قصص واقعية (لهدير ابراهيم)

ابتلاءه رحمه

صلوا علي من ياتي يوم القيامه ويقول امتي

لااله الا انت سبحانك اني كنت من الظالمين

#ابتلاءه_رحمة !!

بحب جدا القِصص اللي بتقدر تضحكني وتبكيني، لأن دا معناه إنها بصدق كلماتها قدرت توصل لقلبي ...

هاشتاج باقي قِصصنا 👇
#قصص_واقعيه_لهدير_ابراهيم 💜

🎈🎈🎈🎈🎈🎈🎈🎈🎈🎈🎈🎈🎈

أنا بقى يا ستي قِصتي تحسي انها السهل الممتنع، اللي هو ولا قادره اشوفها عادية ولا خيالية حالمة ! بس لعلها تصادف قلب حد ف تطمنه...
أنا البنت التانيه لأسرة مكونة من أب وأم وأربع بنات، وجزء كبير من مأساتي لو هنعتبرها مأساة هو إن خلفة والدي كلها بنات في مجتمع بيعتبرها #عيبة وشوية وهيطلعوا ينادوا برجوع وأد البنات !!
تخيلي ان في ولادة أختي الرابعة كان كل اللي يشوف والدي وخاصة قرايبنا تحسي انهم بيعزوه وبيصبروه ع ما بلاه ؟!
عمري م أنسى جملة كانت بتتردد كتير وهي " يا مخلف البنات يا شايل الهم للمات "
أما بالنسبة لكل الأحاديث وكلام الرسول عن البنات ف هو بالنسبالهم هوا، وع رأي السوسة أختي الصغيره : يعني هما مش بيطبقوا حرف من الدين اصلا مستنينهم يطبقوا وياخدوا بكلام الرسول وتوصيته ع البنات ؟!!!

كل واحده مننا سواء انا ولا اخواتي كان ليها حكاية– بلاش أقول مأساة– نصيبك بقى انك تقعي في مأساتي أنا😃
بصي يا ستي أنا بقى واحدة تحسي إن الدنيا ماشية معاها بالعكس آه والله،
كل م أقول هعمل حاجة يحصلي عكسها، هدخل كلية كذا ومستحيل ادخل كلية كذا يتحقق المستحيل وادخل الكلية اللي مش عاوزاها.
أقول مش مشكله قدر الله وماشاء فعل وهاخد كورسات واطور نفسي في الحاجة اللي بحبها الدنيا تقف تماما وتتقفل في وشي.
حبيت، لا مش حبيت أنا عشقت #النقاب من إعدادي بسبب مُدرسة ليا كانت منتقبة كنت عاوزة ألبس النقاب لمجرد إني أكون شبهها، وطبعا الطلب دا والدي قابله برفض تام، معرفش إزاي نسيت أحلام كتير كنت متعلقه بيها في طفولتي إلا حلم النقاب كان بيتجدد معايا سنه ورا سنه، ورفض والدي واصراره كان بيزيد معاه وأوقات كتير كان بيوصل #للضرب!
محاولتش اقرأ عن النقاب حتى ف مش عارفة إزاي كان قلبي بيقابل كل إهانات وضرب والدي بإصرار وتمسك كدا، بس حقيقي النقاب كان متمكن من قلبي بدرجة كبيرة جدا، بس كنت خلاص وصلت إني شايفاه من الأحلام اللي مش ممكن تتحقق.
كل حاجة في حياتي كانت ماشيه ضد رغبتي ومتقفلة إلا حاجة واحده بس كانت مفتوحة في وشي ع الآخر وهي #الأكل !!

عارفة انتِ الشخصية اللي أول م تشوفيها وتسأليها نفسك في ايه تقولك: آكل.. طيب بتحبي ايه: الأكل.. طيب بتحلمي بإيه: إني باكل.. طيب نفسك تحققي ايه: يكون عندي قناة خاصة بالأكل هما يعملوا الأكل وأنا اكله..
اختزلت حياتي حرفياً في الأكل، هو الوحيد اللي كان وفي معايا جدااا وبيطبطب ع روحي قبل معدتي، كان هو أماني ودفئي في الشتا واللي بيرطب ع روحي وقلبي في الصيف.
والميزه الحلوه بقى اني كنت بحب الأكل كله،يعني حطي قدامي أي حاجة هقولك الله نعمة ربنا حد لاقي وف ظرف دقايق هتلاقيها اختفت واستقرت في معدتي، والأجمل بقى إني رغم كل دا كان وزني مش بيزيد ف كان الكل وأولهم اخواتي بيحقدوا عليا،
كنا دايما نضحك بسبب ان انا مهما أكلت مش بزيد وهما اكلتهم خفيفه جدا ومجرد م يشموا ريحة الأكل يزيد وزنهم ..