس..
المهم إن الابتلاء دا في النهاية بنكتشف ان كان في رحمة كبيرة جدا من ربنا..
عادة لما ربزا بيبتلينا بنفضل مركزين مع الابتلاء والسخط في قلوبنا بيزيد وقليل لو حد فينا رضي او فكر بس مجرد تفكير ان لعل ربنا نزل الابتلاء دا رحمة منه علشان يكفر من ذنوب عملناها وقد نكون فاكرينها او تناسيناها
الفكره كلها ان اللي بيرضا وبيدعي وبيصبر هو بس اللي بيفوز....
#من_الرسايل
#حكاوي_هدير
#هدير_ابراهيم
صلوا علي رسول الله
YOU ARE READING
قصص واقعية (لهدير ابراهيم)
Spiritual^-^ صلوا علي حبيب الله^-^ قصص واقعيه بسرد الاشخاص الحقيقين لهذي القصه اكيد كتير وهو داخل يقراء عارف من هدير وايه هي قصصها قصص منها من يبهرنا ومنها من يجعلنا نحمد الله ومنها من تشعرنا بالسعاده والامل جميهم اشخاص تعلقو بالله لينعمو ^-^صلوا علي حبي...
