قصص واقعية (لهدير ابراهيم)

من_كتر_خطابها_

صلوا علي الحبيب

#من_كتر_خطابها_... ؟!!

مثل بيتردد في كتير من البيوت المصريه م غير م اللي يردده يعمل حساب لعواقب الكلام دا ع نفس صاحبة المشكله..
اللي هي اصلا مش مشكله
من كتر خطابها بارت 🤷‍♀️
ايه يعني اللي فيها لو بنت اتقدملها اكتر من عريس ولان ولا واحد فيهم مناسب رفضتهم
المفروض يعني انها توافق خوفاً من التفكير العقيم للمجتمع اللي عايشه فيه ف تتجوز شخص مش مناسب وبعد كام شهر ولا كام سنه حتى ترجع بيت اهلها مطلقه
م هي كدا بردو مش هتسلم من لساني نفس ذات المجتمع العقيم..
ف نصيحه لأي بنت اركني المجتمع دا ع جانب بتفكيره بآراءه بظنونه السيئه المتخلفه ومتتجوزيش مهما وصلتي بالعمر إلا من الشخص اللي تحسي فعلا انك مقتنعه بيه وبحسن ظنك لربنا هتوصلي لكدا
وقِصتنا انهارده بتأكد دا ❤
🌸🌸🌸🌸🌸🌸🌸🌸🌸🌸

انا رضوى عمري دلقتي 43 سنه.. اتربيت في وسط اسره متحرره جدا من اللي بيطلقوا عليهم فئة ال اوبن مايند
اهلي فعلا كانوا اوبن مايند في كل حاجه والدين مكانش ليه وجود ولا رأي في بيتنا بالتالي مكانش في صلاه ولا حجاب وصوم رمضان كان بيبقى حسب المزاج
بس الاوبن مايند دا كان بيجي عند الجواز ويعطل !!
كان بدأ يتقدملي ناس من وانا في الجامعه كنت برفض مش بس علشان كنت شايفه نفسي لسه صغيره ع فكرة اني اكون مسؤله عن اسره وبيت لا هو بردو كان بسبب ان مفيش حد اتقدملي واقتنعت بيه
لحد م خلصت جامعه وبدأ زن أهلي يزيد اني اوافق وانا كنت بتغر شويه في إني بردو لسه سني صغير كمان مفيش حد من اللي بيتقدموا قادره اني احس بقبول ناحيته
لحد م وصل عمري 27 سنه وهنا أهلي بدأوا يتجننوا حرفيا
زن زن زن اني اشتغل علشان اقابل ناس طيب انا مش عاوزه اشتغل ولا شايفه نفسي في اي شغلانه
خلاص يبقى مرواح للنادي كل يوم وحضور اي مناسبه فيها ناس
من الآخر أهلي كانوا بيدللوا عليا قدام اي حد
وباردو مفيش فايده
وبمجرد م وصلت سن ال 29 اتقدملي شخص مكنتش اتخيل عمري اني ممكن اوافق حتى اني اقعد مع واحد زيه وبنفس عقليته
شخص بشع جدا كل حاجه فيه بشعه
نظراته تفكيره طريقة كلامه
بس كان اهلي خلاص فاض بيهم وكمان بصراحه انا كمان كنت خايفه من شبح سن التلاتين..
وافقت وبدأت حياتي تتغير
بس للاسف كان تغيير بشع وللأسوء
الشخص دا كان ملتحي وانا كنت غير محجبه
ضاقت بيه الأرض كلها انه يدور ع واحده محجبه ورايح لواحده بشعرها وبيفرض عليها الحجاب ومن بعده النقاب !!
كان بيفرض عليا حاجات كتير وبيتباهى دايما قدام الناس ان هو اللي هداني ولبسني الحجاب
كان بيتعامل ع اني كنت كافره ودخلني الاسلام !
وانا اصلا ولا اي حاجه م اللي فرضها عليا عملتها وانا مقتنعه وكانت كلها بضغط م اهلي
حتى انه فرض عليا اروح لمسجد معين احفظ فيه قرآن ودا طبعا علشان بردو يفضل يكرر قدام الناس اللي يعرفهم فيه انه جامد جدا في الهدايه
بس مكملتش مرتين ورفضت اروح المسجد دا تماما واختارت مسجد تاني مكانش فارق هو اي مسجد المهم انه بعيد عن الشخص دا ومعارفه
وشويه ومبقتش قادره خلاص اكمل فاض بيا وتعبت
انا مكنتش بروح المسجد دا احفظ قرآن انا كنت بروح افضل اعيط لحد م عيني تورم م كتر العياط ومبقاش قادره افتحها ف ارجع البيت والصداع قاتلني ف انام م كتر التعب
اخدت فتره ع الحال دا وتقوقعت ع نفسي واتمنيت جدا ان الشخص دا ياخد قرار الانفصال لاني مش هقدر اواجه اهلي لكن هو كان مش مستني مني اهتمام اصلا هو واخدني لغرض مختلف وبس..
لحد م في يوم وانا في المسجد بنت عندها حوالي 18 سنه استئذنت انها تقعد معايا وبصراحه انا م صدقت حد قالي مالك وانفتحت في العياط وخرجت معاه كل اللي في قلبي
مكنتش اعرف ان البنت اللي انا اكبر منها ب 10 ممكن يبقى ع ايديها صلاح حالي وقلبي وكل حياتي!!