قصص واقعية (لهدير ابراهيم)

الله لا يعجزه شئ

#الله_لا_يعجزه_شئ !!

#قصص_واقعيه_لهدير_ابراهيم 💌

ناس كتير مش عارفة ولا حاسة بقيمة وأهمية صلاة الاستخارة..  اخترت موقف بسيط جدا عن معجزات صلاة الاستخارة..

تعالوا نشوف قصة النهاردة..

🎀🎀🎀🎀🎀🎀

🎀🎀

اهلا هدير يارب تكوني انتِ وكل متابعينك بخير.. حبيت اشارك في قصص رمضان بموقف بسيط لكن بالنسبالي هو معجزة..

حكيتي في قصصك كتير عن العنوسة واثارها السلبية على نفسية البنات ف أنا المرادي هحكي حكايتي من آخرها..

وصلت لسن الأربعين من غير زواج ومفيش ولا واحد مناسب اتقدم لحد م اتقدملي شخص وانا في عمر ال 43 مطلق بدون أطفال وكان صريح معايا من البداية وبلغني انه عقيم ودا كان سبب طلاقه

كل اللي حواليا حاولوا يقنعوني اوافق عليه وكانت حجتهم اني خلاص عديت الأربعين "سن اليأس" وفقدت القدرة على الحمل.. فضلوا يزنوا عليا بإني ألحق أوافق على حد لان مش ضامنين انه لو مشي يجي غيره.. زن زن زن ياريتهم بيتكلموا بطريقة لطيفة حتى لا دا سم بينقط من لسانهم.. كلامهم كان بينهش في قلبي وجسمي..

الشخص نفسه كويس اكبر مني بسنتين ومظهره الخارجي وشكله مريح للعين.. بس هو انا يعني خلاص خرجت من تصنيف البنات علشان ميبقاش عندي حلم اني اكون ام انا كمان 💔

الوقت دا كان قبل رمضان بأيام ف اتحججت برمضان وطلبت من أخويا الكبير يبلغه اننا هنرد بعد رمضان.. كانت  نيتي بصراحه اني اطفشه..

بس طلبي دا اتقابل برفض تام وخناق وكلام يكسر القلب.. مكنتش عارفه اروح فين ولا اعمل ايه..جريت على سجادة الصلاة فرغت كل شحنة الغضب والضيق اللي جوايا في البكاء والدعاء وانا بين ايدين ربنا.. وبعد م حسيت بإني بدأت احس براحة وافكر بهدوء قررت اني اصلي صلاة استخارة وفضلت اردد: يارب.. يارب ماليش غيرك انجدني واهديني ودلني..يارب انا عمري ما يئست من رحمتك ابدا ومؤمنة ان انت القادر الذي لا يعجزه شئ يارب دل قلبي للصواب..يارب قلبي بين ايديك تقلبه كيفما شئت يارب نفسي احس بفرحة في قلبي..

صليت صلاة الاستخارة وسبحان الله رأيت من علامات التيسير ما رأيت اتعجبت فتوكلت على الله ووافقت واستودعت حلم الأمومة عند الله..

طوال شهر رمضان صلاة الاستخاره ملزماني والدعاء مش بينقطع من قلبي ولا لساني ومشوفتش في حياتي أمر سريع زي زواجي لدرجة اني بين عيد الفطر والأضحى كنت متزوجة سبحان الله..

اتجوزت وبعد 35 يوم تحديدا من عمر زواجي عرفت اني حامل !! يا الله !!!

سجد زوجي في الأرض.. يا م انت كريم ورزاق ورحيم يارب..

سجد زوجي في الأرض.. يا م انت كريم ورزاق ورحيم يارب..

استودعت حلم الأمومة عند من لا تضيع عنده الودائع..

كل اللي كان بيبصلي زمان نظرة شماته وألسنتهم نهشت فيا بقى لسان حالهم يردد دي حكايه ولا في الافلام..

معملتش أي حاجة غير اني بس لجأت للرحيم الرحمن الكريم الرزاق ف رضاني ومخيبش ظني.. والحمد لله بقى عندي زوج وابن والاتنين ربنا جعلهم ليا سند وضهر في الدنيا وعوضني وجبر قلبي بيهم..

حبيت اشارك معاكوا انا كمان حكايتي في شهر الخير الشهر الكريم واقولكوا اتمسكوا بالدعاء والاستخارة ومهما كانت شدة ابتلائكم وصعوبته ف مفيش مع الله مستحيل❤

🎀🎀🎀🎀🎀🎀🎀

🎀

قد صح عن الرسول صلى الله عليه وسلم أنه قال :" ماخاب من استخار " فالاستخارة لا تأتي إلا بخير.. انت بتستخير العليم القدير سبحانه..

آمنت بإن طالما ربنا مقدر للعبد شئ مهما كان رأي العلم والطب ف أمر الله فقط هو اللي نافذ..

افتحوا القرآن هتلاقوا فيه معجزات إلهية تطمن قلوبكوا منها معجزة سيدنا زكريا اللي ربنا رزقه بالولد رغم كبر سنه هو وزوجته ومش بس كدا دي كانت زوجته عاقر لا تلد..

استودعوا الله جميع أحلامكوا وأمانيكيوا وانتوا متطمنين ❤

ولينا لقاء في معجزة وقصة جبر جديدة ❤❤

#هدير_ابراهيم

#حكاوي_هدير