قصص واقعية (لهدير ابراهيم)

كتب_ع_نفسه_الرحمة

صلوا علي من ياتي يوم القيامه ويقول امتي

لااله الا انت سبحانك اني كنت من الظالمين

#كتب_ع_نفسه_الرحمة !!

قِصة مختلفه عن كل القِصص اللي نزلتها قبل كدا .. قرأتها م شويه وقررت انزلها ع طول لعلها #رسالة لحد كالعادة❤

هاشتاج باقي القِصص👇
#قصص_واقعية_لهدير_ابراهيم 💌

🎀🎀🎀🎀🎀🎀🎀🎀🎀🎀🎀🎀🎀🎀🎀🎀

بصي  ي ستي انا اسمي آيه والدي ووالدتي منفصلين بقالهم ١٧سنه عمري حالياً٢٠سنه يعني من واناعندي٣سنين وهما منفصلين ..
ماما مكنتش عاوزه تنفصل علشاني، علشان عارفه اني هتبهدل م غيرها بس قضاء ربنا نفذ وانفصلوا.. وانا عشت مع ماما لحد ما بقى عندي ٥سنين المهم في الفتره دي جدي لمامتي كان تعبان وكان قلقان علي ماما وعليا وفي الفتره دي ماما كان متقدملها عريس ف جدي قالها لازم توافقي عشان انا عارف اني هموت وعاوز اموت وانا مطمن عليكِ والكلام دا يعني المهم ماما وافقت وبالفعل اتجوزت..
وطبعا بابا كان هو كمان اتجوز باردو ف لما عرف ان ماما اتجوزت اخدني عنده.. طبعا شفت ايام ربنا اعلم بيها عدت فتره صغيره وجدي اتوفى وماما اتطلقت من جوزها التاني ع طول بس ماما معرفتش ترجعني من عند بابا ف كنت بروح ازورها كل اسبوع المهم من يوم م روحت اعيش عند والدي وانا خدامه طبعا .. بصي انا مكنش عندي شخصيه اصلا حياتي كلها كانت رعب وخوف كل حاجه يتقالي عليها كنت بنفذها علطول واجي اقول لبابا كان يقولي دي بتحبك وبتعلمك والكلام دا يعني ومكانش بياخد اي موقف او رد فعله مع مراته..
واليوم اللي كنت بروح فيه عند ماما كان بيبقي بالنسبالي كأنه عيد او كأني خارجه من السجن وكنت بقعد اعيطلها واتحايل عليها عشان متودنيش تاني هناك بس مكنش ينفع طبعا..
كل ايامي كانت شبه بعضها اللي بصحة عليه بنام عليه باردو لحد م في يوم هربت وروحت عند ماما فلقيتها بتقولي انتِ جايه مش ف معاد اجازتك ليه قلتلها بابا اللي قالي روحي المهم طبعا الموضوع دا معداش علي خير واتعاقبت طبعا بس مش بالضرب بابا الصراحه عمره ماضربني ابدا
بس اتحرمت من اني اروح عند ماما فتره ودي كانت اصعب ايامي بقى كنت في الوقت دا عندي ييجي ٦سنين ف لقيت بابا في يوم بيقولي انتي من بكره هتروحي المدرسه كان ايامها الاطفال اللي اوشكت انها تدخل اولة ابتدائي فكان لازم قبلها بسنه تروح المدرسه بس مستمعه المهم روحت وكده بس كنت ع طول بهرب كنت غير متزنه مكنش حد قريب مني يوجهني مكنش في غير نينيه لبابا هي اللي كانت حنينه عليا بس انا مكنتش عاوزه حنان بس كنت عاوزه اهتمام اكتر المهم بمجرد م فترة العقوبة خلصت وبدأت اروح عند ماما تاني لما شافت حالتي كده قالتلي انتِ مش هتروحي تعيشي هناك تاني وبالفعل اخدتني ولحد وقتنا هذا وانا قاعده هناك..

وحده زيي اتربت ع الخوف من كل اللي حواليها الحاجه الوحيده اللي كانت على لساني كانت حاضر طيب نعم وخلاص انابقولك التفاصيل دي ليه عشان دا كله مترتب ع اللي جاي
لما بدأت اتأقلم في العيشه عند ماما بدأت اعيش بحريه اكتر بدأت تعوضني عن كل حاجه تسيبني ألعب براحتي اروح واجي براحتي كانت بتجبلي كل اللي نفسي فيه الحاجات الكتيره الوحشه اللي قابلتها وعشتها والحرمان من كل حاجه خلاني انسانه عندي نقص .. الثقه في النفس معدومه .. دايما ببص ع اللي في ايد غيري لما بدأت ماما تعوضني عن كل دا بقيت زي الوحش.. اه والله كل ما بكبر سنه بتغير عن اللي قبلها بس للأسوء.. بقيت انانيه من كتر الحرمان اللي عيشته لما بقت حاجه تجيني كنت عاوزاها ليا لوحدي ميهمنيش غيري لما بقيت في اعدادي كان اهم حاجه عندي نفسي ولبسي وشكلي وبس ماليش دعوه الفلوس بتيجي منين المهم طلباتي وبس ونسيت اقولك ان كانت علاقتي ببابا كانت عاديه جدا.. بروح هناك عشان اجيب مصاريفي وخلاص واقعدشويه زي الضيفه وامشي كل حاجه فيا اتغيرت بقيت قاسيه اوي وغبيه كانت دايما ماما تقولي انتِ طالعه غبيه كده لمين الحاجه الوحيده اللي كنت ملتزمه بيها هي الصلاه والصوم وحفظ القران و اول مادخلت٣اعدادي حتى القرآن بطلت احفظه بحجه الدراسه ..
علاقتي بمامتي مكنتش كويسه مكنتش بسمع غير كلام نفسي بس مكنتش بخاف منها لما كان حد يقولي دا انتِ مامتك تشيليها جوا عينك دي مرضيتش تتجوز علشانك وقعدت تربيكِ وباباكِ شاف حياته وسابك واتجوز وخلف وهي قاعده عشانك مكنتش برد وكنت بقول في سري وهي عملت اي يعني وكنت اضايق اوي من اللي يقولي كده اول حد بدأت ااعض فيه زي مابيقولوا كانت ماما دا بدل ما اشيلها فوق دماغي لاء كنت بزعلها وانا ولا في دماغي كنت بصي عاقه بيها بمعني الكلمة
حتى لما كانت ماما تتفرج علي اي قناه دينيه لو قلتلك ان كل لما اقعد اتفرج معاها كان محور كلام الشيخ حوالين عقوق الاباء ..وكانت هي دايما تقولي شايفه ي آيه بتبقي اخرة الشخص ايه؟
وانا ولا كنت هنا كنت بصراحه بتحرج من نفسي وكنت بسيبها واقوم..
انتِ عارفه ي هدير انا كان نفسي اتغير لان ماما كانت بتصعب عليا من تصرفاتي السيئه معاها بس غصب عني انا عشت ايام عند اهل ابويا تخلي قلبي زي الحجر كنت بقعد ادعي ف صلاتي يارب انا عاوزه اتغير مش عاوزه افضل كده وقد كان وربنا استجاب وكان اول ابتلاء ليا ويكون في أمي
في شهر٢٠١٩/١ ماما بدأت تتعب وتخف وتتعب وتخف تعدي الشهور و الايام وماما مش بتتحسن لحد لما كنا في شهر رمضان ماما تعبت جاامد وبدأت تخس جامد ومبقتش بتاكل.. واليوم كله تقضيه نوم واحنا مش عارفين هي عندها ايه؟
روحنا لدكاتره كتير اوي كل دكتور كان بتشخيص مختلف.. ونجيب العلاج وماما متخفش باردو لحد يوم٢٣ رمضان كنت انا راجعه من شغلي نسيت اقولك اني كنت بشتغل في مركز تحاليل واشعه .. المهم لقيت خالتي ف اليوم دا بتقولي تعالي من الشغل ع البيت عندي كلنا متجمعين هنا وهنفطر او احتمال نروح عند طنط عبير..
طنط عبير دي يعتبر مامتي التانيه ..
وصلت متأخر وبعد ما فطرنا طنط عبير خدتني في جنب لوحدنا وقالتلي مامتك مش عجباني حالتها اللي شوفناها بيها النهارده ميتسكتش عليها .. دي على م طلعت خطوتين السلم كانت بتعيط ولما احنا شفناها كده مبطلناش عياط ي بنتي..