قصص واقعية (لهدير ابراهيم)

بدعائك ربنا هيعوضك

صلوا علي من جلس علي ركبتيه يواسي طفلا مات عصفوره

###############################

#بدعائك_ربنا_هيعوضك
القِصة دي فيها رد لأي حد بيردد انه ليه ربنا مش بيستجيب دعواته؟!
صاحب القِصة قال ان دي مجرد شخبطه وفضفضه منه ف انا معدلتش عليها حاجه ونزلتها بكل مشاعره..

🌸🌸🌸🌸🌸🌸🌸🌸
جايز حكايتي مش عظيمة او كبيرة زي الحكايات اللي بتنزل هنا وبتقرأوها وجايز دي متكونش حكاية اصلا هي شوية شخبطة كده لمواقف فرقت معايا جدا في حياتي..
الحكاية بدأت معايا لما جبت 93٪في تالتة ثانوي ازهر ، وقتها تنسيق بتاعي جابلي كلية علوم ودخلتها فعلا بس متوفقتش فيها وخرجت من الكلية بعد سنتين ضاعوا من عمري علي الفاضي، وقتها كنت محبط ويائس جدا والدنيا مقفلة جدا معايا، ماكنتش ببطل خناق مع ابويا وامي في البيت من كتر الخنقة اللي كنت فيها، وقتها قررت ابطل تعليم ونزلت اشتغلت في محل عشان اصرف علي نفسي ماهو خلاص بقي مش هتعلم تاني!!
وقتها لقيت أمي بتقولي ايه رأيك ندخلك #هندسة_خاص ؟!
اتخانقت معاها اكتر واانا مش هتعلم تاني وبعدين احنا منقدرش علي مصاريف الخاص ده وهنجيب فلوس لكل ده منين وهي تقولي والله ربنا هيفرجها والله..ملكش دعوة احنا هنسعى وربنا هيرزقنا، طب هعملك جمعية كل سنة وربنا هيدبرها..
وانا بردو مصمم علي رفضي ومش بس كده انا رحت سحبت ورقي من علوم وجبته رميته في البيت !
لقيت والدتي تعبت جدا والسكر زاد عليها ونامت والحزن مسكها اكتر،خوفت عليها جدا ما هي امي وروحي فيها بردو،
قولتلها خلاص ماشي هدخل هندسة وانا كاره ده جدا،ومش متقبل خالص يمكن لأني كنت حاسس #بالفشل وإني مش هنجح في حاجة خالص في حياتي!
لما رحت اقدم في هندسة مشيت معايا وانا ماشي طول الطريق عمال اقول يارب الموضوع ميكملش، دخلنا معهد هندسة عشان نقدم ف الراجل بتاع الأمن قالنا ان المكان اكتفى ومش هيقبل طلاب تاني، فقولتلها شوفتي دي علامة من ربنا ويلا نمشي بلا هندسة بلا وجع قلب،
وللقدر ست جنبنا جاية تقدم لابنها وسمعتنا واحنا بنتكلم فقالتلنا انا اعرف معهد قريب من هنا وروح قدم فيه ووصفتلنا المكان، وانا اقول يارب دي طلعتلي منين دي بس!
طلعنا من المكان اللي كنا فيه وقفنا شوية عشان نركب أي مواصلة تودينا المعهد التاني ده، وفجأة نلاقي الست دي خارجة بعربيتها وتقف قدامنا وتحلف علينا لتوصلنا المعهد التاني ده، وبالفعل وصلتنا
قدمت واتقبلت في المعهد وبدأت الدراسة وانا حالتي النفسية صفر لدرجة اني فاكر في اعدادي هندسة ده ماكنتش بتكلم مع حد خالص عشان متصاحبش علي حد اصلا، اول ترم ده حرفيا مفتحتش كتاب، ولما جت امتحانات الميد ترم درجاتي فيه كلها كانت ضعيفة جدا، ولما جت امتحانات الترم ماكنتش بذاكر غير ليلة الامتحان وقولتلهم في البيت لو منجحتش الترم ده هسيب هندسة، بس حرفيا دعوات امي ليا كانت محوطاني من كل ناحية ويقينها بالله غلب يأسي وجبت تقدير #جيد معرفش ازاي؟! يومها اول حاجة عملتها اتصلت بأمي ابلغها..عنيا دمعت مقدرتش امسك نفسي، يومها لقتني بقول لنفسي حرام عليك امك عماله تصرف بالآلاف عليك ربك سترها وعديت الترم، وبالفعل ابتديت اذاكر جبت جيد جدا الترم التاني، ومشيت معايا هندسة لحد سنة تانية مدني، دخلت امتحان مادة #خرسانة دي اتقل مادة في مدني، كنت طالع من الامتحان ده مش موفق فيه خالص تقريبا يومها محلتش مسألة كاملة للآخر ف كدا الامتحان كله تقريبا باظ معايا، وفضلت ادعي ربنا جامد اني اعدي ولو حتي بمقبول وعشان ربنا قال "وأن ليس للإنسان إلا ما سعى" ربنا استجاب دعواتي الكتير جدا وقتها وعديت بمقبول، وخلصت هندسة بتقدير جيد جدا مع مرتبة شرف كمان كل ده بدعوات امي ليا وجيت اقدم ورق الجيش كان نفسي اوي ما ادخلش الجيش وكنت مببطلش دعا اني اخرج يارب كفاية سنتين ضاعو من عمري في علوم وحصلت حاجة غريبة لما قدمت ورقي معرفش ازاي نسيوا يبعتوه منطقة التجنيد وفضلت اسبوع كامل بدور علي ورقي ومحدش عارف هو فين ؟!
صحابي كلهم قدموا وكل الناس لبست وانا كنت وقتها مخنوق مش عارف هعمل ايه ومحتار لحد ما في يوم لقى عسكري الورق بتاعي وبعتهولي التجنيد ولما رحت اكشف طبي الدكتور اداني اعفاء #نظر ع طول، طب ازاي ده محدش بيخرج اصلا وقتها؟! العسكري اللي كان بيخلصلي شهادة الاعفا وقتها قالي حظك حلو دكتور العيون ده بقاله اسبوع مبيجيش، كنت في الغالب هتلبس لو جيت قبل كده، وقتها ممسكتش دموعي ان ربنا استجاب دعواتي وكأن ربنا بيعوضني عن السنتين بتوع علوم، وكأن ربنا بيقولي انا سامعك وعالم بيك ومش هسيبك، لما اخدت الاعفا ابتديت ادور علي شغل، الموضوع كان صعب شوية مع اني مقعدتش كتير تقريبا 3 شهور بس واشتغلت، في وقتها كنت في شهر سبتمبر ماكنتش بدعي ربنا غير بدعوة واحدة بس يارب ما يجي عليا يوم 1 اكتوبر غير وانا شغال يارب، كنت بستنى كل اوقات الإجابة في الشهر ده وادعي الدعوة دي جيت في آخر شهر 9 لقيت واحد زميلي بيكلمني بيقولي في شغل وتعالى اعمل مقابلة وربنا يسهل، فرحت جدا وقولت اكيد ربنا استجاب ليا، رحت عملت مقابلة واتقبلت تقريبا كان يوم 26 سبتمبر، واتفقت مع الراجل اني هنزل بيتي اجيب هدومي وحاجتي واظبط اموري واستلم شغل يوم 1 اكتوبر..
راجع في الطريق مبسوط وعمال احمد ربنا انه استجابلي خلاص واول ماوصلت البيت لقيت صاحبي ده بيكلمني بيعتذرلي بيقولي معلش الراجل بيقولك استنى شوية ولما شغل يفتح هيكلمني، وقتها مقولتش غير حاجة واحدة بس لربنا قولتله يارب انا دعيت وكلي يقين انه مش هيجي يوم واحد في الشهر غير وانا شغال، وقفت اصلي وقولتله يارب والله مايجي علياا يوم 1 اكتوبر غير وانا شغال، وقتها حلفت علي ربنا كتير جدا، وماكنتش قادر امسك دموعي يومها، خلصت صلاة وقاعد بتعشى لقيت تليفون جايلي من حد كنت مكلمه علي شغل قالي في شغل وتعالى اعمل مقابلة، ورحت يوم 27 سبتمبر عملت مقابلة و  اتقبلت والراجل يومها قالي بص انت تنزل معانا يوم 1 في الشهر، قولتله لو عاوزني من بكرة قالي لا خليك ليوم واحد وكأن ربنا بيقولي انا سمعتك تاني اهو واستجبتلك بنفس دعائك ومش هسيبك وهعوضك،يومها خرجت من عنده وانا فرحان ان ربنا سامعني واستجابلي اكتر من فرحتي بالشغل نفسه، اشتغلت في الشركة دي اربع سنين بدأت فيها بمرتب ضعيف شوية، بس بردو بدعواتي لربنا انه يفرجها عليا ويوسع رزقي عشان كان نفسي اعوض امي عن كل المصاريف اللي صرفتها عليا دي، وبردو ربنا بكرمه استجبلي انا فاكر اني زدت في سنة واحدة 3 زيادات في المرتب وده طبعا مبيحصلش ولا في اي شركة بس دي دعواتي لربنا وده كرم ربنا وده الدعاء اللي بيغير القدر والله، بعد اربع سنين شغل في الشركة دي حسيت اني عاوز امشي ومبقاش الوضع معايا تمام زي الاول كان في شركة كويسة وكبيرة نفسي اشتغل فيها بس الموضوع كاان شبه مستحيل لان الشركة كبيرة اوي ومبتشغلش اي حد بس انا قررت اكمل في دعايا وطلبت الشركة دي من ربنا بالاسم، قولتله يارب انا عاوز الشركة دي  بالذات وبعد كام شهر برضو ربنا فاجئني بكرمه واستجابلي وانا شغاال فيها اهو بقالي 3 شهور..

معلش لو رغيت كتير انا بس كنت عاوز اقول لكل الناس ان الدعاء ده نتايجه مش متوقعة خالص وكرم ربنا. مالَوش آخر وعلي فكرة اللي كتب البوست ده مش شيخ ولا حتي شخص ملتزم يعني، انا اقل من اقل حد فيكم وكلكم ناس كبيرة والله، بس انا شخص قلبي اتعلق جدا بالدعاء جدا فوق ماتتصوروا، فبقول لاي حد نفسه في اي حاجة وشايفها صعبة عليه ادعي ربنا وانت قلبك واثق في ربنا ووالله ربنا هيستجيب، ادعو ربنا متخافوش هيستجيب، ادعوا ربنا وهتتفاجئوا بكرمه، ربنا اكبر من كل احلامنا ودعواتنا، ارفعوا ايديكم لربنا وكلموه وقولوله علي كل اللي تعبكم وعلي كل اللي مفرحكم، صاحبو ربنا هيسندكم والله، ينفع ياحبيبي لما تفرح يبقي اول واحد تجري عليه هو ربنا، ينفع يا بنتي لما تزعلي يبقي اول واحد تجري عليه هو ربنا، ارفعوا ايديكم لربنا فإن الله حيي كريم يستحي أن يمد اليه عبده يده ويردهما صفرا...
#ادعوا_ربنا_متخافوش
#ربنا_بيعوض

🌸🌸🌸🌸🌸🌸🌸🌸🌸🌸🌸🌸🌸🌸
وصلني اكتر من موقف متعلق بإجابة الدعاء وكنت محتاره ابدأ بأي موقف لحد م قرأت المسج دي ولقيتها شامله اكتر م موقف كمان مش بس متعلقه بالدعاء لا #باليقين في ان ربنا هيستجيب ودا الأهم 💙
ربنا يستجيب لكل دعواتكم اللي فيها خير ليكم يارب🌺

#من_الرسايل
#حكاوي_هدير
#هدير_ابراهيم

صلوا علي الحبيب