قصص واقعية (لهدير ابراهيم)

قبل فوات الاوان

صلوا علي من ياتي يوم القيامه يقول امتي..امتي

###############################

#قبل_فوات_الأوان !!

مفيش عندي حاجه اقولها في البدايه وهدخل في القِصة ع طول، بس هقول حاجه واحده بس وهي اي رد ع السؤال اللي طاب اننا نتناقش فيه فـ هيكون تحت مبدأ
" الكُل حكيم مادامت القِصة ليست قِصته " !! ✋
وكالعاده #هاشتاج باقي قِصصنا 👇
#قِصص_واقعية_لهدير_ابراهيم ❤

🌹🌹🌹🌹🌹🌹🌹🌹🌹🌹🌹🌹

في البداية أحب اوضحلك ان كتير من قِصصك بدأت تدخل لشريحة معينة من المجتمع وهي الطبقة الغنية، الناس بتشوف اللي معاهم فلوس كتير بطريقة لا هي صح ولا هي غلط، الفكره نفسها مش واضحه، بس صدقيني دول مجتمع داخل مجتمع !!
انا اتولدت في عيله غنيه جدا جدا جدا او بمعنى أدق والدي هو اللي كان غني جدا، والدتي اتوفت وانا صغير ووالدي متجوزش بعد وفاتها، كل حاجه في حياتي كان والدي اللي بياخد القرار فيها وانا كل اللي مطلوب مني اني انفذ بدون لا تفكير ولا نقاش ، حتى التعليم نفسه والدي كان شايف ان الشهاده تحصيل حاصل لان شغلي موجود ومش بيحتاج لتعليمه واتقانه غير الممارسه، بالتالي مكانش في اهتمام عندي بجانب التعليم ولا في اي ثقافه، هو شغل بس علشان اقدر لما اكبر أنمي شغل ومصانع والدي واحافظ عليها زي ما عمل هو مع والده، يعني كان بيربيني زي م تم تربيته بالظبط ..
في ناس ممكن تتخض او تستنكر المعلومة اللي جايه بس هي عاديه جدااا وهي اني عمري ما شوفت والدي بيصلي ولا حتى صلاة الجمعة بالتالي انا لا اتعلمت الصلاه ولا عرفت ولو معلومه صغيره عن الدين كل اللي اعرفه ان من ديانتي انا مسلم وبس .. حتى الصيام مفتكرش اني صُومت وانا صغير او وانا شاب شهر رمضان كامل !! في ناس ممكن تستغرب وتقول ازاااي ، بس دي الحقيقة وقتنا الدين والمعالم بتاعته مكانتش ظاهره وواضحه اوي زي دلوقتي كان الزمن غير الزمن، بس صدقيني دلوقتي كمان عادي جدا لما تعرفي ان في ناس زيي في الفتره دي متعرفش عن الصلاه غير اسمها وبس !!
وزي م والدي كان بيقرر كل حاجه وانا انفذ كان طبيعي انه يقرر امر زواجي ويختار البنت ويعمل كل حاجه وانا اتجوز وبس !!
بالتالي حياتي نفسها بعد الجواز محصلش فيها اي جديد خالص، نفس الروتين بل كمان الاوامر اصبحت تصدر من والدي لينا احنا الاتنين واحنا ننفذ وزي م انا ولا مره اعترضت ع حاجه هي كمان كانت بتنفذ وكأنها اتربت هي كمان ع الطاعة والاوامر وبس ..
افتكر اني اتمردت مره واحده في حياتي، وكانت بسبب واحد قريبي، هو مقرب مني جدا وكنت بحب اقعد معاه ، كان كل م يحكي عن حاجه حصلت معاه او عمالها كنت شايفه سوبر هيرو، هو شايفني واحد فلوس الدنيا تحت رجليه وبيحسدني عليها وانا شايف انه خد كل متع الدنيا ورغم انه مش بدرجة غِنا والدي الا اني كنت شايف ان الحريه اللي هو واخدها تغنيه عن مال العالم كله، كنت معجب بيه جدا وبنمط حياته ودا بفضل الحريه اللي اهله كانوا مدينهاله، وانا كنت زي الطير اللي محبوس في قفص من دهب وبيشوف وبيسمع الطيور اللي بتطير بحريتها وهما بيستكشفوا معالم جديده وبيروح اماكن اكتر، وانا كل اللي بعمله بسمع وبس، ولما اتمردت الكل ثار عليا وذكرني بإن والدي فنى عمره علشاني وعلشان يأمن حياتي ومستقبلي ورفض بيتزوج علشاني .. ومكررتش التمرد دا تاني ابدًا لوقت م ظهرت في حياتي بنت !!
البنت دي شوفت في حياتها الحياه اللي انا نفسي اعيشها مع زوجتي، كانت متمرده مجنونه بتعمل اي حاجه تخطر ع بالها، اتشديت ليها جدًا وغيرت من حياتي، تمردت معاها ايوه بس تمردت بيني وبين نفسي واصبح ليا حياه سريه لا والدي ولا زوجتي يعرفوا عنها حاجه، لوقت م زوجتي وكأي ست حست ان في واحده في حياتي.. كنت شايف دا في نظراتها بس هي ولا مره اتكلمت، لوقت م سألتني البنت اللي دخلت حياتي عن الخطوه اللي بعد كدا !؟ هي عارفه كل حاجه عني وعن حياتي ف خيرتني بين اتزوجها وانفصل عن زوجتي او ابعد عنها.. هي كانت متأكده اني مبقتش اقدر ابعد عنها ابدًا !!
اصبحت في حيره تامه من أمري، دي المره الأولى في حياتي اللي حد يقولي فيها #اختار، طول عمري باخد الامر وانفذه ازاي ممكن اختار دلوقتي لوحدي وبكل سهوله !!
اختار بين زوجتي وانا مش عارف والدي هيكون رد فعله ايه ولا هي نفسه رد فعلها ايه، ولا اختار البنت اللي معاها حسيت اني عايش لأول مره في حياتي !! الاختيار كان صعب جدا عليا خاصة وان دا اول قرار هختاره لوحدي في حياتي .. بس بطلب منك ومن متابعينك ياخدوا وقفه الأول هنا وقبل م يكملوا قراءه عاوز اعرف اختيار كل واحد\ه لو كانوا مكاني !؟