قصص واقعية (لهدير ابراهيم)

وان_تخلى_الجميع_الله_لا_يتخلى

صلوا علي رسول الله

#وان_تخلى_الجميع_الله_لا_يتخلى
لما تضيق ربنا موجود، لما تتقفل كل الأبواب ربنا موجود.. لما تيأس من كل البشر وتعجزك أسباب الأرض ربنا قادر يوجد علشانك سبب..

(ولنبلونكم بشيء من الخوف والجوع ونقص ‏من الأموال والأنفس والثمرات وبشر الصابرين)
الآية دي فيها ابتلائي اللي هكلمكم عنه دلوقتي، ابتلاني الله بمرض الخوف..
الخوف من غير أسباب واضحة، هو بس خوف.. إحساس مالي ضلوعي ومدمر كل إحساس حلو ممكن أحسه في أي موقف..
كنت حد طبيعي جدًا، بس قلبي ضعيف.. حد من أصحاب بابا غاوي غرائب زارنا البيت.. عرض فيلم عن إعصار تسونامي.. شوفت الجثث وسمعت الأصوات.. انهرت ومن وقتها وبقيت بخاف من أي صوت عادي وكرهت كل وسائل التكنولوجيا لأنها كانت سبب من الأسباب في عرض الرعب ده على قلبي أو في ظني إني لولاها ماكنش فيلم زي ده وصلي وبقيت بخاف..

أنا ماكنتش عارفة مالي، في البداية بطلت نوم.. وإحساس الرعب كان بيزيد بليل لما الكل ينام، ولما بقيت مش عارفة أسيطر على نفسي بقيت أبكي، أبكي زي الطفل الصغير اللي تايه من أهله في غابة..
بدأت اشتكي لأهلي..
- أنا خايفة..
- خايفة من إيه؟
- مش عارفة..
- هو في حد بيبقى مش عارف خايف من إيه؟
ولما بوصل للنقطة دي بستسلم، مهو فعلا اللي خايف من حاجة لازم يكون عارف سببها، بس أنا! أنا مش عارفة سبب واحد..
صعبت على بابا لما لقاني مابنامش، وفي ليلة لقيته الساعة ٢ بليل بيقولي:
- تعالي ننزل نتمشى شوية..
- دلوقتي؟!
- آه.. يمكن تتعبي وتنامي..
نزلت معاه بلف في شوارع فاضية إلا من الكلاب.. أغلب الناس حوالينا نايمة في بيوتها، فضل يكلمني عن إن المؤمن القوي مفيش حاجة تخوفه في الدنيا.. لأن مفيش حاجة أقوى منه بالله..
كنت بحس إن الكلام بيطمني.. بيطمني ونفسي الإحساس ده يفضل معايا، على طول..
بعد نص ساعة من اللف رجعت البيت.. بمجرد مادخلت لسريري رجع الرعب اللي في الدنيا لقلبي.. وبرضو ايه السبب أو ايه اللي خايفة منه مش عارفة..
كان عامل زي الكلب الشرس اللي بينهشني في الضلمة لا شيفاه ولا عارفة طالعلي منين..
أهلي في البداية استحملوا عياطي اللي ماكنش بيتوقف وشكوتي اللي مش مفهومة.. بس لكل حاجة نهاية، حتى أهلك هيجيلهم وقت ويزهقوا منك لأن ربنا الواحد الدايم الذي لا يتغير ويمكن دي من حكمة ربنا..
بدأوا يتخانقوا معايا، بقيت اسمع كلام زي زهقنا منك ومن قرفك، بقوا يناموا ويسيبوني أواجه رعبي المش مفهوم لوحدي، وانا بطلت اشتكي.. كنت بعيط وبس!
جسمي نزل وشكلي اتغير، وبقيت بدعي ربنا يعجل بموتي علشان اهلي يرتاحوا وانا أرتاح..
أسوأ من اللي كنت حساه، إحساسي بالتقل على أهلي!
حد قريبنا اقترح عليهم في البيت انه ياخدني عنده ولما أروح عندهم وأغير جو أكيد الموضوع هيختلف..

رحت.. وياريتني ما رحت، أصل كنت تقيلة على الأقرب فتخيل الأبعد ممكن يعمل إيه..
التعب زاد عليا، كان لو حد قالي ازيك بنفجر في العياط.. ومش ببين.. أهلي يتصلوا بيا أقول بخير علشان مش عاوزة ابقى تقل على حد تاني، ولما حسيت إن أنا تقل على دول كمان قررت إني أقتل نفسي..
طلبت منهم يروحوني، وهما زي اللي ماصدقوا.. ونويت إني هرمي نفسي من العربية.. بعد مسافة صغيرة العربية عطلت فقرروا يرجعوا، وكأن ربنا بيمنعني عن ذنب كبير هو عالم بحالي فيه.. وكأنه بيقفل كل الطرق عليا علشان أكلمه واقوله الكل اتخلى عني..

وقفت بين إيديه وبكيت بكل عجزي، شوية وكأني بتكلم بلهجة عتاب على عذابي اللي طال وارجع استغفر وأقوله سامحني، مش قلة صبر بس انا تعبت أوي يارب.. ماحدش طايقني ولا عاوزني ولا عارفة علاجي..
يارب ارفع عني.. ارفع عني انت عالم.. اكتر من سنة في عذاب، القريب والغريب زي بعض، ماليش غيرك..

وبطلت كلام، بقى كلامي محدود مع الناس.. لحد مابعدها بكم يوم جه زيارة للبيت واحد معرفة لقرايبنا دول، وكانوا بيقولوله يا شيخنا، ندهولي يعرفوني عليه.. علشان كانوا عارفين إني بحب اعرف الناس اللي زي كدا..

بص في وشي وابتسم، قالي قالولي إنك مش بخير، تقدري تقوليلي مالك؟
سكت شوية، بعدها لقيتني بحكيله..
رد وقتها وقالي:
- إنت عارفة علاجك إيه؟
قولتله بلهفة:
- إيه..
قالي:
- حاجة بسيطة أوي.. اقرأي سورة ق ٧ مرات بعد كل فرض تصليه، قرينك اللي بيعمل فيكِ كدا.. بيوسوسلك في نفسك بالرعب، وسورة ق هتأدبه.
الموضوع هيبقى تقيل شوية في الأول بس مع التكرار هتلاقيكي حفظتيها.. وكل ماتخافي ردديها..

أنا كنت زي الغرقانة اللي لقت قشة فمسكت فيها، ماقتنعتش بدماغي بس عملت اللي قاله وبقيت اقرأها بقلبي وكياني زي ماطلب.. والمفاجأة بعد ٥ أيام بس الخوف انسحب وبقيت بنام بليل!
ربنا لما أذن بالسبب بعته ليا، ولما سلمتله سيرلي الأسباب الأبعد مايكون عني.. بعتلي بعد أكتر من سنة سبب رفع ابتلاء الخوف عني لحد بيتي.. ابتلاء جه وقت رفعه فاتسيرت أسبابه لما لجأت لله..
إلجأوا لله في ابتلاءاتكوا، سلموله.. هيغنيكم مهما كان العجز حليفكم ويسيرلكم الأسباب، فاللهم لك الحمد حتى ترضى..

#حكاوى_هدير

صلوا علي الحبيب