قصص واقعية (لهدير ابراهيم)

سويداء_القلب !

صلوا على الحبيب...........

هاشتاج باقي القصص
#قصص_واقعيه_لهدير_ابراهيم 💌

🎀🎀🎀🎀🎀🎀🎀🎀🎀

ازيكوا..

انا بحاول ابدأ واعرفكوا بنفسي او بقصتي بس مش عارفه ابدأ ازاي او منين..انا قصتي طويله جدا لدرجه لا تتخيلوها..

اغلب القصص اصحابها بيبدأوا كلام عن تغييرات حصلت ف حياتهم وبدأوا يستوعبوها وهما ف سن معين..

لكن انا قصتي بدأت م قبل م اشوف الدنيا اصلا..

والدتي قعدت سنين بعد الجواز م غير م يحصل حمل..
حاولت بكل الطرق انها تخلف بس كان عندها اسباب طبيه تمنع الخلفه لان فيها خطوره ع حياتها..

لحد يوم م اكتشفت انها حامل !
ورغم كل تحذيرات الدكاتره ورغم محايلات والدي ليها اللي حرفيا كان بيعشقها عشق.. الا انها شافت ان اكيد لربنا حكمه.. طالما اراد انها تكون حامل رغم انها كانت عامله كل احتياطات منع الحمل..

والدتي كملت في حملها رغم المعاناه الصعبه والألم والوجع اللي مرت بيه..
لحد م تعبت جدا واضطروا يدخلوها ولاده مبكره..

والدي قال للدكاتره لو في خطوره عليها يضحوا بالجنين مش مشكله!

الا ان ربنا كان مقدر ان ف نفس الثانيه اللي ينزل فيها الجنين للدنيا تفارق روح تانيه وهي روح أمي.. والجنين دا هو أنا 💔

والدي كرِهني م اللحظة دي لدرجة انه ملمسنيش اصلا ومكانش راضي يروح يسجلني ويطلعلي شهادة ميلاد لانه ف نفس التوقيت كان بيطلع شهادة وفاة أمي.. وشيلني انا ذنب وفاتها 💔!

ولما راح بالعافيه علشان يسجلني قال لموظف الصحه يسميني اي حاجه مش هتفرق..
ولما موظف الصحه استغربه واصر انه يختار اسم..
والدي قاله : سميها سودا.. اصلها جات وجابت معاها كل الايام السودا..

وع عكس كل الناس اللي بتضايق م غلطات موظفين الحكومه او انهم يكتبوا حاجه ع مزاجهم.. ف انا ممتنه للشخص دا حتى الان
حرف واحد زوده ف اسمي غَيّر معناه تماما..
سجلني ب اسم #سويداء ..
وع فكره سويداء تصغير لكلمة سوداء
بس تخيلي لما حد يجي يسألني ع اسمي واقوله اسمي سودا ؟!!

عمتي الكبيره جوزها اتوفى وملهاش اطفال ف كانت عايشه ف نفس البيت مع والدي وهي اللي اتولت مسؤلية تربيتي..

والدي كان مانع اني اظهر قدامه نهائي.. ولو رجع م شغله فجأه قبل م عمتي تدخلني الاوضه كان بيتعصب جدا وممكن يفقد اعصابه عليا..
لانه مش بس شايفني سبب وفاة حبيبته اللي هي أمي لا .. انا كمان كنت شبهها جدا..
كل اللي شافني ويعرف أمي اول حاجه يقولوهالي:صحيح اللي خلف مماتش.. انتِ واخده شعرها الاصفر وعيونها الزرقا بالمللي..